ಇ-ಮೇಲ್‌, ಯೂಸರ್‌ನೇಮ್‌, ಫಾಲೋವರ್ಸ್‌ ಸಂಖ್ಯೆ, ಟ್ವಿಟ್ಟರ್‌ ಖಾತೆ ರಚಿಸಿದ ದಿನಾಂಕ, ಬಳಕೆದಾರರ ಮೊಬೈಲ್‌ ಸಂಖ್ಯೆಯನ್ನು ಹ್ಯಾಕರ್ ಬಿಡುಗಡೆಗೊಳಿಸಿದ್ದು, ಇದು ಜನಪ್ರಿಯ ವ್ಯಕ್ತಿಗಳಿಗೆ ಸೇರಿದ ಮಾಹಿತಿಯಾಗಿದೆ.
ನವದೆಹಲಿ: 40 ಕೋಟಿ ಟ್ವಿಟ್ಟರ್‌ (Twitter) ಬಳಕೆದಾರರ ವೈಯಕ್ತಿಕ ಮಾಹಿತಿಯು (Personal Information) ಡಾರ್ಕ್ವೆಬ್‌ನಲ್ಲಿ (Dark Web) ಸೋರಿಕೆಯಾಗಿದ್ದು, ಅದನ್ನು ಮಾರಾಟಕ್ಕಿಡಲಾಗಿದೆ. ಇದು ಟ್ವಟ್ಟರ್‌ನ ಹೊಸ ಒಡೆಯ ಎಲಾನ್‌ ಮಸ್ಕ್‌ನನ್ನು (Elon Musk) ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕಿಸಿದೆ. ಹ್ಯಾಕರ್ (Hacker) ಈ ಮಾಹಿತಿಯ ಮಾದರಿಯನ್ನು ಹ್ಯಾಕರ್ ಸೈಟ್ಸ್‌ನಲ್ಲಿ ಬಿಡುಗಡೆ ಮಾಡಿದ್ದು, ಮಾಹಿತಿ ಸೋರಿಕೆಯಾಗಿದ್ದು ನಿಜ ಎಂದು ಸ್ಪಷ್ಟಪಡಿಸಿದ್ದಾನೆ. ಇ-ಮೇಲ್‌ (E - Mail) , ಯೂಸರ್‌ನೇಮ್‌ (User Name), ಫಾಲೋವರ್ಸ್‌ ಸಂಖ್ಯೆ, ಟ್ವಿಟ್ಟರ್‌ ಖಾತೆ ರಚಿಸಿದ ದಿನಾಂಕ, ಬಳಕೆದಾರರ ಮೊಬೈಲ್‌ ಸಂಖ್ಯೆಯನ್ನು ಹ್ಯಾಕರ್ ಬಿಡುಗಡೆಗೊಳಿಸಿದ್ದು, ಇದು ಜನಪ್ರಿಯ ವ್ಯಕ್ತಿಗಳಿಗೆ ಸೇರಿದ ಮಾಹಿತಿಯಾಗಿದೆ. ಬಾಲಿವುಡ್‌ ನಟ ಸಲ್ಮಾನ್‌ ಖಾನ್‌, ಗೂಗಲ್‌ ಸಿಇಒ ಸುಂದರ್ ಪಿಚೈ ಹಾಗೂ ಭಾರತದ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ ಮಾಹಿತಿ ಕೂಡಾ ಸೋರಿಕೆಯಾಗಿದ್ದು ಆತಂಕ ಸೃಷ್ಟಿಸಿದೆ. ಇಸ್ರೇಲಿನ ಸೈಬರ್ಕ್ರೈಂ ಗುಪ್ತಚರ ಕಂಪನಿಯ ಸಹ ಸಂಸ್ಥಾಪಕ ಹಡ್ಸನ್‌ ರಾಕ್‌, ಈ ಎಲ್ಲ ಮಾಹಿತಿ ಎಪಿಐ (ಅಪ್ಲಿಕೇಶನ್‌ ಪ್ರೋಗ್ರಾಮಿಂಗ್ ಇಂಟರ್‌ಫೇಸ್‌) (Application Programming Interface) ದೋಷದಿಂದಾಗಿ ಸೋರಿಕೆಯಾಗಿರಬಹುದು ಎಂದು ಅಭಿಪ್ರಾಯ ಪಟ್ಟಿದ್ದಾರೆ.
ಸುಲಿಗೆ ಹಣಕ್ಕೆ ಬೇಡಿಕೆ
‘ಟ್ವಿಟ್ಟರ್‌ ಅಥವಾ ಎಲಾನ್‌ ಮಸ್ಕ್ ನೀವಿದನ್ನು ಓದುತ್ತಿದ್ದರೆ ನೀವು ಈಗಾಗಲೇ 54 ಲಕ್ಷ ಬಳಕೆದಾರರ ಮಾಹಿತಿ ಸೋರಿಕೆಯಾಗಿದ್ದಕ್ಕೆ ಜಿಡಿಪಿಆರ್‌ ದಂಡದ ಭೀತಿ ಎದುರಿಸುತ್ತಿದ್ದೀರಿ. ಇನ್ನು 40 ಕೋಟಿ ಬಳಕೆದಾರರ ಮಾಹಿತಿ ಸೋರಿಕೆ ಬಗ್ಗೆ ಆಲೋಚಿಸಿ’ ಎಂದು ಹ್ಯಾಕರ್ ಬೆದರಿಕೆ ಒಡ್ಡಿದ್ದಾನೆ. ‘ಅಲ್ಲದೇ ಫೇಸ್‌ಬುಕ್‌ ಮಾಹಿತಿ ಸೋರಿಕೆ ಕಾರಣದಿಂದಾಗಿ 22 ಸಾವಿರ ಕೋಟಿ ರೂ. ಜಿಡಿಪಿಆರ್‌ ದಂಡವನ್ನು ಪಾವತಿಸಿದಂತೆ ನೀವು ಪಾವತಿಸಲು ಬಯಸದೇ ಇದ್ದರೆ ಈ ಮಾಹಿತಿಯನ್ನು ನನ್ನಿಂದ ಖರೀದಿಸಿ. ಬಳಿಕ ನಾನು ಈ ಮಾಹಿತಿಯನ್ನು ತೆಗೆದು ಹಾಕುತ್ತೇನೆ. ಇನ್ಯಾರಿಗೂ ಮಾರಾಟ ಮಾಡುವುದಿಲ್ಲ’ ಎಂದು ಹೇಳಿದ್ದಾನೆ. ಈ ಮಾಹಿತಿ ಸೋರಿಕೆಯಾದಲ್ಲಿ ಹಲವಾರು ಖ್ಯಾತ ವ್ಯಕ್ತಿಗಳು ಹಾಗೂ ರಾಜಕಾರಣಿಗಳು ಫಿಶಿಂಗ್‌, ಕ್ರಿಪ್ಟೋ ಸ್ಕಾಮ್‌, ಸಿಮ್‌ ಸ್ವ್ಯಾಪ್ಪಿಂಗ್‌, ಡಾಕ್ಸಿಂಗ್‌ ಮೊದಲಾದ ಚಟುವಟಿಕೆಗಳಿಗೆ ಬಲಿಯಾಗುವ ಸಾಧ್ಯತೆಯಿದ್ದು, ಜನರು ನಿಮ್ಮ ಕಂಪನಿಯ ಮೇಲೆ ವಿಶ್ವಾಸ ಕಳೆದುಕೊಳ್ಳಲಿದ್ದಾರೆ. ಇದರಿಂದ ನಿಮ್ಮ ಕಂಪನಿಯ ಪ್ರಗತಿ ಕುಂಠಿತವಾಗಲಿದೆ ಎಂದು ಎಚ್ಚರಿಕೆ ನೀಡಿದ್ದಾನೆ.
ಇದನ್ನು ಓದಿ: ಏಮ್ಸ್ ಬಳಿಕ ಕೋವಿಡ್‌ ಲಸಿಕೆಯ ‘ಕೋವಿನ್‌’ ವೆಬ್‌ ಮಾಹಿತಿ ಹ್ಯಾಕ್‌..!
ಆಂತರಿಕ ದೋಷದಿಂದ ಡೇಟಾ ಕಳ್ಳತನ..!
ಈ ಹಿಂದೆ 5.4 ಕೋಟಿಗೂ ಹೆಚ್ಚು ಟ್ವಿಟ್ಟರ್‌ ಬಳಕೆದಾರರ ಡೇಟಾ ಕಳ್ಳತನ ವರದಿಯಾಗಿತ್ತು. ಆಂತರಿಕ ದೋಷದ ಮೂಲಕ ಈ ಡೇಟಾವನ್ನು ಕದಿಯಲಾಗಿದೆ. ಈ ಹಿನ್ನೆಲೆ, ಐರ್ಲೆಂಡ್‌ನ ಡೇಟಾ ಪ್ರೊಟೆಕ್ಷನ್ ಕಮಿಷನ್ (ಡಿಪಿಸಿ) ಈ ವಿಷಯವನ್ನು ಇತ್ತೀಚೆಗೆ ತನಿಖೆ ಮಾಡಲು ಘೋಷಿಸಿದೆ.
ಈ ಮಧ್ಯೆ, ಟ್ವಿಟ್ಟರ್‌ನ ಗೌಪ್ಯತೆ ಮತ್ತು ಡೇಟಾ ಸುರಕ್ಷತೆಯ ವಿಧಾನದ ಮೇಲೆ ಅಮೆರಿಕದ ಫೆಡರಲ್ ಟ್ರೇಡ್ ಕಮಿಷನ್(Federal Trade Commission) (ಎಫ್‌ಟಿಸಿ) ತನಿಖೆಯ ವ್ಯಾಪ್ತಿಯನ್ನು ಹೆಚ್ಚಿಸಲಾಗುತ್ತಿದೆ. ಎಲೋನ್ ಮಸ್ಕ್ ಟ್ವಿಟ್ಟರ್‌ ಅನ್ನು ಸ್ವಾಧೀನಪಡಿಸಿಕೊಂಡ ನಂತರ, ಟ್ವಿಟ್ಟರ್‌ ಅಮೆರಿಕ ನಿಯಂತ್ರಕದೊಂದಿಗೆ ಒಪ್ಪಂದವನ್ನು ಅನುಸರಿಸಲು ವಿಫಲವಾಗಬಹುದು ಎಂಬ ಆತಂಕವು ಬೆಳೆಯುತ್ತಿದೆ, ಇದರಲ್ಲಿ ಕಂಪನಿಯು ತನ್ನ ಗೌಪ್ಯತೆ-ಸಂಬಂಧಿತ ವ್ಯವಸ್ಥೆಗಳನ್ನು ಸುಧಾರಿಸಲು ಒಪ್ಪಿಕೊಂಡಿತು.
ಇದನ್ನೂ ಓದಿ: Cyber Hacking: ಏಮ್ಸ್ ಸರ್ವರ್‌ ಹ್ಯಾಕಲ್ಲಿ ಚೀನಿ ಹ್ಯಾಕರ್ ಕೈವಾಡ..?
ಜಾಹೀರಾತಿಗಾಗಿ ಫೋನ್ ಸಂಖ್ಯೆಗಳ ಬಳಕೆ
ಪ್ರಮುಖವಾಗಿ, ಎಫ್‌ಟಿಸಿ ವಕೀಲರು ಕಳೆದ ತಿಂಗಳು ಇಬ್ಬರು ಮಾಜಿ ಟ್ವಿಟ್ಟರ್‌ ಕಾರ್ಯನಿರ್ವಾಹಕರನ್ನು ನಿಯಮಗಳ ಅನುಸರಣೆಯ ಬಗ್ಗೆ ಪ್ರಶ್ನಿಸಿದ್ದಾರೆ. ಈ ಹಿಂದೆ, ಟ್ವಿಟ್ಟರ್‌ ಬಳಕೆದಾರರ ಫೋನ್ ಸಂಖ್ಯೆಗಳಂತಹ ವೈಯಕ್ತಿಕ ಮಾಹಿತಿಯನ್ನು ಜಾಹೀರಾತಿಗಾಗಿ ಬಳಸುತ್ತಿದೆ ಎಂದು ಆರೋಪಿಸಲಾಗಿತ್ತು. ಅಲ್ಲದೆ, ಈ ಮಾಹಿತಿಯನ್ನು ಭದ್ರತಾ ಕಾರಣಗಳಿಗಾಗಿ ಬಳಸಲಾಗಿದೆ ಎಂದು ಬಳಕೆದಾರರಿಗೆ ತಿಳಿಸಲಾಗುತ್ತಿತ್ತು ಎಂದೂ ತಿಳಿದುಬಂದಿದೆ.