ಲೈಕ್​ಗೋಸ್ಕರ್ ಒಂದು​ ಜೀವವನ್ನೇ ತೆಗೆದಳಾ ಈ ಮುಸ್ತಫಾ? ದೀಪಕ್​ ಸಾವಿನ ಹಿಂದಿರೋ ರಹಸ್ಯವೇನು? ನಿಜವೇನು?

ಕೇರಳದಲ್ಲಿ ಬಸ್ ಪ್ರಯಾಣದ ವೇಳೆ ಸಹ ಪ್ರಯಾಣಿಕನ ವಿರುದ್ಧ ಲೈಂ*ಗಿಕ ದೌರ್ಜನ್ಯದ ಆರೋಪ ಮಾಡಿ ಸೋಷಿಯಲ್ ಮೀಡಿಯಾ ಇನ್​ಫ್ಲುಯೆನ್ಸರ್​ ಒಬ್ಬರು ವಿಡಿಯೋ ಪೋಸ್ಟ್ ಮಾಡಿದ್ದರು. ಈ ವಿಡಿಯೋ ವೈರಲ್ ಆಗಿ, ಆರೋಪಕ್ಕೆ ಗುರಿಯಾದ ವ್ಯಕ್ತಿ ಅವಮಾನ ತಾಳಲಾರದೆ ಬದುಕನ್ನು ಕೊನೆಗೊಳಿಸಿಕೊಂಡಿದ್ದಾರೆ.

ಬಸ್​ಗಳಲ್ಲಿ ಹೋಗುವಾಗ ರಶ್​ನಲ್ಲಿಯೇ ತಮ್ಮ ತೀಟೆ ತೀರಿಸಿಕೊಳ್ಳುವ ಪುರುಷರು ಕೆಲವರು ಇದ್ದಾರೆ. ಆದರೆ ಕೆಲವೊಮ್ಮೆ ಇದು ಅಚಾನಕ್​ ಆಗಿ ಘಟಿಸುವುದು ಇದೆ. ಆದರೆ ಯಾವುದು ಉದ್ದೇಶಪೂರ್ವಕವಾಗಿ ಮಾಡಿದ್ದು, ಯಾವುದು ಅಚಾನಕ್​ ಆಗಿ ಆಗಿದ್ದು ಎಂದು ತಿಳಿಯುವುದೂ ಮಹಿಳೆಯರಿಗೆ ಎಷ್ಟೋ ಬಾರಿ ಕಷ್ಟವೇ. ಆದರೆ ಇಲ್ಲೊಂದು ಪ್ರಕರಣದಲ್ಲಿ, ಕೇರಳದಲ್ಲಿ ನಡೆದ ಘಟನೆ ಮಾತ್ರ ಭಾರಿ ಶಾಕಿಂಗ್​ ಎನ್ನುವಂತಿದೆ. ಬಸ್​ನಲ್ಲಿ ಹೋಗುವಾಗ ಸಹ ಪ್ರಯಾಣಿಕರೊಬ್ಬರು ತಮ್ಮನ್ನು ಟಚ್​ ಮಾಡಿದರು ಎಂದು ವಿಡಿಯೋ ಮಾಡಿ ಅದನ್ನು ಸೋಷಿಯಲ್​ ಮೀಡಿಯಾದಲ್ಲಿ ಶೇರ್​ ಮಾಡಿ, ಮಿಲಿಯನ್​ಗಟ್ಟಲೆ ವ್ಯೂವ್ಸ್​ ಪಡೆದ ಬಳಿಕ ಡಿಲೀಟ್​ ಮಾಡಿದ್ದಾಳೆ ಈ ಯುವತಿ. ಆದರೆ ಡಿಲೀಟ್​ ಆಗುವಷ್ಟರಲ್ಲಿಯೇ ಆ ವ್ಯಕ್ತಿ ನೊಂದು ಬದುಕನ್ನೇ ಕೊನೆಗೊಳಿಸಿಗೊಂಡಿದ್ದಾಳೆ.

ಸೋಷಿಯಲ್​ ಮೀಡಿಯಾ ಇನ್​ಫ್ಲುಯೆನ್ಸರ್​

ಈಕೆಯ ಹೆಸರು ಶಿಮ್ಜಿತಾ ಮುಸ್ತಫಾ. ಸೋಷಿಯಲ್​ ಮೀಡಿಯಾ ಇನ್​ಫ್ಲುಯೆನ್ಸರ್​. ಬಸ್​ನಲ್ಲಿ ಹೋಗುವಾಗಲೂ ಕೈಯಲ್ಲಿ ಸೆಲ್ಫಿ ಸ್ಟಿಕ್​ ಹಿಡಿದು ವಿಡಿಯೋ ಮಾಡುತ್ತಲೇ ಹೋಗಿದ್ದಾರೆ. ದೀಪಕ್​ ಎನ್ನುವವರು ಈಕೆಯ ಹಿಂದೆ ನಿಂತಿದ್ದಾರೆ. ಆ ಸಮಯದಲ್ಲಿ ದೀಪಕ್​ ತಮ್ಮನ್ನು ಟಚ್​ ಮಾಡಿದ್ದರು ಎನ್ನುವುದು ಶಿಮ್ಜಿತಾ ಮುಸ್ತಫಾ ಆರೋಪ. ದೀಪಕ್ ವಿರುದ್ಧ ಲೈಂ*ಗಿಕ ದೌರ್ಜನ್ಯದ ಬಗ್ಗೆ ಬರೆದು ಅದನ್ನು ತಮ್ಮ ಸೋಷಿಯಲ್​ ಮೀಡಿಯಾದಲ್ಲಿ ಪೋಸ್ಟ್​ ಮಾಡಿದ್ದರು ಶಿಮ್ಜಿತಾ. ಇನ್ನು ಹೆಣ್ಣುಮಕ್ಕಳ ಮೇಲೆ ದೌರ್ಜನ್ಯ ಎಂದಾಕ್ಷಣ ಹಿಂದೆ ಮುಂದೆ ನೋಡದೆ, ಅದರ ಸತ್ಯಾಸತ್ಯತೆಯನ್ನೂ ತಿಳಿಯದೇ ಕಮೆಂಟ್​ ಹಾಕುವ ಅಭಿಮಾನಿಗಳು ಕೇಳಬೇಕೆ? ಅದರಲ್ಲಿಯೂ ಇಂಥ ವಿಡಿಯೋ ಎಂದ ಮೇಲೆ ಸಹಜವಾಗಿ ಕ್ಲಿಕ್​ ಮಾಡುವವರ ಸಂಖ್ಯೆ ಏರುತ್ತದೆ. ಅದೇ ರೀತಿ, ಈ ವಿಡಿಯೋಗೂ ಮಿಲಿಯನ್​ಗಟ್ಟಲೆ ವ್ಯೂವ್ಸ್​ ಬಂದು ಕಮೆಂಟ್​ಗಳ ಸುರಿಮಳೆಯಾಯಿತು.

ಇನ್ನಷ್ಟು ರೋಚಕ

ಇದೇ ಖುಷಿಯಲ್ಲಿ ಮಾರನೆಯ ದಿನ ಈಕೆ, ಈ ಘಟನೆಯ ಬಗ್ಗೆ ಇನ್ನಷ್ಟು ರೋಚಕವಾಗಿ ಇನ್ನೊಂದು ಪೋಸ್ಟ್​ ಮಾಡಿದಾಗಲೂ ಅದು ಕೂಡ ಕಮೆಂಟ್​ಗಳ ಸುರಿಮಳೆಯಿಂದಲೇ ತುಂಬಿತು. ಒಂದು ವೇಳೆ ದೌರ್ಜನ್ಯ ಆಗಿದ್ದರೆ, ಕನಿಷ್ಠ ಪೊಲೀಸರಿಗೆ ದೂರನ್ನಾದರೂ ನೀಡುವ ಕೆಲಸವನ್ನೂ ಮಾಡಲಿಲ್ಲ. ಆದರೆ ಈ ವಿಡಿಯೋದಲ್ಲಿ ದೀಪಕ್​ ಅವರ ಮುಖ ಸ್ಪಷ್ಟವಾಗಿ ಕಾಣುತ್ತಿದ್ದ ಹಿನ್ನೆಲೆಯಲ್ಲಿ, ಸೋಷಿಯಲ್​ ಮೀಡಿಯಾ ಎಂದರೇನು ಎಂದೇ ಅರಿಯದ ದೀಪಕ್​ ಅವರ ತಂದೆ-ತಾಯಿಗೂ ವಿಷಯ ಮುಟ್ಟಿತು. ದೀಪಕ್​ ಅವರನ್ನು ಎಲ್ಲರೂ ನೋಡುವ ವೈಖರಿಯೇ ಬದಲಾಗಿ ಹೋಯಿತು.

ಬದುಕು ಅಂತ್ಯ

ಎಲ್ಲೆಡೆಯಿಂದ ಬಂದ ಕೆಟ್ಟ ಕಮೆಂಟ್ಸ್​, ಟೀಕೆಗಳನ್ನು ಸಹಿಸಿಕೊಳ್ಳಲು ಆಗದ 41 ವರ್ಷದ ಮಾರಾಟ ವ್ಯವಸ್ಥಾಪಕ ದೀಪಕ್ ಅವರು ಜೀವವನ್ನು ಕೊನೆಗೊಳಿಸಿಕೊಂಡರು. ಅವರು ಸತ್ತ ಬಳಿಕ, ಈಕೆ ಹಾಕಿರುವ ವಿಡಿಯೋ ಡೌನ್​ಲೋಡ್​ ಮಾಡಿಕೊಂಡವರು ಅದನ್ನು ನೋಡಿದಾಗ, ಅದರಲ್ಲಿ ಆಕೆ ನಗುನಗುತ್ತಾ ಆ ವಿಡಿಯೋ ಮಾಡುತ್ತಿರುವುದು ಕಂಡುಬಂದಿದೆ. ದೀಪಕ್​ ಅವರ ಕೈ ಈಕೆಗೆ ಟಚ್​ ಆಗಿದ್ದು ನಿಜವಾಗಿದ್ದರೂ ಇದು ಉದ್ದೇಶಪೂರ್ವಕವೋ, ದುರುದ್ದೇಶವೋ ಎನ್ನುವುದು ಗೊತ್ತಾಗುತ್ತಿಲ್ಲ ಎನ್ನುತ್ತಿದ್ದಾರೆ. ಆದರೆ ಯಾವುದೇ ಹೆಣ್ಣು ಬಸ್​ನಲ್ಲಿ ಅಥವಾ ಇನ್ನೆಲ್ಲಿಯೋ ಪ್ರಯಾಣಿಸುವ ಸಂದರ್ಭದಲ್ಲಿ ಈಗ ಬಾಡಿ ಪಾರ್ಟ್​ ಟಚ್​ ಮಾಡಿದರೆ ಆಕೆಯ ಕೋಪ ಯಾವ ಮಟ್ಟಿಗೆ ಹೋಗುತ್ತದೆ ಎನ್ನುವುದು ಮುಖದ ಭಾವನೆಯಲ್ಲಿಯೇ ತಿಳಿಯುತ್ತದೆ. ಆದರೆ ಈ ವಿಡಿಯೋದಲ್ಲಿ ಆ ಘಟನೆ ನಡೆದ ಮೇಲೆಯೂ ಮುಗುಳ್ನಗುತ್ತಲೇ ಇದ್ದಾರೆ ಎನ್ನುವ ಆರೋಪವೂ ಇದೆ. ಇದು ಕೇವಲ ಲೈಕ್​ಗೋಸ್ಕರ ಮಾಡಿದ ವಿಡಿಯೋ ಎನ್ನುವ ಆರೋಪ ಕೇಳಿಬರುತ್ತಿದೆ. ಸತ್ಯಾಸತ್ಯತೆ ಏನು ಎನ್ನುವುದು ಇನ್ನಷ್ಟೇ ತಿಳಿಯಬೇಕಿದೆ!

ಒಬ್ಬನೇ ಮಗ

ಒಬ್ಬನೇ ಮಗನನ್ನು ಕಳೆದುಕೊಂಡಿರುವ ದುಃಖದಲ್ಲಿ ದೀಪಕ್​ ಕುಟುಂಬಸ್ಥರು ಇದ್ದಾರೆ. ಪೊಲೀಸರಿಗೆ ದೂರನ್ನೂ ದಾಖಲು ಮಾಡದೇ, ವಿಡಿಯೋ ಹಾಕಿ ಮಿಲಿಯನ್​ಗಟ್ಟಲೆ ವ್ಯೂವ್ಸ್​ ಪಡೆದ ಬಳಿಕ, ತಾನು ಹೇಳ್ತಿರೋದು ನಿಜ ಎಂದು ಹೇಳುವುದಕ್ಕಾದರೂ ವಿಡಿಯೋ ಇಟ್ಟುಕೊಳ್ಳುವ ಬದಲು ಅದನ್ನು ಅನುಮಾನಾಸ್ಪದವಾಗಿ ಡಿಲೀಟ್​ ಮಾಡಿರುವುದು ಏಕೆ ಎನ್ನುವ ಪ್ರಶ್ನೆ ಶುರುವಾಗಿದೆ. ಈಕೆಯ ವಿರುದ್ಧ ಕಠಿಣಾತಿಕಠಿಣ ಕ್ರಮ ತೆಗೆದುಕೊಳ್ಳಬೇಕು, ದೀಪಕ್​ ಕುಟುಂಬಕ್ಕೆ ನ್ಯಾಯ ಒದಗಿಸಬೇಕು ಎನ್ನುವ ಕೂಗು ಜೋರಾಗಿದೆ. ಒಬ್ಬರ ಪ್ರಾಣವನ್ನು ಪಡೆದಿರುವ ಈಕೆ ಮಾಡಿದ್ದು ಕೊ*ಲೆ ಎನ್ನಲಾಗುತ್ತಿದೆ. ಪೊಲೀಸರು ಅಸಹಜ ಸಾವಿನ ಪ್ರಕರಣ ದಾಖಲು ಮಾಡಿದ್ದಾರೆ. ಮುಂದೆ ಏನಾಗುತ್ತೋ ನೋಡಬೇಕಿದೆ.