Priyanka Shenoy Menon: ಕಾವಾಲ ಹಾಡಿಗೆ ಭರ್ಜರಿ ಸ್ಟೆಪ್​ ಹಾಕಿ ತಮನ್ನಾಗೆ ಸೆಡ್ಡು ಹೊಡೆದ ಮಿಸೆಸ್ ಕೇರಳ!

ಜೈಲರ್​ ಚಿತ್ರದಲ್ಲಿ ನಟಿ ತಮನ್ನಾ ಭಾಟಿಗೆ ಕಾವಾಲ ಹಾಡಿಗೆ ಮಾಡಿದ ನೃತ್ಯದಂತೆಯೇ, ಅದೇ ರೀತಿ ವೇಷ ತೊಟ್ಟು ಮಿಸೆಸ್​ ಇಂಡಿಯಾ ಕೇರಳ ಪ್ರಿಯಾಂಕಾ ಭರ್ಜರಿ ಸ್ಟೆಪ್​ ಹಾಕಿದ್ದಾರೆ.   

ಟಾಲಿವುಡ್​​ ಚಿತ್ರರಂಗದ ಬಹುನಿರೀಕ್ಷಿತ ಸಿನಿಮಾ ‘ಜೈಲರ್’ (Jailer) ಚಿತ್ರವನ್ನು ಕಣ್ತುಂಬಿಕೊಳ್ಳಲು ಒಂದೆಡೆ ತಲೈವಾ ಫ್ಯಾನ್ಸ್​ ತುದಿಗಾಲಿನಲ್ಲಿ ನಿಂತಿದ್ದರೆ, ಇತ್ತೀಚೆಗೆ ಬಿಡುಗಡೆಯಾಗಿರೋ ಇದರ ಕಾವಾಲ  ಹಾಡು ಮಾತ್ರ ಸೋಷಿಯಲ್​ ಮೀಡಿಯಾದಲ್ಲಿ ಹಂಗಾಮ ಸೃಷ್ಟಿಸುತ್ತಿದೆ. ಫೇಸ್​ಬುಕ್, ಇನ್‌ಸ್ಟಾಗ್ರಾಮ್​, ವಾಟ್ಸಪ್‌ ಸ್ಟೇಟಸ್‌ನಲ್ಲೂ ಇದೇ ಈಗ ಟ್ರೆಂಡಿಂಗ್‌ನಲ್ಲಿದೆ. ಮಕ್ಕಳಿಂದ ಹಿಡಿದು ಅಜ್ಜಿಯರವರೆಗೆ, ಕಿರುತೆರೆ ಕಲಾವಿದರಿಂದ ಹಿಡಿದು ಬೇರೆ ಬೇರೆ ನಟಿಯರೂ ಈ ಹಾಡಿಗೆ ಡಾನ್ಸ್​ ಮಾಡಿ ಮೋಡಿ ಮಾಡುತ್ತಿದ್ದಾರೆ. ಈಚೆಗೆ ಕಿರುತೆರೆ ನಟಿ, ಅಗ್ನಿಸಾಕ್ಷಿ ಖ್ಯಾತಿಯ ವೈಷ್ಣವಿ ಕೂಡ ಈ ಹಾಡಿಗೆ ಡಾನ್ಸ್​ ಮಾಡಿ ಅಭಿಮಾನಿಗಳನ್ನು ರಂಜಿಸಿದ್ದು ಇದೆ.   ಅನಿರುದ್ಧ್ ಮ್ಯೂಸಿಕ್, ಶಿಲ್ಪಾ ರಾವ್ ವಾಯ್ಸ್‌ನಲ್ಲಿ ಸಾಂಗ್ ಕೇಳುಗರಿಗೆ ಆಪ್ತವಾಗಿದೆ.  ತಮನ್ನಾ ಭಾಟಿಯಾ ಮತ್ತು ರಜನಿಕಾಂತ್‌ ನಟಿಸಿದ ಈ ಚಿತ್ರದ ಕಾವಾಲ (Kavalayya)  ಹಾಡು ಜುಲೈ 6ರಂದು ಬಿಡುಗಡೆಯಾಗಿತ್ತು.  ಈ ಹಾಡಿಗೆ ಅರುಣರಾಜ ಕಾಮರಾಜ್ ಸಾಹಿತ್ಯವಿದೆ. ಆನ್‌ಲೈನ್‌ನಲ್ಲಿ ಹೊಸ ಪುಳಕ ಉಂಟು ಮಾಡಿದ ಈ ಹಾಡು ಯೂಟ್ಯೂಬ್‌ನಲ್ಲಿ 80 ದಶಲಕ್ಷ ವೀಕ್ಷಣೆ ಗಳಿಸಿದೆ. ಇದರಲ್ಲಿ ನಟಿ  ತಮನ್ನಾ ಡಾನ್ಸ್​ ಅಂತೂ ಹಲವರಿಗೆ ಹುಚ್ಚೇ ಹಿಡಿಸಿದೆ.  ಜಾನಿ ಮಾಸ್ಟರ್ ಕೊರಿಯೋಗ್ರಫಿಯಲ್ಲಿ ಬಿಂದಾಸ್ ಆಗಿ ಕುಣಿದು ಮಿಲ್ಕಿ ಬ್ಯೂಟಿ ಫ್ಯಾನ್ಸ್​ ಹೃದಯಕ್ಕೆ ಲಗ್ಗೆ ಇಟ್ಟುಬಿಟ್ಟಿದ್ದಾರೆ. ರೀಲ್ಸ್​ನಲ್ಲಿ ಪ್ರವೀಣರಾದವರ ಪೈಕಿ ಬಹುತೇಕ ಯುವತಿಯರಿಗಂತೂ ಈ ಹಾಡು ಅಚ್ಚುಮೆಚ್ಚಾಗಿದ್ದು, ಸಕತ್​ ಲೈಕ್ಸ್​ ಕೂಡ ಬರುತ್ತಿವೆ. ಒಟ್ಟಿನಲ್ಲಿ ಈ ಡಾನ್ಸ್​ (Dacne) ಇಂಟರ್‌ನೆಟ್‌ನಲ್ಲಿ ಹೊಸ ಕ್ರೇಜ್‌ ಹುಟ್ಟುಹಾಕಿದೆ. 

ಮೈಚಳಿ ಬಿಟ್ಟು ತಮನ್ನಾ ಕುಣಿದಿದ್ದು,  ಯೂಟ್ಯೂಬ್‌ನಲ್ಲಿ (Youtube) ಸೂಪರ್‌ ಹಿಟ್‌ ಆಗಿದೆ.  ನಟಿಯ ಆ ಹಾಡಿನ ವಿಡಿಯೋ ತುಣುಕುಗಳೂ ನೋಡುಗರ ಕಣ್ಣರಳಿಸುತ್ತಿವೆ.   ಇದಾಗಲೇ ಹಲವಾರು ಯುವತಿಯರು ಇದರ ರೀಲ್ಸ್​ ಮಾಡಿ ಶೇರ್​ ಮಾಡಿಕೊಂಡಿದ್ದು, ಸುದ್ದಿಯಾಗುತ್ತಿರುವುದು ಇದೆ. ಆದರೆ ಅವರೆಲ್ಲರಿಗಿಂತಲೂ ಭಿನ್ನವಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ ಪ್ರಿಯಾಂಕಾ ಶೆಣೈ (Priyanka Shenoy). ಇದಕ್ಕೆ ಕಾರಣವೂ ಇದೆ. ಇವರ ಡಾನ್ಸ್​ ತಮನ್ನಾ ಅವರ ನೃತ್ಯದಷ್ಟೇ ಸೊಗಸಾಗಿ ಮೂಡಿಬಂದಿದ್ದರೆ, ಈ ಡಾನ್ಸ್​ನಲ್ಲಿ ತಮನ್ನಾ  ತೊಟ್ಟಿರುವ ಉಡುಗೆಯನ್ನೇ ಪ್ರಿಯಾಂಕಾ ಅವರು ತೊಟ್ಟಿದ್ದು, ಅದೇ ರೀತಿ ಮೇಕ್​ ಓವರ್​ ಮಾಡಿಕೊಂಡಿದ್ದಾರೆ. ಡಾನ್ಸ್​ ಹಿಂಭಾಗದಲ್ಲಿ ಕಾವಾಲ ಹಾಡಿಗೆ ತಮನ್ನಾ ಹೆಜ್ಜೆ ಹಾಕುತ್ತಿರುವುದನ್ನು ನೋಡಬಹುದು. ಆ ಹೆಜ್ಜೆಗೆ ಸ್ವಲ್ಪವೂ ವ್ಯತ್ಯಾಸವಾಗದಂತೆ ಥೇಟ್​ ಅದೇ ಮಾದರಿಯಲ್ಲಿ ಪ್ರಿಯಾಂಕಾ ಭರ್ಜರಿ ಸ್ಟೆಪ್​ ಹಾಕಿದ್ದಾರೆ.

ಅಂದಹಾಗೆ ಪ್ರಿಯಾಂಕಾ ಅವರು ಸಾಮಾಜಿಕ ಜಾಲತಾಣದಲ್ಲಿ ಅಪಾರ ಫಾಲೋವರ್ಸ್​ (Followers) ಹೊಂದಿದ್ದಾರೆ.  ಇವರು ಕೇವಲ ಅದ್ಭುತ ನೃತ್ಯಗಾತಿ ಮಾತ್ರವಲ್ಲದೇ 2017 ರಲ್ಲಿ ಮಿಸೆಸ್ ಇಂಡಿಯಾ ಕೇರಳ ಕೂಡ ಆಗಿದ್ದವರು.  ಇನ್‌ಸ್ಟಾಗ್ರಾಂ ರೀಲ್ಸ್‌ನಲ್ಲಿ ಇವರು ಒಂದು ವಾರದ ಹಿಂದೆ ಈ ವಿಡಿಯೋ ಹಂಚಿಕೊಂಡಿದ್ದಾರೆ. ಈ ವಿಡಿಯೋ 50 ದಶಲಕ್ಷಕ್ಕೂ ಅಧಿಕ ವೀಕ್ಷಣೆ ಪಡೆದಿದೆ. ಎರಡು ದಶಲಕ್ಷಕ್ಕೂ ಹೆಚ್ಚು ಜನರು ಲೈಕ್‌ ಮಾಡಿದ್ದಾರೆ.  

ಅಂದಹಾಗೆ,  ಕಾವಾಲ ಹಾಡು ಟ್ರೈಬಲ್‌ ಥೀಮ್‌ನಲ್ಲಿ  ತಯಾರಾಗಿದ್ದು ತಮನ್ನಾ ಭಾಟಿಯಾ ಹಾಟ್​ ಲುಕ್​ಗೆ ಫ್ಯಾನ್ಸ್ ಫಿದಾ ಆಗಿದ್ದಾರೆ.  ರಜನಿಕಾಂತ್‌ ಕೂಡಾ ಈ ಹಾಡಿನಲ್ಲಿ ಸಾಲ್ಟ್‌ ಪೆಪ್ಪರ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ರಜನಿಕಾಂತ್ ಅವರ ಸಿನಿ ಪಯಣದಲ್ಲಿ  ಜೈಲರ್ ಚಿತ್ರ ವಿಶೇಷವಾಗಿದೆ. ಆದ್ದರಿಂದ ಈ ಸಿನಿಮಾದ ಮೇಲೆ ಅವರ ನಿರೀಕ್ಷೆ ಕೂಡ ಹೆಚ್ಚಾಗಿದೆ. ತಮನ್ನಾ ಭಾಟಿಯಾ ಅವರು ಐಟಂ ಸಾಂಗ್​ಗಳಲ್ಲಿ ನಟಿಸಿದ್ದು ಇದೇ ಮೊದಲೇನಲ್ಲ. ‘ಕೆಜಿಎಫ್​: ಚಾಪ್ಟರ್​ 1’ ಸಿನಿಮಾದ ‘ಜೋಕೆ ನಾನು ಬಳ್ಳಿಯ ಮಿಂಚು..’ ಹಾಡಿನಲ್ಲಿ ತಮನ್ನಾ ಸ್ಟೆಪ್​ ಹಾಕಿದ ಪರಿಗೆ ಪಡ್ಡೆ ಹುಡುಗರು ಫಿದಾ ಆಗಿದ್ದರು. ತೆಲುಗು, ತಮಿಳಿನ ಸಿನಿಮಾಗಳಲ್ಲೂ ಅವರು ಐಟಂ ಡ್ಯಾನ್ಸ್​ ಮಾಡಿ ಸೈ ಎನಿಸಿಕೊಂಡಿದ್ದಾರೆ. ಈಗ ಅವರು ‘ಜೈಲರ್​’ ಚಿತ್ರದಲ್ಲಿ ಸ್ಟೆಪ್​  ಹಾಕಿದ್ದಾರೆ.