ಏರ್‌ಇಂಡಿಯಾ ನೇಮಕಾತಿಗೆ ಇಂಡಿಗೋ ಸಿಬ್ಬಂದಿ ದಿಢೀರ್ ರಜೆ, 900ಕ್ಕೂ ಹೆಚ್ಚು ವಿಮಾನ ಹಾರಾಟ ವಿಳಂಬ!

ದೇಶಾದ್ಯಂತ ಇಂಡಿಗೋ ಹಾರಾಟದಲ್ಲಿ ವ್ಯತ್ಯಯ ಪ್ರಯಾಣಿಕರ ಪರದಾಟ, ಇಂಡಿಗೋಗೆ ಸಂಕಟ ಶೇ.50 ರಷ್ಟು ವಿಮಾನಕ್ಕೆ ಕ್ಯಾಬಿನ್ ಕ್ರೂ ಕೊರತೆ

ನವದೆಹಲಿ(ಜು.03): ದೇಶಾದ್ಯಂತ ಬರೋಬ್ಬರಿ 900ಕ್ಕೂ ಹೆಚ್ಚು ಇಂಡಿಗೋ ವಿಮಾನ ಹಾರಟ ವಿಳಂಬವಾಗಿದೆ. ಸಿಬ್ಬಂದಿಗಳ ಕೊರತೆಯಿಂದ ಇಂಡಿಗೋ ವಿಮಾನ ಹಾರಟದಲ್ಲಿ ವ್ಯತ್ಯಯವಾಗಿದೆ. ಈ ಪ್ರಕರಣದ ಕುರಿತು DGCA ತನಿಖೆಗೆ ಆದೇಶಿಸಿದೆ.

ಮೂಲಗಳ ಪ್ರಕಾರ ಏರ್ ಇಂಡಿಯಾ ವಿಮಾನ ಸಂಸ್ಥೆ ಸಿಬ್ಬಂದಿಗಳ ನೇಮಕಾತಿ ಪ್ರಕ್ರಿಯೆ ಆರಂಭಿಸಿದೆ. ಹೀಗಾಗಿ ಇಂಡಿಗೋ ವಿಮಾನ ಸಂಸ್ಥೆ ಸಿಬ್ಬಂದಿಗಳು ಆರೋಗ್ಯ ಸಮಸ್ಯೆ ಎಂದು ರಜೆ ಹಾಕಿದ್ದಾರೆ. ಶನಿವಾರ(ಜು.02) ರಂದು ಏಕಾಏಕಿ ಹಲವರು ಆರೋಗ್ಯ ಸಮಸ್ಯೆ ಕಾರಣ ನೀಡಿ ರಜೆ ಹಾಕಿದ್ದಾರೆ. ಹೀಗಾಗಿ ನಿಗದಿತ ಸಮಯದಲ್ಲಿ ಟೇಕ್ ಆಫ್ ಆಗಬೇಕಿದ್ದ ಇಂಡಿಗೋ ವಿಮಾನಗಳು ಸಿಬ್ಬಂದಿ ಕೊರತೆಯಿಂದ ಹಾರಾಟ ನಡೆಸಿಲ್ಲ.

ಶನಿವಾರ ಬರೋಬ್ಬರಿ 900ಕ್ಕೂ ಹೆಚ್ಚು ವಿಮಾನಗಳ ಹಾರಾಟ ವಿಳಂಬವಾಗಿದೆ. ಏರ್ ಇಂಡಿಯಾ ಎರಡನೇ ಹಂತದ ನೇಮಕಾತಿ ನಡೆಸಿದೆ. ಇದಕ್ಕಾಗಿ ಸಿಬ್ಬಂದಿಗಳು ರಜೆ ಹಾಕಿ ಹೋಗಿದ್ದಾರೆ ಅನ್ನೋ ಮಾಹಿತಿಗಳು ಬಹಿರಂಗವಾಗಿದೆ. 

ಡೈರೆಕ್ಟರ್ ಜನರಲ್ ಆಫ್ ಸಿವಿಲ್ ಏವಿಯೇಶನ್(DGCA) ಈ ಪ್ರಕರಣದ ಕುರಿತು ತನಿಖೆಗ ಆದೇಶಿಸಿದೆ. ಈ ಪ್ರಕರಣ ಗಂಭೀರವಾಗಿದೆ. ವಿಮಾನ ನಿಗಿದಿತ ಸಮಯಕ್ಕೆ ಹಾರಟ ನಡೆಸಬೇಕು.ಕೊಂಚ ವಿಳಂಬವಾದರೂ ಪ್ರಯಾಣಕರಿಗೆ ಅನಾನೂಕಲ ಮಾತ್ರವಲ್ಲ, ಅಪಾಯದ ಸಾಧ್ಯತೆ ಹೆಚ್ಚು. ಹೀಗಾಗಿ ಏಕಾಏಕಿ ಶೇಕಡಾ 50ಕ್ಕೂ ಹೆಚ್ಚು ವಿಮಾನಗಳ ಹಾರಾಟದಲ್ಲಿ ವ್ಯತ್ಯಯವಾಗಿರುವುದು ಇದೇ ಮೊದಲು. ಪ್ರಕರಣದ ತನಿಖೆಗೆ ಕೋರಲಾಗಿದೆ ಎಂದು DGCA ಮುಖ್ಯಸ್ಥ ಅರುಣ್ ಕುಮಾರ್ ಹೇಳಿದ್ದಾರೆ.

ಇಂಡಿಗೋ ಸಂಸ್ಥೆಗೆ ಒಂದರ ಮೇಲೊಂದರಂತೆ ಹೊಡೆತ ಬೀಳುತ್ತಿದೆ. ಇತ್ತೀಚೆಗೆ ವಿಕಲಚೇತನ ಬಾಲಕನ ವಿಚಾರದಲ್ಲಿ ಅಹಂ ಮರೆದಿದ್ದ ಇಂಡಿಗೋ ಸಂಸ್ಥೆಗೆ 5 ಲಕ್ಷ ರೂಪಾಯಿ ದಂಡ ವಿಧಿಸಲಾಗಿತ್ತು. 

ವಿಮಾನಕ್ಕೆ ವಿಕಲಚೇತನ ಮಗು ಹತ್ತಿಸದ ಇಂಡಿಗೋಗೆ 5 ಲಕ್ಷ ದಂಡ
ಅಂಗವಿಕಲ ಮಗುವನ್ನು ವಿಮಾನಕ್ಕೆ ಹತ್ತಿಸಲು ಹಿಂದೇಟು ಹಾಕಿದ ಇಂಡಿಗೋ ಏರ್‌ಲೈನ್ಸ್‌ಗೆ ವಿಮಾನಯಾನ ನಿಯಂತ್ರಣ ಪ್ರಾಧಿಕಾರ ‘ಡಿಜಿಸಿಎ’, 5 ಲಕ್ಷ ರು. ದಂಡ ವಿಧಿಸಿತ್ತು. ಮೇ 7 ರಂದು ರಾಂಚಿ ವಿಮಾನ ನಿಲ್ದಾಣದಲ್ಲಿ ಅಂಗವಿಕಲ ಮಗುವಿಗೆ ಇಂಡಿಗೋ ಏರ್‌ಲೈನ್ಸ್‌ ವಿಮಾನ ಏರಲು ಅವಕಾಶ ಕೊಡದೇ ಇರುವುದು ಭಾರೀ ಟೀಕೆಗೆ ಗುರಿಯಾಗಿತ್ತು. ‘ಬಾಲಕನು ಹೆದರಿದಂತೆ ಕಾಣುತ್ತಾನೆ’ ಎಂಬ ನೆಪದಲ್ಲಿ ವಿಮಾನ ಏರದಂತೆ ಸಿಬ್ಬಂದಿ ತಡೆದಿದ್ದರು. ಈ ಘಟನೆಯ ಬಗ್ಗೆ ತನಿಖೆ ನಡೆಸಲು ಡಿಜಿಸಿಎ, ಮೇ 9 ರಂದು ಸಮಿತಿಯನ್ನು ನೇಮಕ ಮಾಡಿದ್ದರು.

‘ಹೆದರಿದ್ದ ಅಂಗವಿಕಲ ಬಾಲಕನನ್ನು ಶಾಂತಗೊಳಿಸುವ ಬದಲು ಆತನಿಗೆ ವಿಮಾನ ಏರದಂತೆ ತಡೆದಿದ್ದು ಕರ್ತವ್ಯಲೋಪ’ ಎಂದು ಪರಿಗಣಿಸಿರುವ ಡಿಜಿಸಿಎ, ಇಂಡಿಗೋಗೆ 5 ಲಕ್ಷ ರು. ದಂಡ ವಿಧಿಸಿದೆ.

ಇಂಡಿಗೋ ಪೈಲಟ್‌ಗಳಿಂದ ತುರ್ತು ಸಂವಹನ ವ್ಯವಸ್ಥೆ ದುರ್ಬಳಕೆ
ವಿಮಾನದಲ್ಲಿ ಯಾವುದೇ ತೊಂದರೆ ಇರುವ ಸಂದರ್ಭದಲ್ಲಿ ತುರ್ತು ಸಂವಹನಕ್ಕೆಂದು ಇರುವ 121.4 ಮೆಗಾಹಟ್‌್ರ್ಜ ಫ್ರೀಕ್ವೆನ್ಸಿ (ತರಂಗಾಂತರ)ಯನ್ನು ಇಂಡಿಗೋದ 7 ಪೈಲಟ್‌ಗಳು ದುರ್ಬಳಕೆ ಮಾಡಿರುವ ವಿಷಯ ಬೆಳಕಿಗೆ ಬಂದಿದೆ.ಏ.9ರಂದು ಇಂಡಿಗೋದ 7 ಪೈಲಟ್‌ಗಳು ಈ ಫ್ರೀಕೆನ್ವಿ ಬಳಸಿಕೊಂಡು ಅದರಲ್ಲಿ ತಮ್ಮ ವೇತನ ಸಮಸ್ಯೆಗಳ ಕುರಿತು ಅವಹೇಳಕಾರಿ ಪದ ಬಳಸಿ ಸಂವಾದ ನಡೆಸಿದ್ದು ಪತ್ತೆಯಾಗಿದೆ. ಈ ಕುರಿತು ನಾಗರಿಕ ವಿಮಾನಯಾನ ಸಚಿವಾಲಯ ತನಿಖೆಗೆ ಆದೇಶಿಸಿದೆ. ಆದರೆ ಇಂಡಿಗೋ ಸಂಸ್ಥೆ ಈ ಕುರಿತು ಇದುವರೆಗೆ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ.