ಪೊಲೀಸ್‌ ಕುಟುಂಬದ ನಾಲ್ವರು ಸೇರಿ 9 ಮಂದಿಗೆ ಕೊರೋನಾ

ಚಿಕ್ಕಮಗಳೂರಿನಲ್ಲಿ ಪೊಲೀಸ್‌ ಕುಟುಂಬದ ನಾಲ್ವರು ಸೇರಿದಂತೆ ಒಂದೇ ದಿನ 9 ಕೋವಿಡ್ 19 ಪ್ರಕರಣಗಳು ಪತ್ತೆಯಾಗಿವೆ. ಈ ಕುರಿತಾದ ಒಂದು ರಿಪೋರ್ಟ್ ಇಲ್ಲಿದೆ ನೋಡಿ. 

ಚಿಕ್ಕಮಗಳೂರು(ಜು.06): ಆರಂಭದಲ್ಲಿ ಕೊರೋನಾ ಕೇಸ್‌ಗಳಿಲ್ಲದೇ ನಿರಾಂತಕವಾಗಿದ್ದ ಕಾಫಿನಾಡು ಚಿಕ್ಕಮಗಳೂರಿನ ಮೇಲೆ ಮದ್ದಿಲ್ಲದ ಮಹಾಮಾರಿ ತನ್ನ ಕೆಂಗಣ್ಣನ್ನು ಬೀರಿದೆ. 

ಹೌದು, ನಗರದ ಪಾಲಿಗೆ ಸಂಡೇ ಬ್ಯಾಡ್‌ ಡೇ ಆಗಿ ಪರಿಣಮಿಸಿದೆ. ಭಾನುವಾರ ಒಂದೇ ದಿನ ಜಿಲ್ಲೆಯಲ್ಲಿ 9 ಕೊರೋನಾ ಪಾಸಿಟಿವ್‌ ಪ್ರಕರಣಗಳು ಪತ್ತೆಯಾಗಿದ್ದು, ಈ ಪೈಕಿ 8 ಪ್ರಕರಣಗಳು ಚಿಕ್ಕಮಗಳೂರು ನಗರಕ್ಕೆ ಸೇರಿದ್ದಾಗಿವೆ. ಈ 8 ಪ್ರಕರಣಗಳ ಪೈಕಿ ನಗರದ ಪೊಲೀಸ್‌ ಕುಟುಂಬವೊಂದರಲ್ಲೇ 4 ಮಂದಿಗೆ ಕೊರೋನಾ ಇರುವುದು ದೃಢಪಟ್ಟಿದೆ.

ಇಲ್ಲಿನ ಶಂಕರಪುರ, ಗೌರಿಕಾಲುವೆ, ಬಾರ್‌ಲೈನ್‌ ರೋಡ್‌ ಹಾಗೂ ತಾಲೂಕಿನ ಕೆ.ಆರ್‌.ಪೇಟೆಯ ಹಲಸುಮನೆ ಗ್ರಾಮದಲ್ಲಿ ಭಾನುವಾರ ಈ ಸೋಂಕು ಪ್ರಕರಣಗಳು ಪತ್ತೆಯಾಗಿವೆ. ಈಗಾಗಲೇ ಪಾಸಿಟಿವ್‌ ಪ್ರಕರಣ ಬಂದಿರುವ ಪ್ರದೇಶಗಳನ್ನು ಕಂಟೈನ್ಮೆಂಟ್‌ ಝೋನ್‌ ಎಂದು ಗುರುತಿಸಿದ್ದು, ಈ ಎಲ್ಲ ಆತಂಕಗಳ ನಡುವೆಯೇ ಭಾನುವಾರ ಇಬ್ಬರು ಸೋಂಕಿತರು ಗುಣಮುಖರಾಗಿ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ.

ಪ್ರಸ್ತುತ ಚಿಕ್ಕಮಗಳೂರು ಜಿಲ್ಲೆಯಲ್ಲಿ 44 ಸಕ್ರಿಯ ಕೊರೋನಾ ಪ್ರಕರಣಗಳಿವೆ. ಬೇರೆ ಬೇರೆ ಜಿಲ್ಲೆಗಳಲ್ಲಿ ಕೊರೋನಾ ವಾರಿಯರ್ಸ್‌ಗಳು ಈ ಹೆಮ್ಮಾರಿಗೆ ತುತ್ತಾಗಿದ್ದನ್ನು ಕೇಳುತ್ತಿದ್ದ ಕಾಫಿನಾಡಿನ ಮಂದಿಗೆ ಇದೀಗ ನಗರ ಪೊಲೀಸ್ ಕುಟುಂಬಕ್ಕೆ ಸೋಂಕು ಅಪ್ಪಳಿಸಿರುವುದು ಮತ್ತಷ್ಟು ಆತಂಕಕ್ಕೆ ಈಡು ಮಾಡಿದೆ.