ಮನೆಯಿಂದಲೇ ಬಾಳೆಹಣ್ಣಿನ ಪುಡಿ ಬಿಸಿನೆಸ್‌ ಆರಂಭಿಸಿ, ಲಕ್ಷಕ್ಕೂ ಹೆಚ್ಚು ಗಳಿಸಿ

ಯುವಕರ ಆಲೋಚನೆ ಬದಲಾಗುತ್ತಿದೆ. ಉದ್ಯೋಗ ಮಾಡುವ ಬದಲು ಸ್ವಂತ ವ್ಯಾಪಾರ ಮಾಡಬೇಕೆಂದು ಬಯಸುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ಇದಕ್ಕಾಗಿ ಹಲವು ಮಾರ್ಗಗಳನ್ನು ಅನ್ವೇಷಿಸುತ್ತಾರೆ. ಅಂತಹ ಒಂದು ಉತ್ತಮ ವ್ಯಾಪಾರ ಐಡಿಯಾ ಬಗ್ಗೆ ಇಂದು ತಿಳಿದುಕೊಳ್ಳೋಣ...   

ವ್ಯಾಪಾರ ಮಾಡಬೇಕೆಂದು ಬಯಸುವವರು ಹಲವರಿದ್ದಾರೆ. ಆದರೆ ಲಾಭ ಬರುವುದೋ ಇಲ್ಲವೋ ಎಂಬ ಭಯದಿಂದ ಹಿಂದೇಟು ಹಾಕುತ್ತಾರೆ. ಆದರೆ ಉತ್ತಮ ಐಡಿಯಾ, ಮಾರುಕಟ್ಟೆಯ ಅಗತ್ಯಕ್ಕೆ ತಕ್ಕಂತೆ ವ್ಯಾಪಾರ ಆರಂಭಿಸಿದರೆ ಉತ್ತಮ ಲಾಭ ಗಳಿಸಬಹುದು. ಅಂತಹ ವ್ಯಾಪಾರ ಐಡಿಯಾಗಳಲ್ಲಿ ಬಾಳೆಹಣ್ಣಿನ ಪುಡಿ ತಯಾರಿಕೆ ಒಂದು. ಬಾಳೆಹಣ್ಣಿನ ಪುಡಿಯನ್ನು ಏಕೆ ಬಳಸುತ್ತಾರೆ.? ಈ ವ್ಯಾಪಾರ ಆರಂಭಿಸಲು ಎಷ್ಟು ಬಂಡವಾಳ ಬೇಕು? ಲಾಭ ಹೇಗಿರುತ್ತದೆ.? ಇತ್ಯಾದಿ ಮಾಹಿತಿ ಇಲ್ಲಿದೆ. 

ಬಾಳೆಹಣ್ಣಿನ ಪುಡಿಗೆ ಇತ್ತೀಚೆಗೆ ಬೇಡಿಕೆ ಹೆಚ್ಚಾಗುತ್ತಿದೆ. ಸಂಸ್ಕರಿಸಿದ ಆಹಾರ ಉತ್ಪನ್ನವಾಗಿ ಬಾಳೆಹಣ್ಣಿನ ಪುಡಿಗೆ ಹೆಸರಿದೆ. ಶಿಶು ಆಹಾರ, ಬೇಕರಿ ಉತ್ಪನ್ನಗಳು, ಆರೋಗ್ಯ ಪೂರಕಗಳು ಸೇರಿದಂತೆ ಹಲವು ಆಹಾರ ಉತ್ಪನ್ನಗಳಲ್ಲಿ ಬಳಸುತ್ತಾರೆ. ಇತರ ದೇಶಗಳಿಗೂ ಬಾಳೆಹಣ್ಣಿನ ಪುಡಿಯನ್ನು ರಫ್ತು ಮಾಡುತ್ತಾರೆ. ಇ-ಕಾಮರ್ಸ್‌ ಸಂಸ್ಥೆಗಳಲ್ಲಿಯೂ ಬಾಳೆಹಣ್ಣಿನ ಪುಡಿಯನ್ನು ಮಾರಾಟ ಮಾಡುತ್ತಾರೆ. ಉತ್ತಮ ಪ್ರೋಟೀನ್ ಆಹಾರವಾಗಿ ಇದು ಉಪಯುಕ್ತ. 

ಬಾಳೆಹಣ್ಣಿನ ಪುಡಿ ತಯಾರಿಕೆಗೆ ಬೇಕಾಗುವ ಸಾಮಗ್ರಿಗಳು: 

* ಬಾಳೆಹಣ್ಣುಗಳು 
* ಸಂರಕ್ಷಕಗಳು (ಸಾವಯವ ಆಗಿದ್ದರೆ ಅಗತ್ಯವಿಲ್ಲ)
* ಸಿಪ್ಪೆ ಸುಲಿಯುವ ಯಂತ್ರ 
* ಹೋಳು ಮಾಡುವ ಯಂತ್ರ 
* ಒಣಗಿಸುವ ಯಂತ್ರ 
* ಪುಡಿ ಮಾಡುವ ಯಂತ್ರ
* ಪ್ಯಾಕಿಂಗ್ ಯಂತ್ರ 

ಅಗತ್ಯ ಪರವಾನಗಿಗಳು, ವ್ಯಾಪಾರ ನೋಂದಣಿ:
ಈ ವ್ಯಾಪಾರ ಆರಂಭಿಸಲು FSSAI ಪರವಾನಗಿ ಪಡೆಯಬೇಕು. MSME ನೋಂದಣಿ ಇರಬೇಕು. GST ನೋಂದಣಿ, ರಫ್ತು ಮಾಡಲು ಆಮದು-ರಫ್ತು ಕೋಡ್ ಇರಬೇಕು. ಇವುಗಳಿದ್ದರೆ ಕೇಂದ್ರ ಸರ್ಕಾರದ ಯೋಜನೆಗಳ ಮೂಲಕ ಬಂಡವಾಳ ಸಹಾಯ ಪಡೆಯಬಹುದು. 

ಬಂಡವಾಳ, ಲಾಭಗಳು:
ಬಾಳೆಹಣ್ಣಿನ ಪುಡಿ ತಯಾರಿಕೆಗೆ ಬೇಕಾಗುವ ಕಚ್ಚಾ ವಸ್ತುಗಳಿಗೆ ಸುಮಾರು 50 ಸಾವಿರದಿಂದ 1 ಲಕ್ಷ ರೂ. ಬಂಡವಾಳ ಬೇಕಾಗುತ್ತದೆ. ಯಂತ್ರಗಳು, ಸೆಟಪ್‌ಗೆ ಗರಿಷ್ಠ 3 ರಿಂದ 5 ಲಕ್ಷ ರೂ. ಬೇಕು. ಪರವಾನಗಿ, ಇತರೆ ಖರ್ಚುಗಳಿಗೆ  50 ಸಾವಿರ ರೂ., ಮಾರ್ಕೆಟಿಂಗ್, ಬ್ರ್ಯಾಂಡಿಂಗ್‌ಗೆ 1 ಲಕ್ಷ ರೂ. ಬೇಕಾಗುತ್ತದೆ. ಒಟ್ಟಾರೆ 5 ರಿಂದ 7 ಲಕ್ಷ ರೂ.ಗಳಲ್ಲಿ ವ್ಯಾಪಾರ ಆರಂಭಿಸಬಹುದು. ಆರಂಭದಲ್ಲಿ ಸಣ್ಣ ಯಂತ್ರಗಳಿಂದ ಆರಂಭಿಸಿದರೆ ಕೇವಲ 2 ಲಕ್ಷ ರೂ.ಗಳಲ್ಲಿಯೂ ವ್ಯಾಪಾರ ಆರಂಭಿಸಬಹುದು. 

ಮಾರುಕಟ್ಟೆಯಲ್ಲಿ ಬಾಳೆಹಣ್ಣಿನ ಪುಡಿಯ ಬೆಲೆ 200 ರಿಂದ 500 ರೂ. ಇದೆ. 1 ಕೆಜಿ ಬಾಳೆಹಣ್ಣಿನ ಪುಡಿ ತಯಾರಿಸಲು 8ರಿಂದ 10 ಕೆಜಿ ಬಾಳೆಹಣ್ಣು ಬೇಕಾಗುತ್ತದೆ. ಕನಿಷ್ಠ  50 ರಿಂದ 60% ಲಾಭ ಬರುತ್ತದೆ. ಕನಿಷ್ಠ ಪ್ರತಿ ತಿಂಗಳು 1 ಲಕ್ಷ ರೂ.ವರೆಗೆ ಲಾಭ ಗಳಿಸಬಹುದು. 

ವ್ಯಾಪಾರ ಹೇಗೆ ಮಾಡಬೇಕು.?
ಬಾಳೆಹಣ್ಣಿನ ಪುಡಿಯನ್ನು ನಿಮ್ಮ ಸ್ವಂತ ಬ್ರ್ಯಾಂಡ್‌ನಲ್ಲಿ ಪ್ಯಾಕ್ ಮಾಡಿ ಮಾರಾಟ ಮಾಡಬಹುದು. ಸ್ಥಳೀಯ ಸೂಪರ್ ಮಾರ್ಕೆಟ್‌ಗಳ ಜೊತೆಗೆ ಅಮೆಜಾನ್, ಫ್ಲಿಪ್‌ಕಾರ್ಟ್, ಬಿಗ್‌ಬಾಸ್ಕೆಟ್, ಜೆಪ್ಟೊ ಮುಂತಾದವುಗಳ ಜೊತೆ ಒಪ್ಪಂದ ಮಾಡಿಕೊಳ್ಳಬಹುದು. ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ವಾಟ್ಸಾಪ್ ಬಿಸಿನೆಸ್ ಮುಂತಾದ ವೇದಿಕೆಗಳಲ್ಲಿ ಪ್ರಚಾರ ಮಾಡಬಹುದು. ಉತ್ತಮ ಲಾಭ ಗಳಿಸಲು ಉತ್ತಮ ಗುಣಮಟ್ಟದ ಬಾಳೆಹಣ್ಣುಗಳನ್ನು ಬಳಸಬೇಕು. ಸಂಸ್ಕರಣೆ, ಪ್ಯಾಕೇಜಿಂಗ್‌ನಲ್ಲಿಯೂ ಸ್ವಚ್ಛತೆ ಕಾಪಾಡಬೇಕು.