IPL 2022 ತಾಯಿಗೆ ಕೊಟ್ಟ ಮಾತಿಗೆ ಬ್ಯಾಟ್​ ಹಿಡಿದ ಆಟಗಾರ ಯಾರು ಗೊತ್ತಾ..?

* ರೋಮನ್‌ ಪೊವೆಲ್ ಬೆಂಕಿಯಲ್ಲಿ ಅರಳಿದ ಹೂ * ಡೆಲ್ಲಿ ಕ್ಯಾಪಿಟಲ್ಸ್‌ ಪರ ಮಿಂಚಿನ ಪ್ರದರ್ಶನ ತೋರುತ್ತಿರುವ ಬ್ಯಾಟರ್ * ಬಡತನ ಮೆಟ್ಟಿನಿಂತು ತಾಯಿ ಆಸೆ ಪೂರೈಸಿದ ರೋಮನ್ ಪೊವೆಲ್

ಬೆಂಗಳೂರು(ಏ.30): ತಾಯಿಯ ಈ ಒಂದು ಮಾತಿನಿಂದ ಸ್ಫೂರ್ತಿಗೊಂಡ ರಾಕಿ ಬಾಯ್​​, ಇಡೀ ಕೆಜಿಎಫ್​​ ಅನ್ನ ತನ್ನ ಕೈವಶಮಾಡಿಕೊಳ್ಳಲು ಹಾತೊರಿತಾನೆ. ಅಂತೆಯೇ ಇಲ್ಲೊಬ್ಬ, ತಾಯಿ ಕೊಟ್ಟ ಆ ಒಂದು ಭಾಷೆಯನ್ನ ಈಡೇರಿಸಲು ಬ್ಯಾಟ್​​ ಹಿಡಿದು ಕ್ರಿಕೆಟ್​ ಅಂಗಳಕ್ಕೆ ಧುಮುಕ್ತಾನೆ. ಇದ್ರಲ್ಲಿ ಸಂಪೂರ್ಣ ಸಕ್ಸಸ್​ ಕಾಣದಿದ್ರೂ ಹೆತ್ತ ತಾಯಿಯ ಮಾತನ್ನ ಈಡೇರಿಸಲು ಪ್ರಾಮಾಣಿಕವಾಗಿ ಪ್ರಯತ್ನಿಸ್ತಿದ್ದಾನೆ. ನಿಜಕ್ಕೂ ಈತ ತಾಯಿಗೆ ತಕ್ಕ ಮಗ. ಆತನೇ ಡೆಲ್ಲಿ ಕ್ಯಾಪಿಟಲ್ಸ್​ ತಂಡದ ಸ್ಫೋಟಕ ಬ್ಯಾಟರ್​ ರೋಮನ್​ ಪೊವೆಲ್​​​. 

ರೊಮನ್​ ಪೊವೆಲ್ (Rovman Powell)​​​, ವೆಸ್ಟ್​​​ ವಿಂಡೀಸ್​​ನ ಸ್ಫೋಟಕ ದಾಂಡಿಗ. ದೊಡ್ಡ ಹೊಡೆತಗಳಿಗೆ ಎತ್ತಿದ ಕೈ. 2016ರಲ್ಲಿ ವೃತ್ತಿ ಜೀವನ ಆರಂಭಿಸಿದ್ರೂ ಹೆಚ್ಚು ಮನ್ನಣೆ ಗಳಿಸಿರಲಿಲ್ಲ. ಆರು ವರ್ಷಗಳಲ್ಲಿ ಆಗೊಂದು, ಈಗೊಂದು ಚಾನ್ಸ್ ಗಿಟ್ಟಿಸಿಕೊಂಡ್ರು. ಆದ್ರೆ ಈ ಬಾರಿಯ ಸಿಪಿಎಲ್​​​ ಅವರ ಲೈಫ್ ಬದಲಿಸ್ತು. ಇಲ್ಲಿ ತೋರಿದ ಗಮನಾರ್ಹ ಆಟದಿಂದ ಐಪಿಎಲ್​​​​​ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್‌ (Delhi Capitals) ಪರ ಕಣಕ್ಕಿಳಿದ್ರು. ಸಿಕ್ಕ ಕೆಲವೇ ಚಾನ್ಸ್​​​ನಲ್ಲಿ ಸ್ಪೋಟಕ ಆಟವಾಡಿ, ಟಾಕ್​​ ಆಫ್ ಟೌನ್ ಆಗಿದ್ದಾರೆ. ದೈತ್ಯ ಪೊವೆಲ್​​​,​ ರಸೆಲ್​​​ರಂತೆ ಎಂಟರ್​​ಟೈನ್​ ಕ್ರಿಕೆಟರ್​ ಅನ್ನೋದ್ರಲ್ಲಿ ಎರಡು ಮಾತಿಲ್ಲ. ಕೆಕೆಆರ್​ ವಿರುದ್ಧ ಬಿರುಸಿನ 33 ರನ್​ ಗಳಿಸಿ ಅದನ್ನು ಪ್ರೂವ್​ ಮಾಡಿದ್ರು. ಹೀಗೆ ದೊಡ್ಡ ಸಿಕ್ಸರ್​ಗಳಿಂದಲೇ ಪ್ರೇಕ್ಷಕರನ್ನ ಹುಚ್ಚೆದ್ದು ಕುಣಿಯುವಂತೆ ಮಾಡ್ತಿರೋ ಪೊವೆಲ್​​​​ ನಿಜಕ್ಕೂ ಬೆಂಕಿಯಲ್ಲಿ ಅರಳಿದ ಹೂವು. ಆದರೆ ಇವರ ಸಿಕ್ಸರ್​​​-ಬೌಂಡ್ರಿಯಂತೆ ಬದುಕು ಮನಮೋಹಕವಾಗಿರಲಿಲ್ಲ. ಹೆಜ್ಜೆ ಹೆಜ್ಜೆಗೂ ಮುಳ್ಳಿನ ಹಾದಿ.

ಪೊವೆಲ್​​​​​ ಬಡತನ ಮೆಟ್ಟಿ ನಿಂತಿದ್ದೇ ರೋಚಕ:

ಹೌದು, ಪೊವೆಲ್​​ ಕಡುಬಡತನದ ಬೇಗೆಯಲ್ಲಿ ಬೆಳೆದು ಬಂದ ಕ್ರಿಕೆಟರ್​​.1993 ರಲ್ಲಿ ಸಣ್ಣ ಸಮುದಾಯದಲ್ಲಿ ಜನಿಸಿದ ಈ ದೈತ್ಯ ಬ್ಯಾಟರ್​​​ ಎಂದೂ ಖುಷಿ ಕಂಡವರಲ್ಲ. ಸಾಲು-ಸಾಲು ಪ್ರಾಬ್ಲಮ್ಸ್​​ ಕುಟುಂಬವನ್ನು ಕಂಗೆಡಿಸಿತ್ತು. ಬಿರುಕು ಬಿಟ್ಟ ಮನೆಯಲ್ಲಿ ವಾಸವಿದ್ರು. ಬೇಗನೆ ತಂದೆ ಕಳೆದುಕೊಂಡ ಪೊವೆಲ್ ಮೇಲೆ ಚಿಕ್ಕಂದಿನಲ್ಲೇ ಜವಾಬ್ದಾರಿ ಬೆನ್ನೇರಿತು. ಇದರಿಂದ ಅಕ್ಷರಶಃ ರೋಸಿ ಹೋದ ವಿಂಡೀಸ್ ಕ್ರಿಕೆಟರ್ ಬಡತನವನ್ನ ಮೆಟ್ಟಿ ನಿಲ್ಲಲು ತಾಯಿಗೆ ಭಾಷೆ ಕೊಟ್ಟ. ಆ ಮಾತನ್ನ ಉಳಿಸಿಕೊಳ್ಳೋದಕ್ಕಾಗಿ ಸೆಕೆಂಡರಿಗೆ ಸ್ಕೂಲ್​​​​ ಬಿಟ್ಟು, ಚೆಂಡು ದಾಂಡಿನಾಟಕ್ಕೆ ಧುಮುಕಿದ.

ಹೀಗೆ ತಾಯಿಗೆ ಕೊಟ್ಟ ಮಾತನ್ನ ಈಡೇರಿಸಲು ಪಣ ತೊಟ್ಟ ಪೊವೆಲ್​ ಕೊನೆಗೂ ಯಶಸ್ವಿಯಾದ್ರು. ಕಾಲಕ್ರಮೇಣ ಕ್ರಿಕೆಟ್​ನಲ್ಲಿ ನೇಮ್ ಆಂಡ್​ ಫೇಮ್​ ಗಳಿಸಿದ್ರು. ಕಡು ಬಡತನ ಪೊವೆಲ್​​ ಛಲದ ಮುಂದೆ ಮಾಯಾಯ್ತು. ಈಗ ಪೊವೆಲ್​​ ಬರೀ ಪ್ರೇಕ್ಷಕರ ದಿಲ್​ ಗೆದ್ದ ಆಟಗಾರ ಮಾತ್ರವಲ್ಲ, ಬಡತನವನ್ನೇ ಮೆಟ್ಟಿನಿಂತ  ರಿಯಲ್​ ಛಲಗಾರ. 

ಯುವ ಕ್ರಿಕೆಟಿಗರಿಗೆ ಸ್ಫೂರ್ತಿ ಈ ದೈತ್ಯ ಕ್ರಿಕೆಟಿಗ 

ಸವಾಲುಗಳನ್ನ ಮೆಟ್ಟಿನಿಂತ ಈ ದೈತ್ಯ ಕ್ರಿಕೆಟಿಗ ನಿಜಕ್ಕೂ ಯುವ ಆಟಗಾರರಿಗೆ ಸ್ಫೂರ್ತಿ. ಬಡತನ ಶಾಪವಲ್ಲ. ಛಲ ಹಾಗೂ ಕಠಿಣ ಪರಿಶ್ರಮವೊಂದಿದ್ದರೆ ಎಂತಹ ಸವಾಲುಗಳನ್ನ ಮೆಟ್ಟಿ ನಿಲ್ಲಬಹುದು ಅನ್ನೋದನ್ನ ಡೆಡ್ಲಿ ಹಿಟ್ಟರ್ ತೋರಿಸಿಕೊಟ್ಟಿದ್ದಾರೆ. ಪೊವೆಲ್‌​ ರ ಸ್ಪೂರ್ತಿದಾಯಕ ಜೀವನ ಯಂಗ್​ಸ್ಟರ್ಸ್​ಗೆ ಮಾದರಿಯಾಗಲಿ. ತಾಯಿಗೆ ಕೊಟ್ಟ ಮಾತನ್ನ ಉಳಿಸಿಕೊಂಡ  ಈ ತಾಯಿಯ ತಕ್ಕ ಮಗ ಕ್ರಿಕೆಟ್​​​​​​​​​ನಲ್ಲಿ ಮತ್ತಷ್ಟು ಎತ್ತರಕ್ಕೆ ಬೆಳೆಯಲಿ, ಪ್ರೇಕ್ಷಕರನ್ನ ರಂಜಿಸಲಿ.