ದೇಶದ ಎನ್‌ಆರ್‌ಐಗಳ ಪೈಕಿ ಗೌತಮ್ ಅದಾನಿ ಅವರ ಅಣ್ಣ ಅತ್ಯಂತ ಶ್ರೀಮಂತ ಎನಿಸಿಕೊಂಡಿದ್ದಾರೆ. ದೇಶದ ಶ್ರೀಮಂತ ವ್ಯಕ್ತಿಗಳ ಪಟ್ಟಿಯಲ್ಲಿ 6ನೇ ಸ್ಥಾನಕ್ಕೆ ಏರಿಕೆಯಾಗಿದೆ.
ಗೌತಮ್ ಅದಾನಿ ಈಗ ವಿಶ್ವದ 3ನೇ ಆತ್ಯಂತ ಶ್ರೀಮಂತ ವ್ಯಕ್ತಿ (Richest Person) ಎನಿಸಿಕೊಂಡಿದ್ದಾರೆ. ಷೇರು ಮಾರುಕಟ್ಟೆಗಳ (Share Market) ಪ್ರಭಾವದಿಂದ ಕೆಲ ಗಂಟೆಗಳ ಕಾಲ ಗೌತಮ್ ಅದಾನಿ ದೇಶದ 2ನೇ ಶ್ರೀಮಂತ ವ್ಯಕ್ತಿಯೂ ಆಗಿದ್ದರು. ಅವರೊಂದಿಗೆ ಈಗ ಗೌತಮ್ ಅದಾನಿ ಅಣ್ಣ ಸಹ ಭಾರತದ ಟಾಪ್10 ಶ್ರೀಮಂತ ವ್ಯಕ್ತಿಗಳಲ್ಲಿ ಒಬ್ಬರು ಎನಿಸಿಕೊಂಡಿದ್ದಾರೆ. ಐಐಎಫ್‌ಎಲ್ (IIFL) ವೆಲ್ತ್ ಮತ್ತು ಹುರುನ್ (Hurun) ಬುಧವಾರ ಬಿಡುಗಡೆ ಮಾಡಿದ ಮೊದಲ ಹತ್ತು ಶ್ರೀಮಂತ ಭಾರತೀಯರ ಪಟ್ಟಿಯಲ್ಲಿ ಸ್ಥಾನ ಪಡೆದ ಎರಡನೇ ಅದಾನಿ ಎನಿಸಿಕೊಂಡಿದ್ದಾರೆ. ಗೌತಮ್ ಅದಾನಿ ಅವರ ಹಿರಿಯ ಸಹೋದರ ವಿನೋದ್ ಶಾಂತಿಲಾಲ್ ಅದಾನಿ ಈಗ ಭಾರತದ 6ನೇ ಶ್ರೀಮಂತ ಭಾರತೀಯ ಎನಿಸಿಕೊಂಡಿದ್ದಾರೆ. ದುಬೈ ನಿವಾಸಿಯಾಗಿರುವ ಅವರು ಕಳೆದ ಒಂದು ವರ್ಷದಲ್ಲಿ 8ನೇ ಸ್ಥಾನದಿಂದ 6ನೇ ಸ್ಥಾನಕ್ಕೆ ಏರಿದ್ದಾರೆ ಎಂದು ಇಂದು ಬಿಡುಗಡೆಯಾದ IIFL ವೆಲ್ತ್ ಹುರುನ್ ಇಂಡಿಯಾ ರಿಚ್ ಲಿಸ್ಟ್ (Hurun India Rich List) 2022 ತಿಳಿಸಿದೆ.
ಅಂದ ಹಾಗೆ, ಗೌತಮ್ ಅದಾನಿ ಅವರ ಅಣ್ಣ ವಿನೋದ್ ಶಾಂತಿಲಾಲ್ ಅದಾನಿ ಅವರ ಆಸ್ತಿ ಎಷ್ಟು ಗೊತ್ತಾ..? ಬರೋಬ್ಬರಿ 1.69 ಲಕ್ಷ ಕೋಟಿ ರೂ. ಸಂಪತ್ತು ಹೊಂದಿದ್ದಾರೆ. ಗೌತಮ್ ಅದಾನಿ ಮತ್ತು ಕುಟುಂಬವು 5 ವರ್ಷಗಳಲ್ಲಿ ತಮ್ಮ ಸಂಪತ್ತನ್ನು 15.4 ಪಟ್ಟು ಹೆಚ್ಚಿಸಿಕೊಂಡಿದ್ದರೆ, ವಿನೋದ್ ಶಾಂತಿಲಾಲ್ ಅದಾನಿ ಮತ್ತು ಕುಟುಂಬವು ತಮ್ಮ ಸಂಪತ್ತನ್ನು 9.5 ಪಟ್ಟು ಹೆಚ್ಚಿಸಿದೆ ಎಂದು ವರದಿ ಹೇಳಿದೆ. ಕಳೆದ 5 ವರ್ಷಗಳಲ್ಲಿ, ಭಾರತದ ಅತ್ಯಂತ ಶ್ರೀಮಂತರ ಪಟ್ಟಿಯಲ್ಲಿ ಗೌತಮ್ ಅದಾನಿ ಅವರ ಶ್ರೇಯಾಂಕವು 8ನೇ ಸ್ಥಾನದಿಂದ ಮೊದಲ ಸ್ಥಾನಕ್ಕೆ ಏರಿತು. ಇನ್ನೊಂದೆಡೆ, ವಿನೋದ್ ಶಾಂತಿಲಾಲ್ ಅದಾನಿ ಅವರ ರ‍್ಯಾಂಕಿಂಗ್ 2018 ರಲ್ಲಿ 49 ನೇ ಸ್ಥಾನದಿಂದ ಈ ವರ್ಷ ಆರನೇ ಸ್ಥಾನಕ್ಕೆ ಏರಿತು.
ಇದನ್ನು ಓದಿ: ಒಂದೇ ದಿನದಲ್ಲಿ 80 ಸಾವಿರ ಕೋಟಿ ಕಳೆದುಕೊಂಡ Jeff Bezos: ವಿಶ್ವದ 2ನೇ ಶ್ರೀಮಂತ ಸ್ಥಾನಕ್ಕೆ Gautam Adani ಮತ್ತಷ್ಟು ಹತ್ತಿರ
ಗೌತಮ್ ಅದಾನಿ ಅವರ ಅಣ್ಣನ ಆಸ್ತಿಯ ನಿವ್ವಳ ಮೌಲ್ಯವು ಕಳೆದ ಒಂದು ವರ್ಷದಲ್ಲಿ 28% ಅಥವಾ ₹36,969 ಕೋಟಿಗಳಷ್ಟು ಹೆಚ್ಚಾಗಿದೆ. ಹುರುನ್ ವರದಿಯ ಪ್ರಕಾರ, ಅವರು 2021 ರಿಂದ ಪ್ರತಿದಿನ ₹102 ಕೋಟಿಗೂ ಹೆಚ್ಚು ಸಂಪತ್ತನ್ನು ಸೃಷ್ಟಿಸಿದ್ದಾರೆ ಎಂದು ತಿಳಿದುಬಂದಿದೆ. ಒಟ್ಟಾಗಿ, ಅದಾನಿ ಸಹೋದರರಿಬ್ಬರೂ ಒಟ್ಟು ₹12,63,400 ಕೋಟಿ ಸಂಪತ್ತನ್ನು ಹೊಂದಿದ್ದಾರೆ ಅಥವಾ ಹುರುನ್ ಇಂಡಿಯಾ ಶ್ರೀಮಂತರ ಪಟ್ಟಿ 2022 ರಲ್ಲಿ ಟಾಪ್ 10ನಲ್ಲಿ ಸುಮಾರು 40% ಸಂಪತ್ತು ಹೊಂದಿದ್ದಾರೆ ಎಂದು ವರದಿಯಾಗಿದೆ.
ಅತ್ಯಂತ ಶ್ರೀಮಂತ ಎನ್‌ಆರ್‌ಐ
ಅದಾನಿ ಗ್ರೂಪ್‌ನ ವಿನೋದ್ ಶಾಂತಿಲಾಲ್ ಅದಾನಿ ಮತ್ತು ಕುಟುಂಬದವರು ಈ ಪಟ್ಟಿಯಲ್ಲಿರುವ ಅತ್ಯಂತ ಶ್ರೀಮಂತ ಎನ್‌ಆರ್‌ಐಗಳಾಗಿದ್ದಾರೆ (NRI). 1,103 ಭಾರತೀಯ ಎನ್‌ಆರ್‌ಐಗಳಲ್ಲಿ ಒಟ್ಟು 94 ಎನ್‌ಆರ್‌ಐಗಳು ₹1,000 ಕೋಟಿ ಅಥವಾ ಅದಕ್ಕಿಂತ ಹೆಚ್ಚಿನ ಸಂಪತ್ತನ್ನು ಹೊಂದಿದ್ದಾರೆ ಎಂದೂ ಹೇಳಲಾಗಿದೆ. ಅದಾನಿ ಗ್ರೂಪ್ ಕಂಪನಿಗಳ ಮೌಲ್ಯದ ಬೆಳವಣಿಗೆಯಿಂದ ವಿನೋದ್ ಶಾಂತಿಲಾಲ್ ಅದಾನಿ ಅವರ ಆಸ್ತಿಯ ಮೌಲ್ಯವೂ ಹೆಚ್ಚಾಗಿದೆ.
ವಿನೋದ್ ಭಾಯ್ ಎಂದೂ ಕರೆಯಲ್ಪಡುವ ಗೌತಮ್ ಅದಾನಿ ಅವರ ಸಹೋದರ ದುಬೈನಲ್ಲಿ ನೆಲೆಸಿದ್ದಾರೆ ಮತ್ತು ಸಿಂಗಾಪುರ ಹಾಗೂ ಇಂಡೋನೇಷ್ಯಾ ರಾಜಧಾನಿ ಜಕಾರ್ತಾದಲ್ಲಿ ವ್ಯಾಪಾರ ವ್ಯವಹಾರಗಳನ್ನು ನಿರ್ವಹಿಸುತ್ತಾರೆ. 1976 ರಲ್ಲಿ ಮಹಾರಾಷ್ಟ್ರದ ಮುಂಬೈನ ಭಿವಾಂಡಿಯಲ್ಲಿ ವಿ.ಆರ್‌. ಟೆಕ್ಸ್‌ಟೈಲ್ ಹೆಸರಿನಲ್ಲಿ ಪವರ್ ಲೂಮ್‌ಗಳನ್ನು ಸ್ಥಾಪಿಸುವ ಮೂಲಕ ಇವರು ಉದ್ಯಮಿಯಾದರು. ನಂತರ ಅವರು ಬಂಡವಾಳಕ್ಕೆ ಹೊಸ ಸರಕುಗಳನ್ನು ಪರಿಚಯಿಸಿದರು ಮತ್ತು ಸಿಂಗಾಪುರದಲ್ಲಿ ಕಚೇರಿಯನ್ನು ತೆರೆಯುವ ಮೂಲಕ ಅದನ್ನು ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ವಿಸ್ತರಿಸಿದರು.
ಇದನ್ನೂ ಓದಿ: ವಿಶ್ವದ 4ನೇ ಅತಿ ಶ್ರೀಮಂತ ವ್ಯಕ್ತಿ ಅದಾನಿಗೆ ಎಸ್‌ಬಿಐನಿಂದ 14 ಸಾವಿರ ಕೋಟಿ ಸಾಲ ಬೇಕಂತೆ..!
ನಂತರ ವ್ಯಾಪಾರವನ್ನು ನಿರ್ವಹಿಸಲು ಸಿಂಗಾಪುರಕ್ಕೆ ತೆರಳಿದರು ಮತ್ತು 1994 ರಲ್ಲಿ ದುಬೈನಲ್ಲಿ ನೆಲೆಸಿದರು. ಈ ಮೂಲಕ ಮಧ್ಯಪ್ರಾಚ್ಯದಾದ್ಯಂತ ವ್ಯಾಪಾರವನ್ನು ವಿಸ್ತರಿಸಿಕೊಂಡರು ಎಂದು ತಿಳಿದುಬಂದಿದೆ.