ಚುನಾವಣೆಗೂ ಮುನ್ನವೇ ಗೆದ್ದ ಮಾಜಿ ಮುಖ್ಯಮಂತ್ರಿ

ಈ ಬಾರಿ ಎನ್'ಡಿಪಿಪಿ ಮೈತ್ರಿ ಗೆದ್ದರೆ 4ನೇ ಬಾರಿ ಮುಖ್ಯಮಂತ್ರಿಯಾಗುತ್ತಾರೆ. ನಾಗಾಲ್ಯಾಂಡಿನ ಉತ್ತರದ ಅಂಗಮಿ-2 ಕ್ಷೇತ್ರದಲ್ಲಿ ಸ್ಪರ್ಧಿಸಿದ್ದರು

ಕೊಹಿಮಾ(ಫೆ.13): ನಾಗಲ್ಯಾಂಡ್ ಚುನಾವಣೆ ಫೆ.27ರಂದು ನಡೆಯಲಿದ್ದು, ಇಲ್ಲಿನ ಮಾಜಿ ಮುಖ್ಯಮಂತ್ರಿ ಹಾಗೂ ಮುಖ್ಯಮಂತ್ರಿ ಅಭ್ಯರ್ಥಿ ನೀಫಿಯು ರಿಯೊ ತಮ್ಮ ಕ್ಷೇತ್ರದಲ್ಲಿ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.

ಇವರು ತಮ್ಮ ಮೂಲ ಪಕ್ಷ ಎನ್'ಪಿ'ಎಫ್ ಬಿಟ್ಟು ಬಿಜೆಪಿ ಮೈತ್ರಿಯ ನೂತನ ಎನ್'ಡಿಪಿಪಿ ಪಕ್ಷವನ್ನು ಸೇರಿಕೊಂಡಿದ್ದಾರೆ. ಈ ಬಾರಿ ಎನ್'ಡಿಪಿಪಿ ಮೈತ್ರಿ ಗೆದ್ದರೆ 4ನೇ ಬಾರಿ ಮುಖ್ಯಮಂತ್ರಿಯಾಗುತ್ತಾರೆ. ನಾಗಾಲ್ಯಾಂಡಿನ ಉತ್ತರದ ಅಂಗಮಿ-2 ಕ್ಷೇತ್ರದಲ್ಲಿ ಸ್ಪರ್ಧಿಸಿದ್ದರು. ಪ್ರತಿಸ್ಪರ್ಧಿ ಎನ್'ಪಿ'ಎಫ್'ನ ಅಭ್ಯರ್ಥಿ ನಾಮಪತ್ರ ವಾಪಸ್ ಪಡೆದುಕೊಂಡ ಕಾರಣ ಗೆಲುವು ಸಾಧಿಸಿದ್ದಾರೆ.

ರಿಯೋ ಅವರು ತಮ್ಮ ರಾಜಕೀಯ ಜೀವನದಲ್ಲಿ ಮೊದಲ ಬಾರಿ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. ಈ ಮೊದಲು 1998ರಲ್ಲಿ ಕಾಂಗ್ರೆಸ್ ಅಭ್ಯರ್ಥಿಯೊಬ್ಬರು ಅವಿರೋಧವಾಗಿ ಗೆಲುವು ಸಾಧಿಸಿದ್ದರು. ಪ್ರಸ್ತುತ ಸಂಸದರಾಗಿದ್ದ ಇವರು ಶಾಸಕರಾದ ಕಾರಣ ಲೋಕಸಭೆಗೆ ರಾಜೀನಾಮೆ ನೀಡಬೇಕಾಗಿದೆ.