2023ರಿಂದ 4 ದಿನಗಳ ಟೆಸ್ಟ್‌ ಕ್ರಿಕೆಟ್?

ಇತ್ತೀಚಿನ ದಿನಗಳಲ್ಲಿ ಟೆಸ್ಟ್ ಕ್ರಿಕೆಟ್‌ ತನ್ನ ರೋಚಕತೆ ಉಳಿಸಿಕೊಳ್ಳಲು ಐಸಿಸಿ ವಿನೂತನ ಪ್ರಯೋಗಗಳನ್ನು ನಡೆಸುತ್ತಿದೆ. ಹಗಲು-ರಾತ್ರಿ ಟೆಸ್ಟ್ ಬಳಿಕ ಇದೀಗ ಐಸಿಸಿ ಮತ್ತೊಂದು ಮಹತ್ವದ ತೀರ್ಮಾನ ತೆಗೆದುಕೊಳ್ಳಲು ಮುಂದಾಗಿದೆ. ಈ ಕುರಿತಾದ ವರದಿ ಇಲ್ಲಿದೆ ನೋಡಿ...

ಮೆಲ್ಬರ್ನ್‌[ಡಿ.31]: 2023ರಿಂದ ವಿಶ್ವ ಚಾಂಪಿಯನ್‌ಶಿಪ್‌ ವ್ಯಾಪ್ತಿಗೆ ಸೇರುವ ಟೆಸ್ಟ್‌ ಪಂದ್ಯಗಳನ್ನು 5 ದಿನಗಳ ಬದಲಾಗಿ ಕಡ್ಡಾಯವಾಗಿ 4 ದಿನಗಳ ಕಾಲ ನಡೆಸಲು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಮಿತಿ (ಐಸಿಸಿ) ಚಿಂತನೆ ನಡೆಸಿದೆ. 

ಪ್ರಮುಖವಾಗಿ, ನಿರಂತರ ಕ್ರಿಕೆಟ್‌ ಟೂರ್ನಿಗಳನ್ನು ತಡೆಯಲು ಈ ಯೋಜನೆ ರೂಪಿಸಿರುವುದಾಗಿ ಐಸಿಸಿ ತಿಳಿಸಿದೆ. 2017ರ ಅಕ್ಟೋಬರ್‌ನಲ್ಲಿ ಐಸಿಸಿ 4 ದಿನಗಳ ಟೆಸ್ಟ್‌ ಆಯೋಜನೆಗೆ ಅನುಮತಿ ನೀಡಿತ್ತು. ಆದರೆ ಪಂದ್ಯಕ್ಕೆ ಆತಿಥ್ಯ ವಹಿಸುವ ಕ್ರಿಕೆಟ್‌ ಮಂಡಳಿಗೆ ನಿರ್ಧರಿಸುವ ಅವಕಾಶ ನೀಡಲಾಗಿತ್ತು.

ಲಾಭವೇನು?: 2023ರಿಂದ 2031ರ ನಡುವಿನ ಕ್ರಿಕೆಟ್‌ ಋುತುಗಳಲ್ಲಿ ಟೆಸ್ಟ್‌ ಪಂದ್ಯಗಳನ್ನು 5 ದಿನಗಳಿಂದ 4 ದಿನಗಳಿಗೆ ಇಳಿಸುವುದರಿಂದ ಹೆಚ್ಚು ಜಾಗತಿಕ ಮಟ್ಟದ ಟೂರ್ನಿಗಳು, ಬಿಸಿಸಿಐ ಬೇಡಿಕೆಯಂತೆ ಮತ್ತಷ್ಟು ದ್ವಿಪಕ್ಷೀಯ ಸರಣಿಗಳ ಆಯೋಜನೆ, ವಿಶ್ವದಾದ್ಯಂತ ನಡೆಯುವ ಟಿ20 ಲೀಗ್‌ಗಳ ಪ್ರಸರಣ ಹಾಗೂ 5 ದಿನಗಳ ಪಂದ್ಯಗಳ ಆಯೋಜನೆಗೆ ತಗುಲುವ ವೆಚ್ಚವನ್ನು ಕಡಿಮೆ ಮಾಡಲು ನೆರವಾಗಲಿದೆ ಎಂದು ಲೆಕ್ಕಾಚಾರ ಹಾಕಲಾಗಿದೆ. ಸದ್ಯ ಚಾಲ್ತಿಯಲ್ಲಿರುವ 2015-2023ರ ಅವಧಿಯಲ್ಲಿ 5 ದಿನಗಳ ಬದಲಿಗೆ 4 ದಿನಗಳ ಟೆಸ್ಟ್‌ ಪಂದ್ಯಗಳನ್ನು ನಡೆಸಿದ್ದು, 335 ದಿನಗಳು ಉಳಿಯುತ್ತಿದ್ದವು ಎಂದು ಐಸಿಸಿ ಅಂದಾಜಿಸಿದೆ.

ಹೊಸ ಯೋಜನೆಯಲ್ಲ: 4 ದಿನಗಳ ಟೆಸ್ಟ್‌ ಹೊಸ ಯೋಜನೆ ಏನಲ್ಲ. ಈ ವರ್ಷ ಇಂಗ್ಲೆಂಡ್‌ ಹಾಗೂ ಐರ್ಲೆಂಡ್‌ ತಂಡಗಳು 4 ದಿನಗಳ ಪಂದ್ಯವನ್ನು ಆಡಿದ್ದವು. 2017ರಲ್ಲಿ ದಕ್ಷಿಣ ಆಫ್ರಿಕಾ ಹಾಗೂ ಜಿಂಬಾಬ್ವೆ ಸಹ ಒಂದು ಪಂದ್ಯದಲ್ಲಿ ಮುಖಾಮುಖಿಯಾಗಿದ್ದವು.

ಐಸಿಸಿಯ ಈ ಯೋಜನೆಗೆ ಕ್ರಿಕೆಟ್‌ ಮಂಡಳಿಗಳಿಂದ ಸಕಾರಾತ್ಮಕ ಪ್ರತಿಕ್ರಿಯೆ ಬರುವ ನಿರೀಕ್ಷೆ ಇದೆ. ಕ್ರಿಕೆಟ್‌ ಆಸ್ಪ್ರೇಲಿಯಾದ ಸಿಇಒ ಕೆವಿನ್‌ ರಾರ್ಬರ್ಟ್ಸ್, ‘ಖಂಡಿತವಾಗಿಯೂ 4 ದಿನಗಳ ಟೆಸ್ಟ್‌ ಆಯೋಜನೆಯನ್ನು ನಾವು ಪರಿಗಣಿಸುತ್ತೇವೆ. ಕಳೆದ 5ರಿಂದ 10 ವರ್ಷಗಳಲ್ಲಿ ಟೆಸ್ಟ್‌ ಪಂದ್ಯಗಳು ಸರಾಸರಿ ಎಷ್ಟು ದಿನಗಳ ನಡೆದಿದೆ ಎನ್ನುವುದನ್ನು ಗಮನಿಸಿದರೆ, 5 ದಿನಗಳನ್ನು 4 ದಿನಗಳಿಗೆ ಇಳಿಸುವುದು ಸೂಕ್ತ ಎನಿಸುತ್ತದೆ’ ಎಂದಿದ್ದಾರೆ.

ಈ ಯೋಜನೆ ಜಾರಿಗೆ ತರುವ ಮೊದಲು ಕೆಲ ಸರಣಿಗಳಲ್ಲಿ ಪ್ರಾಯೋಗಿಕವಾಗಿ 4 ದಿನಗಳ ಪಂದ್ಯಗಳನ್ನು ಆಯೋಜಿಸುವ ಬಗ್ಗೆ ಐಸಿಸಿ ತನ್ನ ಸದಸ್ಯ ರಾಷ್ಟ್ರಗಳ ಬಳಿ ಸಲಹೆ ಕೋರಿದೆ ಎನ್ನಲಾಗಿದೆ.