ಇದಪ್ಪಾ ವರಸೆ ಅಂದ್ರೆ - ಯುಪಿಎ ಜಿಡಿಪಿ ಇಳಿಸಿದ ಎನ್‌ಡಿಎ!

ಈ ಮುನ್ನ 2004-05ನ್ನು ‘ಮೂಲ ವರ್ಷ’ವಾಗಿ ಜಿಡಿಪಿ ಬೆಳವಣಿಗೆ ದರವನ್ನು ಅಳೆಯಲಾಗಿತ್ತು. ಆದರೆ ಈ ಮೂಲ ವರ್ಷವನ್ನು 2011-12ಕ್ಕೆ ಬದಲಿಸಲು ಈಗ ಕೇಂದ್ರ ಸರ್ಕಾರ ನಿರ್ಧರಿಸಿದೆ.

ನವದೆಹಲಿ(ನ.29): ಹಿಂದಿನ ಯುಪಿಎ ಸರ್ಕಾರ 2010-11ರಲ್ಲಿ ಸಾಧಿಸಿದ್ದ ಎರಡಂಕಿಯ ಶೇ.10.3 ದರದ ಜಿಡಿಪಿ ಬೆಳವಣಿಗೆ ಸೇರಿದಂತೆ 2006ರಿಂದ 11ರವರೆಗಿನ 5 ವರ್ಷಗಳ ಜಿಡಿಪಿ ದರವನ್ನು ಎನ್‌ಡಿಎ ಸರ್ಕಾರ ಇಳಿಸಿದೆ. 2019ರ ಲೋಕಸಭೆ ಚುನಾವಣೆ ಮುನ್ನ ಮೋದಿ ಸರ್ಕಾರ ಕೈಗೊಂಡ ಈ ಕ್ರಮ ಯುಪಿಎ ಹಾಗೂ ಎನ್‌ಡಿಎ ನಡುವೆ ಹೊಸ ಕಾದಾಟಕ್ಕೆ ವೇದಿಕೆ ಮಾಡಿಕೊಟ್ಟಿದೆ.

ಈ ಮುನ್ನ 2004-05ನ್ನು ‘ಮೂಲ ವರ್ಷ’ವಾಗಿ ಜಿಡಿಪಿ ಬೆಳವಣಿಗೆ ದರವನ್ನು ಅಳೆಯಲಾಗಿತ್ತು. ಆದರೆ ಈ ಮೂಲ ವರ್ಷವನ್ನು 2011-12ಕ್ಕೆ ಬದಲಿಸಲು ಈಗ ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಹೀಗಾಗಿ 2010-11ರಲ್ಲಿ ಶೇ.10.3 ದರದ ಜಿಡಿಪಿ ಬೆಳವಣಿಗೆಯನ್ನು ಶೇ.8.5ಕ್ಕೆ ಪರಿಷ್ಕರಿಸಿ ಕೇಂದ್ರ ಸಾಂಖ್ಯಿಕ ಸಚಿವಾಲಯ ಬುಧವಾರ ಆದೇಶ ಹೊರಡಿಸಿದೆ. ಭಾರತವು ಆ ಒಂದೇ ವರ್ಷದಲ್ಲಿ ಎರಡಂಕಿ ಪ್ರಗತಿ ದರವನ್ನು ದಾಖಲಿಸಿತ್ತು. ಈಗ ದರ ಪರಿಷ್ಕರಣೆಯಿಂದ ಆ ಎರಡಂಕಿ ಬೆಳವಣಿಗೆಯ ಹಣೆಪಟ್ಟಿ ಕಳಚಿ ಬಿದ್ದಿದೆ.

2006ರಿಂದ 11ರವರೆಗಿನ 5 ವರ್ಷಗಳ ಪ್ರಗತಿ ದರವನ್ನು ಪರಿಷ್ಕರಿಸಲಾಗಿದ್ದು, ಭಾರಿ ಪ್ರಮಾಣದ ಕಡಿಮೆ ಬೆಳವಣಿಗೆಯನ್ನು ಆ ಸಾಲುಗಳಲ್ಲಿ ಭಾರತ ಕಂಡಿತು ಎಂದು ಬಿಂಬಿಸಲಾಗಿದೆ. ಈ ಬಗ್ಗೆ ಸುದ್ದಿಗಾರರು, ‘ಕೇವಲ ಮನಮೋಹನ ಸಿಂಗ್‌ ಅವಧಿಯ ಜಿಡಿಪಿ ಪರಿಷ್ಕರಿಸಲಾಗಿದೆಯಲ್ಲ’ ಎಂಬ ಪ್ರಶ್ನೆ ಕೇಳಿದಾಗ, ‘ಅರ್ಥವ್ಯವಸ್ಥೆಯ ನೈಜ ಚಿತ್ರಣ ಸಿಗಬೇಕು ಎಂಬ ಉದ್ದೇಶದಿಂದ ಮೂಲ ವರ್ಷವನ್ನು ಬದಲಿಸಿ ಈ ಪರಿಷ್ಕರಣೆ ಮಾಡಲಾಗಿದೆ. ರಾಜಕೀಯ ಉದ್ದೇಶವಿಲ್ಲ’ ಎಂದು ಸರ್ಕಾರದ ಮುಖ್ಯ ಸಾಂಖ್ಯಿಕ ಅಧಿಕಾರಿ ಪ್ರವೀಣ್‌ ಶ್ರೀವಾಸ್ತವ ಹೇಳಿದ್ದಾರೆ.

--

ವರ್ಷ    ಹಿಂದಿನ ದರ    ಪರಿಷ್ಕೃತ (%)

2005-06    9.3    7.9

2006-07    9.3    8.1

2007-08    9.8    7.7

2008-09    3.9    3.1

2009-10    8.5    7.9

2010-11    10.5    8.5