PSI Recruitment Scam: ಕಾಶ್ಮೀರದಲ್ಲೆಲ್ಲ ಹುಡುಕಿ ಕೊನೆಗೆ ಪುಣೆಯಲ್ಲಿ ದಿವ್ಯಾ ಹಾಗರಗಿ ಪತ್ತೆ!

ಪಿಎ​ಸ್‌ಐ ಹಗ​ರ​ಣದ ಪ್ರಮುಖ ಆರೋಪಿ ಎಂದೇ ಗುರು​ತಿ​ಸ​ಲಾ​ಗಿ​ರುವ ದಿವ್ಯಾ ಹಾಗ​ರಗಿ ಮತ್ತು ತಂಡ 18 ದಿನ ಸಿಐ​ಡಿ ಪೊಲೀ​ಸರ ಕಣ್ಣು ತಪ್ಪಿಸಿ ತಲೆ ಮರೆ​ಸಿ​ಕೊಂಡಿದ್ದೇ ಒಂದು ರೋಚಕ ಕತೆ. 

ಕಲಬುರಗಿ (ಏ.30): ಪಿಎ​ಸ್‌ಐ ಹಗ​ರ​ಣದ (PSI Recruitment Scam) ಪ್ರಮುಖ ಆರೋಪಿ ಎಂದೇ ಗುರು​ತಿ​ಸ​ಲಾ​ಗಿ​ರುವ ದಿವ್ಯಾ ಹಾಗ​ರಗಿ (Divya Hagaragi) ಮತ್ತು ತಂಡ 18 ದಿನ ಸಿಐ​ಡಿ ಪೊಲೀ​ಸರ (Police) ಕಣ್ಣು ತಪ್ಪಿಸಿ ತಲೆ ಮರೆ​ಸಿ​ಕೊಂಡಿದ್ದೇ ಒಂದು ರೋಚಕ ಕತೆ. ಪಿಎ​ಸ್‌ಐ ಪರೀಕ್ಷೆಯ ಒಎಂಆರ್‌ ಶೀಟ್‌ ತಿದ್ದು​ಪಡಿ ಸಂಗತಿ ಹೊರಬೀಳು​ತ್ತಿ​ದ್ದಂತೆ ದಿವ್ಯಾ ಇಡೀ ಹಗ​ರ​ಣದ ಕೇಂದ್ರ ಬಿಂದು​ವಾ​ಗಿದ್ದಳು. ಪ್ರಕ​ರ​ಣ​ವನ್ನು ಸಿಐ​ಡಿಗೆ (CID) ವಹಿಸಿ ಸರ್ಕಾರ ಆದೇಶ ಹೊರ​ಡಿ​ಸು​ತ್ತಿ​ದ್ದಂತೆ ದಿವ್ಯಾ ನಾಪ​ತ್ತೆ​ಯಾ​ಗಿ​ದ್ದಳು. ತನ್ನ ತಂಡ​ದೊಂದಿಗೆ ನಿಂತಲ್ಲಿ ನಿಲ್ಲ​ದೆ 18 ದಿನ ಅನೇಕ ಊರೂರು ಸುತ್ತಿ​ದ್ದಾ​ಳೆ.

ಸಿಐಡಿಯ ದಿಕ್ಕು ತಪ್ಪಿ​ಸಲು ಕಾಶ್ಮೀ​ರಕ್ಕೆ ತೆರ​ಳಿ​ದ್ದಾರೆ ಎನ್ನುವ ಸುಳಿ​ವು​ಗ​ಳನ್ನು ನೀಡು​ವ​ಲ್ಲಿಯೂ ದಿವ್ಯಾ ಯಶ​ಸ್ವಿ​ಯಾ​ಗಿ​ದ್ದಳು. ಇತ್ತ ಸಿಐಡಿ 6 ತಂಡ​ಗ​ಳನ್ನು ರಚಿ​ಸಿ​ಕೊಂಡು ಕಲ​ಬು​ಗ​ರಿ​ಯಿಂದ ಕಾಶ್ಮೀ​ರ​ದ​ವ​ರೆಗೂ ಹುಡು​ಕಾಟ ನಡೆ​ಸಿ​ತ್ತು. ದಿವ್ಯಾ ಮತ್ತು ತಂಡ ಏ.2ರಂದೇ ತಮ್ಮ ಮೊಬೈಲ್‌ ಸ್ವಿಚ್‌ ಆಫ್‌ ಮಾಡಿ​ಕೊಂಡಿ​ದ್ದರು. ಇತ್ತ ಏ.12ರಿಂದ ಆರೋ​ಪಿ​ಗ​ಳಿ​ಗಾಗಿ ಸಿಐಡಿ ತೀವ್ರ ಹುಡು​ಕಾಟ ಶುರು ಮಾಡಿತ್ತು. ಇತ್ತ ದಿವ್ಯಾ ಮತ್ತು ಗ್ಯಾಂಗ್‌ ಹೋದ​ಲೆ​ಲ್ಲ ​ಮೊ​ಬೈಲ್‌ ಮತ್ತು ಸಿಮ್‌ ಕಾರ್ಡ್‌​ಗ​ಳನ್ನು ಬದ​ಲಿ​ಸಿ​ದ್ದರು. ಅಲ್ಲದೆ ತಮ್ಮ ಕಾರಿನ ಡ್ರೈವರ್‌ ಮೊಬೈಲನ್ನು ಕೂಡ ಸ್ವಿಚ್‌​ಆಫ್‌ ಮಾಡಿ​ದ್ದರು. ಅದು ಯಾವ​ಗಲೋ ಒಮ್ಮೊಮ್ಮೆ ಆನ್‌ ಆಗು​ತ್ತಿತ್ತು. 

ಇದರ ಜಾಡು ಹಿಡಿದ ಸಿಡಿಐಗೆ ದಿವ್ಯಾ ರಾಜ್ಯದ ಗಡಿ ದಾಟಿ​ದ್ದಾರೆ ಎನ್ನುವ ಸುಳಿವು ಸಿಕ್ಕಿತ್ತು. ಆದರೆ ಯಾವುದೂ ಕೂಡ ಖಚಿ​ತ​ವಾ​ಗು​ತ್ತಿ​ರ​ಲಿಲ್ಲ. ಹೀಗಾಗಿ ಸಿಐ​ಡಿಗೆ ದಿವ್ಯಾ ಜಾಡು ಹಿಡಿ​ಯು​ವುದು ದೊಡ್ಡ ಸವಾ​ಲಾಗಿ ಪರಿ​ಣ​ಮಿ​ಸಿ​ತ್ತು. ಪ್ರತಿ ಬಾರಿಯೂ ಆಕೆ ತಲೆ ಮರೆ​ಸಿ​ಕೊಳ್ಳಲು ಹಲ​ವರು ಸಹಾಯ ಮಾಡಿ​ದ್ದಾರೆ ಎನ್ನ​ಲಾ​ಗಿದೆ. ಆದರೆ ಇದನ್ನು ಸಿಐಡಿ ಖಚಿತ ಪಡಿ​ಸು​ತ್ತಿ​ಲ್ಲ. ಇತ್ತ ಸಿಐಡಿ ಬಲೆಯಿಂದ ತಪ್ಪಿಸಿಕೊಳ್ಳಲು ಮೊದಲು ಆಲಮೇಲ ಮಾರ್ಗವಾಗಿ ಸಂಚಾರ ಶುರು ಮಾಡಿದ ದಿವ್ಯಾ ಮತ್ತು ತಂಡ ಮುಂದೆ 4 ದಿನ ವಿಜಯಪುರ, ನಂತರ ಸೊಲ್ಲಾಪುರ, ಅಲ್ಲಿಂದ ಮತ್ತೆ ಕಲಬುರಗಿಗೆ ಬಂದು ತಲೆ ಮರೆಸಿಕೊಂಡಿತ್ತು. 

ಬಳಿ​ಕ ಪುಣೆಗೆ ಸಾಗಿ ಅಲ್ಲಿ ಉದ್ಯ​ಮಿಯ ಸುರೇಶ್‌ ಕಾಟೆ​ಗಾಂವ್‌ ಮನೆಯಲ್ಲಿ ಆಸರೆ ಪಡೆದಿತ್ತು. 18 ದಿನಗಳಲ್ಲಿ ದಿವ್ಯಾ 5 ದಿನ ಕಲಬುರಗಿ ಹೊರ ವಲಯದಲ್ಲೇ ಇದ್ದಳು ಎಂಬ ಮಾಹಿತಿ ಇದೆ. ಇವೆಲ್ಲದ್ದಕ್ಕೂ ಸಿಐಡಿ ವಿಚಾರಣೆಯೇ ಇದನ್ನು ಖಚಿತ ಪಡಿಸಬೇಕಿದೆ. ಆಸ​ರೆ​ ಪಡೆದ ಮನೆ ಬಾಗಿ​ಲ​ಲ್ಲೇ ಸಿಐಡಿ ಕಂಡು ದಿವ್ಯಾ ಗಡ​ಗ​ಡ!; 18 ದಿನ ಸಿಐಡಿ ಕಣ್ಣು ತಪ್ಪಿಸಿ ತಲೆ ಮರೆ​ಸಿ​ಕೊಂಡಿದ್ದ ಪಿಎಸ್‌ಐ ಹಗರಣದ ರೂವಾರಿ ದಿವ್ಯ ಹಾಗರಗಿ ಕೊನೆಗೂ ಸಿಕ್ಕಿದ್ದು ಮಹಾ​ರಾ​ಷ್ಟ್ರದ ಪುಣೆ​ಯ​ಲ್ಲಿ. ದಿವ್ಯಾ ಮತ್ತು ಆಕೆಯ ಪಟಾ​ಲಂನನ್ನು ಬಂಧಿ​ಸಲು ಸಿಐಡಿ 6 ತಂಡ ರಚಿಸಿಕೊಂಡು ಕಲಬುರಗಿಯಿಂದ ಕಾಶ್ಮೀರವರೆಗೂ ಸುತ್ತಾಡಿತ್ತು.

ಆಕೆ ಪುಣೆಯಲ್ಲಿದ್ದಾಳೆಂಬ ಸುಳಿವು ಸಿಕ್ಕ 11 ತಾಸಿ​ನಲ್ಲೇ ದಿವ್ಯಾ ಮತ್ತವರ 6 ಜನ​ರ ಪಟಾಲಂ​ನ​ನ್ನು ಬಂಧಿಸಿದ್ದಾ​ರೆ. ಹಗರಣದ ರೂವಾರಿ ದಿವ್ಯಾ ಪುಣೆಯಲ್ಲಿದ್ದಾಳೆಂದು ಗೊತ್ತಾಗಿದ್ದೆ ಗುರುವಾರ ಸಂಜೆ 6.30ಕ್ಕೆ, ದಿವ್ಯಾಳ ಆಪ್ತೆ ಶಹಾಬಾದ್‌ನ ಜ್ಯೋತಿ ಪಾಟೀಲ್‌ ಮೊಬೈಲ್‌ನಿಂದ ಈ ಸಂಗತಿ ಗೊತ್ತಾಗಿದ್ದೇ ತಡ ಸಿಐಡಿ ವಿಳಂಬ ಮಾಡದೆ ಪುಣೆ ದಾರಿ ಹಿಡಿದಿತ್ತು. ಪುಣೆಯ ಉದ್ಯಮಿ ಸುರೇಶ ಕಾಯೆಗಾಂವ್‌ ಆಸರೆ ನೀಡಿರೋ ಸುಳಿವು ಜ್ಯೋತಿ ನೀಡಿದ್ದಳು. ಜ್ಯೋತಿ ಪಾಟೀಲ್‌ ಮೂಲಕವೇ ಮಹತ್ವದ ವ್ಯಕ್ತಿಯೊಬ್ಬರಿಗೆ ಕರೆ ಮಾಡಿಸಿದ ಸಿಐಡಿ, ಆ ಕರೆ ಮೂಲಕ ದಿವ್ಯಾ ಇರು​ವಿ​ಕೆ​ಯನ್ನು ಖಚಿ​ತ​ಪ​ಡಿ​ಸಿ​ಕೊಂಡಿತು.

ಮಹಾರಾಷ್ಟ್ರ ಪೊಲೀಸ್‌ ನೆರವಿನಿಂದ ಪುಣೆಯಲ್ಲಿರೋ ಉದ್ಯ​ಮಿ ಸುರೇಶ್‌ ಕಾಟೆಗಾಂವ್‌ ಮನೆ ಮೇಲೆ ದಾಳಿ ನಡೆಸಿತ್ತು. ಮ​ಧ್ಯರಾತ್ರಿ 2.30ಕ್ಕೆ ನಡೆದ ದಾಳಿಯಲ್ಲಿ ಸುರೇಶ್‌ ಕಾಟೆ​ಗಾಂವ್‌, ದಿವ್ಯಾಳನ್ನು ತನ್ನ ಇನ್ನೊಂದು ಮನೆಯಲ್ಲಿಟ್ಟಿದ್ದಾಗಿ ಬಾಯಿಬಿಟ್ಟ. ಆತನನ್ನೇ ಮುಂದಿ​ಟ್ಟು​ಕೊಂಡು ಬಂದ ಸಿಐಡಿ ರಾತ್ರಿಯೇ ದಿವ್ಯಾ ತಂಗಿದ್ದ ಮನೆ ಬಾಗಿಲು ಬಡಿದಿದ್ದಾರೆ. ಹೊರಗಡೆಯಿಂದ ಸುರೇಶ್‌ ತಾನು ಬಂದಿದ್ದಾಗಿ ಹೇಳಿದಾಗ ಒಳಗಿದ್ದ ದಿವ್ಯಾ, ಬಾಗಿಲು ತೆರೆಯುತ್ತಿ​ದ್ದಂತೆ ಎದು​ರಿ​ಗೆ ಕಂಡದ್ದು ಡಿವೈಎಸ್ಪಿ ಶಂಕರಗೌಡ ಪಾಟೀಲ್‌ ಮತ್ತವರ ತಂಡ. ತಾನಡಿಗಿದ್ದ ಮನೆ ಮನೆ ಮುಂದೆಯೇ ಸಿಐಡಿ ತಂಡ​ವನ್ನು ಕಂಡು ದಿವ್ಯಾ ಕಂಗಾಲು, ಏನೊಂದೂ ತೋಚದೆ ಹೌಹಾರಿದ್ದಾಳೆ, ತಡವರಿಸಿದ್ದಾಳೆ, ತನ್ನ ಮುಂದೆಯೇ ಏನಾಗುತ್ತದೆ ಎಂಬುದು ಅರಿವಿಗೆ ಬಾರದಂತೆ ದಿಗ್ಭ್ರಾಂತಳಾಗಿದ್ದಾಳೆ.

11 ಗಂಟೆಯಲ್ಲೇ ಕಾರಾರ‍ಯಚರಣೆ ಖತಂ: ಇದೇ ಸ್ಥಿತಿಯಲ್ಲಿ ದಿವ್ಯಾಳ ವಶಕ್ಕೆ ಪಡೆದ ಸಿಐಡಿ ಶಂಕರಗೌಡ ಪಾಟೀಲ್‌ ಅದೇ ಮನೆಯಲ್ಲಿದ್ದ ಜ್ಞಾನ ಜ್ಯೋತಿ ಶಾಲೆಯ ಶಿಕ್ಷಕಿಯರಾದ ಅರ್ಚನಾ, ಸುನಿತಾರನ್ನು ವಶಕ್ಕೆ ಪಡೆದಿದ್ದಾರೆ. ಜೊತೆಗೆ ಆಶ್ರಯ ನೀಡಿದ್ದ ಸುರೇಶ ಕಾಟೇಗಾಂವ ಮತ್ತು ಆ ಮನೆಯಲ್ಲಿ ಅವರಿಗೆ ಸಹಾಯಕ್ಕಾಗಿ ಇದ್ದ ಕಾಳಿದಾಸ ಎನ್ನುವ ವ್ಯಕ್ತಿಯ ಬಂಧಿಸಿ ಬೆಳಗಿನ 5ಗಂಟೆಗೆ ಎಲ್ಲಾ ಕೆಲಸ ಮುಗಿಸಿ ಮಧ್ಯಾಹ್ನ 12ಕ್ಕೆ ಕಲಬುರಗಿಗೆ ಬಂದಿಳಿದಿದರು. 18 ದಿನಗಳ ಕಾಲ ತಲೆಮರೆಸಿಕೊಂಡಿದ್ದ ದಿವ್ಯಾ ಹಾಗೂ ತಂಡದ ಹಲವರು ಸೆರೆ ಸಿಕ್ಕರು.