ಕಾಫಿನಾಡಲ್ಲಿ ಬೈಕ್ ಕಳ್ಳರ 'ಎಕ್ಸ್ಚೇಂಜ್ ಆಫರ್': ಹಳೇ ಬೈಕ್ ಬಿಟ್ಟು ಹೊಸ ಗಾಡಿ ಹೊತ್ತೊಯ್ದ ಖದೀಮರು; ವಿಡಿಯೋ ವೈರಲ್!
ಸಾರಾಂಶ
ಚಿಕ್ಕಮಗಳೂರಿನಲ್ಲಿ, ಕಳ್ಳರು ವ್ಯಕ್ತಿಯೊಬ್ಬರ ಹೊಸ ಬೈಕನ್ನು ಕದ್ದು, ಬದಲಿಗೆ ತಮ್ಮ ಹಳೆಯ ಬೈಕನ್ನು ಸ್ಥಳದಲ್ಲಿಯೇ ಬಿಟ್ಟು ಹೋಗಿದ್ದಾರೆ. ಈ ವಿಚಿತ್ರ ‘ಎಕ್ಸ್ಚೇಂಜ್ ಆಫರ್’ ಕಳ್ಳತನದ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಬಸವನಹಳ್ಳಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ವರದಿ: ಆಲ್ದೂರು ಕಿರಣ್, ಏಷ್ಯಾನೆಟ್ ಸುವರ್ಣ ನ್ಯೂಸ್
ಚಿಕ್ಕಮಗಳೂರು (ಏ.03): ಸಾಮಾನ್ಯವಾಗಿ ಕಳ್ಳರು ಬೈಕ್ ಕಳ್ಳತನ ಮಾಡಿದರೆ ಸಾಕು ಎಂದು ಓಡಿಹೋಗುತ್ತಾರೆ. ಆದರೆ ಕಾಫಿನಾಡು ಚಿಕ್ಕಮಗಳೂರಿನಲ್ಲಿ ಕಿಲಾಡಿ ಕಳ್ಳರು ಒಂದು ಹೆಜ್ಜೆ ಮುಂದೆ ಹೋಗಿ ವಿಭಿನ್ನವಾಗಿ ಬೈಕ್ ಕಳ್ಳತನಕ್ಕೆ ಮುಂದಾಗಿದ್ದಾರೆ. ಬೈಕ್ ಕಳೆದುಕೊಂಡ ಮಾಲೀಕರು ಅಯ್ಯೋ ಬೈಕ್ ಹೋಯ್ತಲ್ಲಾ ಎಂದು ಅತಿಯಾಗಿ ಬೇಜಾರು ಮಾಡಿಕೊಳ್ಳಬಾರದು ಎಂಬ ‘ಉದಾರ ಮನಸ್ಸಿನಿಂದ’ ತಾವೇ ಒಂದು ಹಳೆಯ ಬೈಕನ್ನು ಅಲ್ಲೇ ಬಿಟ್ಟು, ಮಾಲೀಕರ ಹೊಸ ಬೈಕನ್ನು ಎಗರಿಸಿದ್ದಾರೆ!
ಘಟನೆಯ ವಿವರ:
ನಗರದ ಉಪ್ಪಳ್ಳಿ ನಿವಾಸಿಯಾದ ಇಸ್ಮಾಯಿಲ್ ಎಂಬುವವರು ಈ ‘ಎಕ್ಸ್ಚೇಂಜ್ ಆಫರ್’ ಕಳ್ಳತನಕ್ಕೆ ಬಲಿಯಾದ ವ್ಯಕ್ತಿ. ಇಸ್ಮಾಯಿಲ್ ಅವರು ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದು, ಕಂಪನಿಯಿಂದಲೇ ಅವರಿಗೆ ಒಂದು ಉತ್ತಮ ಸ್ಥಿತಿಯ ಬೈಕನ್ನು ನೀಡಲಾಗಿತ್ತು. ಪ್ರತಿದಿನದಂತೆ ಇಸ್ಮಾಯಿಲ್ ಅವರು ಕೆಲಸ ಮುಗಿಸಿ ರಾತ್ರಿ ತಮ್ಮ ಮನೆಯ ಮುಂದೆ ಬೈಕನ್ನು ಸುರಕ್ಷಿತವಾಗಿ ನಿಲ್ಲಿಸಿದ್ದರು. ಆದರೆ ತಡರಾತ್ರಿ ಬಂದ ಕಳ್ಳರು ಅಲ್ಲಿ ಸಿನಿಮೀಯ ಶೈಲಿಯಲ್ಲಿ ಕೈಚಳಕ ತೋರಿಸಿದ್ದಾರೆ.
ಕಳ್ಳರ ‘ಸಿನಿಮೀಯ’ ಕೈಚಳಕ:
ಈ ಖದೀಮರು ತಾವು ಬಂದಿದ್ದ ಅತ್ಯಂತ ಹಳೆಯ ಮತ್ತು ಶೇಷಾವಸ್ಥೆಯಲ್ಲಿದ್ದ ಬೈಕನ್ನು ಇಸ್ಮಾಯಿಲ್ ಅವರ ಮನೆಯ ಮುಂದೆಯೇ ಬಿಟ್ಟಿದ್ದಾರೆ. ಬದಲಾಗಿ ಇಸ್ಮಾಯಿಲ್ ಅವರ ಕಂಪನಿಯ ಹೊಸ ಬೈಕನ್ನು ಹಾರಿಸಿಕೊಂಡು ಹೋಗಿದ್ದಾರೆ. ಕಳ್ಳರ ಈ ವಿಚಿತ್ರ ತಂತ್ರ ಕಂಡು ಜನರಲ್ಲಿ ಕುತೂಹಲ ಮೂಡಿಸಿದೆಯಾದರೂ, ಮನೆ ಮುಂದೆ ಬೈಕ್ ನಿಲ್ಲಿಸುವವರಿಗೆ ಆತಂಕ ಶುರುವಾಗಿದೆ. ಬೈಕ್ ಕೊಟ್ಟು ಬೈಕ್ ಪಡೆಯುವ ಈ ‘ಬಾರ್ಟರ್ ಸಿಸ್ಟಮ್’ ಕಳ್ಳತನ ಸದ್ಯ ಚಿಕ್ಕಮಗಳೂರಿನಲ್ಲಿ ಹಾಟ್ ಟಾಪಿಕ್ ಆಗಿದೆ.
ಸಿಸಿಟಿವಿಯಲ್ಲಿ ಖದೀಮರ ಕೃತ್ಯ ಸೆರೆ:
ಈ ವಿಚಿತ್ರ ಕಳ್ಳತನದ ದೃಶ್ಯಗಳು ಸಮೀಪದ ಮನೆಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸ್ಪಷ್ಟವಾಗಿ ದಾಖಲಾಗಿವೆ. ವಿಡಿಯೋದಲ್ಲಿ ಕಳ್ಳರು ಯಾವುದೇ ಭಯವಿಲ್ಲದೆ, ಅತ್ಯಂತ ನಿಧಾನವಾಗಿ ಮತ್ತು ಸಮಾಧಾನವಾಗಿ ಪರಿಸ್ಥಿತಿಯನ್ನು ಗಮನಿಸಿ ಈ ಕೃತ್ಯ ಎಸಗಿರುವುದು ಗೋಚರಿಸುತ್ತದೆ. ಬೈಕ್ ಕಳ್ಳರು ಎಷ್ಟು ಸಮಯ ತೆಗೆದುಕೊಂಡು ಈ ಕಾರ್ಯಾಚರಣೆ ಮಾಡಿದ್ದಾರೆ ಎನ್ನುವುದೇ ಆಶ್ಚರ್ಯಕರವಾಗಿದೆ.
ಪೊಲೀಸ್ ತನಿಖೆ:
ಈ ಘಟನೆ ಕುರಿತು ಚಿಕ್ಕಮಗಳೂರಿನ ಬಸವನಹಳ್ಳಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಆಧರಿಸಿ, ಈ ‘ಎಕ್ಸ್ಚೇಂಜ್ ಆಫರ್’ ಕೊಟ್ಟು ಪರಾರಿಯಾಗಿರುವ ಖದೀಮರಿಗಾಗಿ ಜಾಲ ಬೀಸಿದ್ದಾರೆ. ಒಟ್ಟಿನಲ್ಲಿ ಕಳ್ಳರ ಈ ಹೊಸ ಐಡಿಯಾ ನೋಡಿ ಪೊಲೀಸರೇ ಬೆರಗಾಗಿದ್ದು, ಶೀಘ್ರವೇ ಆರೋಪಿಗಳನ್ನು ಪತ್ತೆ ಹಚ್ಚುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.