* ನೇಪಾಳದ ಸುರ್ಖೇಟ್ ಜಿಲ್ಲೆಯಲ್ಲಿ ಭೀಕರ ಅಪಘಾತ
* ಕಂದಕಕ್ಕೆ ಉರುಳಿದ ಬಸ್: ಭೀಕರ ದುರಂತಕ್ಕೆ 32 ಬಲಿ
* ಐವರಿಗೆ ಗಂಭೀರ ಗಾಯ
ಕಠ್ಮಂಡು(ಅ.13): ನೇಪಾಳದ(Nepal) ಸುರ್ಖೇಟ್ ಜಿಲ್ಲೆಯ ಮುಗು(Mugu) ಬಳಿ ನೂರಾರು ಪ್ರಯಾಣಿಕರಿಂದ ತುಂಬಿದ ಬಸ್ ನಿಯಂತ್ರಣ ತಪ್ಪಿ ನೂರಾರು ಅಡಿ ಆಳದ ಕಂದಕಕ್ಕೆ ಉರುಳಿದೆ. ಈ ದುರಂತದ ಬಳಿಕ ನೇಪಾಳದಲ್ಲಿ(Nepal) ಭಾರೀ ಕೋಲಾಹಲ ನಿರ್ಮಾಣವಾಗಿದೆ. ದುರಂತದಲ್ಲಿ ಗಾಯಗೊಂಡವರ, ತಮ್ಮವರನ್ನು ಕಳೆದುಕೊಂಡವರ ಆಕ್ರಂದನ ಮುಗಿಲು ಮುಟ್ಟಿದೆ. ಈ ನಡುವೆ ಅತ್ತ ನೇಪಾಳ ಸರ್ಕಾರ ಪರಿಹಾರ ರಕ್ಷಣಾ ಕಾರ್ಯವನ್ನು ಚುರುಕುಗೊಳಿಸಲು ಸೂಚನೆ ನೀಡಿದೆ. ದುರಂತದಲ್ಲಿ(Accident) ಈವರೆಗೂ 32 ಜನರು ಸಾವನ್ನಪ್ಪಿದ್ದು, ಗಾಯಗೊಂಡ 12 ಜನರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅವರಲ್ಲಿ ಐವರ ಸ್ಥಿತಿ ಗಂಭೀರವಾಗಿದ್ದು, ಮೃತರ ಸಂಖ್ಯೆ ಏರುವ ಸಾಧ್ಯತೆ ಇದೆ.
ನೇಪಾಳದ ಕರ್ನಾಲಿ ಪ್ರಾಂತ್ಯದ ಸುರ್ಖೇತ್ ಜಿಲ್ಲೆಯ ಗುಡ್ಡಗಾಡು ಪ್ರದೇಶದಲ್ಲಿ ಬಸ್ ಅಪಘಾತ ಸಂಭವಿಸಿದೆ. ಈ ದುರಂತದ ಮಾಹಿತಿ ಬಂದ ತಕ್ಷಣ, ಪರಿಹಾರ ಮತ್ತು ರಕ್ಷಣಾ ತಂಡಗಳನ್ನು(Resue Team) ಸ್ಥಳಕ್ಕೆ ಕಳುಹಿಸಲಾಗಿದೆ. ಗಾಯಗೊಂಡವರು ಈ ಬಗ್ಗೆ ಮಾಹಿತಿ ನಿಡುತ್ತಾ, ಬಸ್ ಮುಗು ತಲುಪುವ ಹಂತದಲ್ಲಿತ್ತು. ಆದರರೆ ಅದಕ್ಕೂ ಮುನ್ನ ಬಂದ ತಿರುವಿನಲ್ಲಿ ಬಸ್ ಚಾಲಕ ಸ್ಟೀರಿಂಗ್ ಮೇಲಿನ ನಿಯಂತ್ರಣ ಕಳೆದುಕೊಂಡಿದ್ದಾನೆ. ಮರುಕ್ಷಣವೇ ಪ್ರಯಾಣಿಕರು ತುಂಬಿದ್ದ ಬಸ್ ಕಂದಕಕ್ಕೆ ಉರುಳಿದೆ. ಹತ್ತಿರದ ಗ್ರಾಮಸ್ಥರು ಮತ್ತು ನೇಪಾಳದ ಸೆಂಟಿನೆಲ್ ಸಿಬ್ಬಂದಿ ಕೂಡಲೇ ಕಂದಕದ ಬಳಿ ತಲುಪಿ ರಕ್ಷಣಾ ಕಾರ್ಯದಲ್ಲಿ ತೊಡಗಿದ್ದಾರೆ.
ಕರ್ನಾಲಿ ರಾಜ್ಯ ಸೆಂಟಿನೆಲ್ ಕಚೇರಿಯ ಇನ್ಸ್‌ಪೆಕ್ಟರ್ ಜೀವನ್ ಲಾಮಿಚಾಮೆ ಬಸ್ ಅಪಘಾತದಲ್ಲಿ 32 ಜನರು ಸಾವನ್ನಪ್ಪಿದ್ದಾರೆ ಎಂಬ ಮಾಹಿತಿ ನಿಡಿದ್ದಾರೆ. ಇನ್ನು ಗಂಭೀರವಾಗಿ ಗಾಯಗೊಂಡವರನ್ನು ಉತ್ತಮ ಚಿಕಿತ್ಸೆಗಾಗಿ ಕಠ್ಮಂಡುವಿಗೆ ಕಳುಹಿಸಲಾಗಿದೆ ಎಂದೂ ತಿಳಿಸಿದ್ದಾರೆ.
ಗುಂಡಿಯಿಂದ ತುಂಬಿವೆ ರಸ್ತೆಗಳು, ಇದೇ ದುರಂತಕ್ಕೆ ಕಾರಣ
ನೇಪಾಳದಲ್ಲಿ ಭಾರೀ ಮಳೆ ಮತ್ತು ಭೂಕುಸಿತದಿಂದಾಗಿ, ರಸ್ತೆ ಹಲವು ಕಡೆ ಹದಗೆಟ್ಟಿದೆ. ಹೇಗೋ ಅವಶೇಷಗಳನ್ನು ತೆರವುಗೊಳಿಸಿ ಸಂಚಾರ ಆರಂಭಿಸಲಾಗಿದೆ. ರಸ್ತೆ ಇಕ್ಕಟ್ಟಾಗಿರುವುದರಿಂದ, ನೇಪಾಳದಲ್ಲಿ ರಸ್ತೆ ಅಪಘಾತಗಳ ಪ್ರಮಾಣ ಹೆಚ್ಚಾಗಿದೆ. ಭಾರತ-ನೇಪಾಳ ಗಡಿಯನ್ನು ತೆರೆದ ನಂತರ, ಪ್ರವಾಸಿ ವಾಹನಗಳ ಸಂಖ್ಯೆಯೂ ಹೆಚ್ಚಾಗಿದೆ. ಇಂತಹ ಪರಿಸ್ಥಿತಿಯಲ್ಲಿ, ಟ್ರಾಫಿಕ್ ಜಾಮ್ ಸಮಸ್ಯೆ ಕೂಡ ಅನೇಕ ಕಡೆ ಉದ್ಭವಿಸುತ್ತಿದೆ.
ಬುಟ್ವಾಲ್‌ನಲ್ಲಿ ಮೂರನೇ ದಿನಕ್ಕೆ ಕರ್ಫ್ಯೂ ಮುಂದುವರಿದಿದೆ
ನೇಪಾಳದ ರೂಪಂಡೇಹಿ ಜಿಲ್ಲೆಯ ಬುತ್ವಾಲ್ ಬಳಿಯ ಮೋತಿಪುರ್ ಪ್ರದೇಶದಲ್ಲಿ ಪೊಲೀಸರು ಮತ್ತು ನಾಗರಿಕರ ನಡುವೆ ನಡೆದ ಘರ್ಷಣೆಯಲ್ಲಿ ಮೃತಪಟ್ಟ ನಾಲ್ವರು ನಾಗರಿಕರಲ್ಲಿ ಮೂವರನ್ನು ಗುರುತಿಸಲಾಗಿದೆ. ಮೃತರಲ್ಲಿ ಕಪಿಲ್ವಾಸ್ತು ನಿವಾಸಿ, ವಂಗಂಗಾ ಪುರಸಭೆಯ ವಾರ್ಡ್ 10, ವೀರೇಂದ್ರ ಕುರ್ಮಿ, ರೂಪಂದೇಹಿಯ ಶುದ್ಧೋಧನ್ ಪುರಸಭೆ ವಾರ್ಡ್ 5 ರ ನಿವಾಸಿ ಮತ್ತು ನವಲಪರಸಿ ಜಿಲ್ಲೆಯ ಬಾರ್ಘಾಟ್ ನಿವಾಸಿ ಯುಜನ್ ಕುಮಾರ್ ಸೇರಿದ್ದಾರೆ. ಇನ್ನೊಬ್ಬ ಮೃತನ ಗುರುತು ಇನ್ನೂ ಪತ್ತೆಯಾಗಿಲ್ಲ. ರಾಜ್ಯ ಸರ್ಕಾರವು ಇಡೀ ಘಟನೆಯ ಕುರಿತು ಉನ್ನತ ಮಟ್ಟದ ತನಿಖೆ ನಡೆಸುತ್ತಿರುವಾಗ, ಸಶಸ್ತ್ರ ಪೊಲೀಸ್ ಗುಂಡಿನ ದಾಳಿಯಲ್ಲಿ ಮೃತಪಟ್ಟ ನಾಗರಿಕರ ಕುಟುಂಬಕ್ಕೆ ತಲಾ ಒಂದು ಲಕ್ಷ ರೂಪಾಯಿಗಳ ಪರಿಹಾರವನ್ನು ಘೋಷಿಸಿದೆ.
ಆದರೆ ಘಟನೆಯಲ್ಲಿ ಗಾಯಗೊಂಡ 31 ನಾಗರಿಕರಿಗೆ ಉಚಿತವಾಗಿ ಚಿಕಿತ್ಸೆ ಪಡೆಯಲು ಸೂಚನೆಗಳನ್ನು ನೀಡಲಾಗಿದೆ. ಮೋತಿಪುರದ ವಿವಾದಿತ ಪ್ರದೇಶದಲ್ಲಿ ಮೂರನೇ ದಿನ ಕರ್ಫ್ಯೂ ಮುಂದುವರಿದಿದೆ. ಮೃತರ ಕುಟುಂಬ ಸದಸ್ಯರಿಗೆ ಒಂದು ಲಕ್ಷ ರೂಪಾಯಿಗಳನ್ನು ನೀಡಲಾಗುವುದು ಎಂದು ರಾಜ್ಯ ಸರ್ಕಾರದ ಸಂವಹನ ಮತ್ತು ಆಂತರಿಕ ವ್ಯವಹಾರಗಳ ವಕ್ತಾರ ತಿಲಕ್ ರಾಮ್ ಶರ್ಮಾ ಹೇಳಿದ್ದಾರೆ. ವಿವಾದವು ಹೇಗೆ ಉಲ್ಬಣಗೊಂಡಿತು ಎಂಬುದರ ಕುರಿತು ತನಿಖೆ ಆರಂಭಿಸಲಾಗಿದೆ. ವಿವಾದ ಹೆಚ್ಚಾಗದಂತೆ ಕರ್ಫ್ಯೂ ವಿಧಿಸಲಾಗಿದೆ ಎಂದು ಸಿಡಿಒ ರೂಪಂದೇಹಿ ಋಷಿರಾಮ್ ತಿವಾರಿ ಹೇಳಿದ್ದಾರೆ.