AI ರಾಜಧಾನಿ ಆಗುವತ್ತ ಮಹಾ ಹೆಜ್ಜೆ, ನವಿಮುಂಬೈನಲ್ಲಿ 300 ಎಕರೆಯಲ್ಲಿ ಇನೋವೇಷನ್‌ ಸಿಟಿ!

ಮಹಾರಾಷ್ಟ್ರ ಸರ್ಕಾರವು ನವಿ ಮುಂಬೈನಲ್ಲಿ 300 ಎಕರೆ ವಿಸ್ತೀರ್ಣದ 'ಇನ್ನೋವೇಷನ್ ಸಿಟಿ'ಯನ್ನು ಸ್ಥಾಪಿಸಲು ಯೋಜಿಸಿದೆ. ಇದು ಆರ್ಥಿಕ ಚಟುವಟಿಕೆಯನ್ನು ಉತ್ತೇಜಿಸಲು ಮತ್ತು ತಾಂತ್ರಿಕ ನಾವೀನ್ಯತೆಗಳನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿದೆ. ಇದರೊಂದಿಗೆ ಗ್ಲೋಬಲ್ ಕೆಪಾಬಿಲಿಟಿ ಸೆಂಟರ್ (ಜಿಸಿಸಿ) ಪಾರ್ಕ್ ಅನ್ನು ಸಹ ಸ್ಥಾಪಿಸಲಾಗುವುದು.

ಮುಂಬೈ (ಫೆ.26): ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರು ಆರ್ಥಿಕ ಚಟುವಟಿಕೆಯನ್ನು ಉತ್ತೇಜಿಸಲು ಮತ್ತು ತಾಂತ್ರಿಕ ನಾವೀನ್ಯತೆಗಳನ್ನು ಉತ್ತೇಜಿಸಲು ನವಿ ಮುಂಬೈನಲ್ಲಿ 300 ಎಕರೆ ವಿಸ್ತೀರ್ಣದ 'ಇನ್ನೋವೇಷನ್ ಸಿಟಿ'  ನಿರ್ಮಾಣ ಮಾಡುವುದಾಗಿ ಘೋಷಣೆ ಮಾಡಿದ್ದಾರೆ. ಐಟಿ ಉದ್ಯಮ ಸಂಘ ನಾಸ್ಕಾಮ್ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಫಡ್ನವೀಸ್, ಟಾಟಾ ಸನ್ಸ್‌ನ ಅಧ್ಯಕ್ಷ ಎನ್ ಚಂದ್ರಶೇಖರನ್, ಇನ್ನೋವೇಶನ್ ಸಿಟಿಯ ಪ್ರಮುಖ ಯೋಜನೆಗಳನ್ನು ದಾಖಲಿಸುವ ವಿಸ್ತೃತ ಪ್ರಬಂಧವನ್ನು ಸಿದ್ಧಪಡಿಸುವುದಾಗಿ ತಿಳಿಸಿದ್ದಾರೆ ಎಂದು ವಿವರಿಸಿದರು. ಈ ಬೃಹತ್ ಯೋಜನೆಯು ನವೀ ಮುಂಬೈನ ಹೊಸ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಹೊರವಲಯದಲ್ಲಿ ರೂಪುಗೊಳ್ಳಲಿದ್ದು, ಆ ಪ್ರದೇಶದಲ್ಲಿ ಹೊಸ ನಗರ ಕೇಂದ್ರವನ್ನು ಅಭಿವೃದ್ಧಿಪಡಿಸುವ ರಾಜ್ಯದ ವಿಶಾಲ ದೃಷ್ಟಿಕೋನದ ಭಾಗವಾಗಿ ಇದು ಕಾರ್ಯರೂಪಕ್ಕೆ ಬರಲಿದೆ.

ಇನ್ನೋವೇಶನ್ ಸಿಟಿಯ ಜೊತೆಗೆ, ಮಹಾರಾಷ್ಟ್ರವು ನವಿ ಮುಂಬೈನಲ್ಲಿ ಗ್ಲೋಬಲ್ ಕೆಪಾಬಿಲಿಟಿ ಸೆಂಟರ್ (ಜಿಸಿಸಿ) ಪಾರ್ಕ್ ಅನ್ನು ಸ್ಥಾಪಿಸುತ್ತಿದೆ ಎಂದು ಮುಖ್ಯಮಂತ್ರಿ ಬಹಿರಂಗಪಡಿಸಿದರು. ಹೂಡಿಕೆ ಮಾಡಲು ಐದು ಪ್ರಮುಖ ಜಿಸಿಸಿಗಳೊಂದಿಗೆ ರಾಜ್ಯವು ಸಕ್ರಿಯ ಮಾತುಕತೆ ನಡೆಸುತ್ತಿದೆ ಮತ್ತು ಮುಂದಿನ ದಿನಗಳಲ್ಲಿ ಸಕಾರಾತ್ಮಕ ಸುದ್ದಿಯನ್ನು ಎದುರು ನೋಡುತ್ತಿದೆ ಎಂದು ತಿಳಿಸಿದ್ದಾರೆ.

ಸರ್ಕಾರ ಇತ್ತೀಚೆಗೆ ಡೇಟಾ ಸೆಂಟರ್‌ಗಳಿಗಾಗಿ $20 ಶತಕೋಟಿ ಹೂಡಿಕೆಯ ಹಲವಾರು ತಿಳುವಳಿಕೆ ಒಪ್ಪಂದಗಳಿಗೆ (MoU) ಸಹಿ ಹಾಕಿದೆ ಎಂದು ಫಡ್ನವೀಸ್ ಮಾಹಿತಿ ನೀಡಿದರು. ನವಿ ಮುಂಬೈನಲ್ಲಿ ಹೊಸ ಡೇಟಾ ಸೆಂಟರ್ ಪಾರ್ಕ್ ಅನ್ನು ಸಹ ಸ್ಥಾಪಿಸಲಾಗುವುದು ಎಂದು ಅವರು ಭರವಸೆ ನೀಡಿದರು, ಇದು ತಂತ್ರಜ್ಞಾನ ಮತ್ತು ಮೂಲಸೌಕರ್ಯ ತಾಣವಾಗಿ ಈ ಪ್ರದೇಶದ ಸ್ಥಾನಮಾನವನ್ನು ಮತ್ತಷ್ಟು ಬಲಪಡಿಸುತ್ತದೆ. ಮಹಾರಾಷ್ಟ್ರದ ಕೃತಕ ಬುದ್ಧಿಮತ್ತೆ (AI) ಯೋಜನೆಗಳನ್ನು ಒತ್ತಿ ಹೇಳಿದ ಫಡ್ನವೀಸ್, ತಂತ್ರಜ್ಞಾನ ಪ್ರಮುಖ ಮೈಕ್ರೋಸಾಫ್ಟ್ ಜೊತೆಗಿನ ಒಪ್ಪಂದದ ಭಾಗವಾಗಿ ರಾಜ್ಯದಲ್ಲಿ 10,000 ಕ್ಕೂ ಹೆಚ್ಚು ಮಹಿಳೆಯರು ಈಗಾಗಲೇ AI ತರಬೇತಿ ಪಡೆಯುತ್ತಿದ್ದಾರೆ ಎಂದು ಹೇಳಿದ್ದಾರೆ.

"ಮಹಾರಾಷ್ಟ್ರವು ದೇಶದ ಕೃತಕ ಬುದ್ಧಿಮತ್ತೆಯ ರಾಜಧಾನಿಯಾಗಲು ಬಯಸುತ್ತದೆ" ಎಂದು ತಿಳಿಸಿದ್ದಾರೆ.ತಂತ್ರಜ್ಞಾನ ಆಧಾರಿತ ಯೋಜನೆಗಳು ರಾಜ್ಯದ ಒಟ್ಟು ರಾಜ್ಯ ದೇಶೀಯ ಉತ್ಪನ್ನಕ್ಕೆ (GSDP) ಪ್ರಮುಖ ಕೊಡುಗೆ ನೀಡಲಿವೆ ಎಂದು ಅವರು ಪುನರುಚ್ಚರಿಸಿದರು ಮತ್ತು ಮುಂದಿನ ನಾಲ್ಕರಿಂದ ಐದು ವರ್ಷಗಳಲ್ಲಿ ಇದು $1 ಟ್ರಿಲಿಯನ್ ತಲುಪಲಿದೆ ಎಂದು ಭವಿಷ್ಯ ನುಡಿದರು.ಭವಿಷ್ಯದಲ್ಲಿ, 2027 ರ ನಾಸಿಕ್ ಕುಂಭಮೇಳವನ್ನು ಪರಿಣಾಮಕಾರಿಯಾಗಿ ಯೋಜಿಸುವಲ್ಲಿ ತಂತ್ರಜ್ಞಾನವು ಪ್ರಮುಖ ಅಂಶವಾಗಿದೆ ಎಂದು ಫಡ್ನವೀಸ್ ವಿಶ್ವಾಸದಿಂದ ತಿಳಿಸಿದ್ದಾರೆ.