ಟೀಂ ಇಂಡಿಯಾಗೆ ಬೆಂಗಳೂರು ಮೂಲದ ಎಂಪಿಎಲ್ ಸ್ಪೋರ್ಟ್ಸ್ ಸಂಸ್ಥೆ ಕಿಟ್ ಪ್ರಾಯೋಜಕತ್ವ ನೀಡಲು ಬಿಸಿಸಿಐನನೊಂದಿಗೆ ಒಪ್ಪಂದ ಮಾಡಿಕೊಂಡಿದೆ. ಈ ಕುರಿತಾದ ಒಂದು ರಿಪೋರ್ಟ್ ಇಲ್ಲಿದೆ ನೋಡಿ
ನವದೆಹಲಿ(ನ.03): ಭಾರತ ಕ್ರಿಕೆಟ್ ತಂಡಗಳ ನೂತನ ಕಿಟ್ ಪ್ರಾಯೋಜಕರಾಗಿ ಬೆಂಗಳೂರು ಮೂಲದ ಎಂಪಿಎಲ್ ಸ್ಪೋರ್ಟ್ಸ್ ಸಂಸ್ಥೆ ಬಿಸಿಸಿಐನೊಂದಿಗೆ ಒಪ್ಪಂದಕ್ಕೆ ಸಹಿ ಹಾಕಿದೆ.
3 ವರ್ಷಗಳ ಕಾಲ ಪ್ರಾಯೋಜಕತ್ವ ನೀಡಲಿರುವ ಎಂಪಿಎಲ್ ಸ್ಪೋರ್ಟ್ಸ್ ಪ್ರತಿ ಪಂದ್ಯಕ್ಕೆ ಬಿಸಿಸಿಐಗೆ 65 ಲಕ್ಷ ರುಪಾಯಿ ಪಾವತಿಸಲಿದೆ. ಅಂದರೆ 3 ವರ್ಷಗಳಿಗೆ ಬಿಸಿಸಿಐ 120 ಕೋಟಿ ರುಪಾಯಿ ಸಂಪಾದಿಸಲಿದೆ. ಜೊತೆಗೆ ತಾನು ಮಾರಾಟ ಮಾಡುವ ಪ್ರತಿ ಜೆರ್ಸಿ ಇಲ್ಲವೇ ಇನ್ನಿತರ ಮರ್ಚೆಂಡೈಸ್ನ ಶೇ.10ರಷ್ಟು ಮೊತ್ತವನ್ನು ಬಿಸಿಸಿಐಗೆ ನೀಡಲು ಸಂಸ್ಥೆ ಒಪ್ಪಿಗೆ ನೀಡಿದೆ.
ಎಂಪಿಎಲ್ ಸ್ಪೋರ್ಟ್ಸ್ ಫ್ಯಾಂಟಸಿ ಗೇಮ್ಗಳ ಸಂಸ್ಥೆಯಾಗಿದ್ದು, ಹೊಸದಾಗಿ ಉಡುಪುಗಳ ಉದ್ಯಮವನ್ನು ಆರಂಭಿಸುತ್ತಿದೆ. ಆಸ್ಪ್ರೇಲಿಯಾ ಪ್ರವಾಸದಲ್ಲಿ ಭಾರತ ಹೊಸ ಜೆರ್ಸಿಯೊಂದಿಗೆ ಕಣಕ್ಕಿಳಿಯಲಿದೆ.
ಕಪಿಲ್ ದೇವ್ ಆರೋಗ್ಯ ಕುರಿತು ಸುಳ್ಳು ಹಬ್ಬಿಸಬೇಡಿ; ಮಾಜಿ ಕ್ರಿಕೆಟಿಗನಿಂದ ಮನವಿ!
ಹಿಂದಿನ ಒಪ್ಪಂದಕ್ಕಿಂತ ಕಡಿಮೆ: ಈ ಹಿಂದೆ 5 ವರ್ಷಗಳ ಒಪ್ಪಂದ ಹೊಂದಿದ್ದ ಜಾಗತಿಕ ಮಟ್ಟದ ಸಂಸ್ಥೆ ನೈಕಿ, ಪ್ರತಿ ಪಂದ್ಯಕ್ಕೆ 88 ಲಕ್ಷ ರುಪಾಯಿ ಪಾವತಿಸುತ್ತಿತ್ತು. ಅಂದರೆ ಒಟ್ಟು 370 ಕೋಟಿ ರುಪಾಯಿ ಮೌಲ್ಯದ ಒಪ್ಪಂದ ಅದಾಗಿತ್ತು. ಜೊತೆಗೆ 30 ಕೋಟಿ ರುಪಾಯಿ ರಾಯಲ್ಟಿಯನ್ನೂ ಪಾವತಿಸಿತ್ತು. ಈ ವರ್ಷ ಸೆಪ್ಟೆಂಬರ್ಗೆ ಒಪ್ಪಂದ ಮುಕ್ತಾಯಗೊಂಡಿತ್ತು. ಆ ಬಳಿಕ ಬಿಸಿಸಿಐ ಹೊಸದಾಗಿ ಟೆಂಡರ್ ಆಹ್ವಾನಿಸಿತ್ತಾದರೂ, ಕೊರೋನಾ ಆರ್ಥಿಕ ಸಂಕಷ್ಟದಿಂದಾಗಿ ಯಾವ ಸಂಸ್ಥೆಯೂ ಬಿಡ್ ಸಲ್ಲಿಸಿರಲಿಲ್ಲ. ಹೀಗಾಗಿ, ಎಂಪಿಎಲ್ ಸಂಸ್ಥೆಯೊಂದಿಗೆ ಒಪ್ಪಂದಕ್ಕೆ ಬಿಸಿಸಿಐ ಸಹಿ ಹಾಕಿದೆ.