ಶತಮಾನದ ಸಂಪ್ರದಾಯಕ್ಕೆ ಬ್ರೇಕ್ ಹಾಕಿಸಿದ ಕೊರೋನಾ| ಈಸ್ಟರ್ ಸಂಡೇ ಬಲಿಪೂಜೆ ಲೈವ್‌ ಸ್ಟ್ರೀಮಿಂಗ್| ಕ್ರೈಸ್ತ ಬಾಂಧವರಿಗೆ ಮೋದಿ ಶುಭಾಶಯ
ನವದೆಹಲಿ(ಏ.12): ಕೊರೋನಾ ಅಟ್ಟಹಾಸದಿಂದಾಗಿ ಇಡೀ ವಿಶ್ವವೇ ಸಂಕಷ್ಟದಲ್ಲಿದೆ. ಭಾರತವನ್ನೂ ಕಾಡುತ್ತಿರುವ ಈ ವೈರಸ್ ನಿಯಂತ್ರಿಸಲು ಲಾಕ್‌ಡೌನ್ ವಿಧಿಸಲಲಾಗಿದ್ದು, ಈ ಬಾರಿ ಈಸ್ಟರ್ ಸಂಡೇ ಆಚರಣೆ ಕೇವಲ ಮನೆಯಳಗೇ ಸೀಮಿತಗೊಂಡಿದೆ. ಏಸು ಪುನರುತ್ಥಾನದ ಈ ದಿನ ಪ್ರತಿ ವರ್ಷವೂ ಕ್ರೈಸ್ತ ಬಾಂಧವರು ಹೆಚ್ಚಿನ ಸಂಖ್ಯೆಯಲ್ಲಿ ಚರ್ಚ್‌ನಲ್ಲಿ ಸೇರುತ್ತಿದ್ದರು. ಅಲ್ಲದೇ ಇಲ್ಲಿ ಧಾರ್ಮಿ ವಿಧಿವಿಧಾನಗಳೂ ನೆರವೇರುತ್ತಿದ್ದವು. ಆದರೆ, ಈ ಬಾರಿ ಮಹಾಮಾರಿ ಕೊರೋನಾ ಇದೆಲ್ಲಕ್ಕೂ ತಡೆಯೊಡ್ಡಿದೆ. ಇಂತಹ ಪರಿಸ್ಥಿತಿಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್ ಮೂಲಕ ಎಲ್ಲರಿಗೂ ಈಸ್ಟರ್ ಹಬ್ಬದ ಶುಭ ಕೋರಿದ್ದು, ಶೀಘ್ರವಾಗಿ ಈ ವೈರಸ್ ಅಟ್ಟಹಾಸ ಕೊನೆಗೊಳ್ಳಲಿ ಎಂದು ಬರೆದಿದ್ದಾರೆ.
Best wishes to everyone on the special occasion of Easter. We remember the noble thoughts of Lord Christ, especially his unwavering commitment to empowering the poor and needy. May this Easter give us added strength to successfully overcome COVID-19 and create a healthier planet.
— Narendra Modi (@narendramodi)ಈಸ್ಟರ್ ಸಂಡೇ ಶುಭ ಕೋರಿ ಟ್ವೀಟ್ ಮಾಡಿರುವ ಪಿಎಂ ಮೋದಿ '‘ಈಸ್ಟರ್‌ನ ಈ ವಿಶೇಷ ಸಂದರ್ಭದಲ್ಲಿ ಎಲ್ಲರಿಗೂ ಶುಭಾಶಯಗಳು. ಇಂದು ಕ್ರಿಸ್ತನ ಉದಾತ್ತ ಆಲೋಚನೆಗಳನ್ನು ನಾವು ಸ್ಮರಿಸುತ್ತೇವೆ. ವಿಶೇಷವಾಗಿ ಬಡವರು ಮತ್ತು ನಿರ್ಗತಿಕರನ್ನು ಸಬಲೀಕರಣಗೊಳಿಸುವ ಅವರ ಅಚಲ ಬದ್ಧತೆಯನ್ನು ನೆನೆಯುತ್ತೇವೆ. ಕೊರೋನಾ ವೈರಸ್ ವಿರುದ್ಧ ಯಶಸ್ವಿಯಾಗಿ ಜಯ ಸಾಧಿಸಲು, ಈ ಮೂಲಕ ಭೂಮಿಯಲ್ಲಿ ಆರೋಗ್ಯಕರ ವಾತಾವರಣ ಸೃಷ್ಟಿಸಲು ಈಸ್ಟರ್ ನಮಗೆ ಹೆಚ್ಚಿನ ಶಕ್ತಿಯನ್ನು ನೀಡಲಿ’ ಎಂದು ಬರೆದಿದ್ದಾರೆ.
ಇನ್ನು ಕೊರೋನಾದಿಂದಾಗಿ ಶತಮಾನಗಳಿಂದಲೂ ನಡೆದು ಬಂದ ಸಂಪ್ರದಾಯಕ್ಕೆ ಬ್ರೇಕ್ ಹಾಕಿರುವ ಪೋಪ್ ಫ್ರಾನ್ಸಿಸ್ ಈಸ್ಟರ್ ಸಂಡೇ ಬಲಿ ಪೂಜೆಯನ್ನು ನೇರ ಪ್ರಸಾರದ ಮೂಲಕ ನೆರವೇರಿಸಲಿದ್ದಾರೆ. ಈ ಮೂಲಕ ಲಾಕ್‌ಡೌನ್‌ನಿಂದಾಗಿ ಮನೆಯಲ್ಲೇ ಉಳಿದಿರುವ ವಿಶ್ವದ 1.3 ಬಿಲಿಯನ್ ಕ್ರೈಸ್ತರು ಈ ಪವಿತ್ರ ದಿನವನ್ನು ಆಚರಿಸಲು ಸಾಧ್ಯವಾಗಲಿದೆ.