CBSE Result 2022: ಸಿಬಿಎಸ್‌ಇ 12ನೇ ತರಗತಿ ಫಲಿತಾಂಶ ಪ್ರಕಟ, ಬಾಲಕಿಯರೇ ಮೇಲುಗೈ

ಸಿಬಿಎಸ್‌ಇ ಫಲಿತಾಂಶ ಪ್ರಕಟವಾಗಿದ್ದು ಈ ಬಾರಿಯೂ ಬಾಲಕಿಯರೇ ಮೇಲುಗೈ ಸಾಧಿಸಿದ್ದಾರೆ. ಒಟ್ಟಾರೆ 92.71% ಫಲಿತಾಂಶ ಹೊರಬಂದಿದೆ. cbse.gov.in, cbseresults.nic.in, parikshasangam.cbse.gov.in ಮತ್ತು results.cbse.nic.in ಈ ಜಾಲತಾಣಗಳಲ್ಲಿ ಫಲಿತಾಂಶಗಳನ್ನು ನೀವು ಪಡೆಯಬಹುದು.

ನವದೆಹಲಿ (ಜುಲೈ 22): ಸೆಂಟ್ರಲ್ ಬೋರ್ಡ್ ಆಫ್ ಸೆಕೆಂಡರಿ ಎಜುಕೇಶನ್ (CBSE) ತನ್ನ ಅಧಿಕೃತ ವೆಬ್‌ಸೈಟ್, cbseresults.nic.in ಮತ್ತು results.cbse.nic.in ನಲ್ಲಿ 12 ನೇ ತರಗತಿ ವಿದ್ಯಾರ್ಥಿಗಳಿಗೆ ಅವಧಿ 2 ಮತ್ತು ಅಂತಿಮ ಫಲಿತಾಂಶಗಳನ್ನು ಪ್ರಕಟಿಸಿದೆ. ವಿದ್ಯಾರ್ಥಿಗಳು ತಮ್ಮ ಬೋರ್ಡ್ ಪರೀಕ್ಷೆಯ ರೋಲ್ ಸಂಖ್ಯೆ, ಜನ್ಮ ದಿನಾಂಕ ಮತ್ತು ಶಾಲೆಯ ಕೋಡ್ ಅನ್ನು ಬಳಸಿಕೊಂಡು ಈ ವೆಬ್‌ಸೈಟ್‌ಗಳಿಂದ ತಮ್ಮ ಸ್ಕೋರ್‌ಕಾರ್ಡ್‌ಗಳನ್ನು ಡೌನ್‌ಲೋಡ್ ಮಾಡಬಹುದು. ಈ ವರ್ಷ, 12 ನೇ ತರಗತಿಯಲ್ಲಿ ಒಟ್ಟಾರೆ ಶೇಕಡಾ 92.71 ರಷ್ಟು ಉತ್ತೀರ್ಣರಾಗಿದ್ದಾರೆ. ಈ ಬಾರಿಯೂ ಪರೀಕ್ಷೆಯಲ್ಲಿ ಬಾಲಕಿಯರೇ ಮೇಲುಗೈ ಸಾಧಿಸಿದ್ದು, ಶೇ. 94.54ರಷ್ಟು ಬಾಲಕಿಯರು ಉತ್ತೀರ್ಣರಾಗಿದ್ದರೆ, ಶೇ. 91.25ರಷ್ಟು ಬಾಲಕರು ಉತ್ತೀರ್ಣರಾಗಿದ್ದಾರೆ. ತೃತೀಯ ಲಿಂಗಿಗಳಲ್ಲಿ ಶೇ.100ರಷ್ಟು ಫಲಿತಾಂಶ ದಾಖಲಾಗಿದೆ. ವಿದ್ಯಾರ್ಥಿಗಳು ತಮ್ಮ 12 ನೇ ತರಗತಿಯ ಫಲಿತಾಂಶವನ್ನು ಡಿಜಿಲಾಕರ್‌ನಲ್ಲಿ ಕೂಡ ಪರಿಶೀಲಿಸಬಹುದು. 12 ನೇ ತರಗತಿ ವಿದ್ಯಾರ್ಥಿಗಳು ತಮ್ಮ ಸಂಬಂಧಿತ CBSE 12 ನೇ ಬೋರ್ಡ್ ಫಲಿತಾಂಶಗಳನ್ನು ಪರಿಶೀಲಿಸಲು ಮತ್ತು ಡೌನ್‌ಲೋಡ್ ಮಾಡಲು ನೇರ ಲಿಂಕ್‌ಗಾಗಿ ಇಲ್ಲಿ ಕ್ಲಿಕ್ ಮಾಡಬಹುದು.

CBSE ಅಂತಿಮ ಅಂಕಪಟ್ಟಿಯನ್ನು ಟರ್ಮ್ 1 ಮತ್ತು ಟರ್ಮ್ 2 ಅಂಕಗಳ ಆಧಾರದ ಮೇಲೆ ಸಿದ್ಧಪಡಿಸಿದೆ. ಫಲಿತಾಂಶ ಅಥವಾ ಅಂಕಪಟ್ಟಿಯು ಶೈಕ್ಷಣಿಕ ವರ್ಷದಲ್ಲಿ ಪಡೆದ ಅಂಕಗಳನ್ನು ಒಳಗೊಂಡಿರುತ್ತದೆ, ಇದರಲ್ಲಿ ಆಂತರಿಕ ಮೌಲ್ಯಮಾಪನ, ಪ್ರಾಜೆಕ್ಟ್ ಕೆಲಸ, ಪ್ರಾಯೋಗಿಕ ಪರೀಕ್ಷೆಗಳು ಮತ್ತು ಪೂರ್ವ-ಬೋರ್ಡ್ ಫಲಿತಾಂಶಗಳು ಸೇರಿವೆ. ಸಿಬಿಎಸ್ಇ 12 ನೇ ತರಗತಿಯ ಅವಧಿ 2 ಬೋರ್ಡ್ ಪರೀಕ್ಷೆಗಳನ್ನು ಏಪ್ರಿಲ್ 26 ರಿಂದ ಜೂನ್ 4 ರವರೆಗೆ ನಡೆಸಿತ್ತು.

ಬೆಂಗಳೂರಿನಲ್ಲಿ ಶೇ. 98.16 ಫಲಿತಾಂಶ: ಸಿಬಿಎಸ್‌ಇ 12ನೇ ತರಗತಿಯ ಫಲಿತಾಂಶದಲ್ಲಿ ಪ್ರಾದೇಶಿಕವಾರು ಉತ್ತೀರ್ಣ ಪ್ರಮಾಣದಲ್ಲಿ ಬೆಂಗಳೂರು 2ನೇ ಸ್ಥಾನ ಪಡೆದುಕೊಂಡಿದೆ. ತಿರುವನಂತಪುರ ನಂ.1 ಸ್ಥಾನ ಪಡೆದುಕೊಂಡಿದ್ದು ಶೇ98.83ರಷ್ಟು ಫಲಿತಾಂಶ ದಾಖಲಾಗಿದ್ದರೆ, ಬೆಂಗಳೂರಿನಲ್ಲಿ ಶೇ. 98.16ರಷ್ಟು ಫಲಿತಾಂಶ ದಾಖಲಾಗಿದೆ. ಉಳಿದಂತೆ ಚೆನ್ನೈ: 97.79, ದೆಹಲಿ ಪೂರ್ವ: 96.29, ದೆಹಲಿ ಪಶ್ಚಿಮ: 96.29, ಅಜ್ಮೀರ್: 96.01, ಚಂಡೀಗಢ: 95.98, ಪಂಚಕುಲ: 94.94. : 92.06, ಪಾಟ್ನಾ: 91.20, ಭೋಪಾಲ್: 90.74, ಪುಣೆ: 90.48, ಭುವನೇಶ್ವರ: 90.37, ನೋಯ್ಡಾ: 90.27 , ಡೆಹ್ರಾಡೂನ್: 85.39, ಪ್ರಯಾಗ್ರಾಜ್: 83.71 ಫಲಿತಾಂಶ ಕಂಡಿದೆ.

33 ಸಾವಿರಕ್ಕೂ ಅಧಿಕ ವಿದ್ಯಾರ್ಥಿಗಳಿಗೆ ಶೇ. 95 ಅಂಕ: 33 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು (33,423) ಅಥವಾ ಹಾಜರಾದವರಲ್ಲಿ ಶೇಕಡಾ 2.3 ರಷ್ಟು 95 ಕ್ಕಿಂತ ಹೆಚ್ಚು ಅಂಕ ಗಳಿಸಿದ್ದಾರೆ. 1.34 ಲಕ್ಷ ವಿದ್ಯಾರ್ಥಿಗಳು ಶೇ 90ಕ್ಕಿಂತ ಹೆಚ್ಚು ಅಂಕ ಗಳಿಸಿದ್ದಾರೆ ಎಂದು ಮಂಡಳಿ ತಿಳಿಸಿದೆ. ಮೊದಲ ಬಾರಿಗೆ, 2021-22ರ ಶೈಕ್ಷಣಿಕ ಅವಧಿಗೆ ಬೋರ್ಡ್ ಪರೀಕ್ಷೆಗಳನ್ನು ಎರಡು ಅವಧಿಗಳಲ್ಲಿ ನಡೆಸಲಾಗಿತ್ತು.

ಫೆ. 15ಕ್ಕೆ 2023ರ ಪರೀಕ್ಷೆ: "ಥಿಯರಿ ಪೇಪರ್‌ಗಳಿಗೆ ಮೊದಲ ಅವಧಿಯ ಅಂಕಗಳಿಗೆ 30 ಪರ್ಸಂಟೇಜ್‌ ವೇಟೇಜ್ ನೀಡಲಾಗಿದ್ದು, ಎರಡನೇ ಅವಧಿಯ ಅಂಕಗಳಿಗೆ 70% ವೇಟೇಜ್ ನೀಡಲಾಗಿದೆ" ಎಂದು ಅದು ಹೇಳಿದೆ. ಪ್ರಾಯೋಗಿಕ ಪತ್ರಿಕೆಗಳಿಗೆ ಎರಡೂ ಟರ್ಮ್‌ಗಳಿಗೆ ಸಮಾನ ತೂಕ ನೀಡಲಾಗಿದೆ ಎಂದು ಮಂಡಳಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. 2023 ರ 12 ನೇ ತರಗತಿ ಪರೀಕ್ಷೆಗಳು ಫೆಬ್ರವರಿ 15 ರಿಂದ ನಡೆಯಲಿದೆ.

ಜವಾಹರ್‌ ನವೋದಯ ವಿದ್ಯಾಲಯ ಶ್ರೇಷ್ಠ ಶಾಲೆ: ಸಿಬಿಎಸ್ಇ 12ನೇ ತರಗತಿ ಫಲಿತಾಂಶದಲ್ಲಿ ಜೆನ್‌ವಿ-ಜವಾಹರ್‌ ನವೋದಯ ವಿದ್ಯಾಲಯ ಶಾಲೆಯ ವಿದ್ಯಾರ್ಥಿಗಳು ಉತ್ತಮ ಫಲಿತಾಂಶ ದಾಖಲು ಮಾಡಿದ್ದಾರೆ. ದೇಶದಲ್ಲಿ ಜೆನ್‌ವಿಗಳಲ್ಲಿ ಶೇ. 98.93ರಷ್ಟು ಫಲಿತಾಂಶ ದಾಖಲಾಗಿದ್ದರೆ. ಸೆಂಟ್ರಲ್‌ ಟಿಬೇಟಿಯನ್‌ ಸ್ಕೂಲ್‌ ಅಡ್ಮಿನಿಸ್ಟ್ರೇಷನ್ (ಸಿಟಿಎಸ್‌ಎ) ಅಲ್ಲಿ ಶೇ. 97.96ರಷ್ಟು, ಕೇಂದ್ರೀಯ ವಿದ್ಯಾಲಯಗಳಲ್ಲಿ ಶೇ. 97.04, ಸರ್ಕಾರದ ಅನುದಾನಿತ ಶಾಲೆಗಳಲ್ಲಿ ಶೇ. 94.81, ಸರ್ಕಾರಿ ಶಾಲೆಗಳಲ್ಲಿ ಶೇ. 93.38 ಹಾಗೂ ಇಂಡಿಪೆಂಡೆಂಟ್ ಶಾಲೆಗಳಲ್ಲಿ ಶೇ. 92.20ರಷ್ಟು ಫಲಿತಾಂಶ ದಾಖಲಾಗಿದೆ.