![[ವೈರಲ್ ಚೆಕ್] ಆಶಿರ್ವಾದ್ ಗೋದಿ ಹಿಟ್ಟಿನಲ್ಲಿ ಪ್ಲಾಸ್ಟಿಕ್ ಅಂಶ ನಿಜವೇ..?](https://static.asianetnews.com/images/w-412,h-232,imgid-088cd6f1-a767-42cb-a689-e9a03b0334d0,imgname-image.jpg)
‘ಆಶೀರ್ವಾದ್’ ಗೋಧಿ ಹಿಟ್ಟಿನಲ್ಲಿ ಪ್ಲಾಸ್ಟಿಕ್ ಅಂಶವಿದೆ ಎಂಬಂತಹ ವಿಡಿಯೋಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿವೆ. ಈ ವಿಡಿಯೋದಲ್ಲಿ, ಹದಕ್ಕೆ ಕಲಸಿದ ಗೋಧಿಹಿಟ್ಟನ್ನು ನೀರಿನಲ್ಲಿ ತೊಳೆದಾಗ ಕೊನೆಯಲ್ಲಿ ಅಂಟಿನ ಪದಾರ್ಥ ಲಭ್ಯವಾಗುತ್ತದೆ.
ಅದು ಚೂಯಿಂಗ್ಗಮ್ನಂತೆಯೇ ಗೋಚರವಾಗುತ್ತದೆ. ಇದೇ ಪ್ಲಾಸ್ಟಿಕ್ ಅಂಶ. ಇದು ಆರೋಗ್ಯಕ್ಕೆ ಮಾರಕ ಎಂದು ತೋರಿಸಲಾಗಿದೆ. ಸದ್ಯ ಈ ವಿಡಿಯೋ ವೈರಲ್ ಆಗಿದೆ. ಈ ರೀತಿಯ ಹಲವು ಪ್ರಯೋಗಾತ್ಮಕ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಆದರೆ ನಿಜಕ್ಕೂ ಗೋಧಿ ಹಿಟ್ಟಿನಲ್ಲಿ ಪ್ಲಾಸ್ಟಿಕ್ ಬೆರೆಸಲಾಗಿದೆಯೇ ಎಂದರೆ ಉತ್ತರ ‘ಇಲ್ಲ’. ಏಕೆಂದರೆ ಇದು ಪ್ಲಾಸ್ಟಿಕ್ ಅಂಶ ಅಲ್ಲ. ಎಲ್ಲಾ ವಿಧದ ಗೋಧಿಗಳಲ್ಲಿ ಕಂಡುಬ’ರುವ ಗ್ಲುಟೆನ್ (ಅಂಟು) ನಂತಹ ಪ್ರೊಟೀನ್ ಇದು. ಈ ಬಗ್ಗೆ ‘ಬೂಮ್ಲೈವ್’ ತನಿಖೆಗೆ ಮುಂದಾಗಿ ಕೆಲ ಆಹಾರ ತಜ್ಞರ ಬಳಿಯೇ ಸ್ಪಷ್ಟೀಕರಣ ಕೇಳಿದೆ.
‘ಇದು ಅವೈಜ್ಞಾನಿಕ ತಪ್ಪು ಕಲ್ಪನೆಯಾಗಿದ್ದು, ಎಲ್ಲಾ ವಿಧದ ಗೋಧಿಯಲ್ಲಿ ಶೇ.8-10ರಷ್ಟು ಅಂಟಿನ ಅಂಶವಿರುತ್ತದೆ. ಅದನ್ನೇ ತಪ್ಪಾಗಿ ಪ್ಲಾಸ್ಟಿಕ್ ಎಂದು ಬಿಂಬಿಸಲಾಗಿದೆ’ ಎಂದು ಆಹಾರ ತಜ್ಞ ಉದಯ್ ಅನ್ನಾಪುರ್ ಹೇಳಿದ್ದಾರೆ.
ಅಲ್ಲದೆ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ ಕೂಡ ಈ ಬಗ್ಗೆ ಸ್ಪಷ್ಟೀಕರಣ ನೀಡಿದ್ದು, ‘ನಾರಿನಂಶಕ್ಕೆ ಕಾರಣವಾಗುವ ಗ್ಲುಟೆನಿನ್, ಗ್ಲ್ಯಾಡಿನ್ಗಳೆಂಬ ಎರಡು ವಿಧದ ಪ್ರೊಟೀನ್ಗಳನ್ನು ಗೋಧಿಯು ಒಳಗೊಂಡಿದ್ದು, ಇವು ಆರೋಗ್ಯಕ್ಕೆ ಹಾನಿಕಾರಕವಲ್ಲ’ ಎಂದು ಹೇಳಿದೆ. ಹಾಗಾಗಿ ಆಶೀರ್ವಾದ್ ಗೋಧಿ ಹಿಟ್ಟಿನಲ್ಲಿ ಪ್ಲಾಸ್ಟಿಕ್ ಅಂಶವಿದೆ ಎಂದು ಹರಿದಾಡುತ್ತಿರುವ ಸುದ್ದಿ ಸುಳ್ಳು.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.