ಸ್ಮೃತಿ ಮಂಧನಾ ಸತತ ಎರಡನೇ ಶತಕ; ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತಕ್ಕೆ ಸರಣಿ ಜಯ

ಮೊದಲು ಬ್ಯಾಟ್‌ ಮಾಡಿದ ಭಾರತ, 50 ಓವರಲ್ಲಿ 3 ವಿಕೆಟ್‌ ನಷ್ಟಕ್ಕೆ 325 ರನ್‌ಗಳ ಬೃಹತ್‌ ಮೊತ್ತ ಕಲೆಹಾಕಿತು. 3ನೇ ವಿಕೆಟ್‌ಗೆ ಸ್ಮೃತಿ ಹಾಗೂ ಹರ್ಮನ್‌ಪ್ರೀತ್‌ ನಡುವೆ 171 ರನ್‌ ಜೊತೆಯಾಟ ಮೂಡಿಬಂತು. ಸ್ಮೃತಿ ಸತತ 2ನೇ ಶತಕ ಸಿಡಿಸಿದರು.

ಬೆಂಗಳೂರು: ಸ್ಮೃತಿ ಮಂಧನಾ, ಹರ್ಮನ್‌ಪ್ರೀತ್‌ ಕೌರ್‌ರ ಆಕರ್ಷಕ ಶತಕಗಳು, ಪೂಜಾ ವಸ್ತ್ರಾಕರ್‌ರ ಅಮೋಘ ಕೊನೆಯ ಓವರ್‌ನ ನೆರವಿನಿಂದ ದಕ್ಷಿಣ ಆಫ್ರಿಕಾ ವಿರುದ್ಧದ 2ನೇ ಏಕದಿನ ಪಂದ್ಯದಲ್ಲಿ ಭಾರತ ಮಹಿಳಾ ತಂಡ 4 ರನ್‌ಗಳ ರೋಚಕ ಗೆಲುವು ಸಾಧಿಸಿದೆ. ಇದರೊಂದಿಗೆ 3 ಪಂದ್ಯಗಳ ಸರಣಿಯಲ್ಲಿ 2-0 ಮುನ್ನಡೆ ಪಡೆದಿರುವ ಭಾರತ, ಇನ್ನೂ ಒಂದು ಪಂದ್ಯ ಬಾಕಿ ಇರುವಂತೆಯೇ ಸರಣಿ ವಶಪಡಿಸಿಕೊಂಡಿದೆ.

ಮೊದಲು ಬ್ಯಾಟ್‌ ಮಾಡಿದ ಭಾರತ, 50 ಓವರಲ್ಲಿ 3 ವಿಕೆಟ್‌ ನಷ್ಟಕ್ಕೆ 325 ರನ್‌ಗಳ ಬೃಹತ್‌ ಮೊತ್ತ ಕಲೆಹಾಕಿತು. 3ನೇ ವಿಕೆಟ್‌ಗೆ ಸ್ಮೃತಿ ಹಾಗೂ ಹರ್ಮನ್‌ಪ್ರೀತ್‌ ನಡುವೆ 171 ರನ್‌ ಜೊತೆಯಾಟ ಮೂಡಿಬಂತು. ಸ್ಮೃತಿ ಸತತ 2ನೇ ಶತಕ ಸಿಡಿಸಿದರು. 120 ಎಸೆತದಲ್ಲಿ 18 ಬೌಂಡರಿ, 2 ಸಿಕ್ಸರ್‌ಗಳೊಂದಿಗೆ 136 ರನ್‌ ಕಲೆಹಾಕಿದರು. ಸ್ಫೋಟಕ ಆಟವಾಡಿದ ಹರ್ಮನ್‌ಪ್ರೀತ್‌ 88 ಎಸೆತದಲ್ಲಿ 9 ಬೌಂಡರಿ, 3 ಸಿಕ್ಸರ್‌ಗಳೊಂದಿಗೆ 103 ರನ್‌ ಸಿಡಿಸಿ ಔಟಾಗದೆ ಉಳಿದರು. ರಿಚಾ ಘೋಷ್‌ 13 ಎಸೆತದಲ್ಲಿ 25 ರನ್‌ ಚಚ್ಚಿ, ತಂಡದ ಮೊತ್ತ 300 ರನ್‌ ದಾಟಲು ಕಾರಣರಾದರು.

ದೊಡ್ಡ ಗುರಿ ಬೆನ್ನತ್ತಿದ ದ.ಆಫ್ರಿಕಾ, 15ನೇ ಓವರಲ್ಲಿ 67 ರನ್‌ಗೆ 3 ವಿಕೆಟ್‌ ಕಳೆದುಕೊಂಡಿತ್ತು. ಆದರೆ 4ನೇ ವಿಕೆಟ್‌ಗೆ ನಾಯಕಿ ಲಾರಾ ವೂಲ್ವಾರ್ಟ್‌ ಹಾಗೂ ಮಾರಿಯಾನೆ ಕಾಪ್‌ 184 ರನ್‌ ಸೇರಿಸಿ ಗೆಲುವಿನ ಆಸೆಯನ್ನು ಜೀವಂತವಾಗಿರಿಸಿದರು. ಕಾಪ್‌ 94 ಎಸೆತದಲ್ಲಿ 114 ರನ್‌ ಸಿಡಿಸಿ ಔಟಾದ ಬಳಿಕವೂ ವೂಲ್ವಾರ್ಟ್‌ ಹೋರಾಟ ಮುಂದುವರಿಸಿದರು. ಕೊನೆ 4 ಎಸೆತದಲ್ಲಿ ಗೆಲ್ಲಲು 6 ರನ್‌ ಬೇಕಿದ್ದಾಗ, ಪೂಜಾ ಅದ್ಭುತ ದಾಳಿ ನಡೆಸಿ ದಕ್ಷಿಣ ಆಫ್ರಿಕಾವನ್ನು 321 ರನ್‌ಗೆ ನಿಯಂತ್ರಿಸಿದರು.

ಸ್ಕೋರ್‌: 
ಭಾರತ 50 ಓವರಲ್ಲಿ 325/3 (ಸ್ಮೃತಿ 136, ಕೌರ್‌ 103*, ಎಂಲಾಬ 2-51), 
ದ.ಆಫ್ರಿಕಾ 50 ಓವರಲ್ಲಿ 321/6 (ವೂಲ್ವಾರ್ಟ್‌ 135*, ಕಾಪ್‌ 114, ದೀಪ್ತಿ 2-56)

01ನೇ ಬಾರಿ: ಭಾರತ ತಂಡ ತವರಿನಲ್ಲಿ 300ಕ್ಕಿಂತ ಹೆಚ್ಚು ರನ್‌ ಕಲೆಹಾಕಿದ್ದು ಇದೇ ಮೊದಲು.

01ನೇ ಆಟಗಾರ್ತಿ: ಮಹಿಳಾ ಏಕದಿನದಲ್ಲಿ ಸತತ 2 ಶತಕ ಬಾರಿಸಿದ ಭಾರತದ ಮೊದಲ ಆಟಗಾರ್ತಿ ಸ್ಮೃತಿ.