ನಿನ್ನೆಯ ಆಯುಧ ಇಟ್ಕೊಂಡು, ಇಂದಿನ ಯುದ್ಧ ಗೆಲ್ಲೋಕೆ ಆಗಲ್ಲ ಎಂದ ಸಿಡಿಎಸ್‌ ಅನಿಲ್‌ ಚೌಹಾಣ್‌!

CDS Gen Anil Chauhan emphasized modernizing armed forces ಮೇ 10 ರಂದು ಆಪರೇಷನ್ ಸಿಂಧೂರ್ ಸಮಯದಲ್ಲಿ ನಡೆದ ಕಾರ್ಯಾಚರಣೆಯ ಬಗ್ಗೆ ಸಿಡಿಎಸ್ ಜನರಲ್ ಅನಿಲ್ ಚೌಹಾಣ್ ಮಾತನಾಡಿದ್ದು, ಪಾಕಿಸ್ತಾನದ ಹೆಚ್ಚಿನ ಡ್ರೋನ್‌ಗಳನ್ನು ಭಾರತೀಯ ಪಡೆಗಳು ತಟಸ್ಥಗೊಳಿಸಿವೆ ಎಂದು ಹೇಳಿದರು. 

ಸಶಸ್ತ್ರ ಪಡೆಗಳಲ್ಲಿನ ಶಸ್ತ್ರಾಸ್ತ್ರ ವ್ಯವಸ್ಥೆಗಳನ್ನು ಆಧುನೀಕರಿಸುವ ಅಗತ್ಯವನ್ನು ಬುಧವಾರ ಒತ್ತಿ ಹೇಳಿದ ರಕ್ಷಣಾ ಪಡೆಗಳ ಮುಖ್ಯಸ್ಥ (Chief of Defence Staff) ಜನರಲ್ ಅನಿಲ್ ಚೌಹಾಣ್ (General Anil Chauhan), ಇಂದಿನ ಯುದ್ಧವನ್ನು "ನಾಳಿನ ತಂತ್ರಜ್ಞಾನ"ದೊಂದಿಗೆ ಹೋರಾಡಬೇಕಾಗಿದೆ ಎಂದು ಹೇಳಿದರು.

ಆಪರೇಷನ್ ಸಿಂಧೂರ್ ಸಮಯದಲ್ಲಿ ಸ್ಥಳೀಯ ಶಸ್ತ್ರಾಸ್ತ್ರಗಳ ಬಳಕೆಯನ್ನು ಅವರು ಶ್ಲಾಘಿಸಿದರು ಮತ್ತು ದೇಶದಲ್ಲಿ ಹೂಡಿಕೆ ಮಾಡುವ ಮತ್ತು ನಿರ್ಮಿಸುವ ಅಗತ್ಯವನ್ನು ಒತ್ತಿ ಹೇಳಿದರು.

"ನಿನ್ನೆಯ ಶಸ್ತ್ರಾಸ್ತ್ರ ವ್ಯವಸ್ಥೆಗಳಿಂದ ಇಂದಿನ ಯುದ್ಧವನ್ನು ಗೆಲ್ಲಲು ಸಾಧ್ಯವಿಲ್ಲ; ಇಂದಿನ ಯುದ್ಧವನ್ನು ನಾಳಿನ ತಂತ್ರಜ್ಞಾನದೊಂದಿಗೆ ಹೋರಾಡಬೇಕು" ಎಂದು ಸಿಡಿಎಸ್ ಚೌಹಾಣ್ ರಾಷ್ಟ್ರ ರಾಜಧಾನಿಯಲ್ಲಿ ಯುಎವಿ ಮತ್ತು ಕೌಂಟರ್-ಮ್ಯಾನ್ಡ್ ಏರಿಯಲ್ ಸಿಸ್ಟಮ್ಸ್ (ಸಿ-ಯುಎಎಸ್) ದೇಶೀಕರಣದ ಕಾರ್ಯಾಗಾರವನ್ನುದ್ದೇಶಿಸಿ ಮಾತನಾಡುತ್ತಾ ಹೇಳಿದರು.

ಭಾರತವು ವಿದೇಶಗಳಿಂದ ಬರುವ ತಂತ್ರಜ್ಞಾನದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಬೇಕು ಎಂದು ಅವರು ಹೇಳಿದರು. "ಆಮದು ಮಾಡಿಕೊಂಡ ತಂತ್ರಜ್ಞಾನಗಳ ಮೇಲಿನ ಅವಲಂಬನೆಯು ನಮ್ಮ ಸನ್ನದ್ಧತೆಯನ್ನು ದುರ್ಬಲಗೊಳಿಸುತ್ತದೆ" ಎಂದು ಅವರು ಹೇಳಿದರು.

ಆಪರೇಷನ್ ಸಿಂಧೂರ್ ಕಾರ್ಯಾಚರಣೆಯನ್ನು ನೆನಪಿಸಿಕೊಂಡ ಅವರು, ಮೇ 10 ರಂದು ಮಿಲಿಟರಿ ಸಂಘರ್ಷ ಉತ್ತುಂಗದಲ್ಲಿದ್ದಾಗ ಪಾಕಿಸ್ತಾನವು ನಿರಾಯುಧ ಡ್ರೋನ್‌ಗಳು ಮತ್ತು ಲೋಯ್ಟರಿಂಗ್‌ ಯುದ್ಧಸಾಮಗ್ರಿಗಳನ್ನು ಬಳಸಿತ್ತು ಮತ್ತು ಅವುಗಳಲ್ಲಿ ಯಾವುದೂ ಭಾರತದ ಮೂಲಸೌಕರ್ಯಕ್ಕೆ ಯಾವುದೇ ಹಾನಿಯನ್ನುಂಟುಮಾಡುವಲ್ಲಿ ಯಶಸ್ವಿಯಾಗಲಿಲ್ಲ ಎಂದರು.

"ಮೇ 10 ರಂದು ನಡೆದ ಆಪರೇಷನ್ ಸಿಂಧೂರ್ ಸಮಯದಲ್ಲಿ, ಪಾಕಿಸ್ತಾನವು ನಿರಾಯುಧ ಡ್ರೋನ್‌ಗಳು ಮತ್ತು ಲೋಯ್ಟರಿಂಗ್‌ ಮ್ಯುನೇಷನ್ಸ್‌ ಬಳಸಿತು. ಅವುಗಳಲ್ಲಿ ಯಾವುದೂ ಭಾರತೀಯ ಮಿಲಿಟರಿ ಅಥವಾ ನಾಗರಿಕ ಮೂಲಸೌಕರ್ಯಕ್ಕೆ ಹಾನಿಯನ್ನುಂಟುಮಾಡಲಿಲ್ಲ. ಹೆಚ್ಚಿನದನ್ನು ಕೈನೆಟಿಕ್‌ ಮತ್ತು ನಾನ್‌ ಕೈನೆಟಿಕ್‌ ವಿಧಾನಗಳ ಮೂಲಕ ತಟಸ್ಥಗೊಳಿಸಲಾಯಿತು, ಮತ್ತು ಕೆಲವನ್ನು ಬಹುತೇಕ ಅಖಂಡ ಸ್ಥಿತಿಯಲ್ಲಿ ಪಡೆದುಕೊಂಡಿದ್ದೇವೆ" ಎಂದು ಜನರಲ್ ಚೌಹಾಣ್ ಹೇಳಿದರು.

"ನಮ್ಮ ಭೂಪ್ರದೇಶಕ್ಕಾಗಿ ನಿರ್ಮಿಸಲಾದ ಸ್ಥಳೀಯವಾಗಿ ಅಭಿವೃದ್ಧಿಪಡಿಸಲಾದ ಪ್ರತಿ-ಯುಎಎಸ್ ವ್ಯವಸ್ಥೆಗಳು ಏಕೆ ನಿರ್ಣಾಯಕವಾಗಿವೆ ಎಂಬುದನ್ನು ಆಪರೇಷನ್ ಸಿಂಧೂರ್ ನಮಗೆ ತೋರಿಸಿದೆ. ನಮ್ಮನ್ನು ನಾವು ರಕ್ಷಿಸಿಕೊಳ್ಳಲು ಹೂಡಿಕೆ ಮಾಡಬೇಕು ಮತ್ತು ನಿರ್ಮಿಸಬೇಕು" ಎಂದು ಅವರು ಹೇಳಿದರು.

ಆಧುನಿಕ ಯುದ್ಧದಲ್ಲಿ ಡ್ರೋನ್‌ಗಳ ಹೆಚ್ಚುತ್ತಿರುವ ಪಾತ್ರವನ್ನು ಸಿಡಿಎಸ್ ಎತ್ತಿ ತೋರಿಸಿದರು. ಡ್ರೋನ್‌ಗಳು ಆರ್ಮಿಯಲ್ಲಿ ಏಕಿರಬೇಕು ಅನ್ನೋದನ್ನ ನಮಗೆ ಈ ಕಾರ್ಯಾಚರಣೆ ತೋರಿಸಿದೆ. ಇದು ಸೇನೆಯಲ್ಲಿ ದೊಡ್ಡ ಮಟ್ಟದ ಬದಲಾವಣೆಯನ್ನು ತಂದಿದೆ. ಡ್ರೋನ್‌ಗಳನ್ನು ಸೇನೆಗೆ ಸೇರಿಸಿರುವುದೇ ಅತ್ಯಂತ ಕ್ರಾಂತಿಕಾರಿ ನಿರ್ಧಾರ. ನಾವು ನಡೆಸಿದ ಹಲವು ಯುದ್ಧಗಳಲ್ಲಿ ನೀವು ಇದನ್ನು ನೋಡಿದ್ದೀರಿ ಎಂದಿದ್ದಾರೆ.