
ನವದೆಹಲಿ[ಅ.05]: ಪುಲ್ವಾಮಾ ದಾಳಿಗೆ ಪ್ರತೀಕಾರವಾಗಿ ಪಾಕಿಸ್ತಾನದ ಬಾಲಾಕೋಟ್ನಲ್ಲಿನ ಭಯೋತ್ಪಾದಕ ಶಿಬಿರಗಳನ್ನು ಫೆಬ್ರವರಿಯಲ್ಲಿ ನಾಮಾವಶೇಷ ಮಾಡಿದ್ದ ಭಾರತೀಯ ವಾಯುಪಡೆ, ಆ ಕುರಿತಾದ ಪ್ರಚಾರ (ಪ್ರೊಮೋಷನಲ್) ವಿಡಿಯೋವೊಂದನ್ನು ಬಿಡುಗಡೆ ಮಾಡಿದೆ. ಅ.8ರಂದು ವಾಯುಪಡೆಯ ಸಂಸ್ಥಾಪನಾ ದಿನಾಚರಣೆ ಇರುವ ಹಿನ್ನೆಲೆಯಲ್ಲಿ ಈ ವಿಡಿಯೋವನ್ನು ವಾಯುಪಡೆ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಆರ್.ಕೆ.ಎಸ್. ಭದೌರಿಯಾ ಅವರು ಲೋಕಾರ್ಪಣೆ ಮಾಡಿದ್ದಾರೆ.
ಯುದ್ಧ ವಿಮಾನಗಳು ಟೇಕಾಫ್ ಆಗುವುದು, ಕ್ಷಿಪಣಿ ಹಾರಿಸುವುದು ಹಾಗೂ ರಾಡಾರ್ಗಳು ನಿಗದಿತ ಗುರಿ ಮೇಲೆ ಲಕ್ಷ್ಯ ವಹಿಸುವುದು ಸೇರಿದಂತೆ ಹಲವು ರೋಚಕ ದೃಶ್ಯಗಳು ಈ ವಿಡಿಯೋದಲ್ಲಿವೆ. ಆದರೆ ಇದು ಫೆ.26ರಂದು ನಡೆದ ದಾಳಿಯ ನೈಜ ವಿಡಿಯೋ ಅಲ್ಲ ಎಂದು ಭದೌರಿಯಾ ಅವರು ಸ್ಪಷ್ಟಪಡಿಸಿದ್ದಾರೆ.
ಫೆ.14ರಂದು ಸಿಆರ್ಪಿಎಫ್ನ 40 ಯೋಧರನ್ನು ಬಲಿ ಪಡೆದ ಪುಲ್ವಾಮಾ ದಾಳಿಗೆ ಯಾವ ರೀತಿ ವಾಯುಪಡೆ ಪ್ರತೀಕಾರ ತೀರಿಸಿಕೊಂಡಿತು ಎಂಬ ಹಿನ್ನೆಲೆ ಧ್ವನಿಯೂ ಇರುವ ಈ ವಿಡಿಯೋದಲ್ಲಿ ವಾಯುಪಡೆ ಪೈಲಟ್ಗಳು ಸಭೆ ನಡೆಸುವ ದೃಶ್ಯವಿದೆ. ಮಿರಾಜ್-2000 ಯುದ್ಧ ವಿಮಾನಗಳತ್ತ ಪೈಲಟ್ಗಳು ಓಡುತ್ತಿರುವುದು ಹಾಗೂ ಆ ವಿಮಾನಗಳನ್ನು ಟೇಕಾಫ್ ಮಾಡುವ ಚಿತ್ರಣಗಳು ಇವೆ. ಬಾಲಾಕೋಟ್ ದಾಳಿಗೆ ಪ್ರತೀಕಾರ ತೀರಿಸಿಕೊಳ್ಳಲು ಭಾರತದ ಮೇಲೆ ಫೆ.27ರಂದು ದಂಡೆತ್ತಿ ಬಂದಿದ್ದ ಪಾಕಿಸ್ತಾನ ವಿಮಾನಗಳ ಜತೆ ಭಾರತೀಯ ವಿಮಾನಗಳು ಕಾದಾಟ ನಡೆಸಿದ ದೃಶ್ಯಗಳನ್ನೂ ಈ ವಿಡಿಯೋ ಒಳಗೊಂಡಿದೆ.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.