ಸುಪ್ರೀಂಕೋರ್ಟ್, ಹೈಕೋರ್ಟ್ ನ್ಯಾಯಾಧೀಶರ ವೇತನ ಭಾರೀ ಏರಿಕೆ

ಸುಪ್ರೀಂ ಕೋರ್ಟ್ ಮುಖ್ಯ ನ್ಯಾಯಮೂರ್ತಿ ವೇತನವನ್ನು ಮಾಸಿಕ 2.80 ಲಕ್ಷ ರು.ಗೆ, ಸುಪ್ರೀಂ ಕೋರ್ಟ್ ಜಡ್ಜ್‌ಗಳ ವೇತನ 2.5 ಲಕ್ಷ ರು.ಗೆ, ಹೈಕೋರ್ಟ್‌ಗಳ ಮುಖ್ಯ ನ್ಯಾಯಾಧೀಶರ ಸಂಬಳ 2.5 ಲಕ್ಷ ರು.ಗೆ, ಹೈಕೋರ್ಟ್ ನ್ಯಾಯಾಧೀಶರ ವೇತನ 2.25 ಲಕ್ಷ ರು.ಗೆ ಹೆಚ್ಚಿಸಲು ಸಮ್ಮತಿಸಿದೆ.

ಹೊಸದಿಲ್ಲಿ (ನ.23):  7 ನೇ ವೇತನ ಆಯೋಗದ ವೇತನ ಶ್ರೇಣಿಯ ಅನುಗುಣವಾಗಿ ಸುಪ್ರೀಂಕೋರ್ಟ್ ಹಾಗೂ ಹೈಕೋರ್ಟ್ ನ್ಯಾಯಾಧೀಶರ ವೇತನವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸಲು ಕೇಂದ್ರ ಸಚಿವ ಸಂಪುಟ ಬುಧವಾರ ಅನುಮೋದನೆ ನೀಡಿದೆ. ಮುಂಬರುವ ಸಂಸತ್ತಿನ ಚಳಿಗಾಲದ ಅಧಿವೇಶನದಲ್ಲೇ ಮಸೂದೆ ಮಂಡಿಸಿ ವೇತನ ಹೆಚ್ಚಳ ಪ್ರಸ್ತಾವಕ್ಕೆ ಅನುಮೋದನೆ ಪಡೆದುಕೊಳ್ಳಲು ಉದ್ದೇಶಿಸಲಾಗಿದೆ. 2018ರಲ್ಲೇ ಈ ಸಂಬಂಧ ಅಂದಿನ ಮುಖ್ಯ ನ್ಯಾಯಾಧೀಶ ನ್ಯಾ.ಟಿ.ಎಸ್. ಠಾಕೂರ್ ಅವರು ಪ್ರಸ್ತಾವ ಕಳಿಸಿದ್ದರು. ಭಾರತದ ಮುಖ್ಯ ನ್ಯಾಯಾಧೀಶರ ತಿಂಗಳ ವೇತನವನ್ನು ಮಾಸಿಕ 3 ಲಕ್ಷ ರು.ಗೆ ಹೆಚ್ಚಿಸಬೇಕು ಎಂದು ಮೂವರು ನ್ಯಾಯಾಧೀಶರ ಸಮಿತಿ ಶಿಫಾರಸು ಮಾಡಿತ್ತು.

ಇದನ್ನು ಪರಿಶೀಲಿಸಿರುವ ಸರ್ಕಾರ, ಸುಪ್ರೀಂ ಕೋರ್ಟ್ ಮುಖ್ಯ ನ್ಯಾಯಮೂರ್ತಿ ವೇತನವನ್ನು ಮಾಸಿಕ 2.80 ಲಕ್ಷ ರು.ಗೆ, ಸುಪ್ರೀಂ ಕೋರ್ಟ್ ಜಡ್ಜ್‌ಗಳ ವೇತನ 2.5 ಲಕ್ಷ ರು.ಗೆ, ಹೈಕೋರ್ಟ್‌ಗಳ ಮುಖ್ಯ ನ್ಯಾಯಾಧೀಶರ ಸಂಬಳ 2.5 ಲಕ್ಷ ರು.ಗೆ, ಹೈಕೋರ್ಟ್ ನ್ಯಾಯಾಧೀಶರ ವೇತನ 2.25 ಲಕ್ಷ ರು.ಗೆ ಹೆಚ್ಚಿಸಲು ಸಮ್ಮತಿಸಿದೆ.

2016 ಜನವರಿ 1ರಿಂದ ಹೆಚ್ಚಳವು ಪೂರ್ವಾನ್ವಯವಾಗ ಲಿದ್ದು, ಹಿಂಬಾಕಿಯನ್ನು ಒಂದೇ ಕಂತಿನಲ್ಲಿ ಪಾವತಿಸಲಾ ಗುತ್ತದೆ. ವೇತನ ಹೆಚ್ಚಳವು ಸುಪ್ರೀಂ ಕೋರ್ಟ್‌ನ 31 ನ್ಯಾಯಾಧೀಶರು ಹಾಗೂ 1079 ಹೈಕೋರ್ಟ್ ನ್ಯಾಯಾಧೀಶರಿಗೆ ಅನುಕೂಲ ಕಲ್ಪಿಸಲಿದೆ. 2500 ನಿವೃತ್ತ ಸುಪ್ರೀಂ ಕೋರ್ಟ್ ಹಾಗೂ ಹೈಕೋರ್ಟ್ ಜಡ್ಜ್‌ಗಳಿಗೂ ಇದರಿಂದ ಅನುಕೂಲವಾಗಲಿದೆ. 7ನೇ ವೇತನ ಆಯೋಗದ ಶಿಫಾರಸಿನಂತೆ ಕೇಂದ್ರ ಸರ್ಕಾರದ ಅತ್ಯುಚ್ಚ ಅಧಿಕಾರಿಗಳ ಶ್ರೇಣಿಯಲ್ಲೇ ಈ ನ್ಯಾಯಾಧೀಶರು ಸಂಬಳ ಪಡೆಯಲಿದ್ದಾರೆ.

ಈ ಹಿಂದೆ ಎಷ್ಟಿತ್ತು?: ಈಗ ಹಾಲಿ ಸುಪ್ರೀಂ ಕೋರ್ಟ್'ನ್ಯಾಯಾಧೀಶರು ಹಾಗೂ ಹೈಕೋರ್ಟ್ ಮುಖ್ಯ ನ್ಯಾಯಾಧೀಶರು ಎಲ್ಲ ಕಡಿತಗಳನ್ನು ಹೊರತುಪಡಿಸಿ ಮಾಸಿಕ 1.5 ಲಕ್ಷ ರು. ವೇತನ ಪಡೆಯುತ್ತಿದ್ದಾರೆ. ಸುಪ್ರೀಂ ಕೋರ್ಟ್ ಮುಖ್ಯ ನ್ಯಾಯಾಧೀಶರಿಗೆ ಇದಕ್ಕಿಂತ ಸ್ವಲ್ಪ ಹೆಚ್ಚು ಹಾಗೂ ಹೈಕೋರ್ಟ್ ನ್ಯಾಯಾಧೀಶರಿಗೆ ಇದಕ್ಕಿಂತ ಕೊಂಚ ಕಡಿಮೆ ವೇತನವಿದೆ. ಜತೆಗೆ ಬಾಡಿಗೆ ರಹಿತ ವಾಸಕ್ಕೆ ಅವಕಾಶ ಕೊಡಲಾಗಿದೆ.