ಈಜುಡುಗೆಯಲ್ಲಿ ಮತ ಚಲಾಯಿಸಿದ ಆಸ್ಟ್ರೇಲಿಯನ್ನರು, ಪ್ರಧಾನಿಯಾಗಿ ಮತ್ತೆ ಅಲ್ಬನೀಸ್ ಐತಿಹಾಸಿಕ ಗೆಲುವು

ಆಂಥೋನಿ ಅಲ್ಬನೀಸ್ ನೇತೃತ್ವದ ಆಸ್ಟ್ರೇಲಿಯಾದ ಲೇಬರ್ ಪಕ್ಷ ಚುನಾವಣೆಯಲ್ಲಿ ಗೆದ್ದು ಎರಡನೇ ಅವಧಿಗೆ ಅಧಿಕಾರಕ್ಕೆ ಬಂದಿದೆ. ಪ್ರಧಾನಿ ಮೋದಿ ಅಲ್ಬನೀಸ್‌ಗೆ ಅಭಿನಂದನೆ ಸಲ್ಲಿಸಿದ್ದಾರೆ. ಜನರ ನಂಬಿಕೆ ಮತ್ತು ಆಶಾವಾದದ ಮೇಲೆ ಗೆಲುವು ಸಾಧಿಸಿದ್ದಾಗಿ ಅಲ್ಬನೀಸ್ ಹೇಳಿದ್ದಾರೆ. ಈ ಗೆಲುವು ಸಂಪ್ರದಾಯವಾದಿಗಳಿಗೆ ಹಿನ್ನಡೆಯಾಗಿದೆ. ಚುನಾವಣೆಯಲ್ಲಿ ವಿಶಿಷ್ಟ ಸಂಸ್ಕೃತಿ ಕಂಡುಬಂದಿತು.

ಆಸ್ಟ್ರೇಲಿಯಾದ ಪ್ರಧಾನಿ ಆಂಥೋನಿ ಅಲ್ಬನೀಸ್ ಅವರ ಎಡಪಂಥೀಯ ಸರ್ಕಾರ ಚುನಾವಣೆಯಲ್ಲಿ ಗೆಲುವು ಸಾಧಿಸಿದೆ. ಶನಿವಾರ ನಡೆದ ಫೆಡರಲ್ ಚುನಾವಣೆಯಲ್ಲಿ ಐತಿಹಾಸಿಕ ಎರಡನೇ ಅವಧಿಗೆ ಅಧಿಕಾರ ವಹಿಸಿಕೊಂಡಿದೆ.  ಈ ಮೂಲಕ ಅಲ್ಬನೀಸ್ ಅವರು ಮತ್ತೆ ದೇಶದ ಪ್ರಧಾನಿಯಾಗಿದ್ದಾರೆ. ಕಳೆದ 21 ವರ್ಷಗಳಲ್ಲಿ ಎರಡನೇ ಬಾರಿ ಅಧಿಕಾರಕ್ಕೆ ಬಂದಿರುವ ಮೊದಲ ಪ್ರಧಾನಿ ಎಂಬ ಹೆಗ್ಗಳಿಕೆಗೆ  ಕೂಡ ಇವರ ಪಾಲಾಗಿದೆ.

ಅಲ್ಬನೀಸ್‌ ಅವರ ಗೆಲುವಿಗೆ ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಶುಭಾಶಯ ಕೋರಿದ್ದಾರೆ. "ಆಸ್ಟ್ರೇಲಿಯಾದ ಪ್ರಧಾನಿಯಾಗಿ ಪುನಃ ಆಯ್ಕೆಯಾದ ನಿಮಗೆ ಹೃತ್ಪೂರ್ವಕ ಅಭಿನಂದನೆಗಳು. ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಸಂಬಂಧಗಳನ್ನು ಇನ್ನಷ್ಟು ಬಲಪಡಿಸಲು ನಾನು ಎದುರು ನೋಡುತ್ತಿದ್ದೇನೆ," ಎಂದು ಪ್ರಧಾನಿ ಮೋದಿ ಎಕ್ಸ್ (ಹಳೆ ಟ್ವಿಟ್ಟರ್) ನಲ್ಲಿ ಬರಹ ಹಂಚಿಕೊಂಡಿದ್ದಾರೆ.

ಚುನಾವಣಾ ಫಲಿತಾಂಶದ ನಂತರ ಮಾತನಾಡಿದ ಅಲ್ಬನೀಸ್, "ಇಂದು ಆಸ್ಟ್ರೇಲಿಯಾದ ಜನರು ತಮ್ಮ ನಂಬಿಕೆಯ ಮೌಲ್ಯಗಳಿಗೆ ಮತ ನೀಡಿದ್ದಾರೆ. ಜಗತ್ತಿನಲ್ಲಿ ಅನಿಶ್ಚಿತತೆ ಇರುವ ಸಂದರ್ಭದಲ್ಲಿ, ಜನರು ಆಶಾವಾದ ಮತ್ತು ದೃಢ ನಿರ್ಣಯವನ್ನು ಆಯ್ಕೆ ಮಾಡಿದ್ದಾರೆ," ಎಂದು ಧನ್ಯವಾದ ಹೇಳಿದರು. 

ಲೇಬರ್ ಪಕ್ಷದ ನಾಯಕ ಆಂಥೋನಿ ಅಲ್ಬನೀಸ್‌ ಅವರ ಗೆಲುವು, ಒಂದು ಕಾಲದಲ್ಲಿ ಮತ್ತೆ ಶಕ್ತಿ ಪಡೆದಿದ್ದ ಲಿಬರಲ್-ನ್ಯಾಷನಲ್ ಒಕ್ಕೂಟದ ವಿರುದ್ಧ ಮಹತ್ವದ ಬದಲಾವಣೆಯಾಗಿದೆ. ಸಂಪ್ರದಾಯವಾದಿ ರಾಜಕೀಯದ ಮೇಲೆ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪ್ರಭಾವ ಹೆಚ್ಚುತ್ತಿರುವುದರ ಬಗ್ಗೆ ಜನರಲ್ಲಿ ಉಂಟಾಗಿರುವ ಚಿಂತೆ ಕೂಡ ಈ ಬದಲಾವಣೆಗೆ ಕಾರಣವಾಗಿದೆ.

ಕೆನಡಾದಲ್ಲಿ ಇತ್ತೀಚೆಗೆ ಬಲಪಂಥೀಯ ಪಕ್ಷಗಳು ಸೋತಿದ್ದಂತೆ, ಆಸ್ಟ್ರೇಲಿಯಾದಲ್ಲಿ ಕೂಡಾ ಈ ಚುನಾವಣಾ ಫಲಿತಾಂಶ ಮಹತ್ವದ ಹಿನ್ನಡೆ ಎನಿಸಿತು. ವಿರೋಧ ಪಕ್ಷದ ನಾಯಕ ಪೀಟರ್ ಡಟ್ಟನ್ ಅವರು ತಮ್ಮ ಸೋಲನ್ನು ಒಪ್ಪಿಕೊಂಡಿದ್ದಾರೆ. ಅಲ್ಲದೆ, ಬ್ರಿಸ್ಬೇನ್‌ನಲ್ಲಿರುವ ತಮ್ಮ ಕ್ಷೇತ್ರ ಡಿಕ್ಸನ್ ಅನ್ನು ಲೇಬರ್ ಪಕ್ಷದ ಅಲಿ ಫ್ರಾನ್ಸ್‌ಗೆ ಕಳೆದುಕೊಂಡಿದ್ದಾರೆ.

ಸಿಡ್ನಿಯ ಕ್ಯಾಂಟರ್ಬರಿ-ಹರ್ಲ್‌ಸ್ಟೋನ್ ಪಾರ್ಕ್ ಆರ್‌ಎಸ್‌ಎಲ್ ಕ್ಲಬ್‌ನಲ್ಲಿ ಸೇರಿದ್ದ ತಮ್ಮ ಬೆಂಬಲಿಗರ ಕುರಿತು ಮಾತನಾಡಿದ ಅಲ್ಬನೀಸ್, “ಇಂದು, ಆಸ್ಟ್ರೇಲಿಯಾದ ಜನರು ನ್ಯಾಯ, ಪ್ರಗತಿ ಮತ್ತು ಎಲ್ಲರಿಗೂ ಸಮಾನ ಅವಕಾಶ ಎಂಬ ಮೌಲ್ಯಗಳಿಗೆ ಮತ ಹಾಕಿದ್ದಾರೆ. ಜಾಗತಿಕ ಸವಾಲುಗಳನ್ನು ನಾವು ಆಸ್ಟ್ರೇಲಿಯಾದ ಶೈಲಿಯಲ್ಲಿ ಎದುರಿಸುತ್ತಿದ್ದೇವೆ. ನಾವು ಭವಿಷ್ಯವನ್ನು ನಿರ್ಮಿಸುತ್ತಿದ್ದಾಗ ಪರಸ್ಪರ ಬೆಂಬಲ ಮುಖ್ಯ” ಎಂದು ಹೇಳಿದರು.

ವಿಶಿಷ್ಟ ಮತದಾನ ಸಂಸ್ಕೃತಿ: ಈಜುಡುಗೆಯಲ್ಲಿ ಮತ ಚಲಾಯಿಸಿದ ಮತದಾರರು!
ಆಸ್ಟ್ರೇಲಿಯಾದಲ್ಲಿ 'ಬಡ್ಜಿ ಸ್ಮಗ್ಲರ್ಸ್' ಬ್ರ್ಯಾಂಡ್‌ನ ಸ್ವಿಮಿಂಗ್ ಉಡುಪುಗಳು ಬಹಳ ಜನಪ್ರಿಯವಾಗಿವೆ. ಅಲ್ಲದೆ, ಇಂದು ಕೂಡಾ ಮತದಾನಕ್ಕೆ ಪೇಪರ್ ಬ್ಯಾಲೆಟ್‌ಗಳನ್ನು ಬಳಸಲಾಗುತ್ತದೆ. ಜನರು ಕಾಗದದ ಬ್ಯಾಲೆಟ್‌ನಲ್ಲಿ ಇಚ್ಛಿತ ಪಕ್ಷ ಅಥವಾ ಅಭ್ಯರ್ಥಿಗೆ ಗುರುತು ಹಾಕುತ್ತಾರೆ. ಕೆಲವರು ಮೇಲಂಗಿ ಇಲ್ಲದೆ ಮತದಾನಕ್ಕೆ ಬರುವುದು, ತಮ್ಮ ಸ್ವಾತಂತ್ರ್ಯ ಮತ್ತು ಅಭಿವ್ಯಕ್ತಿಯ ಚಿಹ್ನೆಯೆಂದು ಪರಿಗಣಿಸಲಾಗುತ್ತದೆ.

ವಿಶೇಷವಾಗಿ, ಮೊದಲನೆಯದಾಗಿ ಮತ ಹಾಕುವ 200 ಜನರಿಗೆ 'ಬಡ್ಜಿ ಸ್ಮಗ್ಲರ್ಸ್' ಬ್ರ್ಯಾಂಡ್‌ನ ಉಚಿತ ಸ್ವಿಮ್‌ಸೂಟ್‌ಗಳನ್ನು ವಿತರಿಸಲಾಗುತ್ತದೆ. ಮತಗಟ್ಟೆಗಳ ಬಳಿ ಇನ್ನೊಂದು ವಿಶಿಷ್ಟ ಆಕರ್ಷಣೆ ಎಂದರೆ 'ಡೆಮಾಕ್ರಸಿ ಸಾಸೇಜ್'. ಇದು ಸಾಸೇಜ್, ಮಾಂಸ ಮತ್ತು ಬ್ರೆಡ್‌ನ ತುಂಡುಗಳಿಂದ ತಯಾರಾದ ಬರ್ಗರ್ ಆಗಿದ್ದು, ಸ್ವಯಂ ಸೇವಕರು ಮಾರುತ್ತಾರೆ. ಜನರು ಮತ ಹಾಕಲು ಹೋಗುವಾಗ ಅಥವಾ ಹಿಂದಿರುಗುವಾಗ ಈ ಬರ್ಗರ್‌ಗಳನ್ನು ಖರೀದಿ ಮಾಡುವ ಮೂಲಕ ಚುನಾವಣೆ ಆಯೋಜನೆಗೆ ಹಣದ ಸಹಾಯ ನೀಡುತ್ತಾರೆ.

ಬಹಳಷ್ಟು ಜನರು #democracysausage ಎಂಬ ಹ್ಯಾಷ್‌ಟ್ಯಾಗ್‌ ಬಳಸಿ, ಬರ್ಗರ್‌ ಹಿಡಿದ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಾರೆ. ಈ ಮಾರಾಟದಿಂದ ಬಂದ ಹಣವನ್ನು ಮತಗಟ್ಟೆ ಆಯೋಜನೆ ಮಾಡುತ್ತಿರುವ ಸ್ಥಳೀಯ ಸರ್ಫ್ ಕ್ಲಬ್‌ಗಳಿಗೆ ನೀಡಲಾಗುತ್ತದೆ.