AI ಕಡೆಗೆ Apple ಬಿಗ್ ಶಿಫ್ಟ್; 200ಕ್ಕೂ ಹೆಚ್ಚು ಉದ್ಯೋಗಿಗಳಿಗೆ ಗೇಟ್‌ಪಾಸ್!

ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಕಡೆಗೆ ಹೆಚ್ಚು ಗಮನ ಹರಿಸಲು ಆ್ಯಪಲ್ ಕಂಪನಿಯು ತನ್ನ ಸಿರಿ, ಸಾಫ್ಟ್‌ವೇರ್ ಇಂಜಿನಿಯರಿಂಗ್ ಮತ್ತು ವಿಷನ್ ಪ್ರೊ ವಿಭಾಗಗಳಿಂದ 200ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಿದೆ ಎಂದು ವರದಿಯಾಗಿದೆ.

ಆ್ಯಪಲ್ ಕಂಪನಿಯು ವಿಷನ್ ಪ್ರೊ ಮತ್ತು ಸಾಫ್ಟ್‌ವೇರ್ ಇಂಜಿನಿಯರಿಂಗ್ ವಿಭಾಗಗಳಿಂದ ಸುಮಾರು 200 ಉದ್ಯೋಗಿಗಳನ್ನು ತೆಗೆದುಹಾಕಿದೆ. ಇದರಲ್ಲಿ ಸಿರಿ ಮತ್ತು ಇಂಟೆಲಿಜೆಂಟ್ ಸಿಸ್ಟಮ್ಸ್ ಎಕ್ಸ್‌ಪೀರಿಯನ್ಸ್ ತಂಡದವರೂ ಸೇರಿದ್ದಾರೆ.

ಕಂಪನಿಯು ತನ್ನ ವಿಷನ್ ಪ್ರೊ ಗೇಮಿಂಗ್ ತಂಡ ಮತ್ತು ಇಮ್ಮರ್ಸಿವ್ ವಿಡಿಯೋ ನಿರ್ಮಾಣ ವಿಭಾಗವನ್ನು ದೊಡ್ಡ ಮಟ್ಟದಲ್ಲಿ ಕಡಿಮೆ ಮಾಡುತ್ತಿದೆ.

ಸಿರಿ ತಂತ್ರಜ್ಞಾನವನ್ನು ಸುಧಾರಿಸಲು ಮತ್ತು AI ಆಧಾರಿತ ಸಾಫ್ಟ್‌ವೇರ್‌ಗಳತ್ತ ಗಮನಹರಿಸಲು ಈ ಬದಲಾವಣೆಗಳನ್ನು ಮಾಡಲಾಗುತ್ತಿದೆ.

ಟೆಕ್ ದೈತ್ಯ ಆ್ಯಪಲ್ (AAPL), ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಮತ್ತು ಭವಿಷ್ಯದ ಹಾರ್ಡ್‌ವೇರ್‌ಗಳ ಮೇಲೆ ಗಮನ ಕೇಂದ್ರೀಕರಿಸಲು ಮುಂದಾಗಿದೆ. ಇದಕ್ಕಾಗಿ ತನ್ನ ಪ್ರಮುಖ ವಿಭಾಗಗಳಿಂದ 200ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಿದೆ. ಸಿರಿ ಡಿಜಿಟಲ್ ಅಸಿಸ್ಟೆಂಟ್, ಸಾಫ್ಟ್‌ವೇರ್ ಇಂಜಿನಿಯರಿಂಗ್ ಮತ್ತು ವಿಷನ್ ಪ್ರೊ ತಂಡಗಳಲ್ಲಿ ಈ ಉದ್ಯೋಗ ಕಡಿತ ಮಾಡಲಾಗಿದೆ.

ಬ್ಲೂಮ್‌ಬರ್ಗ್ ವರದಿಯ ಪ್ರಕಾರ, ವಿಷನ್ ಪ್ರೊ ವಿಭಾಗದಲ್ಲಿ ಸುಮಾರು 100 ಹುದ್ದೆಗಳನ್ನು ಕಡಿತಗೊಳಿಸಲಾಗಿದೆ. ಹಾಗೆಯೇ, ಸಿರಿ ವಾಯ್ಸ್ ಅಸಿಸ್ಟೆಂಟ್ ತಂಡ ಮತ್ತು AI-ಚಾಲಿತ ಸಾಫ್ಟ್‌ವೇರ್ ಅಭಿವೃದ್ಧಿಪಡಿಸುವ ಇಂಟೆಲಿಜೆಂಟ್ ಸಿಸ್ಟಮ್ಸ್ ಎಕ್ಸ್‌ಪೀರಿಯನ್ಸ್ ಗ್ರೂಪ್‌ನಿಂದಲೂ ಸುಮಾರು 100 ಉದ್ಯೋಗಿಗಳನ್ನು ತೆಗೆದುಹಾಕಲಾಗಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಆ್ಯಪಲ್, ತನ್ನ ವ್ಯವಹಾರವನ್ನು ಇನ್ನಷ್ಟು ಸುಧಾರಿಸಲು ತಂಡಗಳಲ್ಲಿ ಈ ಬದಲಾವಣೆಗಳನ್ನು ಮಾಡಲಾಗುತ್ತಿದೆ ಎಂದು ಹೇಳಿದೆ. ಕೆಲವು ಹುದ್ದೆಗಳಿಗೆ ಕತ್ತರಿ ಬಿದ್ದರೂ, ಹೊಸ ಹುದ್ದೆಗಳನ್ನು ಸೃಷ್ಟಿಸಲಾಗುವುದು. ಕೆಲಸ ಕಳೆದುಕೊಂಡ ಉದ್ಯೋಗಿಗಳಿಗೆ ಬೇರೆ ಆಂತರಿಕ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಲು ಅವಕಾಶ ಮತ್ತು ಬೆಂಬಲ ನೀಡಲಾಗುವುದು ಎಂದು ಟೆಕ್ ದೈತ್ಯ ಭರವಸೆ ನೀಡಿದೆ.

ಶುಕ್ರವಾರದ ವಹಿವಾಟಿನಲ್ಲಿ AAPL ಷೇರುಗಳು 0.6%ನಷ್ಟು ಇಳಿಕೆ ಕಂಡವು. ಆದರೆ, ವಾರದ ಒಟ್ಟಾರೆ ವಹಿವಾಟಿನಲ್ಲಿ 1.2% ಏರಿಕೆ ದಾಖಲಿಸಿವೆ.

ಸಿರಿ ಮತ್ತು AI ಫೀಚರ್ಸ್ ಮರು ವಿನ್ಯಾಸ

AI-ಚಾಲಿತ ಹೊಸ ಆವೃತ್ತಿಯ ಸಿರಿ ವರ್ಚುವಲ್ ಅಸಿಸ್ಟೆಂಟ್ ಅನ್ನು ಆ್ಯಪಲ್ ಅಭಿವೃದ್ಧಿಪಡಿಸುತ್ತಿದೆ. ಈ ಹಿನ್ನೆಲೆಯಲ್ಲಿ ಸಿರಿ ಮತ್ತು ಇಂಟೆಲಿಜೆಂಟ್ ಸಿಸ್ಟಮ್ಸ್ ಎಕ್ಸ್‌ಪೀರಿಯನ್ಸ್ ವಿಭಾಗಗಳಲ್ಲಿ ಪುನಾರಚನೆ ಮಾಡಲಾಗುತ್ತಿದೆ. ಬ್ಲೂಮ್‌ಬರ್ಗ್ ವರದಿ ಪ್ರಕಾರ ಈ ಹೊಸ ತಲೆಮಾರಿನ ಅಸಿಸ್ಟೆಂಟ್‌ಗೆ ಸಂಪೂರ್ಣವಾಗಿ ಪರಿಷ್ಕರಿಸಿದ ತಾಂತ್ರಿಕ ವಿನ್ಯಾಸದ ಅಗತ್ಯವಿದೆ. ಇದಕ್ಕೆ ಸ್ಪೆಷಲ್ ಸ್ಕಿಲ್ ಬೇಕಾಗಿದ್ದು, ಅಭಿವೃದ್ಧಿಯನ್ನು ವೇಗಗೊಳಿಸಲು ಸಾಫ್ಟ್‌ವೇರ್ ತಂಡಗಳನ್ನು ಮರುಹೊಂದಿಸಲಾಗುತ್ತಿದೆ.

ವಿಷನ್ ಪ್ರೊ ಗೇಮಿಂಗ್, ವಿಡಿಯೋ ಕಂಟೆಂಟ್‌ಗೆ ಕತ್ತರಿ

ಈ ಉದ್ಯೋಗ ಕಡಿತವು $3,699 ಬೆಲೆಯ ವಿಷನ್ ಪ್ರೊ ಸ್ಪೇಷಿಯಲ್ ಕಂಪ್ಯೂಟರ್‌ನ ಕಾರ್ಯತಂತ್ರದಲ್ಲಿನ ಬದಲಾವಣೆಯನ್ನು ಸೂಚಿಸುತ್ತದೆ. ದುಬಾರಿ ಬೆಲೆ ಮತ್ತು ತೂಕದ ಕಾರಣದಿಂದ ಈ ಸಾಧನವು ಗ್ರಾಹಕರನ್ನು ವ್ಯಾಪಕವಾಗಿ ತಲುಪಲು ವಿಫಲವಾಗಿತ್ತು. ಇದೀಗ ಆ್ಯಪಲ್, ತನ್ನ ಆಂತರಿಕ ವಿಷನ್ ಪ್ರೊ ಗೇಮಿಂಗ್ ತಂಡವನ್ನು ಬಹುತೇಕ ವಿಸರ್ಜಿಸುತ್ತಿದೆ ಮತ್ತು ಇಮ್ಮರ್ಸಿವ್ ವಿಡಿಯೋ ನಿರ್ಮಾಣ ವಿಭಾಗದ ಗಾತ್ರವನ್ನು ಕಡಿಮೆ ಮಾಡುತ್ತಿದೆ.

3D ಇಮ್ಮರ್ಸಿವ್ ವಿಡಿಯೋ ಕಂಟೆಂಟ್ ನಿರ್ಮಾಣವು ಆರ್ಥಿಕವಾಗಿ ಬಹಳ ಸವಾಲಿನದ್ದಾಗಿದೆ. ಒಂದೇ ಎಪಿಸೋಡ್‌ಗೆ ಲಕ್ಷಾಂತರ ಡಾಲರ್ ವೆಚ್ಚವಾಗುತ್ತದೆ ಮತ್ತು ಅನೇಕ ನಿರ್ಮಾಣ ತಂಡಗಳು ಬೇಕಾಗುತ್ತವೆ. ಆ್ಯಪಲ್ ತನ್ನದೇ ಆದ ಕೆಲವು ಇಮ್ಮರ್ಸಿವ್ ವಿಡಿಯೋಗಳನ್ನು ಬಿಡುಗಡೆ ಮಾಡುವುದನ್ನು ಮುಂದುವರಿಸಲಿದೆ. ಆದರೆ, ಈ ವ್ಯವಸ್ಥೆಯನ್ನು ಬೆಳೆಸಲು ಹೆಚ್ಚಾಗಿ ಥರ್ಡ್-ಪಾರ್ಟಿ ಕ್ರಿಯೇಟರ್‌ಗಳ ಮೇಲೆ ಅವಲಂಬಿತವಾಗಲು ಯೋಜಿಸಿದೆ.

ಈ ಕಡಿತಗಳ ಹೊರತಾಗಿಯೂ ವಿಷನ್ ಪ್ರೊ ಹಾರ್ಡ್‌ವೇರ್ ಮತ್ತು visionOS ಆಪರೇಟಿಂಗ್ ಸಿಸ್ಟಮ್ ಯೋಜನೆಗಳು ಸಕ್ರಿಯವಾಗಿವೆ ಎಂದು ಆ್ಯಪಲ್ ತನ್ನ ಉದ್ಯೋಗಿಗಳಿಗೆ ಭರವಸೆ ನೀಡಿದೆ. ಆದರೆ, ಸದ್ಯದ ಮಟ್ಟಿಗೆ ಕಂಪನಿಯು ಸ್ಮಾರ್ಟ್ ಗ್ಲಾಸ್‌ಗಳ ಅಭಿವೃದ್ಧಿಗೆ ಹೆಚ್ಚಿನ ಆದ್ಯತೆ ನೀಡಿದೆ. ಇವುಗಳಿಗೆ ಸಂಕೀರ್ಣ 3D ಗೇಮಿಂಗ್ ಅಥವಾ ಇಮ್ಮರ್ಸಿವ್ ಮೀಡಿಯಾ ಸಾಮರ್ಥ್ಯಗಳ ಅಗತ್ಯವಿರುವುದಿಲ್ಲ. ಬ್ಲೂಮ್‌ಬರ್ಗ್ ಪ್ರಕಾರ, ಸುಧಾರಿತ ವಿಷನ್ ಪ್ರೊ ಮಾದರಿಯನ್ನು 2028ರ ಅಂತ್ಯದ ವೇಳೆಗೆ ಬಿಡುಗಡೆ ಮಾಡುವ ಸಾಧ್ಯತೆಯಿದೆ.

AAPL ಷೇರು: ಹೂಡಿಕೆದಾರರ ಅಭಿಪ್ರಾಯವೇನು?

ಸ್ಟಾಕ್‌ಟ್ವಿಟ್ಸ್‌ನಲ್ಲಿ (Stocktwits) ಚಿಲ್ಲರೆ ಹೂಡಿಕೆದಾರರ ಅಭಿಪ್ರಾಯವು 'ಬೇರಿಶ್' (bearish) ಆಗಿತ್ತು ಮತ್ತು ಸಂದೇಶಗಳ ಪ್ರಮಾಣ 'ಕಡಿಮೆ' (low) ಇತ್ತು.

ಈ ವರ್ಷದಲ್ಲಿ ಇಲ್ಲಿಯವರೆಗೆ AAPL ಷೇರು 13.5% ಗಳಿಕೆ ಕಂಡಿದೆ.