ವಿರಾಟ್ ಕೊಹ್ಲಿ-ಬಾಬರ್ ಅಜಂ ಹುಟ್ಟುಹಬ್ಬದ ದಿನ ಮಹತ್ವದ ಪಂದ್ಯಗಳು..! ಗೆಲುವಿನ ಸಿಹಿ ಯಾರಿಗೆ?
ಸಾರಾಂಶ
ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯ ಅಧಿಕೃತ ವೇಳಾಪಟ್ಟಿ ಪ್ರಕಟ ಟೀಂ ಇಂಡಿಯಾ ಮಾಜಿ ನಾಯಕ ವಿರಾಟ್ ಕೊಹ್ಲಿ ಹುಟ್ಟುಹಬ್ಬದಂದು ಮಹತ್ವದ ಪಂದ್ಯ ಇಂಡೋ-ಪಾಕ್ ಪಂದ್ಯದ ದಿನವೇ ಬಾಬರ್ ಅಜಂ ಬರ್ತ್ ಡೇ
ಬೆಂಗಳೂರು(ಜೂ.29) ಈಗ ಇಡೀ ವಿಶ್ವದಲ್ಲಿ ಒನ್ಡೇ ವರ್ಲ್ಡ್ಕಪ್ ಹವಾ ಸ್ಟಾರ್ಟ್ ಆಗಿದೆ. ಯಾವಾಗ ಐಸಿಸಿ, ವಿಶ್ವಕಪ್ ವೇಳಾಪಟ್ಟಿ ರಿಲೀಸ್ ಮಾಡ್ತೋ ಆಗಿನಿಂದ ಮೆಗಾ ಟೂರ್ನಿಗೆ ಮತ್ತಷ್ಟು ಕಳೆ ಬಂದಿದೆ. ಇಂದಿಗೆ ಬರೋಬ್ಬರಿ 98 ದಿನಕ್ಕೆ ವರ್ಲ್ಡ್ಕಪ್ ಕಿಕ್ ಆಫ್ ಆಗಲಿದೆ. ಸ್ಟೇಡಿಯಂಗಳು ರೆಡಿಯಾಗ್ತಿವೆ. ತಂಡಗಳು ಸಿದ್ದವಾಗ್ತಿವೆ. 8 ಟೀಮ್ಸ್ ರೆಡಿ, ಇನ್ನೆರಡು ಟೀಮ್ಸ್ ಯಾವ್ದು ಅನ್ನೋ ಕುತೂಹಲ ಬೇರೆ ಇದೆ. ಇಡೀ ವಿಶ್ವಕಪ್ನಲ್ಲಿ ಮೇನ್ ಅಟ್ರ್ಯಾಕ್ಷನ್ ಅಂದ್ರೆ ಅಂದು ಇಂಡೋ-ಪಾಕ್ ಮ್ಯಾಚ್.
ಬದ್ಧವೈರಿಗಳ ಕಾಳಗ ಪಾಕ್ ಪಾಲಿಗೆ ಮಹತ್ವದ್ದು..!
ಏಕದಿನ ವಿಶ್ವಕಪ್ನಲ್ಲಿ ಇದುವರೆಗೂ ಭಾರತದ ವಿರುದ್ಧ ಪಾಕಿಸ್ತಾನ ಒಂದೂ ಪಂದ್ಯ ಗೆದ್ದಿಲ್ಲ. ಹೌದು, ಒನ್ಡೇ ವರ್ಲ್ಡ್ಕಪ್ ಇತಿಹಾಸದಲ್ಲಿ ಎರಡು ಟೀಮ್ಸ್ 7 ಬಾರಿ ಮುಖಾಮುಖಿಯಾಗಿವೆ. ಈ 7 ಬಾರಿಯೂ ಟೀಂ ಇಂಡಿಯಾವೇ ಗೆದ್ದಿದೆ. 7-0ಯಿಂದ ಮುನ್ನಡೆಯಲ್ಲಿರುವ ಭಾರತವನ್ನ ಈ ಸಲ ಕಟ್ಟಿಹಾಕಲು ಪಾಕಿಸ್ತಾನ ಪ್ಲಾನ್ ಮಾಡಿದೆ. ಇಂಡೋ-ಪಾಕ್ ಪಂದ್ಯದ ದಿನವೇ ಪಾಕಿಸ್ತಾನ ನಾಯಕ ಬಾಬರ್ ಅಜಂ ಬರ್ತ್ ಡೇ ಬೇರೆ. ಈ ಜೋಶ್ನಲ್ಲೇ ಭಾರತವನ್ನ ಭಾರತದಲ್ಲೇ ಸೋಲಿಸಿ, ಇತಿಹಾಸ ನಿರ್ಮಿಸಲು ಎದುರು ನೋಡ್ತಿದೆ ಪಾಕ್.
ವಿರಾಟ್ ಕೊಹ್ಲಿ ವೃತ್ತಿಬದ್ಧತೆ ಕಳೆದ 15 ವರ್ಷದಲ್ಲಿ ಮತ್ತೊಬ್ಬ ಆಟಗಾರನಲ್ಲಿ ಕಂಡಿಲ್ಲ: ಯುವರಾಜ್ ಸಿಂಗ್
ಅಕ್ಟೋಬರ್ 15ರಂದು ಅಹಮದಾಬಾದ್ನಲ್ಲಿ ಭಾರತ-ಪಾಕ್ ವಿಶ್ವಕಪ್ ಪಂದ್ಯ ನಡೆಯಲಿದೆ. ಅಂದು ಪಾಕಿಸ್ತಾನ ನಾಯಕ ಅಜಂ, 29ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳಲಿದ್ದಾರೆ. ತಮ್ಮ ನಾಯಕನಿಗೆ ಗೆಲುವಿನ ಬರ್ತ್ ಡೇ ಗಿಫ್ಟ್ ಕೊಡಲು ಪಾಕ್ ಆಟಗಾರರು ಈಗಿನಿಂದಲೇ ಸಜ್ಜಾಗಿದ್ದಾರೆ. ಆಕಸ್ಮಾತ್ ಬಾಬರ್ಗೆ ಗೆಲುವಿನ ಗಿಫ್ಟ್ ಸಿಕ್ಕರೆ ರೋಹಿತ್ ಪಡೆಗೆ ನಿರಾಸೆಯಾಗಲಿದೆ. ಫಾರ್ ದ ಫಸ್ಟ್ ಟೈಮ್, ಒನ್ಡೇ ವರ್ಲ್ಡ್ಕಪ್ನಲ್ಲಿ ಪಾಕ್ ವಿರುದ್ಧ ಭಾರತ ಸೋತ ಮುಖಭಂಗ ಅನುಭವಿಸಲಿದೆ.
ಕೊಹ್ಲಿ ಬರ್ತ್ ಡೇ ದಿನ ಭಾರತ-ಆಫ್ರಿಕಾ ಕದನ
ನವೆಂಬರ್ 5ರಂದು ವಿರಾಟ್ ಕೊಹ್ಲಿ 35ನೇ ಹುಟ್ಟುಹಬ್ಬ. ಅಂದೇ ಭಾರತದ ಕ್ರಿಕೆಟ್ ಕಾಶಿ ಕೋಲ್ಕತ್ತಾದ ಈಡನ್ ಗಾರ್ಡನ್ಸ್ನಲ್ಲಿ ಭಾರತ-ಸೌತ್ ಆಫ್ರಿಕಾ ತಂಡಗಳ ನಡುವೆ ಲೀಗ್ ಪಂದ್ಯ ನಡೆಯಲಿದೆ. ಕಿಂಗ್ ಕೊಹ್ಲಿಯ 35ನೇ ವರ್ಷದ ಹುಟ್ಟುಹಬ್ಬಕ್ಕೆ ಸಹ ಆಟಗಾರರು ಗೆಲುವಿನ ಗಿಫ್ಟ್ ಕೊಡ್ತಾರಾ ಅನ್ನೋ ಕುತೂಹಲ ಈಗಿನಿಂದಲೇ ಹುಟ್ಟಿಕೊಂಡಿದೆ. ಇನ್ನು 2022ರ ಟಿ20 ವಿಶ್ವಕಪ್ನಲ್ಲಿ ಕೊಹ್ಲಿ ಜನ್ಮದಿನದಂದು ಭಾರತ-ಜಿಂಬಾಬ್ವೆ ಪಂದ್ಯ ನಡೆದಿದ್ರೆ, 2021ರ ಟಿ20 ವಿಶ್ವಕಪ್ನಲ್ಲಿ ಕೊಹ್ಲಿಯ ಬರ್ತ್ ಡೇ ದಿನ ಭಾರತ-ಸ್ಕಾಟ್ಲ್ಯಾಂಡ್ ಮ್ಯಾಚ್ ನಡೆದಿತ್ತು. ಆ ಎರಡು ಪಂದ್ಯವನ್ನೂ ಭಾರತ ಗೆದ್ದಿತ್ತು.
ಈ ವಿಶ್ವಕಪ್ ಆಡೋ ಮೂಲಕ ವಿರಾಟ್ ಕೊಹ್ಲಿ, ತವರಿನಲ್ಲಿ ಎರಡು ಏಕದಿನ ವಿಶ್ವಕಪ್ ಆಡಿದ ಸಾಧನೆ ಮಾಡಲಿದ್ದಾರೆ. ಈ ಮೂಲಕ ಸಚಿನ್ ತೆಂಡೂಲ್ಕರ್ ಸೇರಿದಂತೆ ನಾಲ್ವರ ರೆಕಾರ್ಡ್ ಸರಿಗಟ್ಟಲಿದ್ದಾರೆ. ಈ ನಾಲ್ವರು ಭಾರತದಲ್ಲಿ ಎರಡು ಏಕದಿನ ವಿಶ್ವಕಪ್ ಆಡಿದ್ದರು.
ಕ್ರಿಕೆಟ್ ಮತ್ತು ಕ್ರೀಡಾ ಜಗತ್ತಿನ (Sports News in Kannada) ಕ್ಷಣಕ್ಷಣದ ಕನ್ನಡ ಸುದ್ದಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. IPL Live ಸೇರಿದಂತೆ ಟೀಂ ಇಂಡಿಯಾದ ಬ್ರೇಕಿಂಗ್ ಸುದ್ದಿ (Cricket News in Kannada), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ ಸಂಪೂರ್ಣ ಮಾಹಿತಿ ನಿಮ್ಮ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗೂ ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.