ಬೆಂಗಳೂರು: ನಿವೃತ್ತ ಮಹಿಳಾ ಎಸ್ಸೈ ಸರ ದೋಚಿದ್ದ ಖದೀಮನ ಬಂಧನ

3 ಲಕ್ಷ ರು ಮೌಲ್ಯದ 76.4 ಗ್ರಾಂ ಚಿನ್ನ ಜಪ್ತಿ, ಕದ್ದ ಚಿನ್ನವನ್ನು ಅಟ್ಟಿಕಾ ಗೋಲ್ಡ್‌ ಕಂಪನಿಗೆ ಮಾರಿದ್ದ ಆರೋಪಿ. 

ಬೆಂಗಳೂರು(ಮಾ.02):  ಇತ್ತೀಚಿಗೆ ನಿವೃತ್ತ ಮಹಿಳಾ ಪೊಲೀಸ್‌ ಇನ್ಸ್‌ಪೆಕ್ಟರ್‌ವೊಬ್ಬರಿಂದ ಚಿನ್ನದ ಸರ ದೋಚಿದ್ದ ಚಾಲಾಕಿ ಖದೀಮನೊಬ್ಬ ಚಂದ್ರಾಲೇಔಟ್‌ ಠಾಣೆ ಪೊಲೀಸರ ಬಲೆಗೆ ಬಿದ್ದಿದ್ದಾನೆ.

ಉಲ್ಲಾಳ ನಿವಾಸಿ ದರ್ಶನ್‌ ಬಂಧಿತನಾಗಿದ್ದು, ಆರೋಪಿಯಿಂದ 3 ಲಕ್ಷ ರು ಮೌಲ್ಯದ 76.4 ಗ್ರಾಂ ಚಿನ್ನ ಜಪ್ತಿ ಮಾಡಲಾಗಿದೆ. ಇತ್ತೀಚಿಗೆ ಮೂಡಲಪಾಳ್ಯ ಮುಖ್ಯರಸ್ತೆಯ ಕೆನರಾ ಬ್ಯಾಂಕ್‌ ಕಾಲೋನಿ ನಿವಾಸಿ ನಿವೃತ್ತ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಗೀತಾರೆಡ್ಡಿ ಅವರು ಮನೆ ಮುಂದೆ ಕಸ ಗುಡಿಸುವಾಗ ಸರ ಕಳವು ಮಾಡಿ ಕಿಡಿಗೇಡಿ ಪರಾರಿಯಾಗಿದ್ದ. ಈ ಬಗ್ಗೆ ತನಿಖೆ ನಡೆಸಿದ ಪೊಲೀಸರು, ಸಿಸಿಟಿವಿ ಕ್ಯಾಮೆರಾ ದೃಶ್ಯಾವಳಿ ಸೇರಿದಂತೆ ತಾಂತ್ರಿಕ ಮಾಹಿತಿ ಆಧರಿಸಿ ಆರೋಪಿಯನ್ನು ಪತ್ತೆ ಹಚ್ಚಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ತನ್ನ ತಾಯಿ ಜತೆ ನೆಲೆಸಿದ್ದ ದರ್ಶನ್‌, ಪಿಯುಸಿಗೆ ವ್ಯಾಸಂಗ ಮೊಟಕುಗೊಳಿಸಿ ಮಾರ್ಚ್‌ವೊಂದರಲ್ಲಿ ಕೆಲ ದಿನಗಳು ಕೆಲಸ ಮಾಡಿದ್ದ. ಪ್ರಸುತ್ತ ನಿರುದ್ಯೋಗಿಯಾಗಿ ಆತ ಅಲೆಯುತ್ತಿದ್ದ. ಸುಲಭವಾಗಿ ಹಣ ಸಂಪಾದನೆ ಸಲು ವಾಗಿ ಸರಗಳ್ಳತನಕ್ಕಿಳಿದಿದ್ದ ಆತ, ಮೊದಲ ಯತ್ನದಲ್ಲೇ ನಿವೃತ್ತ ಪೊಲೀಸ್‌ ಅಧಿಕಾರಿಯಿಂದಲೇ ಚಿನ್ನ ದೋಚಿ ಸಿಕ್ಕಿಬಿದ್ದಿದ್ದಾನೆ. ಇತ್ತೀಚಿಗೆ ಕೆನರಾ ಬ್ಯಾಂಕ್‌ ಕಾಲೋನಿಯ ತಮ್ಮ ನಿವಾಸದ ಮುಂದೆ ಮುಂಜಾನೆ ಗೀತಾರೆಡ್ಡಿ ಕಸ ಗುಡಿಸುತ್ತಿದ್ದರು. ಆಗ ವಾಯು ವಿಹಾರ ಸೋಗಿನಲ್ಲಿ ಅಲ್ಲಿಗೆ ಬಂದ ದರ್ಶನ್‌, ಗೀತಾ ರೆಡ್ಡಿ ಅವರ ಬಳಿ ಬಸ್‌ ನಿಲ್ದಾಣ ಯಾವ ಕಡೆ ಇದೆ ಎಂದು ಕೇಳಿದ್ದಾನೆ. ಆಗ ದಾರಿ ತೋರಿಸಲು ಗೇಟ್‌ ದಾಟಿ ಮುಂದೆ ಬಂದಾಗ ಅವ ರಿಂದ ಚಿನ್ನ ಸರ ಎಗರಿಸಿ ಆರೋಪಿ ಪರಾರಿಯಾಗಿದ್ದ. ನಾಲ್ಕು ಕಿ.ಮೀ ಓಡಿ ಬಳಿ ಆಟೋ ಹತ್ತಿ ಆತ ಪರಾರಿಯಾಗಿದ್ದ ಎಂದು ಪೊಲೀಸರು ವಿವರಿಸಿದ್ದಾರೆ.

ಚಿನ್ನ ಕರಗಿಸಿ ಗಟ್ಟಿ ಮಾಡಿದ್ರು: 

ಈ ಕೃತ್ಯ ಎಸಗಿದ ಬಳಿಕ ಅಟ್ಟಿಕಾ ಗೋಲ್ಡ್‌ ಕಂಪನಿಗೆ ಕದ್ದ ಚಿನ್ನವನ್ನು ಆರೋಪಿ ಮಾರಾಟ ಮಾಡಿದ್ದ. ಬಳಿಕ ಆ ಚಿನ್ನವನ್ನು ಕರಗಿಸಿ ಗಟ್ಟಿಮಾಡಿ ಕಂಪನಿ ಮಾರಾಟಕ್ಕೆ ಯತ್ನಿಸಿತ್ತು. ಅಷ್ಟರಲ್ಲಿ ಮಾಹಿತಿ ಪಡೆದು ಚಿನ್ನ ಗಟ್ಟಿಜಪ್ತಿ ಮಾಡಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.