ಸೈಬರ್​ ಕ್ರೈಂಗೆ ಬಲಿಯಾಗಬಾರ್ದಾ? ದುಡ್ಡು ಸೇಫ್​ ಆಗಿರ್ಬೇಕಾ? ಹಾಗಿದ್ರೆ ಕನ್ನಡದಲ್ಲಿ ಮಾತನಾಡಿ! ಪೊಲೀಸ್​ ಅಧಿಕಾರಿ ಮಾತು ಕೇಳಿ

ಸೈಬರ್​ ಕ್ರೈಂ ತಡೆಗೆ ಡಿವೈಎಸ್ಪಿ ರಾಜೇಶ್​ ಸಲಹೆ: ಅಪರಿಚಿತ ಕರೆ, ಲಿಂಕ್​ಗಳಿಗೆ ಸ್ಪಂದಿಸಬೇಡಿ, ಒಟಿಪಿ ಹಂಚಿಕೊಳ್ಳಬೇಡಿ. ಸೈಬರ್​ ವಂಚಕರಿಗೆ ಪ್ರಾದೇಶಿಕ ಭಾಷೆ ಗೊತ್ತಿಲ್ಲದ್ದರಿಂದ ಕನ್ನಡದಲ್ಲಿ ಮಾತನಾಡಿ ಕರೆ ಕಟ್​ ಮಾಡಿಸಿ. ಹಣ ವರ್ಗಾವಣೆಗೆ ಮುನ್ನ ಎಚ್ಚರಿಕೆ ವಹಿಸಿ. ಮ್ಯಾಟ್ರಿಮೋನಿ ಸೈಟ್​ಗಳ ಬಗ್ಗೆ ಎಚ್ಚರ. ಇಲ್ಲಿದೆ ಡಿಟೇಲ್ಸ್​...

ಇಂದು ತಂತ್ರಜ್ಞಾನ ಮುಂದುವರೆದಂತೆಲ್ಲಾ ಸೈಬರ್​ ಕ್ರೈಂ ಹೆಚ್ಚಾಗುತ್ತಿದೆ. ಫೋನ್​ಗಳಲ್ಲಿ ಕರೆ ಮಾಡಿ ಅದನ್ನು ಒತ್ತಿ, ಇದನ್ನು ಒತ್ತಿ ಎನ್ನುವುದು, ಎರಡು ಗಂಟೆಗಳಲ್ಲಿ ನಿಮ್ಮ ಫೋನ್​ ನಂಬರ್​ ಬ್ಲಾಕ್​ ಆಗತ್ತೆ ಎನ್ನುವ ಕರೆ ಬರುವುದು, ಈಗ ಕಳುಹಿಸಿದ ಲಿಂಕ್​ ಒತ್ತಿದರೆ ನಿಮ್ಮ ಅಕೌಂಟ್​ಗೆ ಹಣ ವರ್ಗಾವಣೆ ಆಗುತ್ತದೆ ಎನ್ನುವುದು, ನಿಮಗೆ ಪಾರ್ಸೆಲ್​ ಬಂದಿದ್ದು ಅದನ್ನು ಕಸ್ಟಮ್ಸ್​ನವರು ಹಿಡಿದುಕೊಂಡಿದ್ದಾರೆ, ಕೂಡಲೇ ಇಷ್ಟು ಹಣ ಈ ಅಕೌಂಟ್​ಗೆ ಹಾಕಿ ಎನ್ನುವುದು... ಹೀಗೆ ಫೋನ್​ ಕರೆಗಳು, ಲಿಂಕ್​ಗಳು ಬರುವುದು ಸರ್ವೇ ಸಾಮಾನ್ಯವಾಗಿದೆ. ಇದನ್ನೆಲ್ಲಾ ನಂಬಿ ಬಂದಿರುವ ಲಿಂಕ್​ ಒತ್ತಿದ್ರೋ ಇಲ್ಲವೇ ಆ ನಂಬರ್​ ಒತ್ತಿ, ಈ ನಂಬರ್​ ಒತ್ತಿ ಎಂದಾಕ್ಷಣ ಆ ಸಂಖ್ಯೆಯನ್ನು ಹಿಂದೂ ಮುಂದೂ ನೋಡದೇ ಒತ್ತಿಬಿಟ್ಟರೋ ನಿಮ್ಮ ಬ್ಯಾಂಕ್ ಅಕೌಂಟ್​ ಖಾಲಿಯಾಗೋದು ಗ್ಯಾರೆಂಟಿ. ಇತ್ತೀಚೆಗಂತೂ ನಿಮ್ಮ ಮೊಬೈಲ್​ ನಂಬರ್​ ಮಿಸ್​ಯೂಸ್ ಆಗುತ್ತಿದ್ದು, ಎರಡು ಗಂಟೆಗಳಲ್ಲಿ ನಿಮ್ಮ ಮೊಬೈಲ್​ ಸಂಖ್ಯೆ ಸ್ಟಾಪ್​ ಆಗುತ್ತದೆ, ನಾವು ಮೊಬೈಲ್​ ಅಥಾರಿಯವರು ಕಾಲ್​ ಮಾಡುತ್ತಿದ್ದೇವೆ, ಕೂಡಲೇ 9 ಅನ್ನು ಒತ್ತಿ ಎಂಬ ಸಂದೇಶ ಹಲವರ ಮೊಬೈಲ್​ಗೆ ಬರುತ್ತಿದೆ. ಇದನ್ನು ನಂಬಿ ಎಲ್ಲಿ ಮೊಬೈಲ್​ ಬ್ಲಾಕ್​ ಆಗಿ ಹೋಗುತ್ತದೆ ಎಂದು ಒತ್ತಿಬಿಟ್ಟರೆ ನಿಮ್ಮ ತಲೆ ಮೇಲೆ ನೀವೇ ಚಪ್ಪಡಿ ಕಲ್ಲು ಎಳೆದುಕೊಂಡಂತೆ!

ಹೌದು. ಇಂಥ ಹಲವು ಸೈಬರ್​ ಕ್ರೈಂಗಳು ದಿನನಿತ್ಯ ನಡೆಯುತ್ತಲೇ ಇವೆ. ಮೊಬೈಲ್​ ಫೋನ್​ನಲ್ಲಿಯೇ ಹಣಕಾಸಿನ ವ್ಯವಹಾರವೂ ನಡೆಯುವ ಹಿನ್ನೆಲೆಯಲ್ಲಿ ಅಲ್ಲಿಗೆ ಬರುವ ಓಟಿಪಿಗಳನ್ನು ಮೂರನೆಯ ವ್ಯಕ್ತಿಗೆ ಹೇಳಿದರೆ, ಅಥವಾ ಲಿಂಕ್​ಗಳನ್ನು ಒತ್ತಿಬಿಟ್ಟರೆ ನಿಮ್ಮ ಜೀವನಪೂರ್ತಿ ದುಡಿಮೆಯ ದುಡ್ಡು ಬೇರೆಯವರ ಪಾಲಾಗುವುದು ಶತಃಸಿದ್ಧ. ಅದನ್ನು ವಾಪಸ್​ ಪಡೆಯುವುದು ಕೂಡ ಎಷ್ಟೋ ಬಾರಿ ಅಸಾಧ್ಯವಾಗಿರುವ ಮಾತೇ ಆಗಿದೆ. ಪೊಲೀಸ್​ ಠಾಣೆ, ಸೈಬರ್​ ಸೆಂಟರ್​ ಅಲೆದೂ ಅಲೆದೂ ನೀವು ಆಯಾಸಗೊಂಡರೂ ಯಾರಿಗೋ ಹೋಗಿರುವ ಹಣ ವಾಪಸ್​ ಬರುವುದು ಸುಲಭದ ಮಾತಲ್ಲ. ಈ ಬಗ್ಗೆ ಪೊಲೀಸರು ಅದೆಷ್ಟೇ ಸೂಚನೆ, ಎಚ್ಚರಿಕೆ ಕೊಟ್ಟರೂ, ಹಣದ ಆಸೆಗೆ ಲಿಂಕ್​ ಒತ್ತುವವರ ಸಂಖ್ಯೆ ಹೆಚ್ಚುತ್ತಲೇ ಇದೆ. ಅದರಲ್ಲಿಯೂ ಇಂಥದ್ದಕ್ಕೆ ಬಲಿಯಾಗುವುದು ಸುಶಿಕ್ಷಿತರು, ಎಜುಕೇಟೆಡ್​ ಎನ್ನಿಸಿಕೊಂಡವರೇ, ದೊಡ್ಡ  ದೊಡ್ಡ ಹುದ್ದೆಯಲ್ಲಿ ಇರುವವರೇ ಎನ್ನುವುದು ಕೂಡ ಸೋಜಿಗದ ಸಂಗತಿ.

ಖಾಸಗಿ ಫೋಟೋ ಇಟ್ಕೊಂಡು ಆಡಿಸ್ತಿದ್ದ, ಪೊಲೀಸ್‌ ಠಾಣೆಗೆ ಆಕೆ ಬಂದಾಗ... ಅಂದಿನ ಘಟನೆ ವಿವರಿಸಿದ ಡಿವೈಎಸ್ಪಿ ರಾಜೇಶ್‌

ಇದೇ  ಕಾರಣಕ್ಕೆ ಡಿವೈಎಸ್ಪಿ ರಾಜೇಶ್​ ಅವರು ಒಂದು ಪರಿಹಾರ ನೀಡಿದ್ದಾರೆ. ರಾಜೇಶ್​ ಗೌಡ ಯೂಟ್ಯೂಬ್​ ಚಾನೆಲ್​ ಜೊತೆ ಮಾತನಾಡಿರುವ ರಾಜೇಶ್​ ಅವರು, ಇಂಥ ಸಂದೇಹಾತ್ಮಕ ಕರೆಗಳು ಬಂದರೆ,  ಕನ್ನಡದಲ್ಲಿ ಮಾತನಾಡುವುದೇ ದೊಡ್ಡ ಪರಿಹಾರ ಎಂದಿದ್ದಾರೆ! ಹೌದು. ಸೈಬರ್​ ಕ್ರೈಮ್​ನವರು ಹೆಚ್ಚಾಗಿ ಎಲ್ಲಿಂದಲೋ ಕುಳಿತು ಇಂಥ ಕಿತಾಪತಿ ಮಾಡುತ್ತಿರುತ್ತಾರೆ. ಅವರಿಗೆ ಇಂಗ್ಲಿಷ್​, ಹಿಂದಿ ಬಿಟ್ಟು ಪ್ರಾದೇಶಿಕ ಭಾಷೆ ಗೊತ್ತಿರುವುದಿಲ್ಲ. ಒಂದು ವೇಳೆ ಅವರು ಈ ರೀತಿಯ ಯಾವುದೇ ಸಂದೇಹಾತ್ಮಕವಾಗಿ ಮಾತನಾಡಿದರೆ ನಿಮಗೆ ಇಂಗ್ಲಿಷ್​, ಹಿಂದಿ ಗೊತ್ತು ಎಂದು ಪೋಸ್​ ಕೊಡಲು ಹೋಗಬೇಡಿ. ಕನ್ನಡದಲ್ಲಿ ಮಾತನಾಡಿ. ಆಗ ಅವರೇ ಕರೆ ಕಟ್​ ಮಾಡುತ್ತಾರೆ. ಅದನ್ನು ಬಿಟ್ಟು ನಿಮಗೆ ಎಲ್ಲಾ ಭಾಷೆ ಗೊತ್ತು ಎಂದು ಅವರ ಬಳಿ ಇಂಗ್ಲಿಷ್​, ಹಿಂದಿಯಲ್ಲಿ ಮಾತನಾಡಿದರೆ ನಿಮ್ಮನ್ನು ಮರಳು ಮಾಡಿ ಸುಲಭದಲ್ಲಿ ಫೂಲ್​ ಮಾಡುತ್ತಾರೆ ಎಂದು ಹೇಳಿದ್ದಾರೆ.

ಇದನ್ನು ಹೊರತುಪಡಿಸಿದರೆ, ರಾಜೇಶ್​ ಅವರು ನೀಡಿರುವ ಸಲಹೆ ಎಂದರೆ, ಯಾವುದೇ ಅನ್​ನೋನ್​ ನಂಬರ್​ನಿಂದ ಕಾಲ್​ ಬಂದರೆ ಅದನ್ನು ರಿಸೀವ್​ ಮಾಡಲೇ ಬೇಡಿ, ಮೆಸೆಂಜರ್​ಗಳು ಹಾಗೂ ಎಸ್​ಎಂಎಸ್​ನಲ್ಲಿ ಬರುವ ಲಿಂಕ್​ಗಳನ್ನು ಒತ್ತಬೇಡಿ, ನಿಮ್ಮ ಮಗು ಕಿಡ್​ನ್ಯಾಪ್​ ಆಗಿದೆ, ಇಷ್ಟು ಹಣ ಇಂಥಬ್ಯಾಂಕ್​  ಅಕೌಂಟ್​ಗೆ ಹಾಕಿ ಎಂದ ತಕ್ಷಣ ಗಡಿಬಿಡಿ ಬಿದ್ದು ಅದನ್ನು ನಿಜ ಎಂದು ನಂಬಲು ಹೋಗಬೇಡಿ,OTP ಶೇರ್​ ಮಾಡಬೇಡಿ, ಮ್ಯಾಟ್ರಿಮೋನಿ ಸೈಟ್​ಗಳಲ್ಲಿ ಯಾವುದೋ ಪ್ರೊಫೈಲ್​ ನೋಡಿ ಅದನ್ನು ನಿಜ ಎಂದು ನಂಬಿ ಸೈಬರ್​ ವಂಚನೆಗೆ ಬಲಿಯಾಗಬೇಡಿ... ಹೀಗೆ ಹಲವು ಎಚ್ಚರಿಕೆ ಕೊಟ್ಟಿದ್ದಾರೆ.