ಐತಿಹಾಸಿಕ ನಿರ್ಧಾರ ತೆಗೆದುಕೊಂಡ ICC: ಇಂದಿನ ಪಂದ್ಯದಲ್ಲೇ ಹೊಸ ರೂಲ್ಸ್ ಅಳವಡಿಕೆ

ಭಾರತ-ವೆಸ್ಟ್ ಇಂಡೀಸ್ ನಡುವಿನ ಮೊದಲ ಟಿ20 ಪಂದ್ಯದಲ್ಲಿ ನೋ ಬಾಲ್ ತೀರ್ಪನ್ನು ಮೂರನೇ ಅಂಪೈರ್ ನೀಡಲಿದ್ದಾರೆ. ಈ ಹೊಸ ತೀರ್ಮಾನ ಹೇಗೆ ಎನ್ನುವ ನಿಮ್ಮ ಕುತೂಹಲಕ್ಕೆ ಇಲ್ಲಿದೆ ನೋಡಿ... 

ದುಬೈ[ಡಿ.06]: ಭಾರತ ಹಾಗೂ ವೆಸ್ಟ್‌ಇಂಡೀಸ್‌ ನಡು​ವಿನ ಟಿ20 ಹಾಗೂ ಏಕ​ದಿನ ಸರ​ಣಿ​ಯಲ್ಲಿ ಬೌಲರ್‌ಗಳು ನೋಬಾಲ್‌ ಎಸೆ​ದರೆ ಅದನ್ನು ಮೈದಾ​ನ​ದ​ಲ್ಲಿ​ರುವ ಅಂಪೈರ್‌ ಬದ​ಲಿಗೆ ಮೂರನೇ ಅಂಪೈರ್‌ ನಿರ್ಧ​ರಿ​ಸ​ಲಿ​ದ್ದಾರೆ ಎಂದು ಗುರು​ವಾರ ಅಂತಾ​ರಾ​ಷ್ಟ್ರೀಯ ಕ್ರಿಕೆಟ್‌ ಸಮಿತಿ (ಐ​ಸಿ​ಸಿ) ಘೋಷಿ​ಸಿತು. 

ನೋಬಾಲ್‌ ನಿರ್ಧ​ರಿ​ಸಲು ತಂತ್ರ​ಜ್ಞಾ​ನದ ಸಹಾಯ ಪಡೆ​ಯ​ಲಿದ್ದು, 3ನೇ ಅಂಪೈರ್‌ ಪ್ರತಿ ಎಸೆತವನ್ನು ಗಮ​ನಿ​ಸ​ಲಿ​ದ್ದಾರೆ. ಇದೇ ಮೊದಲು 2016ರಲ್ಲಿ ಈ ಪ್ರಯೋಗ ನಡೆದಿತ್ತು. ಆದರೆ ಭಾರತ ಆಡುವ ಪಂದ್ಯ​ದಲ್ಲಿ ಇಂತಹ ಪ್ರಯೋಗ ಇದೇ ಮೊದಲು. ಇದೇ ವರ್ಷ ಆಗಸ್ಟ್‌ನಲ್ಲಿ ನೋಬಾಲ್‌ ನಿರ್ಧಾರಿಸುವ ಜವಾ​ಬ್ದಾರಿ 3ನೇ ಅಂಪೈರ್‌ನದ್ದು ಎಂದು ಐಸಿಸಿ ಘೋಷಿ​ಸಿತ್ತು. ಆ ಪ್ರಯೋಗವನ್ನು ಸರ​ಣಿ​ಯಲ್ಲಿ ನಡೆ​ಸ​ಲಿದೆ. ಮುಂಬ​ರುವ ದಿನ​ಗ​ಳಲ್ಲಿ ಕೆಲ ಆಯ್ದ ಸರ​ಣಿ​ಗ​ಳಲ್ಲಿ ಈ ಪ್ರಯೋಗ ನಡೆಸಿ, ತಂತ್ರ​ಜ್ಞಾನ ಸಹಾ​ಯದ ಸಾಧ​ಕ-ಬಾಧಕಗಳನ್ನು ಪರಿ​ಶೀ​ಲಿ​ಸ​ಲಾ​ಗು​ತ್ತದೆ ಎಂದು ಐಸಿಸಿ ತಿಳಿ​ಸಿದೆ.

ನೋಬಾಲ್‌ ಘೋಷಣೆ ಹೇಗೆ?
3ನೇ ಅಂಪೈರ್‌ ಪ್ರತಿ ಎಸೆತವನ್ನು ಟೀವಿ ಪರ​ದೆಯಲ್ಲಿ ವೀಕ್ಷಿ​ಸ​ಲಿ​ದ್ದಾರೆ. ನೋಬಾಲ್‌ ಎಂದು ನಿರ್ಧ​ರಿ​ಸಿದ ಬಳಿಕ ಆ ತೀರ್ಪನ್ನು ಮೈದಾ​ನ​ದ​ಲ್ಲಿ​ರುವ ಅಂಪೈರ್‌ಗೆ ತಿಳಿ​ಸ​ಲಿ​ದ್ದಾರೆ. ಒಂದೊಮ್ಮೆ ನೋಬಾಲ್‌ನಲ್ಲಿ ವಿಕೆಟ್‌ ಪತ​ನ​ಗೊಂಡಿ​ದ್ದರೆ, ಬ್ಯಾಟ್ಸ್‌ಮನ್‌ನನ್ನು ಕ್ರೀಸ್‌ಗೆ ಮರ​ಳು​ವಂತೆ ಸೂಚಿ​ಸ​ಲಾ​ಗು​ತ್ತದೆ. 3ನೇ ಅಂಪೈರ್‌ನ ಸೂಚನೆ ಇಲ್ಲದೆ ಮೈದಾ​ನ​ದ​ಲ್ಲಿ​ರುವ ಅಂಪೈರ್‌ಗಳು ನೋಬಾಲ್‌ ಘೋಷಿ​ಸು​ವು​ದಿಲ್ಲ.