ವಿಶ್ವನಾಥ್‌ ರಾಜಕೀಯ ಜೀವನ ಹಾಳಾಗಲು ಇವರೇ ಕಾರಣವಂತೆ

ಜೆಡಿಎಸ್ ಮುಖಂಡ ಎಚ್ ವಿಶ್ವನಾಥ್ ಅವರ ರಾಜಕೀಯ ಜೀವನ ಹಾಳಾಗಲು ಕಾರಣ ಯಾರು ಎನ್ನುವುದಕ್ಕೆ ಇದೀಗ ಕಾಗಿನೆಲೆ ಗುರುಪೀಠದ ಶ್ರೀ ನಿರಂಜನಾನಂದಪುರಿ ಶ್ರೀಗಳು ಮಾತನಾಡಿ, ಸ್ವಯಂಕೃ​ತ ಅಪ​ರಾ​ಧ​ದಿಂದ ಎಚ್‌.​ವಿ​ಶ್ವ​ನಾಥ್‌ ರಾಜ​ಕೀಯ ಹಾಳಾ​ಗಿ​ದೆ ಎಂದರು.

 ದಾವ​ಣ​ಗೆರೆ :  ತಾವು ಅನ್ಯಾಯಕ್ಕೊಳಗಾದಾಗ ಸ್ವಾಮೀಜಿ ಎಲ್ಲಿ ಹೋಗಿದ್ದರು ಎಂಬ ಶಾಸಕ ಎಚ್‌.ವಿಶ್ವನಾಥ್‌ ಅವರ ಹೇಳಿಕೆಗೆ ಪ್ರತ್ಯುತ್ತರ ನೀಡಿರುವ ಕಾಗಿನೆಲೆ ಗುರುಪೀಠದ ಶ್ರೀ ನಿರಂಜನಾನಂದಪುರಿ ಶ್ರೀಗಳು, ಸ್ವಯಂಕೃ​ತ ಅಪ​ರಾ​ಧ​ದಿಂದ ಎಚ್‌.​ವಿ​ಶ್ವ​ನಾಥ್‌ ರಾಜ​ಕೀಯ ಹಾಳಾ​ಗಿ​ದೆಯೇ ಹೊರತು ಯಾರೋ ಮಾಡಿ​ದ್ದಲ್ಲ ಎಂದು ತಿರುಗೇಟು ಕೊಟ್ಟಿದ್ದಾರೆ.

ಜಿಲ್ಲೆಯ ಹರಿ​ಹರ ತಾಲೂಕಿನಲ್ಲಿರುವ ಕಾಗಿ​ನೆಲೆ ಗುರು​ಪೀ​ಠದ ಶಾಖಾಮಠ​ದಲ್ಲಿ ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ವಿಶ್ವ​ನಾಥ್‌ ಕಾಂಗ್ರೆಸ್‌ ಪಕ್ಷ ಬಿಡುವಾಗಲೂ ನಾನೇ ಸಿದ್ದ​ರಾ​ಮಯ್ಯ ಬಳಿ ಹೋಗಿ, ವಿಶ್ವ​ನಾ​ಥ್‌​ರನ್ನು ಪಕ್ಷ ತೊರೆಯದಂತೆ ನೋಡಿಕೊಳ್ಳಿ ಎಂದಿ​ದ್ದೆ. ಆದರೆ ವಿಶ್ವ​ನಾಥ್‌ ಅವರು ಸಿದ್ದ​ರಾ​ಮಯ್ಯ ವಿರು​ದ್ಧವೇ ಕಾಂಗ್ರೆಸ್‌ ಹೈಕ​ಮಾಂಡ್‌ಗೆ ಪತ್ರ ಬರೆ​ದಿ​ದ್ದು, ಆ ಪತ್ರ​ವನ್ನು ಸಿದ್ದ​ರಾ​ಮಯ್ಯ ನನಗೆ ತೋರಿ​ಸಿ​ದ್ದ​ರು. ಸಿದ್ದರಾಮಯ್ಯ ಸುಮ್ಮನಿದ್ದರೂ ವಿಶ್ವನಾಥ್‌ ಅವರು ಸಿದ್ದರಾಮಯ್ಯ ವಿರುದ್ಧ ಟೀಕೆ ಮುಂದುವರಿಸಿದ್ದರು ಎಂದು ವಿವರಿಸಿದರು.

ವಿಶ್ವನಾಥ್‌ ಅವರ ಜೆಡಿಎಸ್‌ ಸೇರ್ಪಡೆ ಬಗ್ಗೆಯೂ ಟಾಂಗ್‌ ನೀಡಿದ ಅವರು, ದೇವೇ​ಗೌಡ್ರು ಘಟ​ಸರ್ಪವಿದ್ದಂತೆ, ಆ ಸ​ರ್ಪದ ಮುಂದೆ ನೀನೊಬ್ಬ ಕಪ್ಪೆ​ ಎಂದು ಸಿದ್ದ​ರಾ​ಮ​ಯ್ಯಗೆ ಒಂದು ಕಾಲ​ದಲ್ಲಿ ಹೋಲಿಸಿ, ಎಚ್ಚ​ರಿಸಿದ್ದ ವಿ​ಶ್ವ​ನಾಥ್‌ ಈಗ ಯಾವ ಘಟ​ಸ​ರ್ಪ, ಕಾಳಿಂಗ ಸರ್ಪದ ಬಳಿ ನಿಂತಿ​ದ್ದಾ​ರೆಂಬುದೇ ಗೊತ್ತಾ​ಗು​ತ್ತಿಲ್ಲ ಎಂದು ಹೇಳಿದರು.

ಆನೆಯು ಕೆರೆ, ಹೊಂಡ​ದಲ್ಲಿ ಸ್ಥಾನ ಮಾಡಿ, ದಡಕ್ಕೆ ಬಂದ ನಂತರ ತನ್ನ ಮೈಮೇಲೆ, ತಲೆ ಮೇಲೆ ತಾನೇ ಮಣ್ಣು ಹಾಕಿ​ಕೊ​ಳ್ಳು​ತ್ತದೆ. ಆನೆ ತಲೆ ಮೇಲೆ ಯಾರೂ ಮಣ್ಣು ಹಾಕು​ವು​ದಿಲ್ಲ. ಅದೇ ರೀತಿಯಲ್ಲಿ ತಮ್ಮ ಮೇಲೆ ತಾವೇ ಮಣ್ಣು ಹಾಕಿ​ಕೊಂಡಿರುವ ವಿಶ್ವನಾಥ್‌ ಈಗ ಕುರುಬ ಸಮಾ​ಜದ ಮೇಲೆ, ಕಾಗಿ​ನೆಲೆ ಕನಕ ಗುರು ಪೀಠದ ಮೇಲೆ ಆಪಾದನೆ ಮಾಡು​ವುದು ​ವಿಶೋಭೆ ತರು​ವು​ದಿಲ್ಲ ಎಂದರು.

ಮಠಾಧಿಪತಿಗಳು ರಾಜಕೀಯ ವಿಚಾರಗಳನ್ನು ಮಾತನಾಡುವುದು ಸರಿಯಲ್ಲ ಎಂಬ ವಿಶ್ವನಾಥ್‌ ಟೀಕೆಗೆ ಉತ್ತರಿಸಿರುವ ಶ್ರೀಗಳು, ನನ್ನ ಸಮಾಜದ ನಾಯ​ಕ​ರಿಗೆ ಅನ್ಯಾ​ಯ​ವಾ​ದಾಗ ಧ್ವನಿ ಎತ್ತು​ತ್ತೇನೆ ಎಂದರು. ಬಿಜೆ​ಪಿ​ಯಲ್ಲಿ ಕೆ.ಎ​ಸ್‌.​ಈ​ಶ್ವ​ರ​ಪ್ಪಗೆ ತೊಂದ​ರೆ​ಯಾ​ದಾ​ಗಲೂ ಮಾತ​ನಾ​ಡಿ​ದ್ದೇನೆ ಎಂದು ಸಮರ್ಥಿಸಿಕೊಂಡರು.