ಇರ್ಫಾನ್ ಪಠಾಣ್ ಜತೆ ಡೇಟ್ ಮಾಡುತ್ತಿದ್ದಾಗ್ಲೆ, ಗಂಭೀರ್ ಪದೇ ಪದೇ ಮಿಸ್ ಕಾಲ್ ಕೊಡ್ತಿದ್ರು: ಹೊಸ ಬಾಂಬ್ ಸಿಡಿಸಿದ ಬಾಲಿವುಡ್ ಬೆಡಗಿ

ಬೆಂಗಳೂರು: ಕ್ರಿಕೆಟಿಗರ ಜತೆ ಬಾಲಿವುಡ್ ನಟಿಯರ ಡೇಟಿಂಗ್ ಇದೀಗ ಗುಟ್ಟಾಗಿಯೇನೂ ಉಳಿದಿಲ್ಲ. ಈಗಾಗಲೇ ಹಲವು ಕ್ರಿಕೆಟಿಗರ ಹೆಸರು ಬಾಲಿವುಡ್ ನಟಿಯರ ಜತೆ ಥಳುಕುಹಾಕಿಕೊಂಡಿದ್ದನ್ನು ನಾವೆಲ್ಲರೂ ನೋಡಿದ್ದೇವೆ. ಇದೀಗ ಬಾಲಿವುಡ್ ನಟಿಯೊಬ್ಬರು ಮಾಜಿ ಕ್ರಿಕೆಟಿಗರಾದ ಇರ್ಫಾನ್ ಪಠಾಣ್ ಹಾಗೂ ಗೌತಮ್ ಗಂಭೀರ್ ಕುರಿತಾಗಿ ಹೊಸ ಬಾಂಬ್ ಸಿಡಿಸಿದ್ದಾರೆ. ಈ ಕುರಿತಾದ ಒಂದು ರಿಪೋರ್ಟ್ ಇಲ್ಲಿದೆ ನೋಡಿ.  

ಬಾಲಿವುಡ್ ನಟಿ ಪಾಯಲ್ ಘೋಷ್ ಇದೀಗ ಹೊಸದೊಂದು ಬಾಂಬ್ ಸಿಡಿಸಿದ್ದಾರೆ. ತಾವು ಟೀಂ ಇಂಡಿಯಾ ಕ್ರಿಕೆಟಿಗ ಇರ್ಫಾನ್ ಪಠಾಣ್ ಜತೆ ಡೇಟಿಂಗ್ ನಡೆಸಿದ್ದಾಗಿ ತಿಳಿಸಿದ್ದಾರೆ.

ಕೆಲದಿನಗಳ ಹಿಂದಷ್ಟೇ ಪಾಯಲ್ ಘೋಷ್, ಟೀಂ ಇಂಡಿಯಾ ವೇಗಿ ಮೊಹಮ್ಮದ್ ಶಮಿಗೆ ಮದುವೆ ಆಫರ್ ನೀಡಿ ಸುದ್ದಿಯಾಗಿದ್ದರು. ಇದಾದ ಬಳಿಕ ತಾವು ಜೋಕ್ ಮಾಡಿದ್ದಾಗಿ ಹೇಳಿದ್ದರು.

ಪಾಯಲ್ ಘೋಷ್ ಈಗಾಗಲೇ ಕೆಲವು ತಮಿಳು ಹಾಗೂ ಹಿಂದಿ ಸಿನಿಮಾಗಳಲ್ಲಿ ನಟಿಸಿ ಗಮನ ಸೆಳೆದಿದ್ದಾರೆ. ತಾವು ಇರ್ಫಾನ್ ಪಠಾಣ್ ಜತೆ ಡೇಟಿಂಗ್ ನಡೆಸುವ ವೇಳೆಯಲ್ಲಿಯೇ ಗೌತಮ್ ಗಂಭೀರ್ ತಮಗೆ ಪದೇ ಪದೇ ಮಿಸ್ ಕಾಲ್ ಕೊಡುತ್ತಿದ್ದರು ಎಂದು ಹೊಸ ಬಾಂಬ್ ಸಿಡಿಸಿದ್ದಾರೆ.

ಗೌತಮ್ ಗಂಭೀರ್ ಹಾಗೂ ಅಕ್ಷಯ್ ಕುಮಾರ್ ನನ್ನ ಹಿಂದೆ ಬಿದ್ದಿದ್ದರು. ಆದರೆ ನಾನು ಇರ್ಫಾನ್ ಪಠಾಣ್ ಅವರನ್ನು ಮಾತ್ರ ಇಷ್ಟಪಟ್ಟಿದ್ದೆ. ಅವರನ್ನು ಬಿಟ್ಟು ಬೇರೆ ಯಾರನ್ನೂ ನೋಡುತ್ತಿರಲಿಲ್ಲ. ನಾನು ಇರ್ಫಾನ್ ಅವರ ಬಳಿ ಎಲ್ಲವನ್ನು ಹೇಳಿಕೊಳ್ಳುತ್ತಿದ್ದೆ ಹಾಗೂ ನನಗೆ ಬಂದ ಮಿಸ್‌ ಕಾಲ್‌ಗಳನ್ನು ತೋರಿಸುತ್ತಿದ್ದೆ. ನಾನು ಇರ್ಫಾನ್ ಅವರನ್ನು ಬಿಟ್ಟು ಬೇರೆ ಯಾರಲ್ಲೂ ಪ್ರೀತಿಸಲಿಲ್ಲ ಎಂದು ಪಾಯಲ್ 'ಎಕ್ಸ್‌' ಮಾಡಿದ್ದಾರೆ.

ಗೌತಮ್ ಗಂಭೀರ್ ನನಗೆ ಪದೇ ಪದೇ ಮಿಸ್ ಕಾಲ್ ಕೊಡುತ್ತಿದ್ದರು. ಇದು ಇರ್ಫಾನ್ ಪಠಾಣ್ ಅವರಿಗೂ ತುಂಬಾ ಚೆನ್ನಾಗಿ ಗೊತ್ತಿತ್ತು. ಅವರು ನನ್ನ ಎಲ್ಲಾ ಕಾಲ್ ಲಿಸ್ಟ್‌ ಚೆಕ್ ಮಾಡುತ್ತಿದ್ದರು. ಈ ವಿಚಾರ ಅವರ ಸಹೋದರ್ ಯೂಸೂಫ್ ಪಠಾಣ್, ಹಾರ್ದಿಕ್ ಹಾಗೂ ಕೃನಾಲ್ ಪಾಂಡ್ಯ ಅವರಿಗೂ ಗೊತ್ತಿತ್ತು. ನಾನೊಮ್ಮೆ ಪುಣೆಯಲ್ಲಿ ಡೊಮೆಸ್ಟಿಕ್ ಪಂದ್ಯ ನಡೆಯುವ ವೇಳೆ ಭೇಟಿಯಾಗಿದ್ದೆ ಎಂದು ಟ್ವೀಟ್ ಮಾಡಿದ್ದಾರೆ.

ಈ ಕುರಿತಂತೆ ತಾವು ಇರ್ಫಾನ್ ಪಠಾಣ್ ಜತೆಗಿರುವ ಫೋಟೋವನ್ನು ಟ್ವಿಟರ್‌ನಲ್ಲಿ ಶೇರ್ ಮಾಡಿಕೊಂಡಿರುವ ಪಾಯಲ್ ಘೋಷ್, ನಾವು ಬ್ರೇಕ್ ಅಪ್ ಆದ ಬಳಿಕ ನಾನು ಕೆಲಕಾಲ ಕಾಯಿಲೆಗೆ ಒಳಗಾಗಿದ್ದೆ. ಇದಾದ ಬಳಿಕ ಕೆಲವು ವರ್ಷಗಳ ಕಾಲ ಕೆಲಸವನ್ನು ಮಾಡಲು ಆಗಲಿಲ್ಲ. ಆದರೆ ನಾನು ಅವರೊಬ್ಬರನ್ನು ಮಾತ್ರ ಲವ್ ಮಾಡಿದ್ದೆ. ಇದಾದ ಬಳಿಕ ನಾನು ಯಾರನ್ನೂ ಲವ್ ಮಾಡಿಲ್ಲ ಎಂದು ಬರೆದುಕೊಂಡಿದ್ದಾರೆ.

ಪಾಯಲ್ ಘೋಷ್ 'ಪಟೇಲ್‌ ಕಿ ಪಂಜಾಬ್ ಶಾದಿ' ಸಿನಿಮಾ ಮೂಲಕ ಬಾಲಿವುಡ್‌ಗೆ ಪಾದಾರ್ಪಣೆ ಮಾಡಿದ್ದರು. ಈ ಚಿತ್ರದಲ್ಲಿ ರಿಶಿ ಕಪೂರ್ ಹಾಗೂ ಪರೇಶ್ ರಾವಲ್ ಕೂಡಾ ನಟಿಸಿದ್ದರು. ಇದಷ್ಟೇ ಅಲ್ಲದೇ ಪಾಯಲ್ 'ಸಾಥ್ ನಿಭಾನಾ ಸಾಥಿಯಾ' ಎನ್ನುವ ಟೆಲಿವಿಷನ್ ಶೋನಲ್ಲಿ ಕಾಣಿಸಿಕೊಂಡಿದ್ದಾರೆ.