ICC Women's T20 World Cup: ಭಾರತ vs ಆಸೀಸ್ ಸೆಮೀಸ್‌ ಕದನಕ್ಕೆ ಕ್ಷಣಗಣನೆ

* ಐಸಿಸಿ ಮಹಿಳಾ ಟಿ20 ಸೆಮಿಫೈನಲ್‌ ಕದನಕ್ಕೆ ವೇದಿಕೆ ಫಿಕ್ಸ್ * ಫೆಬ್ರವರಿ 23ರಂದು ಭಾರತಕ್ಕೆ ಆಸ್ಟ್ರೇಲಿಯಾ ಸವಾಲು * ಫೈನಲ್‌ಗೇರುವ ತವಕದಲ್ಲಿ ಹರ್ಮನ್‌ಪ್ರೀತ್ ಕೌರ್ ಪಡೆ

ಕೇಪ್‌​ಟೌ​ನ್‌(ಫೆ.22): 2023ರ ಐಸಿಸಿ ಮಹಿಳಾ ಟಿ20 ವಿಶ್ವಕಪ್‌ನ ಸೆಮಿಫೈನಲ್‌ನಲ್ಲಿ ಕಳೆದ ಬಾರಿ ರನ್ನ​ರ್‌-ಅಪ್‌ ಭಾರತ ತಂಡಕ್ಕೆ 5 ಬಾರಿ ಚಾಂಪಿ​ಯನ್‌ ಆಸ್ಪ್ರೇ​ಲಿಯಾ ಸವಾಲು ಎದು​ರಾ​ಗ​ಲಿದೆ. ಪಂದ್ಯ ಗುರು​ವಾರ(ಫೆ.23) ನಡೆ​ಯ​ಲಿದೆ.

‘ಬಿ’ ಗುಂಪಿ​ನಲ್ಲಿ ಸ್ಥಾನ ಪಡೆ​ದಿದ್ದ ಹರ್ಮ​ನ್‌​ಪ್ರೀತ್‌ ಕೌರ್‌ ಬಳಗ 3 ಗೆಲುವು, 1 ಸೋಲಿ​ನೊಂದಿಗೆ 6 ಅಂಕ ಸಂಪಾ​ದಿಸಿ 2ನೇ ಸ್ಥಾನ ಪಡೆ​ಯಿತು. ಆರಂಭಿಕ 2 ಪಂದ್ಯ​ಗ​ಳಲ್ಲಿ ಪಾಕಿ​ಸ್ತಾನ, ವೆಸ್ಟ್‌​ಇಂಡೀಸ್‌ ವಿರುದ್ಧ ಗೆದ್ದು ಬಳಿಕ ಇಂಗ್ಲೆಂಡ್‌ಗೆ ಶರ​ಣಾ​ದರೂ ಕೊನೆ ಪಂದ್ಯ​ದಲ್ಲಿ ಐರ್ಲೆಂಡ್‌ ವಿರುದ್ಧ ರೋಚಕ ಜಯ ಸಾಧಿಸಿ ಸೆಮೀ​ಸ್‌​ಗೇ​ರಿದೆ. ಎಲ್ಲಾ 4 ಪಂದ್ಯ ಗೆದ್ದ ಮಾಜಿ ಚಾಂಪಿ​ಯನ್‌ ಇಂಗ್ಲೆಂಡ್‌ ಗುಂಪಿನಲ್ಲಿ ಅಗ್ರ​ಸ್ಥಾ​ನಿ​ಯಾ​ಗಿಯೇ ಅಂತಿಮ 4ರ ಘಟ್ಟ ಪ್ರವೇ​ಶಿ​ಸಿತು. ಮತ್ತೊಂದೆಡೆ ಆಸೀಸ್‌ ಗುಂಪು ಹಂತ​ದ​ಲ್ಲಿ ಆಡಿ​ರುವ ಎಲ್ಲಾ 4 ಪಂದ್ಯ​ಗ​ಳಲ್ಲೂ ಗೆಲುವು ಸಾಧಿ​ಸಿದ್ದು, ‘ಎ’ ಗುಂಪಿ​ನಲ್ಲಿ ನಂ.1 ಸ್ಥಾನ ಪಡೆದು ಉಪಾಂತ್ಯ ತಲು​ಪಿದೆ.

ಭಾರತ ತಂಡದ ಪರ ಆರಂಭಿಕ ಬ್ಯಾಟರ್ ಸ್ಮೃತಿ ಮಂಧನಾ ಅತ್ಯಂತ ಸ್ಥಿರ ಪ್ರದರ್ಶನದ ಮೂಲಕ ಗಮನ ಸೆಳೆಯುತ್ತಿದ್ದು, ತಂಡಕ್ಕೆ ಭರ್ಜರಿ ಆರಂಭ ಒದಗಿಸಿಕೊಡುತ್ತಿದ್ದಾರೆ. ಮಂಧನಾ 3 ಇನಿಂಗ್ಸ್‌ಗಳನ್ನಾಡಿ ಎರಡು ಅರ್ಧಶತಕ ಸಹಿತ 49.67ರ ಸರಾಸರಿಯಲ್ಲಿ 149 ರನ್‌ ಬಾರಿಸಿದ್ದಾರೆ. ಈ ಮೂಲಕ ಟೂರ್ನಿಯಲ್ಲಿ ಗರಿಷ್ಠ ರನ್ ಬಾರಿಸಿದ ಬ್ಯಾಟರ್‌ಗಳ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಇನ್ನು ವಿಕೆಟ್‌ ಕೀಪರ್ ಬ್ಯಾಟರ್ ರಿಚಾ ಘೋಷ್ ಕೂಡಾ 4 ಪಂದ್ಯಗಳನ್ನಾಡಿ 122 ರನ್ ಸಿಡಿಸಿದ್ದಾರೆ. ಇನ್ನುಳಿದಂತೆ ಸೆಮೀಸ್‌ನಲ್ಲಿ ಶಫಾಲಿ ವರ್ಮಾ, ಜೆಮಿಮಾ ರೋಡ್ರಿಗ್ಸ್‌, ಹರ್ಮನ್‌ಪ್ರೀತ್ ಕೌರ್ ಕೂಡಾ ಜವಾಬ್ದಾರಿಯುತ ಪ್ರದರ್ಶನ ತೋರಿದರೆ, ಆಸೀಸ್ ಎದುರು ಪ್ರಾಬಲ್ಯ ಮೆರೆಯಬಹುದಾಗಿದೆ.

ಇನ್ನು ಬೌಲಿಂಗ್ ವಿಭಾಗದಲ್ಲಿ ಭಾರತ ಕೊಂಚ ದುರ್ಬಲವಾಗಿ ಗುರುತಿಸಿಕೊಂಡಿದ್ದು, ರೇಣುಕಾ ಸಿಂಗ್ ಹೊರತುಪಡಿಸಿ, ಉಳಿದ ಬೌಲರ್‌ಗಳು ಮಾರಕ ದಾಳಿ ನಡೆಸಲು ವಿಫಲವಾಗಿದ್ದಾರೆ. ದೀಪ್ತಿ ಶರ್ಮಾ, ಪೂಜಾ ವಸ್ತ್ರಾಕರ್, ರಾಜೇಶ್ವರಿ ಗಾಯಕ್ವಾಡ್‌ ಅವರು ಜವಾಬ್ದಾರಿಯುತ ಪ್ರದರ್ಶನ ತೋರಬೇಕಿದೆ.

ಇಂಗ್ಲೆಂಡ್‌ ವಿಶ್ವ ದಾಖಲೆ!

ಕೇಪ್‌ಟೌ​ನ್‌: ಮಹಿಳಾ ಟಿ20 ವಿಶ್ವ​ಕಪ್‌ ಇತಿ​ಹಾ​ಸ​​ದಲ್ಲೇ ಮೊದಲ ಬಾರಿ 200 ರನ್‌ ಕಲೆ​ಹಾಕಿ ದಾಖಲೆ ಬರೆದ ಇಂಗ್ಲೆಂಡ್‌ ತಂಡ ಪಾಕಿ​ಸ್ತಾನ ವಿರುದ್ಧದ ಪಂದ್ಯ​ದ​ಲ್ಲಿ 114 ರನ್‌ ಗೆಲುವು ಸಾಧಿ​ಸಿತು. ಮೊದಲು ಬ್ಯಾಟ್‌ ಮಾಡಿದ ಇಂಗ್ಲೆಂಡ್‌ ನ್ಯಾಥಲಿ ಸ್ಕೀವರ್‌ (40 ಎಸೆ​ತ​ಗ​ಳಲ್ಲಿ 81), ಡ್ಯಾನಿಲ್‌ ವ್ಯಾಟ್‌(33 ಎಸೆ​ತ​ಗ​ಳಲ್ಲಿ 59)ರ ಅಬ್ಬ​ರ​ದಿಂದಾಗಿ 5 ವಿಕೆ​ಟ್‌ಗೆ 213 ರನ್‌ ಕಲೆ​ಹಾ​ಕಿತು. ಪಾಕಿಸ್ತಾನ 9 ವಿಕೆ​ಟ್‌ಗೆ 99 ರನ್‌ ಗಳಿಸಿ ಸೋಲೊ​ಪ್ಪಿ​ಕೊಂಡಿತು.

ರ‍್ಯಾಂಕಿಂಗ್‌‌: ರಿಚಾಗೆ 20ನೇ, ರೇಣುಕಾಗೆ 5ನೇ ಸ್ಥಾನ

ದುಬೈ: ಭಾರತದ ವಿಕೆಟ್‌ ಕೀಪರ್‌ ಬ್ಯಾಟರ್‌ ರಿಚಾ ಘೋಷ್‌ ಐಸಿಸಿ ಮಹಿಳಾ ಟಿ20 ಬ್ಯಾಟರ್‌ಗಳ ರ‍್ಯಾಂಕಿಂಗ್‌‌ ಪಟ್ಟಿಯಲ್ಲಿ 16 ಸ್ಥಾನ ಜಿಗಿದು ಮೊದಲ ಬಾರಿಗೆ ಅಗ್ರ 20ರಲ್ಲಿ ಸ್ಥಾನ ಪಡೆದಿದ್ದಾರೆ. ಟಿ20 ವಿಶ್ವಕಪ್‌ನಲ್ಲಿ ವಿಂಡೀಸ್‌ ವಿರುದ್ಧ 41, ಇಂಗ್ಲೆಂಡ್‌ ವಿರುದ್ಧ 47 ರನ್‌ ಗಳಿಸಿದ್ದ ರಿಚಾ ವೃತ್ತಿಬದುಕಿನ ಶ್ರೇಷ್ಠ 20ನೇ ಸ್ಥಾನ ಪಡೆದಿದ್ದಾರೆ. ರಿಚಾ ಘೋಷ್‌ ಅಗ್ರ 20ರಲ್ಲಿರುವ ಭಾರತದ 5ನೇ ಆಟಗಾರ್ತಿ ಎನಿಸಿದ್ದಾರೆ. ಸ್ಮೃತಿ 3ನೇ ಸ್ಥಾನದಲ್ಲಿದ್ದರೆ, ಶಫಾಲಿ 10, ಜೆಮಿಮಾ 12, ಹರ್ಮನ್‌ಪ್ರೀತ್‌ 13ನೇ ಸ್ಥಾನದಲ್ಲಿದ್ದಾರೆ. ಇದೇ ವೇಳೆ ಬೌಲರ್‌ಗಳ ರಾರ‍ಯಂಕಿಂಗ್‌ ಪಟ್ಟಿಯಲ್ಲಿ ರೇಣುಕಾ ಸಿಂಗ್‌ 7 ಸ್ಥಾನ ಏರಿಕೆ ಕಂಡು ವೃತ್ತಿಬದುಕಿನ ಶ್ರೇಷ್ಠ 5ನೇ ಸ್ಥಾನ ಪಡೆದಿದ್ದಾರೆ.