ಕಾಂಗ್ರೆಸ್'ನದ್ದಾಯಿತು ಈಗ ಬಿಜೆಪಿಯ ‘ಕಪ್ಪ’ ಡೈರಿ ಬಹಿರಂಗ!

ಡೈರಿಯಲ್ಲಿ ಹಣ ಪಡೆದ ಪಟ್ಟಿಯಲ್ಲಿ ನಮೂದಾಗಿರುವ ಇನಿಶಿಯಲ್​’ಗಳು ಬಿಜೆಪಿ ನಾಯಕರಿಗೂ ಹಾಗೂ ಕಡೆಯಲ್ಲಿರುವ ಸಹಿ ಬಿಜೆಪಿ ಎಂಎಲ್​’ಸಿ ಲೆಹರ್​ಸಿಂಗ್​ ಅವರಿಗೂ ಹೋಲಿಕೆ ಆಗುತ್ತೆ ಎಂದ ದಿನೇಶ್ ಗುಂಡುರಾವ್, ಈ ಡೈರಿ, ಗೋವಿಂದರಾಜು ಡೈರಿ ಹಾಗೂ ಸಹರಾ-ಬಿರ್ಲಾ ಡೈರಿ ಎಲ್ಲದರ ಬಗ್ಗೆಯೂ ಉನ್ನತ ಮಟ್ಟದ ತನಿಖೆ ಆಗಲಿ ಎಂದು ಆಗ್ರಹಿಸಿದ್ದಾರೆ.

ಬೆಂಗಳೂರು (ಫೆ.25): ಕಾಂಗ್ರೆಸ್​ ಹೈಕಮಾಂಡ್​’ಗೆ ಕಪ್ಪ ಸಲ್ಲಿಸಿದ ವಿವರಗಳುಳ್ಳ ಡೈರಿ ಬಹಿರಂಗಗೊಂಡ ಬೆನ್ನಲ್ಲೇ ಕಾಂಗ್ರೆಸ್​ ನಾಯಕರು ಫೇಸ್​’​ಬುಕ್​ನಲ್ಲಿ ಓಡಾಡುತ್ತಿದ್ದ ಡೈರಿಯ ಪ್ರತಿಯೊಂದನ್ನು ಬಿಡುಗಡೆ ಮಾಡಿದ್ದಾರೆ. ಅಷ್ಟೇ ಅಲ್ಲ, 2013ರಲ್ಲಿ ಲೆಹರ್​ಸಿಂಗ್ ಅಡ್ವಾಣಿಗೆ ಪತ್ರ ಬರೆದಿರುವುದನ್ನೂ ಬಿಡುಗಡೆ ಮಾಡಿ ಬಿಜೆಪಿ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. ಇದಕ್ಕೆ ಪ್ರತಿಯಾಗಿ ಬಿಜೆಪಿ ಪ್ರತ್ಯುತ್ತರ ನೀಡಿದೆ. ಈ ಎಲ್ಲ ವಿವರಗಳ ಸವಿವರ ವರದಿ ಇಲ್ಲಿದೆ.

ಕಳೆದ ಮೂರು ದಿನಗಳಿಂದ ಫೇಸ್’​ಬುಕ್ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದ ಡೈರಿಯ ಪ್ರತಿಯೊಂದನ್ನು ಕೆಪಿಸಿಸಿ ಕಾರ್ಯಾಧ್ಯಕ್ಷ ದಿನೇಶ್​ ಗುಂಡೂರಾವ್​ ಬಿಡುಗಡೆ ಮಾಡಿದ್ದಾರೆ. ಬೆಂಗಳೂರಿನ ವಿಧಾನಸೌಧದಲ್ಲಿಂದು ಸುದ್ದಿಗೋಷ್ಟಿ ನಡೆಸಿ ಈ ಡೈರಿ ಬಿಡುಗಡೆ ಮಾಡಿದ ಅವರು, ಬಿಜೆಪಿ ಶಾಸಕ ಲೆಹರ್​ ಸಿಂಗ್​ ನಿವಾಸದ ಮೇಲೆ ಐಟಿ ದಾಳಿ ನಡೆದಾಗ ಸಿಕ್ಕ ಡೈರಿ ಇದು ಎಂದೂ ಆರೋಪಿಸಿದ್ದಾರೆ.

ಡೈರಿಯಲ್ಲಿ ಹಣ ಪಡೆದ ಪಟ್ಟಿಯಲ್ಲಿ ನಮೂದಾಗಿರುವ ಇನಿಶಿಯಲ್​’ಗಳು ಬಿಜೆಪಿ ನಾಯಕರಿಗೂ ಹಾಗೂ ಕಡೆಯಲ್ಲಿರುವ ಸಹಿ ಬಿಜೆಪಿ ಎಂಎಲ್​’ಸಿ ಲೆಹರ್​ಸಿಂಗ್​ ಅವರಿಗೂ ಹೋಲಿಕೆ ಆಗುತ್ತೆ  ಎಂದ ಅವರು, ಈ ಡೈರಿ, ಗೋವಿಂದರಾಜು ಡೈರಿ ಹಾಗೂ ಸಹರಾ-ಬಿರ್ಲಾ ಡೈರಿ ಎಲ್ಲದರ ಬಗ್ಗೆಯೂ ಉನ್ನತ ಮಟ್ಟದ ತನಿಖೆ ಆಗಲಿ ಅಂತ ಆಗ್ರಹಿಸಿದ್ದಾರೆ.

ಅಷ್ಟೇ ಅಲ್ಲದೇ, ಇದೇ ವೇಳೆ 2013ರಲ್ಲಿ ಲೆಹರ್​ ಸಿಂಗ್ ಎಲ್​.ಕೆ. ಅಡ್ವಾಣಿಯವರಿಗೆ ಬರೆದ ಪತ್ರದ ಪ್ರತಿಯನ್ನು ಬಿಡುಗಡೆ ಮಾಡಿದ ದಿನೇಶ್​ಗುಂಡೂರಾವ್​, 2008ರಲ್ಲಿ ಯಡಿಯೂರಪ್ಪನವರ ನೇತೃತ್ವದಲ್ಲಿ ಪಕ್ಷ ಅಧಿಕಾರಕ್ಕೆ ಬರಬೇಕಿದ್ದರೆ ಹಣ ಎಲ್ಲಿಂದ ಬಂತು ಎಂದು ನೀವೇಕೆ ಕೇಳಲಿಲ್ಲ ಅಂತ ಅಡ್ವಾಣಿಯವರಿಗೆ ಲೆಹರ್ ಸಿಂಗ್ ಪ್ರಶ್ನಿಸಿದ್ದರು. ಅಡ್ವಾಣಿ ಯಾತ್ರೆಗಳಿಗೆ ಹಣ ಖರ್ಚು ಮಾಡಿರುವ ವಿಚಾರವನ್ನೂ ಆ ಪತ್ರದಲ್ಲಿ ಪ್ರಸ್ತಾಪಿಸಿರುವುದನ್ನು ದಿನೇಶ್​ ಗುಂಡೂರಾವ್​ ಹೇಳಿದರು.

ನಕಲಿ ದಾಖಲೆ: ಬಿಜೆಪಿ

ಆದರೆ, ಇವರು ಸುದ್ದಿಗೋಷ್ಟಿ ನಡೆಸುವ ಮುನ್ನವೇ ಅಂದರೆ ನಿನ್ನೆಯೇ ಬಿಜೆಪಿ ನಾಯಕರು ಸಾಮಾಜಿಕ ಜಾಲತಾಣದಲ್ಲಿ ಬಿಜೆಪಿ ನಾಯಕರ ಅವಹೇಳನ ಮಾಡುವ ಡೈರಿಯ ಪ್ರತಿ ಹಾಕಿರುವವರ ವಿರುದ್ಧ ಕ್ರಮಕೈಗೊಳ್ಳಬೇಕೆಂದು ಬೆಂಗಳೂರು ನಗರ ಪೊಲೀಸ್ ಆಯುಕ್ತರಿಗೆ ದೂರು ದಾಖಲಿಸಿದ್ದಾರೆ.

ಈ ವಿವರ ಬಿಡುಗಡೆ ಮಾಡಿದ ಬಿಜೆಪಿ ವಕ್ತಾರ ಅಶ್ವತ್ಥ್ ನಾರಾಯಣ, 1000 ಕೋಟಿ ರೂಪಾಯಿಗಳ ಕಪ್ಪ ಪ್ರಕರಣದ ದಾಖಲೆ ಬಿಡುಗಡೆ ನಂತರ ಹತಾಶಗೊಂಡಿರುವ ಕಾಂಗ್ರೆಸ್, ನಕಲಿ ದಾಖಲೆ ಬಿಡುಗಡೆ ಮಾಡಿದೆ ಅಂತ ಹೇಳಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಓಡಾಡುತ್ತಿದ್ದ ಈ ಡೈರಿಯ ಪ್ರತಿಯಲ್ಲಿ ಅಮಿತ್ ಷಾ, ನರೇಂದ್ರ ಮೋದಿ, ಮುರುಳಿಧರರಾವ್, ಯಡಿಯೂರಪ್ಪ ಅವರನ್ನು ಸೂಚಿಸುವಂತಹ ಇನಿಶಿಯಲ್​’ಗಳನ್ನು ಹಾಕಲಾಗಿದೆ. ಆದರೆ 2013ರಲ್ಲಿ ಅಮಿತ್ ಷಾ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರು ಆಗಿರಲಿಲ್ಲ, ಮೋದಿ ಪ್ರಧಾನಿಯೂ ಆಗಿರಲಿಲ್ಲ, ಯಡಿಯೂರಪ್ಪ ಹಾಗೂ ಲೆಹರ್​ಸಿಂಗ್ ಬಿಜೆಪಿಯಲ್ಲೇ ಇರಲಿಲ್ಲ. ಮುರುಳೀಧರರಾವ್​ ರಾಜ್ಯ ಬಿಜೆಪಿಯ ಉಸ್ತುವಾರಿಯೂ ಆಗಿರಲಿಲ್ಲ ಅಂತ ಅಶ್ವತ್ಥ್ ನಾರಾಯಣ ಸ್ಪಷ್ಟನೆ ನೀಡಿದ್ದಾರೆ. ಒಟ್ಟಾರೆ, ಡೈರಿ ಬಹಿರಂಗ ಪ್ರಕರಣ ಬಿಜೆಪಿ ಹಾಗೂ ಕಾಂಗ್ರೆಸ್ ನಡುವೆ ಪರಸ್ಪರ ರಾಜಕೀಯ ಆರೋಪ ಪ್ರತ್ಯಾರೋಪಕ್ಕೆ ಭಾರೀ ಗ್ರಾಸ ಒದಗಿಸಿದ್ದು, ಇದು ಇಷ್ಟಕ್ಕೇ ನಿಲ್ಲುವ ಲಕ್ಷಣಗಳಿಲ್ಲ.

ವರದಿ: ವೀರೇಂದ್ರ ಉಪ್ಪುಂದ., ಪೊಲಿಟಿಕಲ್ ಬ್ಯೂರೋ