ಭಾರಿ ಮೊತ್ತಕ್ಕೆ ಹರಾಜಾಗಿರುವ ಈ 5 ಆಟಗಾರರು ಪ್ರಾಂಚೈಸಿಗಳ ನಂಬಿಕೆ ಉಳಿಸಿಕೊಳ್ತಾರಾ..?

ಐಪಿಎಲ್ ಆಟಗಾರರ ಹರಾಜು ಪ್ರಕ್ರಿಯೆ ಕುತೂಹಲಕ್ಕೆ ತೆರೆಬಿದ್ದಿದೆ. ಕೆಲ ಆಟಗಾರರು ನಿರೀಕ್ಷೆಗೂ ಮೀರಿ ಹರಾಜಾಗಿದ್ದರೆ, ಇನ್ನೂ ಕೆಲ ಕ್ರಿಕೆಟಿಗರನ್ನೂ ಪ್ರಾಂಚೈಸಿಗಳು ಮೂಸಿಯೂ ನೋಡಲಿಲ್ಲ. ಇನ್ನೇನು ಕೆಲ ತಿಂಗಳಲ್ಲಿ ಆರಂಭವಾಗಲಿರುವ ಐಪಿಎಲ್'ನಲ್ಲಿ ನಿರೀಕ್ಷೆಗೂ ಮೀರಿ ಹರಾಜಾಗಿರುವ ಈ ಐವರು ಆಟಗಾರರು ಪ್ರಾಂಚೈಸಿಗಳ ನಂಬಿಕೆ ಉಳಿಸಿಕೊಳ್ಳುತ್ತಾರಾ ಎಂದು ಕಾದು ನೋಡಬೇಕಿದೆ.

#5  ಕೀರನ್ ಪೊಲ್ಲಾರ್ಡ್:

ಫಿಟ್'ನೆಸ್ ಸಮಸ್ಯೆಯಿಂದ ಬಳಲುತ್ತಿರುವ ಪೊಲ್ಲಾರ್ಡ್, ಪ್ರಸ್ತುತ ಹೇಳಿಕೊಳ್ಳುವಂತಹ ಫಾರ್ಮ್'ನಲ್ಲಿಲ್ಲ. 2017ರ ಆವೃತ್ತಿಯಲ್ಲಿ ಕೇವಲ 2 ಓವರ್ ಬೌಲಿಂಗ್ ಮಾಡಿ 30 ರನ್ ನೀಡಿದ್ದರು. ಆದರೆ ಒಂದೇ ಒಂದು ವಿಕೆಟ್ ಕಬಳಿಸಲೂ ಸಾಧ್ಯವಾಗಿರಲಿಲ್ಲ. ಆದಾಗಿಯೂ ಮುಂಬೈ ಇಂಡಿಯನ್ಸ್ ಪೊಲ್ಲಾರ್ಡ್'ರನ್ನು ರೀಟೈನ್ ಮಾಡಿಕೊಂಡಿದೆ.

#4 ಇಶನ್ ಕಿಶನ್:

ಜಾರ್ಖಂಡ್ ಮೂಲದ ವಿಕೆಟ್ ಕೀಪರ್ ಬ್ಯಾಟ್ಸ್'ಮನ್. 2016ರಲ್ಲಿ ಅಂಡರ್ 19 ಟೀಂ ಇಂಡಿಯಾವನ್ನು ವಿಶ್ವಕಪ್'ನಲ್ಲಿ ಫೈನಲ್'ವರೆಗೂ ಮುನ್ನಡೆಸಿದ್ದರು. ಕಳೆದ ವರ್ಷ ಗುಜರಾತ್ ಲಯನ್ಸ್ ತಂಡ 35 ಲಕ್ಷಕ್ಕೆ ಖರೀದಿಸಿತ್ತು. ಕಳೆದ ಆವೃತ್ತಿಯಲ್ಲಿ ಆಡಿದ 5 ಪಂದ್ಯಗಳಲ್ಲಿ 42 ರನ್ ಕಲೆಹಾಕಿದ್ದರು.

ಆದರೆ ಈ ಬಾರಿ ಮುಂಬೈ ಇಂಡಿಯನ್ಸ್ ತಂಡ 6.2 ಕೋಟಿ ನೀಡಿ ಇಶನ್ ಕಿಶನ್ ಅವರನ್ನು ಖರೀದಿಸಿದೆ.

#3 ಕೆ. ಗೌತಮ್:

2012ರಲ್ಲಿ ಕರ್ನಾಟಕ ಪರ ರಣಜಿ ಕ್ರಿಕೆಟ್'ಗೆ ಪದಾರ್ಪಣೆ ಮಾಡಿದ ಕೆ. ಗೌತಮ್. ಕಳೆದ ಆವೃತ್ತಿಯಲ್ಲಿ ಮುಂಬೈ ಇಂಡಿಯನ್ಸ್ 2 ಕೋಟಿ ನೀಡಿ ಖರೀದಿಸಿತ್ತು. ಆದರೆ ಈ ಬಾರಿ ರಾಜಸ್ಥಾನ ರಾಯಲ್ಸ್ ತಂಡ 6.2 ಕೋಟಿ ನೀಡಿ ಕನ್ನಡಿಗನನ್ನು ತನ್ನ ತಂಡಕ್ಕೆ ಸೇರಿಸಿಕೊಂಡಿದೆ.

#2 ಮನೀಶ್ ಪಾಂಡೆ:

ಮನೀಶ್ ಪಾಂಡೆಯನ್ನು ಸನ್'ರೈಸರ್ಸ್ ಹೈದರಾಬಾದ್ ತಂಡ 11 ಕೋಟಿ ನೀಡಿ ಖರೀಧಿಸಿದೆ. ಕಳೆದ ಆವೃತ್ತಿಯಲ್ಲಿ 50ರ ಸರಸರಿಯಲ್ಲಿ ರನ್ ಗಳಿಸಿದ್ದ ಪಾಂಡೆ ಮೇಲೆ ಸಾಕಷ್ಟು ನಿರೀಕ್ಷೆಯಿದೆ.

#1 ಜಯದೇವ್ ಉನಾದ್ಕತ್:

ಈ ಬಾರಿ ಅಚ್ಚರಿಯ ಬೆಲೆಗೆ ಹರಾಜಾಗಿರುವ ಆಟಗಾರನೆಂದರೆ ಜಯದೇವ್ ಉನಾದ್ಕತ್. ಕಳೆದ ಆವೃತ್ತಿಯಲ್ಲಿ ರೈಸಿಂಗ್ ಪುಣೆ ಸೂಪರ್'ಜೈಂಟ್ಸ್ 30 ಲಕ್ಷ ನೀಡಿ ಖರೀದಿಸಿತ್ತು. 2017ರಲ್ಲಿ 24 ವಿಕೆಟ್ ಕಬಳಿಸುವ ಮೂಲಕ ಗಮನ ಸೆಳೆದಿದ್ದ ಉನಾದ್ಕತ್, ಈ ಬಾರಿ 11.5 ಕೋಟಿ ರುಪಾಯಿಗೆ ರಾಜಸ್ಥಾನ ರಾಯಲ್ಸ್ ಪಾಲಾಗುವ ಮೂಲಕ ಎಲ್ಲರ ಹುಬ್ಬೇರುವಂತೆ ಮಾಡಿದ್ದಾರೆ.

ಈ ಮೇಲ್ಕಂಡ ಆಟಗಾರರು ಪ್ರಾಂಚೈಸಿಗಳ ನಂಬಿಕೆ ಉಳಿಸಿಕೊಳ್ಳುತ್ತಾರಾ ಎನ್ನೋದನ್ನು ಕಾಲವೇ ಉತ್ತರಿಸಬೇಕಿದೆ.