ವಿಜೇಂದರ್'ಗೆ ಸಾಟಿಯಾಗದ ಚೆಕಾ; ಏಷ್ಯಾ ಪೆಸಿಫಿಕ್ ಪಟ್ಟ ಉಳಿಸಿಕೊಂಡ ಭಾರತೀಯ ಬಾಕ್ಸರ್
ಸಾರಾಂಶ
ಮಣ್ಣುಮುಕ್ಕಿಸುತ್ತೇನೆಂದು ಕೊಚ್ಚಿಕೊಂಡಿದ್ದ ಭಾರೀ ಅನುಭವಿ ಬಾಕ್ಸರ್'ಗೆ ನಾಕೌಟ್ ಪಂಚ್ ಕೊಟ್ಟ ವಿಜೇಂದರ್
ನವದೆಹಲಿ: ‘‘ರಿಂಗ್ನ ಆಚೆ ಏನನ್ನೂ ಹೇಳಲು ಇಚ್ಛಿಸುವುದಿಲ್ಲ. ಏಕೆಂದರೆ, ರಿಂಗ್ನೊಳಗೆ ನನ್ನ ಪಂಚ್ಗಳೇ ನಾನು ಹೇಳದ್ದೆಲ್ಲವನ್ನೂ ಮಾರ್ದನಿಸುತ್ತವೆ.'' - ಅನುಭವಿ ಬಾಕ್ಸರ್ ಫ್ರಾನ್ಸಿಸ್ ಚೆಕಾ ವಿರುದ್ಧ 3-0 ಅಂತರದಿಂದ ಗೆಲುವು ಪಡೆದು ಡಬ್ಲ್ಯೂಬಿಒ ಏಷ್ಯಾ ಪೆಸಿಫಿಕ್ ಬಾಕ್ಸಿಂಗ್ ಚಾಂಪಿಯನ್ಶಿಪ್ ಗೆದ್ದ ಭಾರತದ ವೃತ್ತಿಪರ ಬಾಕ್ಸರ್ ವಿಜೇಂ ದರ್ ಸಿಂಗ್ ಆಡಿದ ನುಡಿಗಳಿವು.
ಇಲ್ಲಿನ ತ್ಯಾಗರಾಜ ಒಳಾಂಗಣ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಜಿದ್ದಾಜಿದ್ದಿನ ಕಾದಾಟದಲ್ಲಿ ವಿಜೇಂದರ್ ಸಿಂಗ್ ಅವರ ಶಕ್ತಿಶಾಲಿ ಹಾಗೂ ಚಾಣಾಕ್ಷ ಪಂಚ್'ಗಳಿಗೆ ತತ್ತರಿಸಿದ ಚೆಕಾ, ವಿಜೇಂದರ್ಗೆ ಸಡ್ಡು ಹೊಡೆಯುವಲ್ಲಿ ವಿಫಲರಾದರು.
ಮೊದಲ ರೌಂಡ್ನಲ್ಲಿ 3-1ರಿಂದ ಮೇಲುಗೈ ಮೆರೆದ ವಿಜೇಂದರ್, ಆ ನಂತರದ ಎರಡನೇ ಸುತ್ತಿನಲ್ಲಿ 7-3ರ ಮುನ್ನಡೆ ಪಡೆದರು.
ಇನ್ನು ತೃತೀಯ ಸುತ್ತಿನಲ್ಲಂತೂ ಅತ್ಯಂತ ಆಕ್ರಮಣ ಕಾರಿಯಾದ ವಿಜೇಂದರ್ ಸಿಂಗ್ರನ್ನು ಚೆಕಾ ತಡೆದು ನಿಲ್ಲಿಸಿದರು. ಅಷ್ಟರಲ್ಲಾಗಲೇ ವಿಜಿಗೆ ಒಂದೆರಡು ಉತ್ತಮ ಪಂಚ್'ಗಳನ್ನು ನೀಡಿದ್ದರೂ ವಿಜೇಂದರ್ ಅವರ ಜಾಬ್ ತಡೆಯಲು ಅಸಾಧ್ಯವಾಗಿ ಅವರನ್ನು ಅಪ್ಪಿಕೊಂಡು ತಳ್ಳುತ್ತಾ ಸಾಗಿದರು ಚೆಕಾ. ಅಷ್ಟರಲ್ಲಿ ಪಂದ್ಯದ ರೆಫರಿ ಮಧ್ಯ ಪ್ರವೇಶಿಸಿ ಚೆಕಾ ಅವರನ್ನು ವಿಜಿಯವರಿಂದ ಬೇರ್ಪಡಿಸಿದರು.
ನಿಯಮಗಳ ಪ್ರಕಾರ, ಇದನ್ನು ನಾಕೌಟ್ ಎಂದು ಪರಿಗಣಿಸಲ್ಪಡುವ ಹಿನ್ನೆಲೆಯಲ್ಲಿ ವಿಜೇಂದರ್ ಅವರನ್ನು ಚಾಂಪಿಯನ್ ಎಂದು ಘೋಷಿಸಲಾಯಿತು. ಈ ಪಂದ್ಯದಲ್ಲಿನ ಜಯವೂ ಸೇರಿದಂತೆ ಪ್ರೊ ಬಾಕ್ಸಿಂಗ್'ಗೆ ಕಾಲಿಟ್ಟಾಗಿನಿಂದ ವಿಜಿ ಸತತ 8 ಜಯ ಕಂಡಂತಾಗಿದೆ.
(epaper.kannadaprabha.in)
ಕ್ರಿಕೆಟ್ ಮತ್ತು ಕ್ರೀಡಾ ಜಗತ್ತಿನ (Sports News in Kannada) ಕ್ಷಣಕ್ಷಣದ ಕನ್ನಡ ಸುದ್ದಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಐಪಿಎಲ್ ಲೈವ್ ಸೇರಿದಂತೆ ಟೀಂ ಇಂಡಿಯಾದ ಬ್ರೇಕಿಂಗ್ ಸುದ್ದಿ (Cricket News in Kannada), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ ಸಂಪೂರ್ಣ ಮಾಹಿತಿ ನಿಮ್ಮ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗೂ ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.