ವಿಶ್ವದ ದೊಡ್ಡಣ್ಣ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಹಾಗೂ ಯುಕೆ ಪ್ರಧಾನಿ ರಿಷಿ ಸುನಕ್‌ ಭೇಟಿ ಬೆನ್ನಲ್ಲೇ ಇಸ್ರೇಲ್ ಗಾಜಾದಲ್ಲಿ ಸೇನೆ ದಾಳಿಗೆ ಸಿದ್ಧವಾಗಿರುವಂತೆ ರಕ್ಷಣಾ ಸಚಿವ ಸೈನಿಕರಿಗೆ ಸೂಚಿಸಿದ್ದಾರೆ.
ಇಸ್ರೇಲ್ - ಹಮಾಸ್ ಯುದ್ಧ ಮುಂದುವರಿದಿದ್ದು, ವಾಯುದಾಳಿಗಳು ಮೂಂದುವರಿದಿದೆ. ಈ ನಡುವೆ ವಿಶ್ವದ ದೊಡ್ಡಣ್ಣ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಹಾಗೂ ಯುಕೆ ಪ್ರಧಾನಿ ರಿಷಿ ಸುನಕ್‌ ಭೇಟಿ ಬೆನ್ನಲ್ಲೇ ಇಸ್ರೇಲ್ ಮತ್ತೊಂದು ಹೆಜ್ಜೆ ಮುಂದಿಟ್ಟಿದೆ.
ಪ್ಯಾಲೆಸ್ತೀನ್‌ ಗಡಿಗೆ ನುಗ್ಗಲು ಸಿದ್ಧರಾಗುವಂತೆ ಇಸ್ರೇಲ್ ತನ್ನ ಭೂಸೇನೆಗೆ ಹೇಳಿದೆ. ಇಸ್ರೇಲ್ ರಕ್ಷಣಾ ಸಚಿವ ಯೋವ್ ಗ್ಯಾಲಂಟ್ ಅವರು ಗಾಜಾ ಪಟ್ಟಿಯ ಗಡಿಯಲ್ಲಿರುವ ಸೈನಿಕರಿಗೆ ಈ ಸೂಚನೆ ನೀಡಿದ್ದಾರೆ ಎಂದು ತಿಳಿದುಬಂದಿದೆ.
ಅಕ್ಟೋಬರ್ 7 ರಂದು ಹಮಾಸ್ ಉಗ್ರಗಾಮಿಗಳು ನಡೆಸಿದ ಮಾರಣಾಂತಿಕ ಹಠಾತ್ ದಾಳಿಯ ಹಿನ್ನೆಲೆಯಲ್ಲಿ ಇಸ್ರೇಲ್ ಪಡೆಯನ್ನು ಸಂಗ್ರಹಿಸುತ್ತಿರುವ ಗಾಜಾ ಬಳಿಯ ಇಸ್ರೇಲ್‌ನ ದಕ್ಷಿಣ ಕಮಾಂಡ್‌ಗೆ ಯೋವ್ ಗ್ಯಾಲಂಟ್ ಭೇಟಿ ನೀಡಿದರು ಎಂದು ಕ್ಸಿನ್ಹುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಭೂಸೇನೆಯ ಕಾರ್ಯಾಚರಣೆಯನ್ನು ಪ್ರಾರಂಭಿಸಲು ಆದೇಶಕ್ಕಾಗಿ "ಸಂಘಟಿತರಾಗಿ, ಸಿದ್ಧರಾಗಿರಿ" ಎಂದು ಪಡೆಗಳಿಗೆ ಇಸ್ರೇಲ್ ರಕ್ಷಣಾ ಸಚಿವ ಯೋವ್ ಗ್ಯಾಲಂಟ್ ಹೇಳಿದ್ದಾರೆ.
"ಗಾಜಾವನ್ನು ಈಗ ದೂರದಿಂದ ನೋಡುವವರು ಅದನ್ನು ಒಳಗಿನಿಂದ ನೋಡುತ್ತಾರೆ ಎಂದು ನಾನು ನಿಮಗೆ ಭರವಸೆ ನೀಡುತ್ತೇನೆ" ಎಂದೂ ಅವರು ಹೇಳಿದರು.
"ಹೋರಾಟದ ಮುಂದುವರಿಕೆಗೆ ಸಿದ್ಧತೆಯನ್ನು ಪೂರ್ಣಗೊಳಿಸುವ ಭಾಗವಾಗಿ, ಕಾರ್ಯಾಚರಣೆಯ ಯೋಜನೆಗಳ ಅನುಮೋದನೆ ಮತ್ತು ಕ್ಷೇತ್ರದಲ್ಲಿ ಪಡೆಗಳ ನಿಯೋಜನೆಯು ಪ್ರಸ್ತುತ ನಡೆಯುತ್ತಿದೆ" ಎಂದು ಮಿಲಿಟರಿ ಹೇಳಿಕೆ ನೀಡಿದೆ.
ಸದರ್ನ್ ಕಮಾಂಡ್‌ನ ಕಮಾಂಡಿಂಗ್ ಆಫೀಸರ್ ಯಾರೋನ್ ಫಿಂಕೆಲ್ಮನ್‌ ಅವರು ಪ್ರಸ್ತುತ ದಕ್ಷಿಣ ಪ್ರದೇಶದಲ್ಲಿ ನೆಲೆಸಿರುವ ಹಲವಾರು ಘಟಕಗಳಿಗೆ ಭೇಟಿ ನೀಡಿದರು ಮತ್ತು ಹೇಳಿಕೆಯ ಪ್ರಕಾರ ದಾಳಿಯ ಯೋಜನೆಗಳನ್ನು ಅನುಮೋದಿಸಿದರು.
"ಈಗ, ನಮ್ಮ ಕುಶಲತೆಯು ಯುದ್ಧವನ್ನು ಅವರ ಪ್ರದೇಶಕ್ಕೆ ತೆಗೆದುಕೊಂಡು ಹೋಗುತ್ತದೆ. ಇದು ದೀರ್ಘವಾಗಿರುತ್ತದೆ, ಅದು ತೀವ್ರವಾಗಿರುತ್ತದೆ” ಎಂದು ಯಾರೋನ್ ಫಿಂಕೆಲ್ಮನ್‌ ಗಡಿಯುದ್ದಕ್ಕೂ ಸೈನಿಕರು ಮತ್ತು ಕಮಾಂಡರ್‌ಗಳಿಗೆ ಹೇಳಿದರು.
ಇತ್ತೀಚೆಗೆ ಅಮೆರಿಕ ಅಧ್ಯಕ್ಷ ಹಾಗೂ ಯುಕೆ ಪ್ರಧಾನಿ ರಿಷಿ ಸುನಕ್‌ ಇಸ್ರೇಲ್‌ಗೆ ಭೇಟಿ ನೀಡಿದ್ದರು. ಗಾಜಾ ಆಸ್ಪತ್ರೆ ಮೇಲೆ ದಾಳಿ ಮಾಡಿದ್ದು, ಇಸ್ರೇಲ್ ಎಂದು ಪ್ಯಾಲೆಸ್ತೀನ್‌ ಆರೋಪಿಸಿದರೆ, ಹಮಾಸ್ ರಾಕೆಟ್‌ ಮಿಸ್‌ಫೈರ್‌ ಆಗಿದೆ ಎಂದು ಇಸ್ರೇಲ್ ವಿಡಿಯೋ ಬಿಡುಗಡೆ ಮಾಡಿತ್ತು.
ಇನ್ನೊಂದೆಡೆ, 57 ಮುಸ್ಲಿಂ ದೇಶಗಳೆಲ್ಲ ಪ್ಯಾಲೆಸ್ತೀನ್‌ ಪರವಾಗಿ ನಿಂತಿದ್ದು, ಇಸ್ರೇಲ್ ಕೂಡಲೇ ದಾಳಿ ನಿಲ್ಲಿಸುವಂತೆ ಎಚ್ಚರಿಸಿವೆ.