ಲೋಕೋಪಯೋಗಿಯಲ್ಲಿ ಬಹುಕೋಟಿ ಟೆಂಡರ್: ನಕಲಿ ದಾಖಲೆ ಸಲ್ಲಿಸಿದವರಿಗೆ ರಸ್ತೆ ಕಾಮಗಾರಿಗಳ ಹಂಚಿಕೆ

ಲೋಕೋಪಯೋಗಿ ಇಲಾಖೆಯಲ್ಲಿ ನಡೆಯುವ ಟೆಂಡರ್​ ಅಕ್ರಮಗಳು ಅದೆಷ್ಟೋ. ಇದೀಗ ಮತ್ತೊಂದು ಬಹುಕೋಟಿ ಟೆಂಡರ್ ಗೋಲ್​ಮಾಲ್​ ಪ್ರಕರಣ ಲೋಕೋಪಯೋಗಿ ಇಲಾಖೆಯಲ್ಲಿ ನಡೆದಿದೆ. ಹೆದ್ದಾರಿ ರಸ್ತೆ ಅಭಿವೃದ್ಧಿಯ 127 ಕಾಮಗಾರಿಗಳಿಗೆ ಸುಳ್ಳು ದಾಖಲೆಗಳನ್ನು ಕೊಟ್ಟು ಟೆಂಡರ್​ ಹಂಚಿಕೆ ಮಾಡಿರುವ ಪ್ರಕರಣ ಇದಾಗಿದೆ. ಗುತ್ತಿಗೆದಾರರು ಸಲ್ಲಿಸಿರುವ ನಕಲಿ ದಾಖಲೆಗಳು ಎಕ್ಸ್​ಕ್ಲೂಸಿವ್​ ಆಗಿ ಸುವರ್ಣನ್ಯೂಸ್​'ಗೆ ಸಿಕ್ಕಿವೆ.

ಬೆಂಗಳೂರು(ನ.25): ಲೋಕೋಪಯೋಗಿ ಇಲಾಖೆಯಲ್ಲಿ ನಡೆಯುವ ಟೆಂಡರ್​ ಅಕ್ರಮಗಳು ಅದೆಷ್ಟೋ. ಇದೀಗ ಮತ್ತೊಂದು ಬಹುಕೋಟಿ ಟೆಂಡರ್ ಗೋಲ್​ಮಾಲ್​ ಪ್ರಕರಣ ಲೋಕೋಪಯೋಗಿ ಇಲಾಖೆಯಲ್ಲಿ ನಡೆದಿದೆ. ಹೆದ್ದಾರಿ ರಸ್ತೆ ಅಭಿವೃದ್ಧಿಯ 127 ಕಾಮಗಾರಿಗಳಿಗೆ ಸುಳ್ಳು ದಾಖಲೆಗಳನ್ನು ಕೊಟ್ಟು ಟೆಂಡರ್​ ಹಂಚಿಕೆ ಮಾಡಿರುವ ಪ್ರಕರಣ ಇದಾಗಿದೆ. ಗುತ್ತಿಗೆದಾರರು ಸಲ್ಲಿಸಿರುವ ನಕಲಿ ದಾಖಲೆಗಳು ಎಕ್ಸ್​ಕ್ಲೂಸಿವ್​ ಆಗಿ ಸುವರ್ಣನ್ಯೂಸ್​'ಗೆ ಸಿಕ್ಕಿವೆ.

ಲೋಕೋಪಯೋಗಿಯಲ್ಲಿ ಬಹುಕೋಟಿ ಟೆಂಡರ್ ಅಕ್ರಮ?

ಲೋಕೋಪಯೋಗಿ ಇಲಾಖೆ ಅಂದರೆ ಅದು ಟೆಂಡರ್'​ಗಳ ಗೂಡು. ಪ್ರತಿನಿತ್ಯ ಹತ್ತು ಹಲವು ಟೆಂಡರ್​'ಗಳನ್ನು ಅಲ್ಲಿ ಗುತ್ತಿಗೆದಾರರಿಗೆ ವಹಿಸುವ ಕೆಲಸ ಎಡಬಿಡದೇ ನಡೆದೇ ಇರುತ್ತದೆ. ಈ ಪ್ರಕ್ರಿಯೆಯಲ್ಲಿ ಅಕ್ರಮಗಳೂ ಸದ್ದಿಲ್ಲದೇ ನುಸುಳುತ್ತಿವೆ. ಇದೀಗ ಲೋಕೋಪಯೋಗಿ ಇಲಾಖೆಯಲ್ಲಿ ಬಹುಕೋಟಿ ಟೆಂಡರ್​ ಅಕ್ರಮವೊಂದು ನಡೆದಿದೆ ಎನ್ನುವ ಆರೋಪ ಕೇಳಿ ಬಂದಿದೆ.

ಇತ್ತೀಚೆಗಷ್ಟೇರಾಜ್ಯ ಹೆದ್ದಾರಿ ಅಭಿವೃದ್ಧಿ ಯೋಜನೆಯ ಹಂತ-3 ರಡಿ ಮೂರೂವರೆ ಸಾವಿರ ಕೋಟಿ ರೂ ಮೌಲ್ಯದ 127 ಪ್ಯಾಕೇಜ್​ಗಳಲ್ಲಿ ಹೆದ್ದಾರಿ ಅಭಿವೃದ್ಧಿಗೆ ಟೆಂಡರ್​ ಕರೆಯಲಾಗಿತ್ತು. ಆದ್ರೆ ಈ ಟೆಂಡರ್'​ಗಳ ಪೈಕಿ ಹಲವು ಟೆಂಡರ್​'ಗಳಿಗೆ ಗುತ್ತಿಗೆದಾರರು ನಕಲಿ ದಾಖಲೆಗಳನ್ನು ಸಲ್ಲಿಸಿ ಅಕ್ರಮವಾಗಿ ಪಡೆದುಕೊಂಡಿದ್ದಾರೆ ಎನ್ನಲಾಗಿದೆ. ಅಲ್ಲದೇ ಟೆಂಡರ್'​ಗಳನ್ನು ಕೆಲವೇ ಗುತ್ತಿಗೆದಾರರ ಜೊತೆ ಮೊದಲೇ ಸಂಧಾನ ಮಾಡಿಕೊಂಡು ಹಂಚಿಕೆ ಮಾಡುತ್ತಿರುವ ಆರೋಪವೂ ಇದೆ. ಈ ಅವ್ಯವಹಾರದಲ್ಲಿ ಗುತ್ತಿಗೆದಾರರಷ್ಟೇ ಅಲ್ಲದೇ ಇಲಾಖೆ ಅಧಿಕಾರಿಗಳು ಹಾಗೂ ಲೋಕೋಪಯೋಗಿ ಇಲಾಖೆ ಸಚಿವ ಡಾ.ಎಚ್.ಸಿ.ಮಹಾದೇವಪ್ಪರವರ ವಿಶೇಷ ಕಾರ್ಯದರ್ಶಿಯೊಬ್ಬರು ಶಾಮೀಲಾಗಿದ್ದಾರೆ ಎನ್ನುವ ಆರೋಪವೂ ಬಲವಾಗಿ ಕೇಳಿ ಬರುತ್ತಿದೆ. ಈ ಅಕ್ರಮದ ಬಗ್ಗೆ ಸುವರ್ಣನ್ಯೂಸ್​ಗೆ ಆರ್​ಟಿಐ ದಾಖಲೆಗಳು ಸಿಕ್ಕಿವೆ.

ಅಕ್ರಮ ನಡೆದಿದ್ದು ಹೀಗೆ

ಹೆದ್ದಾರಿಗಳ ಅಭಿವೃದ್ಧಿ ಕಾಮಗಾರಿಗಳಿಗೆ ಕರೆದಿರುವ ಟೆಂಡರ್​ನಲ್ಲಿ ಒಂದಷ್ಟು ಷರತ್ತುಗಳನ್ನು ಹಾಕಲಾಗಿತ್ತು. ಆದರೆ ಈ ಷರತ್ತುಗಳಿಗೆ ಕೆಲವು ಗುತ್ತಿಗೆದಾರರು ನಕಲಿ ದಾಖಲೆ ಸೃಷ್ಟಿಸಿ ಸಲ್ಲಿಸಿದ್ದಾರೆ ಅನ್ನೋ ಆರೋಪ ಇದೆ. ಹೆದ್ದಾರಿ ಅಭಿವೃದ್ಧಿ ಕಾಮಗಾರಿಗೆ ಅಹರ್ತೆ ಸಿಗಬೇಕಾದರೆ, ಗುತ್ತಿಗೆದಾರರು ಈ ಹಿಂದೆ ಕನಿಷ್ಟ ಎರಡು ವರ್ಷದ ಕಾಮಗಾರಿಗಳಲ್ಲಿ ಇಲಾಖೆ ನಿಗದಿ ಪಡಿಸಿದ ಇಂತಿಷ್ಟು ಕೋಟಿ ಹಣ ಟರ್ನ್​ಓವರ್​ ನಡೆಸಿರುವುದಕ್ಕೆ ಪ್ರಮಾಣಪತ್ರ ಸಲ್ಲಿಸಬೇಕು ಅನ್ನೋ ಷರತ್ತು ಇದೆ. ಆದ್ರೆ ಸುವರ್ಣನ್ಯೂಸ್​​ಗೆ ಸಿಕ್ಕಿರುವ ದಾಖಲೆಗಳ ಪ್ರಕಾರ ಕೆಲ ಗುತ್ತಿಗೆದಾರರು ತಮ್ಮ ಹಿಂದಿನ ಕಾಮಗಾರಿಗಳ ಟರ್ನ್​ಓವರ್​ ಮೊತ್ತದ ಬಗ್ಗೆ ಸುಳ್ಳು ಮಾಹಿತಿ ನಮೂದಿಸಿರುವುದು ಪತ್ತೆಯಾಗಿದೆ. ಅಲ್ಲದೇ ಯಂತ್ರೋಪಕರಣಗಳ ಮಾಲೀಕತ್ವವನ್ನು ಸ್ವತಂ ಗುತ್ತಿಗೆದಾರರೇ ಹೊಂದಿರಬೇಕೆಂಬ ಷರತ್ತನ್ನೂ ಪಾಲಿಸಿಲ್ಲ. ಕಾಮಗಾರಿಗೆ ಅಗತ್ಯ ಇರುವ ಯಂತ್ರೋಪಕರಣಗಳ ಮಾಲೀಕತ್ವಕ್ಕೆ ಕೆಲವು ಗುತ್ತಿಗೆದಾರರು ಆರ್​ಟಿಒ ಕೊಟ್ಟಿರುವ ವಾಹನಗಳ ದಾಖಲೆ ಸಲ್ಲಿಸದೇ ಕೇವಲ ಸ್ಟ್ಯಾಂಪ್​ ಪೇಪರ್​ ದಾಖಲೆ ಮಾತ್ರ ಸಲ್ಲಿಸಿರೋದು ಅನುಮಾನ ಹುಟ್ಟಿಸಿದೆ.

ಇನ್ನು ಕೆಲ ತಿಂಗಳ ಹಿಂದೆಯೇ ಈ ಟೆಂಡರ್​ ಗೋಲ್​ಮಾಲ್​ ಬಗ್ಗೆ ಕೆಲವರು ಸಿಎಂ ಸಿದ್ದರಾಮಯ್ಯ ಗಮನಕ್ಕೂ ತರಲಾಗಿತ್ತು. ಆದರೆ ಮುಖ್ಯಮಂತ್ರಿಗಳು ಗಮನ ನೀಡ್ಲಿಲ್ಲ ಎನ್ನಲಾಗಿದೆ. ಇತ್ತಿಚೆಗಷ್ಟೇ ಮಂಡ್ಯ ಮೂಲದ ಗುತ್ತಿಗೆದಾರರು ಸಚಿವ ಎಚ್​.ಸಿ.ಮಹಾದೇವಪ್ಪ ವಿರುದ್ಧ ಬೇರೊಂದು ಟೆಂಡರ್ ಅಕ್ರಮ ಪ್ರಕರಣದಲ್ಲಿ ಎಸಿಬಿಗೆ ದೂರು ಕೊಟ್ಟು ಅದರ ತನಿಖೆ ನಡೆಯುತ್ತಿದೆ. ಇದರ ಬೆನ್ನಲ್ಲೇ ಲೋಕೋಪಯೋಗಿ ಇಲಾಖೆಯಲ್ಲಿ ಮತ್ತೊಂದು ಬಹುಕೋಟಿ ಟೆಂಡರ್​ ಅಕ್ರಮ ಸದ್ದು ಮಾಡುತ್ತಿರೋದು ಸರ್ಕಾರಕ್ಕೆ ಮುಜುಗರ ತಂದಿದೆ.