ಮೋದಿ ಹೇಳಿದ್ರಾ?: ಪಾಕ್‌ಗೆ ಸಾಲ ಕೊಡಲ್ಲ ಅಂತಿದೆ ಚೀನಾ!

ಪಾಕಿಸ್ತಾನಕ್ಕೆ ಸಾಲ ಕೊಡಲು ಚೀನಾ ಬ್ಯಾಂಕ್ ನಕಾರ! ಆರ್ಥಿಕವಾಗಿ ದಿವಾಳಿಯತ್ತ ಸಾಗುತ್ತಿರುವ ಪಾಕಿಸ್ತಾನ! ಪಾಕ್ ಕರೆನ್ಸಿ ಮೌಲ್ಯ ಕುಸಿತವೇ ಸಾಲ ನಕಾರಕ್ಕೆ ಕಾರಣ!ಐಎಂಎಫ್ ಪಾಕ್‌ಗೆ ಸಾಲ ಕೊಡಲು ಅಮೆರಿಕ ವಿರೋಧ! ಚೀನಾ ಸಾಲ ತೀರಿಸಲು ಐಎಂಎಫ್ ಹಣ ಬಳಕೆ ಸಾಧ್ಯತೆ

ಹಾಂಕಾಂಗ್(ಆ.19): ಪಾಕಿಸ್ತಾನಕ್ಕೆ ಸಾಲ ಕೊಡಲು ಚೀನಾದ ಬ್ಯಾಂಕ್‌ಗಳು ಭಯಪಡುತ್ತಿವೆ ಎಂದು ಹೇಳಲಾಗುತ್ತಿದ್ದು, ಇದಕ್ಕೆ ಕುಸಿಯುತ್ತಿರುವ ಪಾಕಿಸ್ತಾನ ಕರೆನ್ಸಿ ಮೌಲ್ಯವೇ ಕಾರಣ ಎನ್ನಲಾಗಿದೆ.

ಆರ್ಥಿಕವಾಗಿ ದಿವಾಳಿಯಾಗುವ ಹಂತಕ್ಕೆ ತಲುಪಿರುವ ಪಾಕಿಸ್ತಾನಕ್ಕೆ, ಐಎಂಎಫ್‌ ನೆರವು ಕೊಡುವುದನ್ನು ಅಮೆರಿಕ ಬಲವಾಗಿ ವಿರೋಧಿಸುತ್ತಿದೆ. ಮತ್ತೊಂದು ಕಡೆ ಪಾಕ್‌ ಕರೆನ್ಸಿಯ ಮೌಲ್ಯ ಕುಸಿಯುತ್ತಿದೆ. ಹೀಗಾಗಿ ಪಾಕ್‌ಗೆ ಸಾಲ ಕೊಡಲು ಚೀನಿ ಬ್ಯಾಂಕ್‌ಗಳು ಹಿಂದೇಟು ಹಾಕುತ್ತಿವೆ. 

ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್‌ ಸಲುವಾಗಿ ಚೀನಾದ ಬ್ಯಾಂಕ್‌ಗಳು ಪಾಕಿಸ್ತಾನಕ್ಕೆ ಈಗಾಗಲೇ ಹತ್ತಾರು ಶತಕೋಟಿ ಡಾಲರ್‌ ಸಾಲವನ್ನು ಕೊಟ್ಟಿವೆ. ಪಾಕಿಸ್ತಾನದ ವಿದೇಶಿ ವಿನಿಮಯ ಸಂಗ್ರಹ ತೀವ್ರವಾಗಿ ಕುಸಿದಿದ್ದು, ಐಎಂಎಫ್‌ ಹಾಗೂ ಸೌದಿ ಅರೇಬಿಯಾದಿಂದ ಆರ್ಥಿಕ ನೆರವಿನ ನಿರೀಕ್ಷೆಯಲ್ಲಿದೆ. ಕೇವಲ 2 ತಿಂಗಳಿನ ಆಮದಿಗೆ ಸಾಕಾಗುವಷ್ಟು ವಿದೇಶಿ ವಿನಿಮಯ ಸಂಗ್ರಹವನ್ನು ಪಾಕಿಸ್ತಾನ ಹೊಂದಿದೆ. 

ಐಎಂಎಫ್‌ ಒಂದು ವೇಳೆ ಪಾಕಿಸ್ತಾನಕ್ಕೆ ಆರ್ಥಿಕ ನೆರವನ್ನು ಕೊಡಲು ಒಪ್ಪಿದರೆ, ಪಾಕಿಸ್ತಾನ ಅದನ್ನು ಚೀನಾದ ಸಾಲ ಮರುಪಾವತಿಗೆ ಬಳಸುವ ಸಾಧ್ಯತೆ ಇದೆ ಎಂದು ಅಮೆರಿಕ ಆರೋಪಿಸಿದೆ.