ಉತ್ತಪ್ಪ, ರಾಣಾ, ರಸೆಲ್ ಅಬ್ಬರ: ಪಂಜಾಬ್’ಗೆ ಸವಾಲಿನ ಗುರಿ ನೀಡಿದ ಕೆಕೆಆರ್

ಟಾಸ್ ಗೆದ್ದ ಪಂಜಾಬ್ ಬೌಲಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿತು. ಸ್ಫೋಟಕ ಆರಂಭ ನೀಡಿದ ನರೈನ್-ಲಿನ್ ಜೋಡಿ ಮೊದಲ ವಿಕೆಟ್’ಗೆ 34 ರನ್’ಗಳ ಜತೆಯಾಟ ನಿಭಾಯಿಸಿತು. ಇದರ ಬೆನ್ನಲ್ಲೇ ಕೇವಲ 2 ರನ್’ಗಳ ಅಂತರದಲ್ಲಿ ನರೈನ್ ಹಾಗೂ ಲಿನ್ ಪೆವಿಲಿಯನ್ ಸೇರಿದರು.

ಕೋಲ್ಕತಾ[ಮಾ.27]: ರಾಬಿನ್ ಉತ್ತಪ್ಪ, ನಿತಿಶ್ ರಾಣಾ ಆಕರ್ಷಕ ಅರ್ಧಶತಕಗಳ ಹಾಗೂ ಆ್ಯಂಡ್ರೆ ರಸೆಲ್ ಸಿಡಿಲಬ್ಬರದ ಬ್ಯಾಟಿಂಗ್[48] ನೆರವಿನಿಂದ ಕೋಲ್ಕತಾ ನೈಟ್ ರೈಡರ್ಸ್ ತಂಡ 218 ರನ್ ಬಾರಿಸಿದ್ದು, ಪ್ರವಾಸಿ ಪಂಜಾಬ್ ತಂಡಕ್ಕೆ ಸವಾಲಿನ ಗುರಿ ನೀಡಿದೆ.

ಟಾಸ್ ಗೆದ್ದ ಪಂಜಾಬ್ ಬೌಲಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿತು. ಸ್ಫೋಟಕ ಆರಂಭ ನೀಡಿದ ನರೈನ್-ಲಿನ್ ಜೋಡಿ ಮೊದಲ ವಿಕೆಟ್’ಗೆ 34 ರನ್’ಗಳ ಜತೆಯಾಟ ನಿಭಾಯಿಸಿತು. ಇದರ ಬೆನ್ನಲ್ಲೇ ಕೇವಲ 2 ರನ್’ಗಳ ಅಂತರದಲ್ಲಿ ನರೈನ್ ಹಾಗೂ ಲಿನ್ ಪೆವಿಲಿಯನ್ ಸೇರಿದರು.

ಆಸರೆಯಾದ ರಾಣಾ-ಉತ್ತಪ್ಪ: ಕೇವಲ 36 ರನ್’ಗಳಿಗೆ 2 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಕೆಕೆಆರ್’ಗೆ ನಿತಿಶ್ ರಾಣಾ ಹಾಗೂ ರಾಬಿನ್ ಉತ್ತಪ್ಪ ಆಸರೆಯಾದರು. ಎಚ್ಚರಿಕೆ ಆಟ ಪ್ರದರ್ಶಿಸಿದ ಈ ಜೋಡಿ ಮೂರನೇ ವಿಕೆಟ್’ಗೆ 110 ರನ್’ಗಳ ಜತೆಯಾಟವಾಡುವ ಮೂಲಕ ಬೃಹತ್ ಮೊತ್ತ ಕಲೆ ಹಾಕಲು ನೆರವಾದರು. ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ ರಾಣಾ ಸತತ ಎರಡನೇ ಬಾರಿಗೆ ಅರ್ಧಶತಕ ಪೂರೈಸಿದರು. ಕೇವಲ 34 ಎಸೆತಗಳಲ್ಲಿ 2 ಬೌಂಡರಿ ಹಾಗೂ 7 ಸಿಕ್ಸರ್ ಸಹಿತ 63 ರನ್ ಚಚ್ಚಿ ವರಣ್ ಚಕ್ರವರ್ತಿಗೆ ಚೊಚ್ಚಲ ಬಲಿಯಾದರು. ಆ ಬಳಿಕ ಉತ್ತಪ್ಪ ಕೂಡಿಕೊಂಡ ರಸೆಲ್ ಪಂಜಾಬ್ ಬೌಲರ್’ಗಳನ್ನು ಮನಬಂದಂತೆ ದಂಡಿಸಿದರು. ಉತ್ತಪ್ಪ 50 ಎಸೆತಗಳಲ್ಲಿ ಅಜೇಯ 67 ರನ್ ಬಾರಿಸಿದರೆ, ರಸೆಲ್ ಕೇವಲ 17 ಎಸೆತಗಳಲ್ಲಿ 3 ಬೌಂಡರಿ ಹಾಗೂ 5 ಸಿಕ್ಸರ್’ನೊಂದಿಗೆ 48 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು.

ಸಂಕ್ಷಿಪ್ತ ಸ್ಕೋರ್:
ಕೆಕೆಆರ್: 218/4
ರಾಬಿನ್ ಉತ್ತಪ್ಪ: 67