'ಚಪ್ಪಲಿ ಹೊಲಿಯೋಕೆ ಲಾಯಕ್ಕು ನೀನು..' ಬೆಂಗಳೂರಿನ ಇಂಡಿಗೋ ಟ್ರೇನಿ ಪೈಲಟ್‌ಗೆ ಜಾತಿ ನಿಂದನೆ!

ಬೆಂಗಳೂರು ಮೂಲದ ಟ್ರೇನಿ ಪೈಲಟ್‌ ಶರಣ್‌ ಕುಮಾರ್‌, ಇಂಡಿಗೋ ಏರ್‌ಲೈನ್ಸ್‌ನ ಮೂವರು ಅಧಿಕಾರಿಗಳ ವಿರುದ್ಧ ಜಾತಿ ಆಧಾರಿತ ಕಿರುಕುಳದ ಆರೋಪ ಮಾಡಿದ್ದಾರೆ. ಈ ಘಟನೆ ಗುರಗಾಂವ್‌ನಲ್ಲಿರುವ ಇಂಡಿಗೋ ಕಂಪನಿಯ ಕೇಂದ್ರ ಕಚೇರಿಯಲ್ಲಿ ನಡೆದಿದೆ.

ಬೆಂಗಳೂರು (ಜೂ.23): ಇಂಡಿಗೋ ಏರ್‌ಲೈನ್ಸ್‌ನ ಮೂವರು ಅಧಿಕಾರಿಗಳ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗಿದೆ. ಬೆಂಗಳೂರು ಮೂಲದ ಟ್ರೇನಿ ಪೈಲಟ್‌ ಶರಣ್‌ ಕುಮಾರ್‌, ಇವರುಗಳ ಮೇಲೆ ಜಾತಿ ಆಧಾರಿತ ಕಿರುಕುಳದ ಆರೋಪ ಮಾಡಿದ್ದಾರೆ. ಈ ಘಟನೆ ಗುರಗಾಂವ್‌ನಲ್ಲಿರುವ ಇಂಡಿಗೋ ಕಂಪನಿಯ ಕೇಂದ್ರ ಕಚೇರಿಯಲ್ಲಿ ನಡೆದಿದೆ ಎನ್ನಲಾಗಿದೆ. ಈ ಮೂವರು ಅಧಿಕಾರಿಗಳು ತಮಗೆ ಮೌಖಿಕ ನಿಂದನೆ ಮತ್ತು ತಾರತಮ್ಯ ಆರೋಪ ಮಾಡಿದ್ದಾರೆ. ಎಸ್‌ಸಿ/ಎಸ್‌ಟಿ ಕಾಯ್ದೆ ಮತ್ತು ಬಿಎನ್‌ಎಸ್ ಅಡಿಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದೆ. ಪೊಲೀಸರು ಸಾಕ್ಷ್ಯಗಳನ್ನು ಸಂಗ್ರಹಿಸಲು ಪ್ರಾರಂಭಿಸಿದ್ದಾರೆ.

ಇಂಡಿಗೋ ಏರ್‌ಲೈನ್ಸ್‌ನ ಮೂವರು ಅಧಿಕಾರಿಗಳ ವಿರುದ್ಧ ಎಸ್‌ಸಿ/ಎಸ್‌ಟಿ (ದೌರ್ಜನ್ಯ ತಡೆ) ಕಾಯ್ದೆ ಮತ್ತು ಬಿಎನ್‌ಎಸ್ ಅಡಿಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದೆ ಎಂದು ಟೈಮ್ಸ್‌ ಆಫ್‌ ಇಂಡಿಯಾ ವರದಿ ಮಾಡಿದೆ.

ಎಸ್‌ಸಿ/ಎಸ್‌ಟಿ (ದೌರ್ಜನ್ಯ ತಡೆ) ಕಾಯ್ದೆ ಮತ್ತು ಬಿಎನ್‌ಎಸ್ ಅಡಿಯಲ್ಲಿ ಪ್ರಕರಣವನ್ನು ಆರಂಭದಲ್ಲಿ ಬೆಂಗಳೂರಿನಲ್ಲಿ ಜೀರೋ ಎಫ್‌ಐಆರ್ ಆಗಿ ದಾಖಲಿಸಲಾಗಿತ್ತು, ಆದರೆ ಅದನ್ನು ಗುರಗಾಂವ್‌ನ ಡಿಎಲ್‌ಎಫ್ -1 ಪೊಲೀಸ್ ಠಾಣೆಗೆ ವರ್ಗಾಯಿಸಲಾಗಿದೆ.

ಆರೋಪಗಳ ಕುರಿತು ಪ್ರತಿಕ್ರಿಯಿಸಿರುವ ಇಂಡಿಗೋ, ಯಾವುದೇ ರೀತಿಯ ತಾರತಮ್ಯ, ಕಿರುಕುಳ ಅಥವಾ ಪಕ್ಷಪಾತದ ಬಗ್ಗೆ ಶೂನ್ಯ ಸಹಿಷ್ಣುತಾ ನೀತಿಯನ್ನು ಎತ್ತಿಹಿಡಿಯುತ್ತದೆ ಮತ್ತು ಎಲ್ಲರನ್ನೂ ಒಳಗೊಳ್ಳುವ ಮತ್ತು ಗೌರವಾನ್ವಿತ ಕೆಲಸದ ಸ್ಥಳವಾಗಿರಲು ದೃಢವಾಗಿ ಬದ್ಧವಾಗಿದೆ ಎಂದು ಹೇಳಿದೆ. "ಇಂಡಿಗೋ ಈ ಆಧಾರರಹಿತ ಹಕ್ಕುಗಳನ್ನು ಬಲವಾಗಿ ನಿರಾಕರಿಸುತ್ತದೆ ಮತ್ತು ಅದರ ನ್ಯಾಯಸಮ್ಮತತೆ, ಸಮಗ್ರತೆ ಮತ್ತು ಹೊಣೆಗಾರಿಕೆಯ ಮೌಲ್ಯಗಳಿಗೆ ಬದ್ಧವಾಗಿದೆ ಮತ್ತು ಅಗತ್ಯವಿರುವಂತೆ ಕಾನೂನು ಜಾರಿ ಸಂಸ್ಥೆಗಳಿಗೆ ತನ್ನ ಬೆಂಬಲವನ್ನು ನೀಡುತ್ತದೆ" ಎಂದು ವಿಮಾನಯಾನ ಸಂಸ್ಥೆಯ ವಕ್ತಾರರು ತಿಳಿಸಿದ್ದಾರೆ.

ದೂರಿನಲ್ಲಿ ಇರೋದೇನು?

ಏಪ್ರಿಲ್ 28 ರಂದು ಏರ್‌ಲೈನ್ಸ್‌ನ ಪ್ರಧಾನ ಕಚೇರಿಯಾದ ಎಮಾರ್ ಕ್ಯಾಪಿಟಲ್ ಟವರ್ 2 ರಲ್ಲಿ ನಡೆದ ಸಭೆಯಲ್ಲಿ ಬೆಂಗಳೂರಿನ 35 ವರ್ಷದ ತರಬೇತಿ ಪೈಲಟ್ ಶರಣ್‌ ಕುಮಾರ್‌, ತಮ್ಮ ಹಿರಿಯ ಸಿಬ್ಬಂದಿಯಾದ ತಪಸ್ ಡೇ, ಮನೀಶ್ ಸಹಾನಿ ಮತ್ತು ಕ್ಯಾಪ್ಟನ್ ರಾಹುಲ್ ಪಾಟೀಲ್ ವಿರುದ್ಧ ಮೌಖಿಕ ನಿಂದನೆ ಮತ್ತು ಜಾತಿ ಆಧಾರಿತ ತಾರತಮ್ಯ ಆರೋಪ ಮಾಡಿದ್ದಾರೆ. ದೂರುದಾರರ ಪ್ರಕಾರ, ಅವರು ಕಚೇರಿಗೆ ಬಂದ ತಕ್ಷಣ ಕಿರುಕುಳ ಪ್ರಾರಂಭವಾಯಿತು, ಡೇ ಅವರು ತಮ್ಮ ಫೋನ್ ಮತ್ತು ಬ್ಯಾಗ್ ಅನ್ನು "ಅವಮಾನಕರ ರೀತಿಯಲ್ಲಿ" ಹೊರಗೆ ಇಡಲು ಆದೇಶಿಸಿದ್ದರು ಎನ್ನಲಾಗಿದೆ. "ಅವರ ಸೂಚನೆಯು ನಂತರದ ನನ್ನ ಮೇಲೆ ಜಾತಿ ನಿಂದನೆ ಮತ್ತು ತಾರಮ್ಯಕ್ಕೆ ಕಾರಣವಾಯಿತು" ಎಂದು ತರಬೇತಿ ಪೈಲಟ್ ತನ್ನ ದೂರಿನಲ್ಲಿ ತಿಳಿಸಿದ್ದಾರೆ.

ಮಧ್ಯಾಹ್ನ 3.30 ರಿಂದ ನಡೆದ 30 ನಿಮಿಷಗಳ ಸಭೆಯಲ್ಲಿ ಮೂವರು ಅಧಿಕಾರಿಗಳು ಜಾತಿ ನಿಂದನೆ ಹೇಳಿಕೆಗಳನ್ನು ನೀಡಿದ್ದಾರೆ ಎಂದು ಶರಣ್‌ ಕುಮಾರ್‌ ಹೇಳಿದ್ದಾರೆ. "ನೀವು ವಿಮಾನ ಹಾರಿಸಲು ಯೋಗ್ಯರಲ್ಲ, ವಾಪಾಸ್‌ ಹೋಗಿ ಚಪ್ಪಲಿ ಹೊಲಿಯೋದನ್ನ ಶುರು ಮಾಡು" ಮತ್ತು "ನೀವು ಇಲ್ಲಿ ವಾಚ್‌ಮನ್‌ ಆಗೋಕೆ ಕೂಡ ಯೋಗ್ಯರಲ್ಲ" ಎಂಬಂತಹ ಹೇಳಿಕೆಗಳು ಅದರಲ್ಲಿ ಸೇರಿವೆ. ಕಿರುಕುಳ ದಿನಗಟ್ಟಲೆ ಮುಂದುವರೆದಿದ್ದು, ರಾಜೀನಾಮೆ ನೀಡುವಂತೆ ಒತ್ತಡ ಹೇರಲು ಉದ್ದೇಶಿಸಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ. "ಅವರು ಮಾಡಿದ ಹೇಳಿಕೆಗಳು ಅವಮಾನಕರವಾಗಿದ್ದವು ಮಾತ್ರವಲ್ಲದೆ, ಪರಿಶಿಷ್ಟ ಜಾತಿಯ ವ್ಯಕ್ತಿಯಾಗಿ ನನ್ನ ಗುರುತು ಮತ್ತು ಸ್ಥಾನಮಾನವನ್ನು ಕುಗ್ಗಿಸುವ ಗುರಿಯನ್ನು ಹೊಂದಿವೆ" ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಈ ಕಿರುಕುಳದಲ್ಲಿ "ವೃತ್ತಿಪರ ಬಲಿಪಶುಗಳಾಗುವುದು" ಸೇರಿದ್ದು, ನ್ಯಾಯಸಮ್ಮತವಲ್ಲದ ಸಂಬಳ ಕಡಿತ, ಬಲವಂತದ ಮರುತರಬೇತಿ ಅವಧಿಗಳು, ಪ್ರಯಾಣ ಸವಲತ್ತುಗಳನ್ನು ರದ್ದುಗೊಳಿಸುವುದು ಮತ್ತು ಅನಗತ್ಯ ಎಚ್ಚರಿಕೆ ಪತ್ರಗಳು ಸೇರಿವೆ. ದೂರುದಾರರು ಉನ್ನತ ಅಧಿಕಾರಿಗಳು ಮತ್ತು ಕಂಪನಿಯ ನೈತಿಕ ಸಮಿತಿಗೆ ವಿಷಯವನ್ನು ತಿಳಿಸಿದರೂ, ಯಾವುದೇ ಕ್ರಮ ಕೈಗೊಳ್ಳಲಾಗಿಲ್ಲ ಎಂದು ಹೇಳಿಕೊಂಡಿದ್ದು, ಕಾನೂನು ಹಸ್ತಕ್ಷೇಪಕ್ಕಾಗಿ ಎಸ್‌ಸಿ/ಎಸ್‌ಟಿ ಸೆಲ್‌ಅನ್ನು ಸಂಪರ್ಕಿಸುವಂತೆ ಒತ್ತಾಯಿಸಿದೆ.

"ಇತರರ ಮುಂದೆ ಜಾತಿವಾದಿ ಮತ್ತು ನಿಂದನೀಯ ಹೇಳಿಕೆಗಳನ್ನು ನೀಡಲಾಗಿದ್ದು, ಇವು ಕಾನೂನಿನಡಿಯಲ್ಲಿ ಗಂಭೀರ ಅಪರಾಧಗಳಾಗಿವೆ: ನೀವು ವಿಮಾನ ಹಾರಿಸಲು ಯೋಗ್ಯರಲ್ಲ, ಹಿಂತಿರುಗಿ ಚಪ್ಪಲಿ ಹೊಲಿಯಿರಿ, ನನ್ನ ಪೂರ್ವಜರ ಜಾತಿಯ ಕೆಲಸವನ್ನು ಉಲ್ಲೇಖಿಸಿ. ನೀವು ನನ್ನ ಶೂ ನೆಕ್ಕಲು ಸಹ ಅರ್ಹರಲ್ಲ ಎಂದು ಅವರು ಹೇಳಿದರು" ಎಂದು ಶರಣ್ ಅವರ ತಂದೆ ಅಶೋಕ್ ಕುಮಾರ್ ಆರೋಪಿಗಳಾದ ತಪಸ್ ಡೇ, ಮನೀಶ್ ಸಹಾನಿ ಮತ್ತು ರಾಹುಲ್ ಪಾಟೀಲ್ ವಿರುದ್ಧದ ದೂರಿನಲ್ಲಿ ತಿಳಿಸಲಾಗಿದೆ.