ಕರ್ನಾಟಕಕ್ಕೆ ಹ್ಯಾಟ್ರಿಕ್ ಗೆಲುವು; ಸೌರಾಷ್ಟ್ರವನ್ನು ಬಗ್ಗುಬಡಿದ ಕನ್ನಡಿಗರು

ಇದಕ್ಕೂ ಮುನ್ನ ಮೊದಲು ಬ್ಯಾಟ್ ಮಾಡಿದ ಕರ್ನಾಟಕ ತಂಡ ಕೂಡ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಲು ವಿಫಲವಾಯಿತು. ನಾಯಕ ಮಯಂಕ್ ಅಗರ್ವಾಲ್ 89 ರನ್ ಗಳಿಸಿದ್ದು ಕರ್ನಾಟಕದ ಇನ್ನಿಂಗ್ಸ್'ನ ಹೈಲೈಟ್. ಇವರನ್ನು ಬಿಟ್ಟರೆ ಸ್ಟುವರ್ಟ್ ಬಿನ್ನಿ ಮಾತ್ರ ಒಂದಷ್ಟು ರನ್ ಗಳಿಸಿದರು. ರಾಬಿನ್ ಉತ್ತಪ್ಪ, ಪವನ್ ದೇಶಪಾಂಡೆ ನಿರಾಶೆಗೊಳಿಸಿದರು. ಆದರೆ, ವೇಗದ ಬೌಲಿಂಗ್'ಗೆ ಸಹಕಾರಿಯಾದ ಈಡನ್ ಗಾರ್ಡನ್ಸ್ ಪಿಚ್'ನಲ್ಲಿ ಕರ್ನಾಟಕ ಗೆಲ್ಲಲು 201 ರನ್ ಸ್ಕೋರು ಸಾಕಾಯಿತು.

ಕೋಲ್ಕತಾ(ಫೆ. 28): ರಣಜಿ ಟ್ರೋಫಿ ಟೂರ್ನಿಗಳಲ್ಲಿ ಕಳಪೆ ಪ್ರದರ್ಶನ ನೀಡಿ ನಿರಾಶೆ ಮೂಡಿಸಿದ್ದ ಕರ್ನಾಟಕ ಕ್ರಿಕೆಟ್ ತಂಡ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಅಬ್ಬರಿಸಿ ಬೊಬ್ಬಿರಿಯುತ್ತಿದೆ. ವಿಜಯ್ ಹಜಾರೆ ಟ್ರೋಫಿಯಲ್ಲಿ ಕರ್ನಾಟಕ ಸತತ ಮೂರನೇ ಜಯ ಪಡೆದು ಬೀಗಿದೆ. ಇಂದು ನಡೆದ ಡಿ ಗುಂಪಿನ ಪಂದ್ಯದಲ್ಲಿ ಸೌರಾಷ್ಟ್ರ ವಿರುದ್ಧ ಕರ್ನಾಟಕ 73 ರನ್'ಗಳಿಂದ ಜಯಭೇರಿ ಭಾರಿಸಿದೆ. ಗೆಲ್ಲಲು 202 ರನ್'ಗಳ ಸಾಧಾರಣ ಗುರಿ ಪಡೆದರೂ ಸೌರಾಷ್ಟ್ರ ಕೇವಲ 128 ರನ್ನಿಗೆ ಆಲೌಟ್ ಆಗಿ ಸೋಲಪ್ಪಿತು. ವೇಗದ ಬೌಲರ್ ರೋನಿತ್ ಮೋರೆ 4 ವಿಕೆಟ್ ಕಬಳಿಸಿ ಸೌರಾಷ್ಟ್ರ ಬೆನ್ನೆಲುಬು ಮುರಿದರು. ಒಂದು ಹಂತದಲ್ಲಿ 27 ರನ್ನಿಗೆ 5 ವಿಕೆಟ್ ಕಳೆದುಕೊಂಡಿದ್ದ ಸೌರಾಷ್ಟ್ರ ಇನ್ನೂ ಬೇಗನೇ ಆಲೌಟ್ ಆಗುವ ಭೀತಿಯಲ್ಲಿತ್ತು. ಆದರೆ, ನಾಯಕ ಜಯದೇವ್ ಶಾ, ಚಿರಾಗ್ ಜಾನಿ ಮತ್ತು ಶೌರ್ಯ ಅವರು ಉತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಿ ಸೌರಾಷ್ಟ್ರಕ್ಕೆ ಒಂದಷ್ಟು ಮಾನ ಉಳಿಸಿದರು.

ಇದಕ್ಕೂ ಮುನ್ನ ಮೊದಲು ಬ್ಯಾಟ್ ಮಾಡಿದ ಕರ್ನಾಟಕ ತಂಡ ಕೂಡ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಲು ವಿಫಲವಾಯಿತು. ನಾಯಕ ಮಯಂಕ್ ಅಗರ್ವಾಲ್ 89 ರನ್ ಗಳಿಸಿದ್ದು ಕರ್ನಾಟಕದ ಇನ್ನಿಂಗ್ಸ್'ನ ಹೈಲೈಟ್. ಇವರನ್ನು ಬಿಟ್ಟರೆ ಸ್ಟುವರ್ಟ್ ಬಿನ್ನಿ ಮಾತ್ರ ಒಂದಷ್ಟು ರನ್ ಗಳಿಸಿದರು. ರಾಬಿನ್ ಉತ್ತಪ್ಪ, ಪವನ್ ದೇಶಪಾಂಡೆ ನಿರಾಶೆಗೊಳಿಸಿದರು. ಆದರೆ, ವೇಗದ ಬೌಲಿಂಗ್'ಗೆ ಸಹಕಾರಿಯಾದ ಈಡನ್ ಗಾರ್ಡನ್ಸ್ ಪಿಚ್'ನಲ್ಲಿ ಕರ್ನಾಟಕ ಗೆಲ್ಲಲು 201 ರನ್ ಸ್ಕೋರು ಸಾಕಾಯಿತು.

ಹ್ಯಾಟ್ರಿಕ್ ಗೆಲುವಿನ ಬಳಿಕ ಡಿ ಗುಂಪಿನಲ್ಲಿ ಕರ್ನಾಟಕ ತಂಡ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು. ಸೌರಾಷ್ಟ್ರ ತಂಡ ಸತತ ಮೂರನೇ ಸೋಲಿನೊಂದಿಗೆ ಕೊನೆಯ ಸ್ಥಾನದಲ್ಲಿ ಮುಂದುವರಿದಿದೆ. ಮೊದಲೆರಡು ಪಂದ್ಯಗಳಲ್ಲಿ ಜಾರ್ಖಂಡ್ ಮತ್ತು ಸರ್ವಿಸಸ್ ತಂಡಗಳನ್ನು ಸೋಲಿಸಿದ್ದ ಕರ್ನಾಟಕಕ್ಕೆ ಇನ್ನೂ ಮೂರು ಪಂದ್ಯಗಳಿದ್ದು, ಹೈದರಾಬಾದ್, ಜಮ್ಮು-ಕಾಶ್ಮೀರ ಮತ್ತು ಛತ್ತೀಸ್'ಗಡ ತಂಡಗಳ ಸವಾಲು ಎದುರಿಲಿದೆ.

ಕರ್ನಾಟಕ 47.1 ಓವರ್ 201 ರನ್ ಆಲೌಟ್
(ಮಯಂಕ್ ಅಗರ್ವಾಲ್ 89, ಸ್ಟುವರ್ಟ್ ಬಿನ್ನಿ 31 - ಕುಶಾಂಗ್ ಪಟೇಲ್ 36/4, ಚಿರಾಗ್ ಜಾನಿ 40/3, ಜಯದೇವ್ ಉನಾದ್ಕತ್ 38/2)

ಸೌರಾಷ್ಟ್ರ 36.2 ಓವರ್ 128 ರನ್ ಆಲೌಟ್
(ಜಯದೇವ್ ಶಾ 38, ಶೌರ್ಯ ಎಂ.ಸಾನಂದಿಯಾ ಅಜೇಯ 31, ಚಿರಾಗ್ ಜಾನಿ 25 ರನ್ - ರೋನಿತ್ ಮೋರೆ 20/4, ಎಂ.ಪ್ರಸಿದ್ಧ್ ಕೃಷ್ಣ 19/2, ಸ್ಟುವರ್ಟ್ ಬಿನ್ನಿ 37/2)

(ಫೋಟೋ: ಮಯಂಕ್ ಅಗರ್ವಾಲ್ ಅವರ ಫೈಲ್ ಫೋಟೋ)