ದೇಣಿಗೆ ಸ್ವೀಕಾರದಲ್ಲಿ ನಂಬರ್ ಒನ್ ಸ್ಥಾನ ಪಡೆದ BJP; 2023-24ರಲ್ಲಿ ಬಂದ ಹಣವೆಷ್ಟು? ಕಾಂಗ್ರೆಸ್‌ಗಿಂತ 6ಪಟ್ಟು ಹೆಚ್ಚು

BJP And Congress: 2023-24ರಲ್ಲಿ ಬಿಜೆಪಿ ಅತಿ ಹೆಚ್ಚು ದೇಣಿಗೆ ಪಡೆದು ಅಗ್ರಸ್ಥಾನದಲ್ಲಿದೆ. ಕಾಂಗ್ರೆಸ್ 281.48 ಕೋಟಿ ರೂ. ದೇಣಿಗೆ ಸಂಗ್ರಹಿಸಿದೆ, ಇದು ಬಿಜೆಪಿಗಿಂತ 6 ಪಟ್ಟು ಕಡಿಮೆಯಾಗಿದೆ.

ನವದೆಹಲಿ: 2023-24ನೇ ವಿತ್ತ ವರ್ಷದಲ್ಲಿ ರಾಷ್ಟ್ರೀಯ ಪಕ್ಷಗಳು ಒಟ್ಟು 2,544.278 ಕೋಟಿ ರು. ದೇಣಿಗೆ ಸಂಗ್ರಹಿಸಿವೆ. ಇದರಲ್ಲಿ ಬಿಜೆಪಿ ಒಂದೇ 2243 ಕೋಟಿ ರು. ದೇಣಿಗೆ ಸ್ವೀಕರಿಸಿ ನಂ.1 ಪಕ್ಷವಾಗಿ ಹೊರಹೊಮ್ಮಿದೆ ಎಂದು ಅಸೋಸಿಯೇಷನ್ ​​ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ಎಡಿಆರ್) ವರದಿ ತಿಳಿಸಿದೆ.

ಬಿಜೆಪಿ 8,358 ದೇಣಿಗೆಗಳಿಂದ ಒಟ್ಟು 2,243.947 ಕೋಟಿ ರು. ಘೋಷಿಸಿದರೆ, ಕಾಂಗ್ರೆಸ್ 1994 ದೇಣಿಗೆಗಳಿಂದ 281.48 ಕೋಟಿ ರು. ಘೋಷಿಸಿದೆ. ಬಿಜೆಪಿ ಘೋಷಿಸಿದ ದೇಣಿಗೆ ಕಾಂಗ್ರೆಸ್, ಆಮ್ ಆದ್ಮಿ ಪಕ್ಷ , ನ್ಯಾಷನಲ್ ಪೀಪಲ್ಸ್ ಪಾರ್ಟಿ (ಎನ್‌ಪಿಇಪಿ) ಮತ್ತು ಸಿಪಿಎಂ ಇದೇ ಅವಧಿಯಲ್ಲಿ ಘೋಷಿಸಿದ ಒಟ್ಟು ದೇಣಿಗೆಗಳಿಗಿಂತ 6 ಪಟ್ಟು ಹೆಚ್ಚು.

ಕಳೆದ ವರ್ಷಕ್ಕಿಂತ ಅಧಿಕ

2022-23ರಲ್ಲಿ ಬಿಜೆಪಿಗೆ 719.858 ಕೋಟಿ ರು. ದೇಣಿಗೆ ಬಂದಿತ್ತು. ಈ ವರ್ಷ ಇದು ಶೇ.211.72ರಷ್ಟು ಹೆಚ್ಚಳವಾಗಿದೆ. ಅದೇ ರೀತಿ, ಕಾಂಗ್ರೆಸ್‌ಗೆ 79.924 ಕೋಟಿ ರು. ಬಂದಿತ್ತು. ಈ ವರ್ಷ ಶೇ.252.18ರಷ್ಟು ಹೆಚ್ಚಳವಾಗಿದೆ.

ಈ ವರ್ಷ ರಾಷ್ಟ್ರೀಯ ಪಕ್ಷಗಳು ಪಡೆದ ಒಟ್ಟು ದೇಣಿಗೆ ಕಳೆದ ವರ್ಷಕ್ಕಿಂತ 1,693.84 ಕೋಟಿ ರು.ಗಳಷ್ಟು ಹೆಚ್ಚಾಗಿದ್ದು, ಶೇ.199.17ರಷ್ಟು ಏರಿಕೆ ದಾಖಲಿಸಿದೆ. ಈ ಮೂಲಕ ದೇಣಿಗೆ ಸ್ವೀಕಾರದಲ್ಲಿ ಬಿಜೆಪಿ ನಂಬರ್ ಒನ್ ಸ್ಥಾನವನ್ನು ಪಡೆದುಕೊಂಡಿದೆ.