ತುಮ​ಕೂರು: ಸಿದ್ಧ​ಗಂಗಾ ಮಠದ ಹೆಸರಲ್ಲಿ 'ದಾಸೋಹ ನಿಧಿ' ವಸೂಲಿ

ಮಠದ ಅಂಧ ಶಾಲೆಗೆ ವಸ್ತು ಕೊಡಿಸಲು ಹಣ ಕೊಡಿ| ‘ದಾಸೋಹಕ್ಕೆ ನಿಧಿ ಅರ್ಪಿಸಿ’ ಹೀಗೆ ವಿವಿಧ ವಿಚಾರ ಮುಂದಿಟ್ಟುಕೊಂಡು ಕೆಲವರಿಂದ ಹಣ​-ಧವಸ ಧಾನ್ಯ ವಸೂಲಿ| ಸಾವಿರಾರು ರು. ಕೂಡ ನೀಡಿ ಮೋಸ ಹೋದ ಅನೇಕರು| 

ತುಮ​ಕೂರು(ಮಾ.12): ಕಳೆದ ಅನೇಕ ದಿನಗಳಿಂದ ಸಿದ್ಧಗಂಗಾ ಮಠದ ಹೆಸರು ಬಳಸಿ ಅನೇಕರು ಹಣ ವಸೂಲಿ ಮಾಡು​ತ್ತಿದ್ದು, ಇಂಥ ವ್ಯಕ್ತಿ​ಗಳ ವಿರುದ್ಧ ಹತ್ತಿರದ ಪೊಲೀಸ್‌ ಠಾಣೆಗೆ ಅಥವಾ ಶ್ರೀಮ​ಠಕ್ಕೆ ಮಾಹಿತಿ ನೀಡು​ವಂತೆ ಆಡ​ಳಿ​ತಾ​ಧಿ​ಕಾರಿ ಎಸ್‌.ವಿಶ್ವ​ನಾ​ಥಯ್ಯ ತಿಳಿ​ಸಿ​ದ್ದಾರೆ.

ನಾವು ಮಠದಿಂದ ಬಂದಿದ್ದು ನಿಮ್ಮ ಕಾಯಿಲೆಗಳಿಗೆ ಚಿಕಿತ್ಸೆ ಕೊಡುತ್ತೇವೆ, ಮಠದ ಅಂಧ ಶಾಲೆಗೆ ವಸ್ತುಗಳನ್ನು ಕೊಡಿಸಲು ಹಣ ಕೊಡಿ’ ‘ದಾಸೋಹಕ್ಕೆ ನಿಧಿ ಅರ್ಪಿಸಿ’ ಹೀಗೆ ವಿವಿಧ ವಿಚಾರ ಮುಂದಿಟ್ಟುಕೊಂಡು ಕೆಲವರು ಹಣ​-ಧವಸ ಧಾನ್ಯ ವಸೂಲಿ ಮಾಡುತ್ತಿರುವುದು ಗಮನಕ್ಕೆ ಬಂದಿದೆ. ಇದು ರಾಜ್ಯಾದ್ಯಂತ ನಡೆಯುತ್ತಿದ್ದು ಮಠ ಭಕ್ತರೇ ಈ ವಿಚಾರ ದೂರವಾಣಿ ಮೂಲಕ ನಮಗೆ ತಿಳಿಸಿದ್ದಾರೆ. ಅನೇಕರು ಸಾವಿರಾರು ರು. ಕೂಡ ನೀಡಿ ಮೋಸ ಹೋಗಿದ್ದಾರೆ.

ದಾನ ಸಂಗ್ರಹಕ್ಕೆ ಶ್ರೀಮಠದಿಂದ ಯಾವುದೇ ವ್ಯಕ್ತಿಗಳನ್ನು ನೇಮಿಸಿಲ್ಲ. ನಿಮ್ಮ ಧನ, ದವಸ, ಧಾನ್ಯ ಇನ್ನಿತರೆ ಯಾವುದೇ ದಾನಗಳಿದ್ದರೂ ಮಠದ ದೂರವಾಣಿ ಸಂಖ್ಯೆ 0816-2282211 ಗೆ ಕರೆಮಾಡಿ ಮಾಹಿತಿ ಪಡೆಯಿರಿ ಎಂದು ವಿಶ್ವ​ನಾ​ಥಯ್ಯ ಮನವಿ ಮಾಡಿದ್ದಾರೆ.