ಬಿಎಂಟಿಸಿ ಪ್ರಯಾಣಿಕರಿಗೆ ಗುಡ್ ನ್ಯೂಸ್..!

*  BMTC ಮಾಸಿಕ ಬಸ್ ಪಾಸ್ ವಿತರಣೆಯಲ್ಲಿ ಬದಲಾವಣೆ *  ಕ್ಯಾಲೆಂಡರ್ ತಿಂಗಳ ಬದಲಾಗಿ ಪಾಸ್ ಖರೀದಿಸಿದ ದಿನದಿಂದ 30 ದಿನಗಳವರೆಗೆ ಮಾನ್ಯ *  ಪಾಸ್ ಪಡೆಯಲು ಗುರುತಿನ ಚೀಟಿ ಬೇಕಾಗಿಲ್ಲ  

ಬೆಂಗಳೂರು(ಮೇ.27):  ಸಿಲಿಕಾನ್ ಸಿಟಿ ಮಂದಿಗೆ ಬಿಎಂಟಿಸಿ ಗುಡ್ ನ್ಯೂಸ್ ಕೊಟ್ಟಿದೆ. ಇನ್ಮುಂದೆ ನೀವು ಬಸ್ ಪಾಸ್ ಖರೀದಿ ಮಾಡಿದ ದಿನದಿಂದ 30 ದಿನಗಳವರೆಗೆ ಪಾಸ್ ಮಾನ್ಯವಾಗಲಿದೆ. ಹೌದು, ಇದುವರೆಗೂ ನೀವು ಬಿಎಂಟಿಸಿ ಬಸ್ ಪಾಸ್ ಕೊಂಡು ಕೊಂಡ್ರೆ ಕ್ಯಾಲೆಂಡರ್‌ಗೆ ಅನುಗುಣವಾಗಿ ಮಾತ್ರ ಪಾಸ್ ವಿತರಿಸಲಾಗ್ತಿತ್ತು. ಕ್ಯಾಲೆಂಡರ್ ಪ್ರಕಾರ ಪಾಸ್ ವಿತರಿಸಿದ್ರೆ ವಾರದ ನಂತರ ಪಾಸ್ ಪಡೆಯುತ್ತಿದ್ದ ಪ್ರಯಾಣಿಕರಿಗೆ ನಷ್ಟ ಆಗ್ತಿತ್ತು. ಆದ್ರೆ ಇನ್ಮುಂದೆ ಪಾಸ್ ಪಡೆದ ದಿನದಿಂದ ಮುಂದಿನ 30 ದಿನಗಳವರೆಗೆ ಅನ್ವಯವಾಗಲಿದ್ದು ಪ್ರಯಾಣಿಕರಿಗೂ ಖುಷಿ ತಂದಿದೆ. 

ಅಂದ ಹಾಗೆ ಈ ನಿಯಮ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ ವಿತರಿಸುವ ಸಾಮಾನ್ಯ ವಜ್ರ ಮತ್ತು ವಾಯು ವಜ್ರ ಬಸ್‌ಳಿಗೆ ಮಾತ್ರ ಅನ್ವಯವಾಗಲಿದೆ. ಜುಲೈನಿಂದ ಹೊಸ ನಿಯಮ ಜಾರಿಯಾಗಲಿದೆ.

ಪಾಸ್ ಪಡೆಯಲು ಗುರುತಿನ ಚೀಟಿ ಬೇಕಾಗಿಲ್ಲ

ಬಿಎಂಟಿಸಿಯಿಂದ ಬಸ್ ಪಾಸ್ ಪಡೆಯಲು ಗುರುತಿನ ಚೀಟಿ ಕಡ್ಡಾಯವಾಗಿತ್ತು. ಆದ್ರೆ ಇನ್ಮುಂದೆ ಮಾಸಿಕ ಬಸ್ ಪಾಸ್ ಪಡೆಯಲು ಬಿಎಂಟಿಸಿ ಗುರುತಿನ ಚೀಟಿ ಕಡ್ಡಾಯವಿಲ್ಲ. ಬದಲಾಗಿ ಆಧಾರ್ ಕಾರ್ಡ್, ವೋಟರ್ ಐಡಿ, ಪಾನ್ ಕಾರ್ಡ್, ಪಾಸ್ ಪೋರ್ಟ್, ಡಿಎಲ್ ಸೇರಿದಂತೆ ಸರ್ಕಾರದಿಂದ ವಿತರಿಸಿದ ಯಾವುದೇ ಗುರುತಿನ ಚೀಟಿ ಪ್ರಯಾಣಿಕರು ತೋರಿಸಿ ಪಾಸ್ ಬಳಕೆ ಮಾಡಬಹುದು.