ಕಳೆದ ವರ್ಷ ಪ್ರಕೃತಿ ವಿಕೂಪದಿಂದ ಅಪಾರ ಹಾನಿಯಾದ ಕಾರಣ, ಈ ಬಾರಿ ಟೂರ್ನಿಯನ್ನು ಸರಳವಾಗಿ ಆಯೋಜಿಸಲಾಗಿತ್ತು. ಹಾಕಿ ಕೂರ್ಗ್‌ ಸಂಸ್ಥೆಯೇ ಟೂರ್ನಿ ಆಯೋಜನೆ ಹೊಣೆ ಹೊತ್ತಿತ್ತು. ಕಳೆದ 22 ವರ್ಷಗಳಿಂದ ಸೆಮಿಫೈನಲ್‌ ಹಾಗೂ ಫೈನಲ್‌ನಲ್ಲಿ ಆಡಿದ್ದ ತಂಡಗಳು ಮಾತ್ರ ಈ ಬಾರಿ ಪಾಲ್ಗೊಂಡಿದ್ದವು.
ವಿರಾಜಪೇಟೆ(ಮೇ.11): ಕಾಕೋಟುಪರಂಬುವಿನಲ್ಲಿ ಹಾಕಿ ಕೂರ್ಗ್‌ ವತಿಯಿಂದ ನಡೆದ ಕೊಡವ ಕೌಟುಂಬಿಕ ಹಾಕಿ ಟೂರ್ನಿಯಲ್ಲಿ ಪರದಂಡ ತಂಡ ಚಾಂಪಿಯನ್‌ ಆಗಿ ಹೊರಹೊಮ್ಮಿತು. ಕಳೆದ ವರ್ಷ ಪ್ರಕೃತಿ ವಿಕೂಪದಿಂದ ಅಪಾರ ಹಾನಿಯಾದ ಕಾರಣ, ಈ ಬಾರಿ ಟೂರ್ನಿಯನ್ನು ಸರಳವಾಗಿ ಆಯೋಜಿಸಲಾಗಿತ್ತು. ಹಾಕಿ ಕೂರ್ಗ್‌ ಸಂಸ್ಥೆಯೇ ಟೂರ್ನಿ ಆಯೋಜನೆ ಹೊಣೆ ಹೊತ್ತಿತ್ತು. ಕಳೆದ 22 ವರ್ಷಗಳಿಂದ ಸೆಮಿಫೈನಲ್‌ ಹಾಗೂ ಫೈನಲ್‌ನಲ್ಲಿ ಆಡಿದ್ದ ತಂಡಗಳು ಮಾತ್ರ ಈ ಬಾರಿ ಪಾಲ್ಗೊಂಡಿದ್ದವು. ಒಟ್ಟು 149 ತಂಡಗಳು ಪ್ರಶಸ್ತಿಗಾಗಿ ಸೆಣಸಿದವು.
ಶುಕ್ರವಾರ ನಡೆದ ಫೈನಲ್‌ನಲ್ಲಿ ಪರದಂಡ ತಂಡ ಟೈ ಬ್ರೇಕರ್‌ನಲ್ಲಿ 5-2 ಗೋಲುಗಳ ಗೆಲುವು ಸಾಧಿಸಿತು. ನಿಗದಿತ ಸಮಯದಲ್ಲಿ ಉಭಯ ತಂಡಗಳು 2-2ರಲ್ಲಿ ಸಮಬಲ ಸಾಧಿಸಿದ ಕಾರಣ, ಫಲಿತಾಂಶಕ್ಕಾಗಿ ಟೈ ಬ್ರೇಕರ್‌ ಮೊರೆ ಹೋಗಲಾಯಿತು. ಪ್ರಶಸ್ತಿ ವಿಜೇತ ಪರದಂಡ ತಂಡ 60 ಸಾವಿರ ಬಹುಮಾನ ಮೊತ್ತ ಪಡೆಯಿತು.
ಇದೇ ವೇಳೆ ಚಾಂಪಿಯನ್‌ಶಿಪ್‌ ಟ್ರೋಫಿ ಫೈನಲ್‌ನಲ್ಲಿ ಪುದಿಯೊಕ್ಕಡ ತಂಡ 5-1 ಗೋಲುಗಳಿಂದ ಕಾಳೇಂಗಡ ತಂಡವನ್ನು ಮಣಿಸಿ ಪ್ರಶಸ್ತಿ ಜಯಿಸಿತು. ತಂಡಕ್ಕೆ 50 ಸಾವಿರ ಬಹುಮಾನ ಮೊತ್ತ ದೊರೆಯಿತು.
ಅಕ್ಕ-ತಂಗಿಯರ ಸಾಧನೆ: ಕಾಳೆಂಗಡ ತಂಡದ ಪರ ಕಣಕ್ಕಿಳಿದ ಸಹೋದರಿಯರಾದ ಮೋನಿಶಾ ಮತ್ತು ಯಶಸ್ವಿನಿ ಉತ್ತಮ ಪ್ರದರ್ಶನ ನೀಡಿದರು. ಅಲ್ಲದೆ ಕೊಡವ ಹಾಕಿ ಉತ್ಸವದ ಫೈನಲ್‌ನಲ್ಲಿ ಆಡಿದ ಮೊದಲ ಬಾಲಕಿಯರು ಎಂಬ ಕೀರ್ತಿಗೆ ಪಾತ್ರರಾದರು.