ಒಂದೇ ಶತಕದಲ್ಲಿ ದ್ರಾವಿಡ್, ಗವಾಸ್ಕರ್ ಅಪರೂಪದ ದಾಖಲೆ ಮುರಿದ ಕೆ ಎಲ್ ರಾಹುಲ್!

ಭಾರತ-ಇಂಗ್ಲೆಂಡ್ ನಡುವಿನ ಮೊದಲ ಟೆಸ್ಟ್ ಪಂದ್ಯದ ನಾಲ್ಕನೇ ದಿನ ಕೆ.ಎಲ್ ರಾಹುಲ್ ತಮ್ಮ 9ನೇ ಟೆಸ್ಟ್ ಶತಕ ಬಾರಿಸಿದರು. ಈ ಮೂಲಕ ದಿಗ್ಗಜ ಆಟಗಾರರಾದ ಸುನಿಲ್ ಗವಾಸ್ಕರ್ ಮತ್ತು ರಾಹುಲ್ ದ್ರಾವಿಡ್ ಅವರ ಹೆಸರಿನಲ್ಲಿದ್ದ ಅಪರೂಪದ ದಾಖಲೆಗಳನ್ನು ಮುರಿದರು.

ಇಂಗ್ಲೆಂಡ್‌ನಲ್ಲಿ 3ನೇ ಶತಕ ಸಿಡಿಸಿದ ರಾಹುಲ್

ಭಾರತದ ಆರಂಭಿಕ ಆಟಗಾರ ಕೆ.ಎಲ್ ರಾಹುಲ್ ಟೆಸ್ಟ್ ಕ್ರಿಕೆಟ್‌ನಲ್ಲಿ ಮತ್ತೊಂದು ಅದ್ಭುತ ಮೈಲಿಗಲ್ಲು ತಲುಪಿದ್ದಾರೆ. ಐದು ಟೆಸ್ಟ್ ಪಂದ್ಯಗಳ ಸರಣಿಯಲ್ಲಿ ಭಾರತ ಇಂಗ್ಲೆಂಡ್ ವಿರುದ್ಧ ಮೊದಲ ಟೆಸ್ಟ್ ಆಡುತ್ತಿದೆ. ಲೀಡ್ಸ್‌ನಲ್ಲಿ ನಡೆಯುತ್ತಿರುವ ಈ ಟೆಸ್ಟ್‌ನ ಎರಡನೇ ಇನ್ನಿಂಗ್ಸ್‌ನಲ್ಲಿ ಕೆ.ಎಲ್ ರಾಹುಲ್ ಅದ್ಭುತ ಶತಕ ಬಾರಿಸಿದರು. ಇದರೊಂದಿಗೆ ಇಂಗ್ಲೆಂಡ್‌ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಏಷ್ಯಾದ ಆರಂಭಿಕ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ರಾಹುಲ್ 202 ಎಸೆತಗಳಲ್ಲಿ 13 ಬೌಂಡರಿಗಳೊಂದಿಗೆ ತಮ್ಮ ಶತಕ ಪೂರ್ಣಗೊಳಿಸಿದರು.

ಸುನಿಲ್ ಗವಾಸ್ಕರ್, ರಾಹುಲ್ ದ್ರಾವಿಡ್ ದಾಖಲೆ ಬ್ರೇಕ್

ಕೆ.ಎಲ್ ರಾಹುಲ್‌ಗೆ ಇದು ಇಂಗ್ಲೆಂಡ್‌ನಲ್ಲಿ ಆರಂಭಿಕ ಆಟಗಾರನಾಗಿ ಮೂರನೇ ಶತಕ. ಈ ಮೂಲಕ ದಿಗ್ಗಜ ಆಟಗಾರರಾದ ಸುನಿಲ್ ಗವಾಸ್ಕರ್ ಮತ್ತು ರಾಹುಲ್ ದ್ರಾವಿಡ್ ದಾಖಲೆಗಳನ್ನು ಮುರಿದರು. ಇಂಗ್ಲೆಂಡ್‌ನಲ್ಲಿ ಸುನಿಲ್ ಗವಾಸ್ಕರ್ 2, ರಾಹುಲ್ ದ್ರಾವಿಡ್ 2, ವಿಜಯ್ ಮರ್ಚೆಂಟ್ 2, ರವಿ ಶಾಸ್ತ್ರಿ 2, ತಮೀಮ್ ಇಕ್ಬಾಲ್ 2 ಶತಕಗಳ ದಾಖಲೆಯನ್ನು ಮೀರಿಸಿದರು. ಟೆಸ್ಟ್ ಇತಿಹಾಸದಲ್ಲಿ ಇಂಗ್ಲೆಂಡ್‌ನಲ್ಲಿ ಮೂರು ಶತಕ ಬಾರಿಸಿದ ಏಕೈಕ ಏಷ್ಯಾದ ಆರಂಭಿಕ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ರಿಷಭ್ ಪಂತ್ ಜೊತೆ ಕೆ.ಎಲ್ ರಾಹುಲ್ ಸೂಪರ್ ಇನ್ನಿಂಗ್ಸ್

ಈ ಪಂದ್ಯದ ನಾಲ್ಕನೇ ದಿನ (ಜೂನ್ 23) ಭಾರತ ತಂಡ ಮೊದಲ ಇನ್ನಿಂಗ್ಸ್‌ನ ಶತಕ ವೀರ ಶುಭ್‌ಮನ್ ಗಿಲ್ ವಿಕೆಟ್ ಅನ್ನು ಬೇಗನೆ ಕಳೆದುಕೊಂಡಿತು. ಆಗ ಭಾರತದ ಸ್ಕೋರ್ 92/3 ಆಗಿತ್ತು. ಆದರೆ ಕೆ.ಎಲ್ ರಾಹುಲ್ ಕ್ರೀಸ್‌ಗೆ ಬಂದು ಸ್ಥಿರವಾಗಿ ಉತ್ತಮ ಇನ್ನಿಂಗ್ಸ್ ಆಡಿದರು. ಶತಕದೊಂದಿಗೆ ಮಿಂಚಿದರು. ಅವರೊಂದಿಗೆ ಬಂದ ರಿಷಭ್ ಪಂತ್ ಜೊತೆಗೂಡಿ ಪಂದ್ಯಕ್ಕೆ ತಿರುವು ನೀಡುವ ಜೊತೆಯಾಟವನ್ನು ನೀಡಿದರು. ಈ ವೇಳೆ ಪಂತ್ ಸಹ ಶತಕ ಬಾರಿಸಿದರು. 118 ರನ್‌ಗಳ ತಮ್ಮ ಶತಕದ ಇನ್ನಿಂಗ್ಸ್‌ನಲ್ಲಿ ಪಂತ್ 15 ಬೌಂಡರಿ ಮತ್ತು 3 ಸಿಕ್ಸರ್ ಬಾರಿಸಿದರು.

ಲೀಡ್ಸ್‌ನ ಹೆಡ್ಡಿಂಗ್ಲಿ ಪಿಚ್‌ನಲ್ಲಿ ಕೆ.ಎಲ್ ರಾಹುಲ್ ಕ್ಲಾಸ್ ಇನ್ನಿಂಗ್ಸ್

ಲೀಡ್ಸ್‌ನ ಹೆಡ್ಡಿಂಗ್ಲಿ ಪಿಚ್‌ನಲ್ಲಿ ಮೋಡ ಕವಿದ ವಾತಾವರಣದಲ್ಲಿ ಕೆ.ಎಲ್ ರಾಹುಲ್ ತಮ್ಮ ಬ್ಯಾಟಿಂಗ್ ಕ್ಲಾಸ್ ಅನ್ನು ಪ್ರದರ್ಶಿಸಿದರು. ಇಂಗ್ಲೆಂಡ್ ನಾಯಕ ಬೆನ್ ಸ್ಟೋಕ್ಸ್ ಎಸೆದ ಶಾರ್ಟ್ ಪಿಚ್ ಎಸೆತಗಳನ್ನು ಸಮರ್ಥವಾಗಿ ಎದುರಿಸಿದರು. ಶತಕದೊಂದಿಗೆ ರಾಹುಲ್ ತಮ್ಮ ಆಟದ ಸಾಮರ್ಥ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದರು. ಕೆ.ಎಲ್ ರಾಹುಲ್ ಇಲ್ಲಿಯವರೆಗೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಒಂಬತ್ತು ಶತಕ ಬಾರಿಸಿದ್ದಾರೆ. ಇದರಲ್ಲಿ ಇಂಗ್ಲೆಂಡ್ ವಿರುದ್ಧ ನಾಲ್ಕು ಶತಕಗಳಿವೆ. 2018 ರಲ್ಲಿ ದಿ ಓವಲ್‌ನಲ್ಲಿ 149 ರನ್, 2021 ರಲ್ಲಿ ಲಾರ್ಡ್ಸ್‌ನಲ್ಲಿ 129 ರನ್ ಮತ್ತು ಇತ್ತೀಚಿನ ಶತಕ 2025 ರಲ್ಲಿ ಹೆಡ್ಡಿಂಗ್ಲಿಯಲ್ಲಿ ಬಂದಿದೆ. ಇದರೊಂದಿಗೆ ರಾಹುಲ್‌ಗೆ ಇಂಗ್ಲೆಂಡ್‌ನಲ್ಲಿ ಮೂರು ಶತಕಗಳು ದೊರೆತಿದ್ದು, ಆರಂಭಿಕ ಆಟಗಾರನಾಗಿಯೇ ಬಂದಿವೆ. ಇದು ಭಾರತ ಕ್ರಿಕೆಟ್ ಇತಿಹಾಸದಲ್ಲಿ ಹೊಸ ದಾಖಲೆಯಾಗಿದೆ.

ಕೆ.ಎಲ್ ರಾಹುಲ್‌ಗೆ ಸಿಕ್ಕ ಲಕ್ಕಿ ಬ್ರೇಕ್

ಇನ್ನಿಂಗ್ಸ್‌ನ 38ನೇ ಓವರ್‌ನಲ್ಲಿ ರಾಹುಲ್ 58 ರನ್‌ಗಳಾಗಿದ್ದಾಗ ಹ್ಯಾರಿ ಬ್ರೂಕ್ ಅವರ ಕ್ಯಾಚ್ ಬಿಟ್ಟರು. ಜೋಶ್ ಟಂಗ್ ಎಸೆದ ಶಾರ್ಟ್ ಬಾಲ್ ಅನ್ನು ಥರ್ಡ್ ಮ್ಯಾನ್ ಕಡೆಗೆ ಹೊಡೆದ ರಾಹುಲ್‌ಗೆ, ಬ್ರೂಕ್ ಕ್ಯಾಚ್ ಬಿಟ್ಟಿದ್ದರಿಂದ ಮತ್ತೊಂದು ಅವಕಾಶ ಸಿಕ್ಕಿತು. ಅದೇ ಅವಕಾಶವನ್ನು ಬಳಸಿಕೊಂಡು ಶತಕ ಬಾರಿಸಿದರು. 

SENA ದೇಶದಲ್ಲಿ ರಾಹುಲ್ ಹೊಸ ದಾಖಲೆ

ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್, ನ್ಯೂಜಿಲೆಂಡ್, ಆಸ್ಟ್ರೇಲಿಯಾ (ಸೆನಾ) ದೇಶಗಳಲ್ಲಿ ಟೆಸ್ಟ್ ಆರಂಭಿಕ ಆಟಗಾರನಾಗಿ 50+ ಸ್ಕೋರ್‌ಗಳನ್ನು ಹೆಚ್ಚು ಬಾರಿ ಮಾಡಿರುವವರಲ್ಲಿ ಕೆ ಎಲ್ ರಾಹುಲ್ ಈಗ ಎರಡನೇ ಸ್ಥಾನದಲ್ಲಿದ್ದಾರೆ. ಅವರೊಂದಿಗೆ ವೀರೇಂದ್ರ ಸೆಹ್ವಾಗ್ ಮತ್ತು ಮುರಳಿ ವಿಜಯ್ ಸಹ ಇದ್ದಾರೆ. ಇವರಿಗಿಂತ ಮೊದಲು ಸುನಿಲ್ ಗವಾಸ್ಕರ್ ಅಗ್ರಸ್ಥಾನದಲ್ಲಿದ್ದಾರೆ.

ಕೆ ಎಲ್ ರಾಹುಲ್ ಅಂಕಿ-ಅಂಶ

ಕೆ.ಎಲ್ ರಾಹುಲ್ ಅವರ ಟೆಸ್ಟ್ ವೃತ್ತಿಜೀವನದ ಅಂಕಿಅಂಶಗಳನ್ನು ಗಮನಿಸಿದರೆ, ಇಲ್ಲಿಯವರೆಗೆ 59 ಟೆಸ್ಟ್‌ಗಳನ್ನು ಆಡಿ 3,350 ಕ್ಕೂ ಹೆಚ್ಚು ರನ್ ಗಳಿಸಿದ್ದಾರೆ. ಟೆಸ್ಟ್‌ಗಳಲ್ಲಿ ರಾಹುಲ್ 9 ಶತಕ ಮತ್ತು 17 ಅರ್ಧಶತಕ ಗಳಿಸಿದ್ದಾರೆ.