ಮಿಸ್‌ ಆಗಿ ಪ್ರಿಂಟ್‌ ಆಗಿದ್ದ ನಾಣ್ಯ ಹರಾಜಿನಲ್ಲಿ 4.25 ಕೋಟಿಗೆ ಮಾರಾಟ, ಇದರ ವಿಶೇಷತೆ ಏನು?

ಈ ನಾಣ್ಯವನ್ನು 1975 ರಲ್ಲಿ ತಯಾರಿಸಲಾಗಿದೆ ಎಂದು ಹೇಳಲಾಗುತ್ತಿದೆ. ಇದು 20 ನೇ ಶತಮಾನದ ಅಪರೂಪದ ನಾಣ್ಯಗಳಲ್ಲಿ ಒಂದೂ ಎನ್ನುವ ಮನ್ನಣೆಯನ್ನೂ ಪಡೆದಿದೆ. ಅಮೆರಿಕನ್‌ ಡಿಮ್‌ ನಾಣ್ಯ ಎಂದು ಹರಾಜು ಸಂಸ್ಥೆ ಹೇಳಿದೆ.

ಬೆಂಗಳೂರು (ನ.8): ಜಗತ್ತಿನಲ್ಲಿ ಸಾಮಾನ್ಯ ವಸ್ತುವಿನಂತೆ ಕಾಣುವ ಅನೇಕ ವಸ್ತುಗಳು ಇವೆ, ಆದರೆ ಅವುಗಳ ಬೆಲೆ ನಾವು ನಿರೀಕ್ಷೆ ಮಾಡಿದ್ದಕ್ಕಿಂತ ಹೆಚ್ಚಾಗಿರುತ್ತದೆ. ನಾವು-ನೀವು ಅದನ್ನು ಊಹಿಸಲೂ ಸಾಧ್ಯವಿಲ್ಲ. ಇಂದು ನಾವು ನಿಮಗೆ ಅಂತಹ ಒಂದು ನಾಣ್ಯದ ಸುದ್ದಿಯನ್ನು ಹೇಳಲಿದ್ದೇವೆ. ಹೆಚ್ಚೆಂದರೆ ಈ ನಾಣ್ಯವನ್ನು ತಯಾರಿಸಲು ಕೆಲವು ನೂರು ಅಥವಾ ಸಾವಿರ ರೂಪಾಯಿಗಳು ಖರ್ಚಾಗಿರಬಹುದು. ಆದರೆ, ಹರಾಜಿನಲ್ಲಿ ಈ ನಾಣ್ಯ ಮಾರಾಟವಾದಾಗ ಇದರ ಬೆಲೆ ಬರೋಬ್ಬರಿ 4 ಕೋಟಿ ರೂಪಾಯಿ ಆಗಿದೆ. ಈ ನಾಣ್ಯವನ್ನು 1975 ರಲ್ಲಿ ತಯಾರಿಸಲಾಗಿದೆ. ಇದು 20 ನೇ ಶತಮಾನದ ಅಪರೂಪದ ನಾಣ್ಯಗಳಲ್ಲಿ ಒಂದಾಗಿದೆ ಎಂದು ಬಣ್ಣಿಸಲಾಗುತ್ತಿದೆ. ಇದು ಅಮೆರಿಕನ್‌ ಡಿಮ್‌ ನಾಣ್ಯ ಎಂದು ಹರಾಜು ಹಾಕಿರುವ ಏಜೆನ್ಸಿ ಹೇಳಿದೆ. ಈ ನಾಣ್ಯವನ್ನು 1975 ರಲ್ಲಿ ಸ್ಯಾನ್ ಫ್ರಾನ್ಸಿಸ್ಕೋ ಮಿಂಟ್ ತಯಾರಿಸಿದೆ.

ಯುಎಸ್ ಅಧ್ಯಕ್ಷರ ಫೋಟೋವನ್ನು ಮುದ್ರಿಸಲಾಗಿದೆ: ನೀವು ಈಗಾಗಲೇ ನೋಡಿರುವ ಚಿತ್ರದಲ್ಲಿರುವಂತೆ, ಇದರಲ್ಲಿ ಅಮೆರಿಕದ ಅಧ್ಯಕ್ಷ ಫ್ರಾಂಕ್ಲಿನ್ ರೂಸ್ವೆಲ್ಟ್ ಅವರ ಫೋಟೋ ಇದೆ. ಇದರ ಹೊರತಾಗಿ ಪ್ರತಿ ನಾಣ್ಯದ ಮೇಲೆ ಮಾಡಲಾಗುವ 'ಎಸ್' ಚಿಹ್ನೆಯನ್ನು ಈ ನಾಣ್ಯದಲ್ಲಿ ಮಾಡಲಾಗಿಲ್ಲ. ಅಮರಿಕನ್‌ ಡಿಮ್‌ನ ಈ ನಾಣ್ಯದ ಮೇಲೆ ಎಸ್‌ ಚಿಹ್ನೆ ಇರದ ಎರಡು ನಾಣ್ಯ ಮಾತ್ರವೇ ಪ್ರಿಂಟ್‌ ಆಗಿದೆ. ಅದರಲ್ಲಿ ಒಂದು ಈ ನಾಣ್ಯ. ಹಾಗಾಗಿ ಇದು ಅತ್ಯಂತ ಅಪರೂಪದ ನಾಣ್ಯ ಎಂದು ಹರಾಜಿನಲ್ಲಿ ದೊಡ್ಡ ಮೊತ್ತಕ್ಕೆ ಸೇಲ್‌ ಆಗಿದೆ.

ಈ ನಾಣ್ಯಕ್ಕಾಗಿ  ಆನ್‌ಲೈನ್‌ನಲ್ಲಿ ಬಿಡ್ಡಿಂಗ್: ಈ ಅಪರೂಪದ ನಾಣ್ಯವನ್ನು ಗ್ರೇಟ್ ಕಲೆಕ್ಷನ್ಸ್ ಹೆಸರಿನ ಹರಾಜು ಸಂಸ್ಥೆ ಆನ್‌ಲೈನ್‌ನಲ್ಲಿ ಹರಾಜು ಮಾಡಿದೆ. ಈ ಕುರಿತು ಕ್ಯಾಲಿಫೋರ್ನಿಯಾ ಗ್ರೇಟ್ ಕಲೆಕ್ಷನ್ಸ್ ನ ಅಧ್ಯಕ್ಷ ಇಯಾನ್ ರಸೆಲ್ ಮಾತನಾಡಿ, ಈ ನಾಣ್ಯದ ಹರಾಜಿನ ಯಶಸ್ಸಿನಿಂದ ತುಂಬಾ ಸಂತೋಷವಾಗಿದ್ದು, 4.25 ಕೋಟಿ ರೂ.ಗೆ ಹರಾಜಾಗಿದೆ ಎಂದು ತಿಳಿಸಿದ್ದಾರೆ.

ಮೂವರು ಸಹೋದರಿಯರ ಬಳಿ ಇದ್ದ ನಾಣ್ಯ: ಹರಾಜಿನ ಮೊದಲು, ಈ ನಾಣ್ಯವು ಓಹಿಯೋದ ಮೂವರು ಸಹೋದರಿಯರ ಬಳಿ ಇತ್ತು. ಆದರೆ, ಅವರು ತಮ್ಮ ಗುರುತನ್ನು ಇಲ್ಲಿಯವರೆಗೂ ಗೌಪ್ಯವಾಗಿಟ್ಟಿದ್ದಾರೆ. ಆದರೆ ಹರಾಜು ಕಂಪನಿಯೊಂದಿಗೆ ಮಾತನಾಡುವಾಗ, ಅವರು ತಮ್ಮ ಸಹೋದರನ ಮರಣದ ನಂತರ ಈ ನಾಣ್ಯವನ್ನು ಪಡೆದಿದ್ದಾಗಿ ತಿಳಿಸಿದ್ದಾರೆ, ಅವರ ಸಹೋದರ ಮತ್ತು ತಾಯಿ ಅಂತಹ ಎರಡು ನಾಣ್ಯಗಳನ್ನು ಹೊಂದಿದ್ದರು, ಇದನ್ನು ಅವರು ಆನುವಂಶಿಕವಾಗಿ ಪಡೆದಿದ್ದರು. ಆದರೆ 1978ರಲ್ಲಿ ಈ ಒಂದು ನಾಣ್ಯವನ್ನು ಕುಟುಂಬದವರು 15 ಲಕ್ಷ ರೂ.ಗೆ ಮಾರಾಟ ಮಾಡಿದ್ದರು.