2ನೇ ಆವೃತ್ತಿ ಜೂನಿಯರ್ ಕಬಡ್ಡಿಗೆ ಭರ್ಜರಿ ತಯಾರಿ

2ನೇ ಸೀಸನ್‌ನಲ್ಲಿ ಜೂನಿಯರ್ ಕಬಡ್ಡಿಗೆ 12 ನಗರಗಳ 288 ಶಾಲೆಯ 3500 ಯುವ ಆಟಗಾರರು ಪಾಲ್ಗೊಳ್ಳುವ ನಿರೀಕ್ಷೆ ಇದೆ. 11 ರಿಂದ 12 ವರ್ಷದೊಳಗಿನ ಆಟಗಾರರು ಭಾಗವಹಿಸಬಹುದಾಗಿದೆ. ಮೊದಲ ಆವೃತ್ತಿಯಲ್ಲಿ 96 ಶಾಲೆಗಳು ಪಾಲ್ಗೊಂಡಿದ್ದವು. ಮೊದಲ ಆವೃತ್ತಿಯಲ್ಲಿನ ಜೂನಿಯರ್ ಕಬಡ್ಡಿ ಪ್ರಶಸ್ತಿಯನ್ನು ಸೋನಿಪತ್‌ನ ಸೌತ್ ಪಾಯಿಂಟ್ ವಿಶ್ವ ಶಾಲೆ ಜಯಿಸಿತ್ತು.

ಮುಂಬೈ[ಆ.28]: ಬಹುನಿರೀಕ್ಷಿತ ಪ್ರೊ ಕಬಡ್ಡಿ ಜತೆಯಲ್ಲಿ ಆರಂಭವಾಗುವ ಜೂನಿಯರ್ ಕಬಡ್ಡಿ 2ನೇ ಆವೃತ್ತಿಗೆ ದೇಶಾದ್ಯಂತ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಪ್ರೊ ಕಬಡ್ಡಿ ಪಂದ್ಯಗಳು ನಡೆಯಲಿರುವ 12 ನಗರಗಳಲ್ಲಿ ಜೂನಿಯರ್ ಕಬಡ್ಡಿ ಪಂದ್ಯಗಳು ನಡೆಯಲಿವೆ.

2ನೇ ಸೀಸನ್‌ನಲ್ಲಿ ಜೂನಿಯರ್ ಕಬಡ್ಡಿಗೆ 12 ನಗರಗಳ 288 ಶಾಲೆಯ 3500 ಯುವ ಆಟಗಾರರು ಪಾಲ್ಗೊಳ್ಳುವ ನಿರೀಕ್ಷೆ ಇದೆ. 11 ರಿಂದ 12 ವರ್ಷದೊಳಗಿನ ಆಟಗಾರರು ಭಾಗವಹಿಸಬಹುದಾಗಿದೆ. ಮೊದಲ ಆವೃತ್ತಿಯಲ್ಲಿ 96 ಶಾಲೆಗಳು ಪಾಲ್ಗೊಂಡಿದ್ದವು. ಮೊದಲ ಆವೃತ್ತಿಯಲ್ಲಿನ ಜೂನಿಯರ್ ಕಬಡ್ಡಿ ಪ್ರಶಸ್ತಿಯನ್ನು ಸೋನಿಪತ್‌ನ ಸೌತ್ ಪಾಯಿಂಟ್ ವಿಶ್ವ ಶಾಲೆ ಜಯಿಸಿತ್ತು. ಜೂನಿಯರ್ ಕಬಡ್ಡಿ ಪಂದ್ಯಗಳನ್ನು ವೀಕ್ಷಿಸುವವರ ಸಂಖ್ಯೆ ಕೂಡ ಗಣನೀಯ ಏರಿಕೆ ಕಂಡಿತ್ತು. ಟೂರ್ನಿ ಅಂತ್ಯದ ವೇಳೆಗೆ 15.64 ಕೋಟಿ ವೀಕ್ಷಕರು ಜೂನಿಯರ್ ಕಬಡ್ಡಿಯನ್ನು ವೀಕ್ಷಿಸಿದ್ದರು.

ಜೂನಿಯರ್ ಕಬಡ್ಡಿಯ 2ನೇ ಆವೃತ್ತಿಯ ಪಂದ್ಯಗಳ ವೇಳಾಪಟ್ಟಿ ಆಗಸ್ಟ್ ಅಂತ್ಯ ಮತ್ತು ಸೆಪ್ಟೆಂಬರ್ ಆರಂಭದಲ್ಲಿ ಪ್ರಕಟಿಸಲಾಗುವುದು ಎಂದು ಆಯೋಜಕರು ಹೇಳಿದ್ದಾರೆ. ಆಯ್ಕೆಯಾಗಲಿರುವ 24 ಶಾಲೆಗಳನ್ನು 8 ಗುಂಪುಗಳಾಗಿ ವಿಂಗಡಿಸಲಾಗುವುದು. ಪ್ರತಿ ಗುಂಪಿನಲ್ಲಿ 3 ತಂಡಗಳು ಇರಲಿದ್ದು, ಪ್ರತಿ ತಂಡಗಳ ವಿರುದ್ಧ ಪಂದ್ಯವನ್ನಾಡಲಿವೆ. ಗುಂಪಿನಲ್ಲಿ ಅಗ್ರ ಸ್ಥಾನ ಪಡೆಯುವ ತಂಡಗಳು ಸಿಟಿ ಫೈನಲ್ಸ್ ಸುತ್ತಿನಲ್ಲಿ ಆಡಲಿವೆ. ಯುವ ವಿದ್ಯಾರ್ಥಿಗಳನ್ನು ಗುರಿಯಾಗಿಸಿಕೊಂಡು ಜೂನಿಯರ್ ಕಬಡ್ಡಿಯನ್ನು ಆರಂಭಿಸಲಾಗಿದೆ. ಶಾಲೆಯಲ್ಲಿನ ಯುವ ಆಟಗಾರರನ್ನು ಗುರುತಿಸುವ ಸಲುವಾಗಿ ಆಯಾ ಶಾಲೆಗಳ ದೈಹಿಕ ಶಿಕ್ಷಕರಿಗೆ ತರಬೇತಿ ನೀಡಲಾಗುತ್ತಿದೆ.