ಫೋಟೋಗಳು ಮಸುಕಾಗಿ ಬರುತ್ತಿದ್ದರೆ ಹೀಗೆ ಮಾಡಿ: ಫೋನ್ ಕ್ಯಾಮರಾ ಕ್ಲೀನಿಂಗ್ ಟಿಪ್ಸ್

ಫೋಟೋ ಚೆಂದ ಕಾಣಿಸಬೇಕು ಎಂಬ ಕಾರಣಕ್ಕೆ ಅನೇಕರು ದುಬಾರಿ ಮೊಬೈಲ್ ಫೋನ್‌ಗಳನ್ನು ಖರೀದಿಸುತ್ತಾರೆ. ಆದರೂ ಕೆಲವೊಮ್ಮೆ ಸ್ಮಾರ್ಟ್‌ಫೋನ್‌ನಲ್ಲಿ ಫೋಟೋ ಚೆನ್ನಾಗಿ ಬರಲ್ಲ,  ಇದಕ್ಕೆ ಹಲವು ಕಾರಣಗಳಿರಬಹುದು. ಕ್ಯಾಮರಾ ಲೆನ್ಸ್ ಮೇಲೆ ಧೂಳು ಸಂಗ್ರಹವಾಗಿರುವುದು ಕೂಡ ಇದಕ್ಕೆ ಕಾರಣ, ಹೀಗಾಗಿ ಇಲ್ಲಿ ನಿಮ್ಮ ಕ್ಯಾಮರಾ ಲೆನ್ಸ್ ಸ್ವಚ್ಛಗೊಳಿಸುವುದಕ್ಕೆ ಕೆಲ ಸಲಹೆಗಳನ್ನು ನೀಡಲಾಗಿದೆ. 

ಇತ್ತೀಚಿನ ದಿನಗಳಲ್ಲಿ ಪ್ರತಿಯೊಬ್ಬರ ಬಳಿಯೂ ಸ್ಮಾರ್ಟ್‌ಫೋನ್ ಇದೆ. ಬೆಳಗ್ಗೆಯಿಂದ ರಾತ್ರಿಯವರೆಗೆ ಎಲ್ಲರೂ ಸ್ಮಾರ್ಟ್‌ಫೋನ್‌ನೊಂದಿಗೆ ಸಮಯ ಕಳೆಯುತ್ತಾರೆ. ಉದ್ಯೋಗಿಗಳಿಗೆ ಸ್ಮಾರ್ಟ್‌ಫೋನ್ ಅತ್ಯಗತ್ಯ ವಸ್ತುವಾಗಿದೆ. ಹಲವರು ತಮ್ಮ ದೈನಂದಿನ ಕೆಲಸಗಳಿಗೆ ಸ್ಮಾರ್ಟ್‌ಫೋನ್ ಅನ್ನು ಬಳಸುತ್ತಾರೆ. ಕೆಲವು ಉದ್ಯೋಗಿಗಳು ಆಗಾಗ್ಗೆ ವಿವಿಧ ರೀತಿಯ ಫೋಟೋಗಳನ್ನು ತೆಗೆದು ಅಪ್‌ಲೋಡ್ ಮಾಡಬೇಕಾಗುತ್ತದೆ. ಹಲವು ಸಭೆಗಳನ್ನು ಫೋನ್‌ನಲ್ಲಿಯೇ ವಿಡಿಯೋ ಕರೆಗಳ ಮೂಲಕ ನಡೆಸಲಾಗುತ್ತದೆ. ಹೀಗೆ ಪ್ರತಿ ಕೆಲಸಕ್ಕೂ ಸ್ಮಾರ್ಟ್‌ಫೋನ್ ಬೇಕಾಗಿರುವ ಕಾಲಘಟ್ಟದಲ್ಲಿ ನಾವಿರುವಾಗ ಅದರ ಕ್ಯಾಮೆರಾ ಕಾರ್ಯಕ್ಷಮತೆ ಬಹಳ ಮುಖ್ಯವಾಗಿದೆ. ಆದರೆ ಹಲವರು ಸ್ಮಾರ್ಟ್‌ಫೋನ್ ಖರೀದಿಸಿದ ನಂತರ ಅದನ್ನು ಸರಿಯಾಗಿ ನಿರ್ವಹಿಸುವುದಿಲ್ಲ. ವಿಶೇಷವಾಗಿ ಕ್ಯಾಮೆರಾ ವಿಷಯದಲ್ಲಿ ಗಮನ ಹರಿಸುವುದಿಲ್ಲ. ಅದಕ್ಕಾಗಿಯೇ ಕ್ಯಾಮೆರಾದಲ್ಲಿ ಫೋಟೋಗಳು ಮಸುಕಾಗಿ ಬರುತ್ತವೆ.

ಪ್ರಸ್ತುತ ಮೊಬೈಲ್ ಕಂಪನಿಗಳು ಹೆಚ್ಚಿನ ಸ್ಪಷ್ಟತೆಯ ಕ್ಯಾಮೆರಾಗಳಿಗೆ ಆದ್ಯತೆ ನೀಡುತ್ತಿವೆ. 200 ಮೆಗಾಪಿಕ್ಸೆಲ್ ಕ್ಯಾಮೆರಾಗಳನ್ನು ಹೊಂದಿರುವ ಸ್ಮಾರ್ಟ್‌ಫೋನ್‌ಗಳು ಮಾರುಕಟ್ಟೆಯಲ್ಲಿ ಲಭ್ಯವಿವೆ. ಆದರೆ ಎಷ್ಟೇ ಮೆಗಾಪಿಕ್ಸೆಲ್ ಕ್ಯಾಮೆರಾ ಇದ್ದರೂ, ಹಲವು ಬಾರಿ ಫೋಟೋಗಳು ಮಸುಕಾಗಿ ಬರುತ್ತವೆ. ಇದರಿಂದಾಗಿ ಬಳಕೆದಾರರು ಹೊಸ ಸ್ಮಾರ್ಟ್‌ಫೋನ್‌ಗಳನ್ನು ಖರೀದಿಸುತ್ತಾರೆ. ಆದರೆ ಕ್ಯಾಮೆರಾ ಕಾರಣದಿಂದ ಫೋಟೋ ಚೆನ್ನಾಗಿ ಬರುತ್ತಿಲ್ಲ ಎಂಬ ಕಾರಣದಿಂದ ಮೊಬೈಲ್ ಫೋನನ್ನು ಬದಲಾಯಿಸುವ ಅಗತ್ಯವಿಲ್ಲ. ನಿಮ್ಮ ಫೋನ್ ಕ್ಯಾಮೆರಾವನ್ನು ಸುಧಾರಿಸಲು ಕೆಲವು ಸಲಹೆಗಳು ಇಲ್ಲಿವೆ. ನೀವು ಆಂಡ್ರಾಯ್ಡ್ ಫೋನ್ ಬಳಸುತ್ತಿದ್ದರೆ, ನಿಮ್ಮ ಫೋನ್‌ನಿಂದ ಅದ್ಭುತವಾದ ಫೋಟೋಗಳನ್ನು ಕ್ಲಿಕ್ ಮಾಡಬಹುದು. ಇದಕ್ಕಾಗಿ ಈ ಸಲಹೆಗಳನ್ನು ಪಾಲಿಸಬೇಕು.

1. ಮೈಕ್ರೋಫೈಬರ್ ಬಟ್ಟೆ ಬಳಸಿ

ಲೆನ್ಸ್ ಅನ್ನು ಸ್ವಚ್ಛಗೊಳಿಸಲು ಕನ್ನಡಕಗಳಿಗೆ ಬಳಸುವ ಮೈಕ್ರೋಫೈಬರ್ ಬಟ್ಟೆಯನ್ನು ಬಳಸಿ. ಇದು ಸೂಕ್ಷ್ಮವಾದ ಲೆನ್ಸ್ ಅನ್ನು ಗೀರುಗಳಿಲ್ಲದೆ ಸ್ವಚ್ಛಗೊಳಿಸುತ್ತದೆ.

2. ಕ್ಯಾಮೆರಾ ಕ್ಲೀನಿಂಗ್ ಕಿಟ್

ಮಾರುಕಟ್ಟೆಯಲ್ಲಿ ಕ್ಯಾಮೆರಾ ಲೆನ್ಸ್‌ಗಳನ್ನು ಸ್ವಚ್ಛಗೊಳಿಸಲು ವಿಶೇಷ ಕಿಟ್‌ಗಳು ಲಭ್ಯವಿವೆ. ಇವುಗಳನ್ನು ಬಳಸಿ ಲೆನ್ಸ್ ಅನ್ನು ಹೆಚ್ಚು ಪರಿಣಾಮಕಾರಿಯಾಗಿ ಸ್ವಚ್ಛಗೊಳಿಸಬಹುದು.

3. ಸ್ಯಾನಿಟೈಸರ್ ಅಥವಾ ಸ್ಪಿರಿಟ್ ಬಳಸಿ

ಸ್ವಚ್ಛವಾದ ಹತ್ತಿಯ ಮೇಲೆ ಸ್ಪಿರಿಟ್ ಅಥವಾ ಸ್ಯಾನಿಟೈಸರ್ ಹಾಕಿ ಲೆನ್ಸ್ ಅನ್ನು ಸ್ವಚ್ಛಗೊಳಿಸಿ. ಇದು ಎಣ್ಣೆ, ಬೆರಳಚ್ಚುಗಳನ್ನು ತೆಗೆದುಹಾಕುತ್ತದೆ. ಆದರೆ ಹೆಚ್ಚಿನ ಪ್ರಮಾಣದಲ್ಲಿ ಹಚ್ಚಬೇಡಿ.

4. ಬ್ಲೋವರ್ ಬಳಸಿ

ಸಣ್ಣ ಬ್ಲೋವರ್ ಅಥವಾ ಕ್ಯಾಮೆರಾ ಬ್ಲೋವರ್ ಮೂಲಕ ಲೆನ್ಸ್ ಮೇಲಿನ ಧೂಳನ್ನು ಸ್ವಚ್ಛಗೊಳಿಸಿ.

5. ಲೆನ್ಸ್ ಅನ್ನು ಮುಟ್ಟಬಾರದು

ಲೆನ್ಸ್ ಅನ್ನು ಬೆರಳಿನಿಂದ ಮುಟ್ಟುವ ಅಭ್ಯಾಸವಿದ್ದರೆ ಬಿಟ್ಟುಬಿಡಿ. ಹಲವರು ಲೆನ್ಸ್ ಸ್ವಚ್ಛಗೊಳಿಸಲು ಬೆರಳನ್ನು ಬಳಸುತ್ತಾರೆ. ಆದರೆ ಅವರ ಬೆರಳಚ್ಚುಗಳು ಲೆನ್ಸ್ ಮೇಲೆ ಉಳಿಯುತ್ತವೆ. ಅವು ಫೋಟೋಗಳ ಮೇಲೆ ಪರಿಣಾಮ ಬೀರುತ್ತವೆ.

6. ಕವರ್, ಪ್ರೊಟೆಕ್ಟರ್ ಬಳಸಿ

ಕ್ಯಾಮೆರಾ ಲೆನ್ಸ್‌ಗೆಂದೇ ಇರುವ ಪ್ರೊಟೆಕ್ಟರ್ ಬಳಸಿ. ಇದು ಲೆನ್ಸ್ ಅನ್ನು ಧೂಳಿನಿಂದ ರಕ್ಷಿಸುತ್ತದೆ. ಆಕಸ್ಮಿಕವಾಗಿ ಫೋನ್ ಕೆಳಗೆ ಬಿದ್ದರೂ ಕ್ಯಾಮೆರಾ ಮತ್ತು ಲೆನ್ಸ್‌ಗೆ ಏನೂ ಆಗದಂತೆ ರಕ್ಷಿಸುತ್ತದೆ.

7. ಒಣ ಸ್ಥಳದಲ್ಲಿಡಿ

ಮೊಬೈಲ್ ಫೋನ್ ಅನ್ನು ಹೆಚ್ಚು ತೇವಾಂಶವಿರುವ ಸ್ಥಳಗಳಲ್ಲಿ ಇಡಬೇಡಿ. ತೇವಾಂಶದಿಂದ ಲೆನ್ಸ್ ಮೇಲೆ ಹೊಗೆಯಂತಹ ಪದರ ಉಂಟಾಗಿ ಅಲ್ಲೇ ಉಳಿಯುತ್ತದೆ. ಇದು ತಿಳಿಯದೆಯೇ ಫೋಟೋಗಳ ಮೇಲೆ ಪರಿಣಾಮ ಬೀರುತ್ತದೆ.