'ಈ ಕೋರ್ಸ್‌ ಪಾಸಾದವರಿಗೆ ಉದ್ಯೋಗಾವಕಾಶ'

ಪ್ರತಿ 2 ಗ್ರಾಪಂಗೆ ಒಬ್ಬರಂತೆ ಕೃಷಿ ಡಿಪ್ಲೊಮಾ ಪದವಿ ಪಡೆದವರನ್ನು 10 ತಿಂಗಳ ಕಾಲಾವಧಿಗೆ ಹೊರಗುತ್ತಿಗೆ ಆಧಾರದಲ್ಲಿ ನೇಮಕಾತಿ| 10 ತಿಂಗಳ ನೇಮಕಾತಿ ಅವಧಿಯಲ್ಲಿ 3 ತಿಂಗಳು ಪ್ರಧಾನ ಮಂತ್ರಿ ಫಸಲ್‌ಬಿಮಾ ಯೋಜನೆಯಲ್ಲಿ ಬೆಳೆ ಸಮೀಕ್ಷೆ ಕೆಲಸ| ಉಳಿದ 7 ತಿಂಗಳು ಕೃಷಿ ಇಲಾಖೆಯಲ್ಲಿ ಕೆಲಸ| 

ಬೀದರ್‌(ಫೆ.20): ಪ್ರಧಾನ ಮಂತ್ರಿ ಫಸಲ್‌ ಬಿಮಾ ಯೋಜನೆ ಪರಿಣಾಮಕಾರಿ ಅನುಷ್ಠಾನಕ್ಕಾಗಿ ರಾಜ್ಯದ ಗ್ರಾಮ ಪಂಚಾಯಿತಿಗಳಿಗೆ ಕೃಷಿ ಡಿಪ್ಲೊಮಾ ಪದವೀಧರರನ್ನು ನೇಮಕಾತಿ ಮಾಡಿಕೊಳ್ಳುವ ಕುರಿತಂತೆ 3 ಸಾವಿರ ಹುದ್ದೆಗಳ ಸೃಷ್ಟಿಗೆ ಪರವಾನಗಿ ಕೋರಿ ಮುಖ್ಯಮಂತ್ರಿಗಳಿಗೆ ವರದಿ ಸಲ್ಲಿಸಿದ್ದೇವೆ ಎಂದು ಕೃಷಿ ಸಚಿವ ಬಿ.ಸಿ. ಪಾಟೀಲ್‌ ತಿಳಿಸಿದ್ದಾರೆ. 

ನಗರದಲ್ಲಿ ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಪ್ರತಿ 2 ಗ್ರಾಪಂಗೆ ಒಬ್ಬರಂತೆ ಕೃಷಿ ಡಿಪ್ಲೊಮಾ ಪದವಿ ಪಡೆದವರನ್ನು 10 ತಿಂಗಳ ಕಾಲಾವಧಿಗೆ ಹೊರಗುತ್ತಿಗೆ ಆಧಾರದಲ್ಲಿ ನೇಮಕಾತಿ ಮಾಡಿಕೊಳ್ಳುವ ಕೃಷಿ ಸಚಿವಾಲಯ ನಿರ್ಧರಿಸಿದೆ. ಮುಖ್ಯಮಂತ್ರಿಗಳ ಪರವಾನಗಿಗಾಗಿ ಕಾಯಲಾಗುತ್ತಿದೆ ಎಂದರು.

10 ತಿಂಗಳ ನೇಮಕಾತಿ ಅವಧಿಯಲ್ಲಿ 3 ತಿಂಗಳು ಪ್ರಧಾನ ಮಂತ್ರಿ ಫಸಲ್‌ಬಿಮಾ ಯೋಜನೆಯಲ್ಲಿ ಬೆಳೆ ಸಮೀಕ್ಷೆ ಕೆಲಸ ಮಾಡುವರು, ನಂತರ ಉಳಿದ 7 ತಿಂಗಳು ಕೃಷಿ ಇಲಾಖೆಯಲ್ಲಿ ಕೆಲಸ ನಿರ್ವಹಿಸುವರು. ಇವರಿಗೆ ತಂತ್ರಜ್ಞಾನದ ಮಾಹಿತಿ ಇರುವುದರಿಂದ ಕೃಷಿ ಇಲಾಖೆಯಲ್ಲಿರುವ ಆ್ಯಪ್‌ ಬಳಸಲು ಅನುಕೂಲವಾಗಲಿದೆ ಎಂದು ತಿಳಿಸಿದರು.